TLAMACHTIJLI 12
Matajmanakan ipampa tlen kimachiliaj oksekimej
“Nenmochimej [...] xmajmanakan ijkuak se itlaj kajmana” (1 PED. 3:8).
TLAKUIKAJLI 90 Xmoyolchikauakan
TLEN TIKITASKEJa
1. Ken kijtoua 1 Pedro 3:8, ¿tleka kuajli tomachiliaj ijkuak tinemij imiuan akin najmanaj ipampa tlen tikmachiliaj niman ken tinemij?
TINOCHIMEJ kuajli tomachiliaj ijkuak tinemij imiuan akin najmanaj ipampa tlen tikmachiliaj niman ken tinemij. Yejuamej nokojtiliaj kasikamatiskej tlen tiknemiliaj niman tlen tikmachiliaj. Techpaleuiyaj ijkuak kitaj tlen techpoloua, kemantika hasta maski xitikintlajtlaniliaj. Tikintlasojkaitaj akin najmanaj intech oksekimej noso teasikamatij,b ken kijtoua 1 Pedro 3:8 (xpoua).
2. ¿Tleka noneki tokojtiliskej titeasikamatiskej?
2 Akin tikchiuaj ken Cristo tiknekij titeasikamatiskej. San ika, noijki tikmatstokej ika kemantika noneki tokojtiliskej tikchiuaskej yejon. ¿Tleka? Pampa titlajtlakolejkej niman san titlanemiliaj totechkopa (Rom. 3:23). Sekimej kanaj ouijtika kitaj ipampa ken onoskaltijkej niman tlen inpan onochiuj. Noijki, techijtlakoua tlen oksekimej kichiuaj, pampa ipan yejuin tonaltin miyekej san yejuamej notlasojtlaj, xakaj najmana itech tlen oksekimej inpan nochiua (2 Tim. 3:1, 2). ¿Kenon uelis tikchiuaskej ika maka matechijtlako yejuin niman tajmanaskej inpampa oksekimej?
3. a) ¿Tlenon techpaleuis más matiteasikamatikan? b) ¿Tlenon tikitaskej ipan yejuin tlamachtijli?
3 Tikyejyekoskej tikchiuaskej ken Jehová niman Jesús yejon tlen techpaleuis más matiteasikamatikan. Jehová techititia kenon titeasikamatiskej pampa yejua tlasojtlalistli (1 Juan 4:8). Jesús kuajli okiteititi kenon katka iTajtsin (Juan 14:9). Ijkuak onen ipan tlaltikpaktli, okiteititi kenon tlaltikpakchanejkej uelij teasikamatij. Ipan yejuin tlamachtijli, kachtopa tikitaskej kenon Jehová niman Jesús najmanaj ipampa tlen kimachiliaj oksekimej niman sakin tikitaskej kenon uelis tikchiuaskej ken yejuamej.
JEHOVÁ NAJMANA INTECH OKSEKIMEJ
4. ¿Kenon nesi ipan Isaías 63:7-9 ika Jehová kajmana tlen kimachiliaj itekipanojkauan?
4 Biblia kijtoua ika Jehová kajmana tlen kimachiliaj itekipanojkauan. Matikitakan kenon onomachili ijkuak israelitas otlajyouijkej. ITlajtol toTajtsin kijtoua: “Ipan nochi intlajyouilis yejua noijki otlajyoui” (xpoua Isaías 63:7-9, TNM).c Sakin, Jehová okijto ika ijkuak kitlajyouiltiayaj ikalpan kentla yejua kitlajyouiltijtoskiaj. Okimijli itekipanojkauan: “San akinon mechkitskia nejua noixtololo kikitskia” (Zac. 2:8). ¡Kualtsin okineskayoti Jehová kenon najmana ipampa ikalpan!
Jehová okimikneli israelitas niman okinmakixti itech Egipto. (Xkita párrafo 5).
5. Xkijto tlenon yokichiuj Jehová niman ijkon yokinpaleui itekipanojkauan ijkuak tlajyouiyaj.
5 Ijkuak itekipanojkauan toTajtsin tlajyouiyaj, yejua xsan kimiknelia, noijki kinpaleuiya. Matitlanemilikan itech yejuin. Ijkuak israelitas tlakeualtin katkaj Egipto, Jehová okimachili tlen yejuamej kinkokouaya niman yejon okichiuj makinmakixti. Okijli Moisés: “Nikitstikaj kenijki tlajyouiyaj nokoneuan [...]. Nikaktikaj ken chokaj [...] pampa on tlakamej yejuan tlatekitiltiaj chikauak sanoyej kinmailiaj. Nikinmiknelia pampa sanoyej tlajyouiyaj. Yejua ika, onitemoko para nikinmanauis intech on egipcios” (Éx. 3:7, 8). Pampa okimikneli, okinmakixti. Sakin, ijkuak nemiyaj ipan tlajli tlen okinmakaka, opeujkej kimixnamikij. ¿Tlenon okichiuj toTajtsin? Biblia kijtoua: “Ijkuak toTEKO kintaya ken kintlajyouiltiayaj kinmikneliaya”. Niman pampa okimasikamat, oksejpa okinpaleui, niman okintitlan jueces makinmakixtitij (Juec. 2:16, 18).
