¿Kenon itoka toTajtsin?
Ijkuak tikneki yakaj tikixmatis, kachtopa kanaj tiktlajtoltia: “¿Kenon motoka?”. Tla ijkon tiktlajtoltiskia toTajtsin, ¿tlenon mitsijliskia?
“Nejua niJehová. Yejuin notokayo” (Isaías 42:8).
¿Itikmatiya ika ijkon itoka? Kanaj ka, pampa miyekej akin kitlajtolkuepaj Biblia xsajnoye kitekitiltiaj, niman sekimej nion xkitekitiltiaj. Miyekpa, yejuamej kipatlaj yejuin tokayotl niman kitlaliaj: toTEKO. San ika, ipan tlajkuiloltin tlen kachtopa onoijkuilojkej itech Biblia, itoka toTajtsin uajnestiuj ipantsin 7,000. Yejuin tokayotl noijkuiloua ika naui letras hebreas: YHWH noso JHVH. Ika náhuatl tikijtouaj “Jehová”.
Tlajkuilojli itech Salmo tlen ononexti nisiuj mar Muerto (itech xiuitl 30 hasta 50, HEBREO)
Tlen Tyndale okitlajtolkuep (1530, INGLÉS)
Versión Reina-Valera (1602, ESPAÑOL)
Union Version (1919, CHINO)
Itoka toTajtsin uajnestiuj ipan miyek amatlajkuiloltin ika Hebreo niman ipan miyek amoxtin tlen yonotlajtolkuepkej.
¿TLEKA NONEKI MANOTEKITILTI ITOKA TOTAJTSIN?
ToTajtsin kineki manotekitilti itoka. Xakaj okitlalili itoka; sa no yejua onotokayoti. Jehová okijto: “In yejua nochipa katka notokatsin niman nochipa yes notokatsin. Ika in notokatsin nechnotsaskej para nochipa nochimej tlakamej yejuan tlakatitiaskej” (Éxodo 3:15). Ipan Biblia, itoka toTajtsin más miyekpa uajnestiuj xijkon ken tlajtoltin tlen ika kinotsaj, ken akin nochi ueli kichiua, toTaj, toTeko noso toTajtsin. Niman más miyekpa uajnestiuj xijkon ken intokayo Abrahán, Moisés, David noso Jesús. Niman xsan yejon, Jehová kineki ika matikixmatikan itoka. Biblia kijtoua: “Makimatikan tlaltikpakchanejkej ika tejua, akin motoka Jehová, san tejua tiUeyixtika ipan nochi tlaltikpaktli” (Salmo 83:18, TNM).
Jesús kineki manotekitilti itoka toTajtsin. Ipan teoyotl tlen miyekej kixmatij ken padrenuestro, Jesús okimititi inomachtijkauan ika nonekiya kichiuiliskej teoyotl toTajtsin ika yejuin tlajtoltin: “Machipaui motoka” (Mateo 6:9, TNM). Niman Jesús okijli toTajtsin ipan se teoyotl: “NoTajtsin, xchiua para ma mitsueyilikan” (Juan 12:28). Ipan nochi inemilis, Jesús onokojtili kiueyilis itoka toTajtsin, ika yejon, yejua ouel okijli: “Yonikinmachistij akin tejua, niman sanken moka nitemachistis” (Juan 17:26).
Akin kixmatstokej toTajtsin kimatij ika noneki manotekitilti itoka. Itekipanojkauan toTajtsin akin yeuejkaui onenkej kasikamatiyaj ika itoka toTajtsin melak ueyi kijtosnekiya, pampa itoka kinmakixtiaya niman kichiuaya manemikan ika inyojlo. “Itokayo Jehová se torre tlen kojtik. Itech notlaloua akin yolmelaujki, niman kiselia tlapaleuilistli” (Proverbios 18:10, TNM). “Nochimej akin kinotsaskej Jehová ika itokayo makisaskej” (Joel 2:32). Biblia kijtoua ika itoka toTajtsin kichiuaskia ika miyekej makimatikan akinomej itekipanojkauan toTajtsin. “Pampa nochimej kalpamej, yejuamej, kistinemiskej inseselti ika itokayo intajtsin; san ika, tejuamej tikistinemiskej nochipa ika itokayo toTajtsin Jehová, xkeman tijkauaskej” (Miqueas 4:5; Hechos 15:14).
¿TLENON KITEITITIA ITOKA TOTAJTSIN?
Itoka techititia kenon yemelak toTajtsin. Miyekej ixtlamatkej kijtouaj ika tokayotl Jehová kijtosneki: “Yejua Kichiua Manochiua”. Ijkuak Jehová otlajto iuan Moisés, yejua okiteititi tlenon kijtosneki itoka. Yejua okijto: “Nejua yejuan ninejua” (Éxodo 3:14). Tla kuajli tikitaj ken onoijkuilo ika hebreo, yejuin uelis notlajtolkuepas ken: “Nejua ninochiuas tlen niktlapejpenis ninochiuas”. Kuakon, itoka toTajtsin xsan kiteititia ika yejua Tlachijchiujketl, itoka noijki kiteititia ika yejua nochiua tlen yejua kineki niman ijkon kichiuas tlen yokijto. Niman itoka noijki kiteititia ika yejua kichiua ika nochi tlen yokichijchiuj manochiua tlen nonekis niman ijkon manochiua tlen yokijto. Maski toTajtsin kinotsaj ika miyek tlajtoltin tlen kiteititiaj ika yejua ueyixtika niman ika kipiya kojtilistli, san itoka, Jehová, kiteititia kenon yemelak yejua niman nochi tlen yejua uelis nochiuas.
Itoka toTajtsin techititia ika yejua najmana topampa. Tlen kijtosneki itoka toTajtsin kuajli kiteititia ika yejua kitlasojtla nochi tlen yokichijchiuj, kema, yejua techtlasojtla. Pampa yejua techijlia kenon itoka, kiteititia ika kineki matikixmatikan. Yejua akin kachtopa otechijli kenon itoka, achto ika tejuamej tiknemiliskiaj titetlajtoltiskej. Kuajli tikitaj ika toTajtsin xkineki matiknemilikan ika yejua uejka nemi, yejua kineki matikmatikan ika yemelak nemi niman ika uelis tiknisiuiskej (Salmo 73:28).
Ijkuak tijkuij itoka toTajtsin tikititiaj ika tiknekij iuan touikaskej. Xkonemili ika tejua tikneki yakaj iuan timouikas niman tikijlia ika mamitsnotsa ika motoka. ¿Kenon timomachiliskia tla yejua xkinekiskia kitekitiltis motoka? Kanaj xtikneltokaskia tla yejua yemelak kineki mouan nouikas. Noijki ijkon panoua iuan Jehová. Yejua yotechijli kenon itoka niman kineki matijkuikan. Ijkuak ijkon tikchiuaj, tikititiaj ika tiknekij iuan touikaskej. Yejua kuajli kimati akinomej tlanemiliaj itech itoka (Malaquías 3:16).
Tla tiknekij tikixmatiskej toTajtsin, kachtopa noneki tikmatiskej kenon itoka. San ika, xsan yejon noneki. Noneki kuajli tikixmatiskej niman tikmatiskej kenon yejua.
¿KENON ITOKA TOTAJTSIN? ToTajtsin itoka Jehová. Itoka techititia ika yejua se toTajtsin akin uelis kichiuas nochi tlen kijtoua.