Yolseuilistli: ¿kenon uelis tikpiyaskej?

IPAN yejuin tlaltikpaktli kampa tentok ika tlaueltin, ouijtika tinemis ika yolseuilistli. Niman, maski tikpiyaj achijtsin yolseuilistli, kemantika noneki tokojtiliskej niman ijkon maka tikpoloskej. ¿Katlejua itlajtolyekanalisuan Biblia uelis techpaleuiskej matikpiyakan melauak yolseuilistli niman maka matikpolokan? ¿Niman kenon tikinpaleuiskej oksekimej noijki makipiyakan?

¿TLENON NONEKI NIMAN IJKON TIKPIYASKEJ MELAUAK YOLSEUILISTLI?

Tla tiknekij tikpiyaskej melauak yolseuilistli, noneki tikmachiliskej ika tinemij ika toyojlo. Noijki noneki matikinpiyakan akin kuajli imiuan touikaj. San ika, melak noneki kuajli touikaskej iuan toTajtsin pampa ijkon nochipa tikpiyaskej yolseuilistli. Matikitakan kenon uelis tikchiuaskej yejon.

Ijkuak tiktlakamatij itlanauatiluan Jehová niman itlajtolyekanalisuan tlen melajkej, tikteititiaj ika itech titlaneltokaj niman ika tiknekij iuan touikaskej ika yolseuilistli (Jer. 17:7, 8; Sant. 2:22, 23). Kuakon, toTajtsin technisiuiya niman techteochiua ika yolseuilistli ipan toyojlo. Isaías 32:17 kijtoua: “Ipampa melauak melajkayotl onias yolseuilistli, niman itlakilyo melauak melajkayotl yes ika nochipa kuajli timomachilis niman xtlaj mitsmojtis”. Kema ijkon, uelis tikpiyaskej melauak yolseuilistli tla tiktlakamatij Jehová ika nochi toyojlo (Is. 48:18, 19).

Noijki techmakaj tlen techpaleuiya niman ijkon nochipa matikpiyakan yolseuilistli, toTajtsin iluikakchane techmaka se ueyi tetlayokolijli: iespíritu santo (Hech. 9:31).

ESPÍRITU SANTO TECHPALEUIYA

Ijkuak Pablo otlajto itech “itlakilyo espíritu santo”, tlajtojli yolseuilistli ika yeyi okiteneuj (Gál. 5:22, 23, TNM). Ijkin tej, tla tiknekij tikpiyaskej melauak yolseuilistli, noneki tokauiliskej ika espíritu santo matechyekana. Matikitakan ome tlemach tlen uelis tikchiuaskej niman ijkon espíritu santo matechpaleui.

Kachtopa, noneki tomatiskej tikpouaskej iTlajtol toTajtsin (Sal. 1:2, 3). Ijkuak titlanemiliaj itech tlen kijtoua Biblia, espíritu santo techpaleuiya matikasikamatikan tlenon kinemilia Jehová itech miyek tlemach. Se neskayotl, tiuelij tlenon kichiua Jehová niman ijkon maonia yolseuilistli niman noijki tiuelij tleka yejuin melak kipatiojkaita. Tla tikchiuaj tlen tiuelij ipan iTlajtol, tikpiyaskej miyek yolseuilistli (Prov. 3:1, 2).

Ika ome, kipiya ika tikchiuiliskej teoyotl Jehová niman tiktlajtlaniliskej matechmaka iespíritu (Luc. 11:13). Akin kitlajtlaniliaj makinpaleui, Jehová kuajli kimijlia: “Dios mechmakas yolseuilistli on yejuan más ueyi de nochi kech se tlakatl uelis kajsikamatis. Niman in yolseuilistli kejeuas nemoyojlo niman nemotlamachilis pampa itechkopa Cristo Jesús nennemij san sekan iuan” (Filip. 4:6, 7). Tla miyekpa tiktlajtlaniliaj iespíritu, Jehová techtemiltis ika yolseuilistli tlen tikmachiliskej ipan toyojlo, tlen san kinmaka akin kuajli imiuan nouikaj (Rom. 15:13).

Biblia miyekej yokinpaleui makipatlakan innemilis niman makipiyakan iuan Jehová yolseuilistli tlen xkeman tlamis, sa no yejuamej makipiyakan yolseuilistli niman imiuan akin kinyeualouaj. Matikitakan seki neskayomej.

KENON OKIPIXKEJ YOLSEUILISTLI TLEN XTLAMI

Ipan yejuin tonaltin, ipan tlanechikojli tlen kichiua ken Cristo, nemij akin yeuejkaui nimantsin kualaniyaj, san ika, aman tetlakaitaj, teijyouiyaj, yolseujkej niman teikneliaja (Prov. 29:22). Yejuin tlen inpan onochiuj omemej tokniuan akin okinpaleuijkej maka nimantsin makualanikan niman mayolseujkej imiuan oksekimej.

David kijtouaya tlen xkuajli pampa nimantsin kualaniya. Achto ika nosentemakas itech toTajtsin, yonomatka tetejteneuas niman xkintlakaitaya inchanejkauan. Se tonajli, okimat ika nonekiya nopatlas. ¿Tlenon okipaleui manochiua yolseujki? Yejua kijtoua: “Opeuj nikintlakamati tlajtolyekanalistin tlen onka ipan Biblia. Niman melak onechpaleui pampa nochanejkauan niman nejua opeuj melak totlakaitaj”.