6. Xkijto kenon Jehová okiteititi ika kajmanaya tlen kimachiliaya itech akin onopopolojka.
6 Jehová kajmana tlen kimachiliaj itekipanojkauan hasta ijkuak nopopolouaj. Matikitakan tlen ipan onochiuj Jonás. ToTajtsin okititlan Nínive makiteijliti tlen inpan panoskia akin ompa chantij. San ika, pampa onoyolkuepkej, okintlapopolui. Yejon melak okitlauelmikti Jonás pampa xonochiuj tlen yokijtoka. Jehová okijyoui iteotlajtokauj niman okipaleui makipatla tlen kinemiliaya (Jon. 3:10–4:11). Sakin, Jonás okasikamat tlen opanoka, niman toTajtsin hasta okichiuj ika Jonás makijkuilo tlen ipan opanok niman ijkon matechpaleui (Rom. 15:4).d
7. ¿Kenon techpaleuiya tlen Jehová yokichiuj ipampa itekipanojkauan?
7 Tlen Jehová yokichiuj techpaleuiya matikmatstokan ika kimasikamati itekipanojkauan. Kitstika ken tokokouaj niman ken titlajyouiyaj. Kixmatstika “inyojlo nochimej on tekoneuan intech in tlaltikpaktlakamej” (2 Crón. 6:30). Kasikamati tlen tiknemiliaj niman tlen tikmachiliaj, noijki tlen xueli tikchiuaj. Niman techijlia ika xkitekauilis matechtlatlatakan itech tlen xuelis tikxikoskej (1 Cor. 10:13). ¿Xmelak ika yejuin techyolseuiya?
JESÚS NAJMANA INTECH OKSEKIMEJ
8-10. ¿Tlenon okipaleui Jesús makimasikamati oksekimej?
8 Ijkuak Jesús onen ipan tlaltikpaktli onajman ipampa oksekimej. Yeyi tlemach melak okipaleui. Kachtopa, ken yotikitakej, kuajli okiteititi kenon katka iTaj. Ken Jehová, yejua noijki kintlasojtlaya tlaltikpakchanejkej. Maski pakiya itech tlen yejua niman iTaj okichijchiujkej, melak kintlasojtlaya tlaltikpakchanejkej (Prov. 8:31). Tlasojtlalistli okipaleui makajmana tlen kimachiliaj tlaltikpakchanejkej.
9 Ome, ijkon ken Jehová, Jesús ueliya kitaya inyojlo tlaltikpakchanejkej, kijtosneki, kixmatiya intlanemililuan niman tlen kimachiliayaj (Mat. 9:4; Juan 13:10, 11). Kuakon, ijkuak kimitaya ika najmanayaj, kinyolseuiaya pampa kimasikamatiya (Is. 61:1, 2; Luc. 4:17-21).
10 Ika yeyi, Jesús noijki otlajyoui ken tlaltikpakchanejkej. Xnemili, nesi ika onoskalti imiuan se familia akin xkipiayaj tomin. Pampa otekit iuan itlakpataj José, ouel kichiua chikauak tekitl (Mat. 13:55; Mar. 6:3). Niman kanaj okimachili kenon timoyolkokos ijkuak miki se mochanejkauj, pampa José omik ijkuak Jesús xipeuaya tenojnotsa. Noijki, okimat kenon timomachilis tikinpiyas mochanejkauan akin xtlaneltokaj ken tejua (Juan 7:5). Yejuin niman okseki tlen ipan onochiuj okipaleui makimasikamati tlaltikpakchanejkej.
Pampa teikneliani, Jesús kuika kiyauak se akin xtlakaki niman kipajtia. (Xkita párrafo 11).
11. ¿Kemanon ones ika Jesús melak oteasikamat? (Xkita tlaixkopinajli tlen onka ixpan yejuin revista).
