Tlen notlajtoltiaj akin kitaj revistas

¿Tlajtoua Salmo 144:12-15 itech ikalpan toTajtsin noso intech xchanejkej akin kichiuaj tlen xkuajli tlen noteneua ipan tlaxelojli pitentsin 11?

Ken noijkuiloua tlajtojli hebreo kipiya miyek ken uelis nasikamatis. Kuakon, aman ika itikmatij yejuin, matikitakan tlen techpaleuis kuajli matikasikamatikan:

1. Xtlanemili itech okseki tlen kijtoua salmo. Pampa notekitiltia tlajtojli “kuakon” ipan tlaxelojli 12, nasikamati ika tlateochiualistin tlen noteneuaj ipan tlaxeloltin 12 ontlami ipan 14 inpan nochiua akin yolmelaujkej, akin kitlajtlanij makinmakauakan niman makinmakixtikan intech akin xkuakualtin (tlaxelojli 11). Tlen nasikamati nikan noijki nesi ipan tlaxelojli 15, kampa okpa nesi tlajtojli “yolpaki” niman noijki tlajtoua itech yejon kalpan: “akin iTajtsin yejua Jehová”.

2. Yejuin tlen nasikamati notlajtolnamiki iuan okseki tlen onka ipan Biblia tlen kijtouaj ika Jehová kiteochiuas ikalpan. Yejuin salmo tlajtoua ika David melak kuajli kimatstoya ika sakin ika toTajtsin kimakixtiskia kalpan Israel itech itlauelikniuan, yejua kiteochiuaskia ika pakilistli niman kichiuaskia maka itlaj makipolo (Lev. 26:9, 10; Deut. 7:13; Sal. 128:1-6). Se neskayotl, Deuteronomio 28:4 kijtoua: “Tlateochiujtin yeskej mokoneuan niman itlakilyo motlal niman ikoneuan moyolkauan, ikoneuan mouakaxuan niman moborreguitos”. Niman ijkuak otekiuajtik Salomón, ikoneuj David, kalpan Israel onen ika yolseuilistli niman xtlaj kipolouaya ijkon ken xkeman panouaya. Niman xsan yejon, tlen onochiuj ijkuak otekiuajtik kineskayotia kenon yes ijkuak tlanauatis Mesías (1 Rey. 4:20, 21; Sal. 72:1-20).

Kuakon uelis tikijtoskej ika yejuin tlen nasikamati itech Salmo 144 kichiua ika nochi salmo melak kuajli makiteititi tlamachialistli tlen itekipanojkauan Jehová melak kinekij manochiua: ika toTajtsin kinpopolos nochimej akin xkuakualtin, niman ika akin yolmelaujkej kiseliskej yolseuilistli niman xtlaj kinpolos (Sal. 37:10, 11).