ToTajtsin iTlajtol kipiya kojtilistli

1. ¿Tleka kuajli tikmatstokej ika iTlajtol toTajtsin kipiya kojtilistli? (Xkita tlaixkopinajli kampa peua tlen tomachtijtokej).

AKIN tiktekichiuiliaj Jehová kuajli tikmatstokej ika “itlajtol Dios kipia nemilistli niman kipia poder” (Heb. 4:12). Yotikitakej ika tlen techijlia toTajtsin ipan Biblia kipiya kojtilistli tlen ueli kipatla tonemilis niman innemilis oksekimej. Ijkuak ok xnomachtiayaj, sekimej tlachtekiyaj, kikuiyaj drogas noso auilnemiyaj. Oksekimej melak kimixmatstoyaj noso kipiayaj tomin, san ika, yejon xkinyolpaktiaya (Ecl. 2:3-11). Sakin, ikojtilis Biblia ouel okichiuj ika akin xkipiayaj se tlamachialistli makipiyakan, niman aman kimatij kenon nemiskej. Tikmatij ika yotechyolpakti tikamapouaskej ipan Amatl Tekakistilijketl itech innemilis sekimej tlen nesi ipan tlamachtiltin “La Biblia les cambió la vida”. Niman maski tla tiTeixpantijkauan noso ka, yotikitakej ika tinochimej techpoloua matechpaleui Biblia niman ijkon tikchikaujtiaskej ken touikaj iuan Jehová.

2. ¿Tlenon okipatlakej sekimej ipan innemilis ipan kachtopa siglo ika ikojtilis iTlajtol toTajtsin?

² Tiuelij tikasikamatij tleka amanin miyekej tlaltikpakchanejkej miyek kipatlaj ipan innemilis ijkuak nomachtiaj iTlajtol toTajtsin. Yejuin noijki opanok inuan akin kichiuayaj ken Cristo ipan kachtopa siglo, akin kipiayaj intlamachialis ika yaskej iluikak (xpoua 1 Corintios 6:9-11). Apóstol Pablo okijto akinomej xkiseliskej iTekiuajyo toTajtsin, niman sakin okimijli ika sekimej intech yejuamej kichiuayaj “on ken on tlajtlakojli”. San ika, iTlajtol toTajtsin niman espíritu santo okinpaleui manopatlakan. Sekimej hasta ijkuak ikichiuayaj ken Cristo ueyi ken onopopolojkej niman okijtlakojkej ken nouikayaj iuan Jehová. Se neskayotl, Biblia tlajtoua itech se tlapejpenijli akin ononek kikixtiskej itech tlanechikojli. San ika, sakin okipatlak tlen nonekiya, niman oksejpa ouajnokuep tlanechikojli (1 Cor. 5:1-5, TNM; 2 Cor. 2:5-8). Techyolchikaua tikitaskej kenon miyekej tokniuan yonopatlakej ika itlapaleuilis iTlajtol toTajtsin.

3. ¿Tlenon tikitaskej ipan yejuin tlamachtijli?

³ Pampa Jehová yotechmakak iTlajtol tlen kipiya ueyi kojtilistli, tiknekij kuajli tiktekitiltiskej (2 Tim. 2:15). Ika yejon, ipan yejuin tlamachtijli tikitaskej tlenon uelis tikchiuaskej niman ijkon yexkan matechpaleui ikojtilis Biblia. Kachtopa, ipan tonemilis. Ika ome, ijkuak titenojnotsaj. Niman ika yeyi, ijkuak titemachtiaj ipan tlanechikojli. Tlen tikitaskej techpaleuis matikititikan totlasojtlalis niman totlasojkamachilis toTajtsin iluikakchane, akin techmachtia kuajli matinemikan (Is. 48:17).

IPAN TONEMILIS

4. a) ¿Tlenon kipiya tikchiuaskej tla tiknekij ika iTlajtol toTajtsin matechpaleui? b) ¿Tejua kenon tikchiuilia niman ijkon tikpoua Biblia?