Ken onoskalti Rachel okijtlako ken tlanemilia niman tlen kichiua. Yejua kijtoua: “Ok melak ninoxixikoua iuan yejon tlen xkuajli nikmachilia pampa nochanejkauan nochi tonajli san nokualanijtoyaj”. ¿Tlenon yokipaleui manochiua yolseujki? Yejua technankilia: “Nochipa niktlajtlanilia Jehová manechpaleui”.

David niman Rachel san ome neskayomej itech kenon melak kuajli tonkisaskej tla tikintlakamatij itlajtolyekanalisuan Biblia niman tiktejtemouaj itlapaleuilis espíritu santo. Maski tinemij ipan yejuin tlaltikpaktli kampa onka tlauejli, kuajli nesi ika uelis tikpiyaskej yolseuilistli niman titepaleuiskej ika ipan tlanechikojli niman tochan noijki maonia. Aman tej, Jehová techtlajtlanilia: “Xchiuakan kanika hasta kampa nenueliskej ken ijki nemoyolika nennemiskej iuan nochi tlakatl” (Rom. 12:18). ¿Kenon uelis tikchiuaskej yejon? ¿Niman tlen tlateochiualistin tikseliaj ijkuak tokojtiliaj tiyolseujkej yeskej?

NOCHIPA MATIKTEJTEMOKAN YOLSEUILISTLI

Ijkuak titenojnotsaj, tikinyolchikauaj tlaltikpakchanejkej makikakikan tlen titemachtiaj itech iTekiuajyo toTajtsin (Is. 9:6, 7; Mat. 24:14, TNM). Niman techyolpaktia ika miyekej kiseliaj yejuin tlajtojli itech yolseuilistli. Yejuin kichiua maka sa melak makinkuaajmana noso makinkualani nochi tlen panoua inyeualiujyan. Aman, kipiyaj melauak tlamachialistli tlen nochiuas tlayekapan, niman kitlakamatij yejuin tlanauatijli: “Xtejtemo yolseuilistli niman xyejyeko xpiya” (Sal. 34:14).

Yemelak, xnochimej kuajli technankiliaj ijkuak tikinnojnotsaj (Juan 3:19). Maski ijkon, iespíritu toTajtsin techpaleuiya matikinnotsakan ika yolseuilistli niman tetlakaitalistli. Ijkon, tiktlakamatij tlen Jesús otechijli matikchiuakan ijkuak tontenojnotsaskej: “Ijkuak nenkalakiskej ipan se kajli, ijkin xtetlajpalokan: ‘Xpiakan yolseuilistli’. Tla on tlakamej yejuan chantij ipan on kajli kuajli mechseliskej, Dios kintiochiuas ikan yolseuilistli. Pero tla yejuamej xkuajli mechseliskej, Dios xkinmakas yolseuilistli” (Mat. 10:11-13). Tla tiktlakamatij tlen Jesús otechnauati, kichiuas matokuepakan itech yejon kajli ika yolseuilistli niman kanaj tlayekapan uelis techkakiskej.

Akin tikchiuaj ken Cristo, noijki titepaleuiyaj maonia yolseuilistli ijkuak tikintlakaitaj tekiuajkej, maski akin xkuelitaj ika titenojnotsaj. Matikitakan se neskayotl. Tekiuajkej itech se país tlen onka África tetlauelitayaj niman xtechkauiliayaj makinchijchiuakan Kaltin kampa Nosentlaliaj. Pampa nonekiya noyektlalis yejon tlauejli, onotitlan se tokniuj akin ompa otlapaleuijka ken misionero makitomiliti se tlanauatijketl itech yejon país akin nemiya Londres (Inglaterra) ika nochi tikchiuaj ika yolseuilistli. ¿Tlenon opanok?

Tokniuj techijlia: “Ijkuak onajsik onikitak kenon itlaken akin ompa teseliaya niman onikmat ika ualeuaya itech se tribu kampa tlajtouayaj se tlajtojli tlen oniuelka. Kuakon, oniktlajpalo ika itlajtol. Omojkatlachix niman onechtlajtolti tleka oniajka. Ika tetlakaitalistli, onikijli ika niknekiya nitlajtos iuan tlanauatijketl. Yejua okonots ipan teléfono, tlanauatijketl ouajkis niman onechtlajpalo ika itlajtol. Sakin, kuajli okikak tlen oniktomili itech tlen kichiuaj iteixpantijkauan Jehová”.

Pampa tokniuj okinots ika miyek tetlakaitalistli, tlanauatijketl okipatlak tlen xkuajli kinemiliaya itech tokniuan. Sakin, tekiuajkej itech yejon país opeuj tekauilia manochijchiuakan Kaltin kampa Nosentlaliaj iTeixpantijkauan Jehová. ¡Tokniuan melak oyolpakej! Kema, tikpiyaskej miyek tlateochiualistin tla tikintlakaitaj oksekimej niman kichiuas matikpiyakan yolseuilistli.

MATIKPIYAKAN YOLSEUILISTLI TLEN XTLAMIS

Aman, itekipanojkauan toTajtsin tichantij kentla ipan se xochitlalpan kampa onka yolseuilistli. Niman titepaleuiskej maonia tla tokojtiliaj tikiskaltiskej yejuin itlakilyo espíritu. San ika, tlen melak ueyi kijtosneki, yejua ika Jehová techmakas itlateochiualis niman nochipa tikpiyaskej miyek yolseuilistli ipan yenkuik tlaltikpaktli (2 Ped. 3:13, 14).