¿Itikmatiya?

¿Tlenon yonomatkaj kichiuayaj judíos tlen okichiuj Jesús makijto ika xkuajli timotlajtolpaleuis ika itlaj?

IPAN Tlanauatijli tlen okimakakej Moisés, kemantika kuajli katka timotlajtolpaleuis ika itlaj. San ika, ipan itonaluan Jesús, miyekej judíos yonomatkaj notlajtolpaleuiskej ika itlaj itech nochi tlen kijtouayaj. Ijkon kinekiyaj kiteititiskej ika tlen kijtouayaj melauak katka. Jesús okpatipan okijto ika xkuajli katka yejuin tlen kichiuayaj tlen nion xtepaleui, niman okijto: “San xtlanankilikan ‘kemaj’ noso ‘ka’” (Mat. 5:33-37; 23:16-22).

Se amoxtli teológico kijtoua ika itech seki tlen uajnestiuj ipan Talmud uelis tikitaskej kenon judíos melak miyekpa notlajtolpaleuiayaj ika itlaj niman ijkon kiteititiskej ika melauak tlen yokijtokaj. Ipan Talmud kuajli ijkuiliujtok tlenon itech intlajtol kipiaya ika kichiuaskej niman katlejua ueliskiaj xkichiuaskej.

Xsan Jesús okijto ika xkuajli katka timomatis tikchiuas yejuin. Se neskayotl, ixtlamatki judío akin okijkuilo tlen yeuejkaui onochiuj itoka Flavio Josefo okiteneuj se secta judía akin kiyejyekouayaj xtlaj ika notlajtolpaleuiskej. Akin ompa nemiyaj, kineltokayaj ika timotlajtolpaleuis ika itlaj, melak xkuajli katka xijkon ken titekajkayauas. Yejuamej kimachiliayaj ika tla se tlaltikpakchane ika itlaj notlajtolpaleuiaya niman ijkon oksekimej makineltokakan, kuakon kijtosnekiya ika yejua se istlakatki. Se amoxtli Judío tlen noixmati ken Eclesiástico noso Sabiduría itech Jesús Ben Sirá noijki kijtoua itlaj ijkon: “Tlakatl akin miyekpa notlajtolpaleuiya ika itlaj, temi ika tlen xkuajli” (23:11). Kuakon tlen Jesús okijto ika xkuajli katka, yejua san tikauilmatis timotlajtolpaleuis ika itlaj. Tla nochipa tikijtouaj tlen melauak, xnonekis matotlajtolpaleuikan ika itlaj ijkuak tiknekiskej ika oksekimej matechneltokakan.