11 Ones ika Jesús melak oteasikamat ijkuak okichiuj milagros. Xokichiuj pampa nonekiya kichiuas, okichiuj pampa okimikneli akin tlajyouiayaj (Mat. 20:29-34; Mar. 1:40-42). Xnemili tlenon okimachili ijkuak okuikak se tlakatl okipajtito pampa xtlakakiya noso ijkuak okiyoliti ikoneuj se siuakauajli (Mar. 7:32-35; Luc. 7:12-15). Jesús okimachili tlen okimachilijkej oksekimej niman yejon okimapeuj makinpaleui.
12. Ken nesi ipan Juan 11:32-35, ¿kenon Jesús okiteititi ika okimasikamat Marta niman María?
12 Ijkuak omik Lázaro, Jesús okiteititi ika okimasikamat Marta niman María, imikniuan Lázaro. Ijkuak okitak kenon noyolkokouayaj, “ochokak” (xpoua Juan 11:32-35). Xochokak pampa xok keman kitaskia akin iuan nouikaya. Yejua kimatstoya ika kiyolitiskia. Ochokak pampa onoyolkoko ijkuak okitak kenon tlajyouiayaj imikniuan Lázaro.
13. ¿Tleka techyolchikaua tiueliskej itech ken Jesús oteasikamat?
13 Jesús xtlajtlakole katka niman tejuamej kema. San ika, techpaleuiya ijkuak tiuelij kenon yejua oteasikamat. Niman tiktlasojtlaj Jesús ipampa kenon okinpaleui tlaltikpakchanejkej (1 Ped. 1:8). Techyolchikaua pampa tikmatij ika aman Tekiuaj itech iTekiuajyo toTajtsin niman ika xok uejkauis kipopolos nochi tlajyouilistli. Pampa yejua noijki tlaltikpakchane katka, kinamiki makipopolo nochi tlen yotexchiuili tlen Satanás kiyekana. Melak tipakij ika tikpiyaj toTekiuaj akin kasikamati tlen techajmana (Heb. 2:17, 18; 4:15, 16).
MATIKCHIUAKAN KEN JEHOVÁ NIMAN JESÚS
14. Ika tlen kijtoua Efesios 5:1, 2, ¿tlenon tiknekij tikchiuaskej?
14 Ijkuak tikitaj tlen yokichiujkej Jehová niman Jesús, noijki tiknekij más titeasikamatiskej (xpoua Efesios 5:1, 2). Maski tejuamej xueli tikitaj tlen oksekimej kipiyaj ipan inyojlo, kema uelis tikyejyekoskej tikasikamatiskej tlen kimachiliaj niman tlen kinpoloua (2 Cor. 11:29). Aman, nemij miyekej akin nexikolejkej, san ika, tejuamej tikyejyekouaj tikchiuaj tlen okijto Pablo: “Maka xchiuakan on tlen kuajli san para nemejuamej, yej no xkinchiuilikan oksekimej on tlen kuajli” (Filip. 2:4).
(Xkimita párrafos 15-19).e
15. ¿Akinomej melak noneki mateasikamatikan?
15 Tlayekankej ipan tlanechikojli yejuamej akin melak noneki mateasikamatikan. Kimatstokej ika Jehová kinyolkuitis itech kenon kinpaleuiyaj akin yokiminmaktili (Heb. 13:17). Noneki kimasikamatiskej imikniuan tla kinekij kinpaleuiskej. ¿Kenon kiteititiaj yejon?
16. ¿Tlenon kichiuaj tlayekankej akin teasikamatij, niman tleka melak noneki?
16 Tlayekankej akin teasikamatij, imiuan nemij ikniuan ijkuak noneki. Imiuan tlajtouaj niman kuajli kinkakij. Yejuin melak noneki ijkuak se iborreguito Jehová kineki kintlapouilis inyojlo, san ika, xkimati kenon kichiuas (Prov. 20:5). Ijkuak tlayekankej kinektokej imiuan nemiskej tokniuan niman intech tlaneltokaj, yejon kichiua kuajli manouikakan niman manotlasojtlakan (Hech. 20:37).
17. ¿Tlenon melak kitlasojkaitaj intech tlayekankej? Xkijto se neskayotl.
17 Miyekej tokniuan kijtouaj ika melak kitlasojkaitaj ijkuak tlayekankej najmanaj intech oksekimej, ¿tleka? Adelaide kijtoua: “Pampa tikmati ika mitsasikamatiskej, tiknekis imiuan titlajtos”. Noijki kijtoua: “Ipampa kenon mitskakiskej, tikitas ika kimachiliaj tlen tikmachilijtika”. Se tokniuj kilnamiki: “Ijkuak nikijlitoya se tlayekanketl tlen tlauejli nikixnamiktoya, onikitak ika oixayotejten. Xkeman nikilkauas tlen okichiuj” (Rom. 12:15).