⁴ Tla tiknekij ika iTlajtol toTajtsin matechpaleui, kipiya ika nochipa tikamapouaskej, niman tla tiuelij mamojmostla (Jos. 1:8). Yemelak ika timiyekej melak miyek tekitl tikpiyaj, san ika, xkipiya ika itlaj tijkauiliskej matechtelti ika tikamapouaskej, nion tlen kipiya ika tikchiuaskej (xpoua Efesios 5:15, 16). Uelis tikpouaskej Biblia ika kualkan, ika tonajli noso ika tlayoua. Tomachiliaj ijkon ken akin okijkuilo Biblia: “¡Melak niktlasojtla motlanauatil! Itech nitlanemilia nochi tonajli” (Sal. 119:97).

5, 6. a) ¿Tleka melak noneki matitlanemilikan itech tlen tikpouaj ipan Biblia? b) ¿Kenon noneki titlanemiliskej tla tiknekij matechpaleui? c) ¿Kenon yomitspaleui tejua ika tikamapoua iTlajtol toTajtsin niman itech titlanemilia?

⁵ Aman tej, xsan noneki tikamapouaskej Biblia. Noneki kuajli titlanemiliskej itech tlen ompa tikamapouaj (Sal. 1:1-3). San ijkon tiueliskej tikchiuaskej ipan tonemilis nochi tlamachilistli tlen tiknextiaj ipan iTlajtol toTajtsin. Tla tikpouaskej ipan amatl noso ipan se aparato, tlen melak tiknekij yejua ika maajsi ipan toyojlo.

⁶ ¿Kenon noneki titlanemiliskej tla tiknekij matechpaleui? Miyekej ijkuak kiamapoujtiuej Biblia, noteltijtiuej niman notlajtoltiaj itlaj ken yejuin: “¿Tlenon nechmachtia yejuin itech Jehová? ¿Nikchiujtika tlen nikan kijtoua ipan nonemilis? ¿Onka itlaj itech tlen ok uelis ninoyektlalis?”. Tla titlanemiliaj ipan iTlajtol toTajtsin niman tikchiuiliaj teoyotl Jehová, tiknekiskej tikchiuaskej tlen yejua techijlia. Kuakon kuajli topaleuiskej ika ikojtilis iTlajtol toTajtsin ipan tonemilis (2 Cor. 10:4, 5).

IJKUAK TITENOJNOTSAJ

7. ¿Kenon uelis kuajli tiktekitiltiskej iTlajtol toTajtsin ijkuak titenojnotsaj?

⁷ ¿Kenon uelis kuajli tiktekitiltiskej iTlajtol toTajtsin ijkuak titenojnotsaj? Se tlen uelis tikchiuaskej yejua tla miyekpa tiktekitiltiaj. Se tokniuj okijto: “Tla titenojnotstinemiskia techajchan iuan Jehová, ¿san nochipa tejua titlajtoskia, noso tijkauiliskia matlajto?”. ¿Tlenon okijtosnek? Ika, ijkuak yakaj tikpouiliaj Biblia, kentla tijkauilijtoskiaj Jehová makinojnotsa. Se tlaxelojli tlen kuajli yonotlapejpeni kipiya miyek kojtilistli xijkon ken tlen miyek tejuamej uelis tikijtoskej (1 Tes. 2:13). Ika yejon, matotlajtoltikan: “Ijkuak nitenojnotsa, ¿nikyejyekoua niktepouilis Biblia nochipa ijkuak niueli?”.

8. ¿Tleka xsan noneki matikinpouilikan Biblia akin tikinnojnotsaj?