18. ¿Kenon uelis titeasikamatiskej?
18 Kema, tinochimej uelis titeasikamatiskej, xsan tlayekankej. ¿Kenon? Matikyejyekokan matikasikamatikan tlauejli tlen kixnamiktokej tochanejkauan niman tokniuan. Matajmanakan intech telpokamej, akin kualoj, ueuentsitsintin niman akin yomik se inchanejkauj. Matikintlajtoltikan kenon nemij niman kuajli matijkakikan tlen technankiliaj. Matikimasikamachiltikan ika yemelak tikasikamatij tlen inpan panotok. Niman matikyejyekokan matikinpaleuikan hasta kampa tiuelij. Ijkuak tikchiuaj yejuin, tikteititiaj ika yemelak titetlasojtlaj (1 Juan 3:18).
19. ¿Tleka noneki titeasikamatiskej ijkuak tikyejyekoskej tikinpaleuiskej oksekimej?
19 Ijkuak tikyejyekoskej tikinpaleuiskej oksekimej, noneki titeasikamatiskej. ¿Tleka? Pampa xnochimej ijkon kimixnamikij tlauejli. Sekimej nochi kijtouaj tlen inpan onochiuj, san ika, sekimej ka. Kuakon, ijkuak tikinpaleuiskej, maka matikintlajtoltikan tlen uelis kinpinaujtis (1 Tes. 4:11). Ijkuak yakaj techijlis tlen kimachilia, hasta uelis xtikneltokiliskej. San ika, noneki tikasikamatiskej ika yejua ijkon nomachilia. Kuakon, noneki matijkakikan niman maka nimantsin matitlajtokan (Mat. 7:1; Sant. 1:19).
20. ¿Tlenon tikitaskej ipan okse tlamachtijli?
20 Ijkon ken titeasikamatij ipan tlanechikojli, noijki noneki ijkon matikchiuakan ijkuak titenojnotsaj. ¿Kenon uelis tikteititiskej ika titeasikamatij ijkuak titenojnotsaj? Tikitaskej ipan okse tlamachtijli.
TLAKUIKAJLI 130 Matitetlapopoluikan
a Jehová niman Jesús najmanaj ipampa tlen kimachiliaj oksekimej. Yejuin tlamachtijli techmachtis itech tlen tiueliskej intechkopa. Tikitaskej tleka noneki noijki ijkon matajmanakan niman kenon uelis tikchiuaskej.
b NONEKI MATIKMATIKAN: Titeasikamatis kijtosneki ijkuak tikyejyekos tikasikamatis tlen oksekimej kimachiliaj niman tikmachilis tlen kimachilijtokej (Rom. 12:15).
c Isaías 63:7-9: “7 Nejua nikteneuas tlen Jehová yokichiuj ipampa itlasojtlalis tlen xtekaua, tlen kinamiki manoueyichiua, ipampa nochi tlen Jehová okichiuj topampa, nochi miyek tlemach tlen kuajli yokichiuj ipampa ikalpan Israel, ipampa iteiknelilis niman iueyitlasojtlalis tlen xtekaua. 8 Pampa yejua okijto: ‘Kuajli nikmatstok ika yejuamej nokalpan, nokoneuan akin xnechkauaskej’. Kuakon, onochiuj intemakixtijkauj. 9 Ipan nochi intlajyouilis yejua noijki otlajyoui. Niman itlatitlankauj akin kitki tlajtojli okinmakixti. Ika itlasojtlalis niman iteiknelilis yejua ika okpa okinkouj, niman yejua okinkuiteuj niman okinuikak ipan yejon yeuejkaui tonaltin”.
d Jehová noijki okimikneli oksekimej itekipanojkauan akin onomojtikej noso onoyolajmankej. Ken Ana, Elías niman Ébed-mélec (1 Sam. 1:10-20; 1 Rey. 19:1-18; Jer. 38:7-13; 39:15-18).
e TLEN NESI IPAN TLAIXKOPINALTIN: Ipan tlanechikoltin uelis tikteititiskej ika tajmanaj intech oksekimej niman ika titetlasojtlaj. Ipan yejuin Kajli kampa Tosentlaliaj tikitaj 1) se tlayekanketl kualtsin kinotsa se telpokatsin niman inan, 2) se tajtli iuan iichpokatsin konkauaj se tokniuj lamajtsin ipan carro niman 3) omemej tlayekankej kuajli kikakij tokniuj akin okintlajtlanili makipaleuikan.