⁸ Melauak, xsan noneki matikinpouilikan Biblia akin tikinnojnotsaj. Ijkon ken panouaya ipan kachtopa siglo, amanin miyekej xkasikamatij tlen kijtoua Biblia (Rom. 10:2). Yejua ika, xkipiya tiknemiliskej ika yokasikamat se tlaxelojli san pampa yotikonpouilijkej. Tiktetomiliaj noso miyekpa tikijtouaj tlajtoltin tlen ueyi kijtosnekij. Ijkon, iTlajtol toTajtsin uelis ajsis ipan intsontekon niman ipan inyojlo akin techkakij (xpoua Lucas 24:32).

9. Xkijto tlenon uelis noijtos niman ijkon akin techkakij makitlakaitakan Biblia ijkuak tikinpouiliskej se tlaxelojli.

⁹ Ijkuak tikpouaskej se tlaxelojli, kipiya ika tikchiuaskej ika akin techkakij makitlakaitakan Biblia. Se neskayotl, kachtopa ika tikpouaskej uelis tikijtoskej: “Matikitakan tlenon kijtoua toTajtsin itech yejuin”. Niman tla titlajtouaj iuan yakaj akin xonoskalti kampa tlaneltokaj itech Cristo, uelis tikijtoskej: “Xkita tlenon kijtoua yejuin tlajkuiloltin tlen miyekej melak kitlakaitaj”. Noso tla yakaj xitlaj kimatisneki itech tlaneltokijli, uelis tiktlajtoltiskej: “¿Kemantika yomitskakitijkaj yejuin tlajtoltin tlen yeuejkaui onoijkuilojkej?”. Pampa tlaltikpakchanejkej xsan noijki tlanemiliaj, nonekis tikpapatlaskej kenon tikinnojnotsaskej (1 Cor. 9:22, 23).

10. a) Xkijto tlenon ipan onochiuj se tokniuj. b) Xkijto kenon yotikitak tejua ika iTlajtol toTajtsin kipiya kojtilistli ijkuak titenojnotsa.

¹⁰ Miyekej tokniuan yokitakej ika kitekitiltiskej iTlajtol toTajtsin ijkuak tenojnotsaj melak ueli kinpaleuiya tlaltikpakchanejkej. Se neskayotl, se tokniuj kontlajpalouaya se tlakatl akin iueyi katka niman kipiaya miyek xiujtin ika kinpouaya torevistas. Niman se tonajli, xsan okikauili Amatl Tekakistilijketl tlen kemach yokiska, noijki okinemili kipouilis se tlaxelojli tlen nesiya ipan yejon revista. Okipouili 2 Corintios 1:3, 4, kampa kijtoua ika Jehová “yejua techiknelijtikaj niman nochipa techyoltlalijtikaj”, niman ika yejua noijki “techyoltlalia ipan nochi on tlin techpajsoloua”. Yejuin melak oajsik ipan iyojlo, niman okitlajtlanili tokniuj oksejpa makipouili yejon tlaxeloltin. Sakin, okijli ika yejua niman isiuauj melak kinpolouaya makinyolseuikan niman ika kinekiyaj okseki kixmatiskej itech Biblia. Ken tikitaj, tiktekitiltiskej iTlajtol toTajtsin ijkuak titenojnotsaj kichiua maajsi ipan inyojlo (Hech. 19:20).

IJKUAK TITEMACHTIAJ IPAN TLANECHIKOJLI

11. ¿Tlenon kipiya kichiuaskej tokniuan akin temachtiaj ipan tlanechikojli?

¹¹ Tinochimej techyolpaktia tiaskej tlanechikoltin niman uejueyimej tlanechikoltin. Niman tiauej pampa ijkon tikueyichiuaj Jehová. San ika, noijki tiauej pampa tlen ompa temachtiaj techpaleuiya. Kuakon, tokniuan akin temachtiaj ipan tlanechikojli kipiyaj se kualtsin tekitl, san ika noijki se ueyi tekitl (Sant. 3:1). Yejua ika, nochipa kipiya kitaskej ika nochi tlen temachtiaj makisa ipan Biblia. Tla tejua tikpiya yejuin tekitl, ¿tlenon uelis tikchiuas niman ijkon ikojtilis iTlajtol toTajtsin makinpaleui tokniuan akin mitskakij?

12. ¿Kenon akin temachtia ipan tlanechikojli uelis kimatis ika Biblia kiyekana itlamachtil?

¹² Kuajli xkita ika Biblia yejua tlen kiyekana motlamachtil (Juan 7:16). Xmotlajpiya ika ijkuak titlajtos itech tlen inpan onochiuj oksekimej, neskayomej noso ken tiktetomilia motlamachtil maka makichiuakan ika manoilkauakan tlaxeloltin tlen tikinpoua. Noijki, xkilnamiki ika xsan noijki kijtosneki tikpouas Biblia niman titemachtis ika Biblia. Kema, tla melak miyek tlaxeloltin tikinpoua, miyekej akin mitskakij nion xkimilnamikiskej. Ika yejon, kuajli xkintlapejpeni tlaxeloltin niman maka san totoka intech xpapanotiuj, xkinpoua, xkintoma, xtlali se neskayotl niman xkijto kenon tikchiuaskej (Neh. 8:8). Tla tlamachtijli yokijkuilo ikalpan toTajtsin, xmomachti tlen kijtoua, noijki tlaxeloltin tlen ompa uajlauej, niman sakin xkita kenon notlajtolnamikij. Sakin, xtlapejpeni tlaxeloltin tlen tikintekitiltis ijkuak titemachtis tlen noneki ipan yejon tlamachtijli (tiknextis okseki tlen mitspaleuis ipan tlamachtiltin 21, 22 niman 23 itech amoxtli Benefíciese de la Escuela del Ministerio Teocrático). San ika, tlen melak noneki tikchiuas, yejua tiktlajtlanilis Jehová mamitspaleui niman ijkon titemachtis kualtsin tlamachtiltin tlen uajlauej ipan iTlajtol (xpoua Esdras 7:10;a Proverbios 3:13, 14).b

13. a) ¿Kenon okipaleui se tokniuj ika ipan tlanechikojli kitekitiltiaj Biblia? b) ¿Kenon yomitspaleui tejua ika ipan tlanechikoltin notekitiltia Biblia?

¹³ Matikitakan kenon se tokniuj siuatl akin chanti Australia melak okipaleui ika ipan tlanechikojli kitekitiltiaj Biblia. Ijkuak konetl katka ipan onochiuj tlen melak xkuajli, maski ijkon okiseli iTlajtol toTajtsin niman onosentemakak itech Jehová. San ika, ok xueliya kineltokaya tla Jehová kitlasojtlaya. Se tonajli okikak ipan se tlanechikojli se tlaxelojli tlen oajsik ipan iyojlo. Ijkuak melak yotlanemili ipan yejon tlaxelojli niman yokinpoujka okseki, okasikamat ika toTajtsin kema kitlasojtlaya.c Niman tejua, ¿kemantika yotijkak itlaj ipan tlanechikojli noso ueyi tlanechikojli tlen melak oajsik ipan moyojlo? (Neh. 8:12).

14. ¿Kenon tikteititiskej ika melak tiktlasojkaitaj iTlajtol toTajtsin?

¹⁴ Kema, tinochimej melak tiktlasojkamatij ika toTajtsin Jehová akin techtlasojtla, otechmakak iTlajtol niman ijkon ken okijto yeuejkaui, yokichiuj nochipa maonia (1 Ped. 1:24, 25). Ipampa yejon, mojmostla matikpouakan, matikchiuakan tlen tomachtiaj niman matiktekitiltikan ika tikinpaleuiskej oksekimej. Ijkon tikteititiskej ika tiktlasojtlaj niman ika tikitaj ken itlaj melak patioj. Niman tlen melak ueyi kijtosneki, ijkon tikteititiskej ika tiktlasojtlaj akin otechmakak, Jehová.