Ijkuak toTajtsin tetlajtlakolmaka, ¿kuajli kiteijlia tlen kichiuas?

SE IXTLAMATKI akin kiteijlia tla kiyauis noso ka, kita ipan se aparato ika uajnonisiuijtiuj se chikauak ajakakiyaujtli ipan se kalpan kampa miyekej chantij. Yejua najmana inpampa yejon tlaltikpakchanejkej, kuakon, miyekpa kimijlia ika uajnonisiuijtiuj se chikauak ajakakiyaujtli.

Noijki ijkon, Jehová kimijlitika nochimej ika uajnonisiuijtiuj se chikauak “ajakakiyaujtli”, ijkon ken xkeman nochiua. ¿Kenon kimijlitika? ¿Niman tleka uelis kuajli tikmatstoskej ika kitemaka miyek tiempo niman ijkon makichiuakan tlen kimijlia? Uelis tiknankiliskej yejuin tla tikitaj seki tlen youejkauj okichiuj Jehová.

TLEN TOTAJTSIN OKIJTOKA IKA KICHIUASKIA

Yeuejkaui, Jehová miyekpa okiteijli ika kintlajtlakolmakaskia akin xkitlakamatiyaj itlanauatiluan (Prov. 10:25; Jer. 30:23). Nochipa ijkuak ijkon okichiuj, ika miyek tiempo okiteijli ika yejkoskiaj “ajakakiyaujtin” niman okiteijli tlenon nonekiya kichiuaskej niman ijkon kiyolpaktiskej (2 Rey. 17:12-15; Neh. 9:29, 30). Jehová okintekitilti itekipanojkauan niman ijkon makimijlikan tlaltikpakchanejkej tlen yejua kichiuaskia. Kinekiya makimatikan ika nonekiya nimantsin makichiuakan tlen yejua kintlajtlaniliaya niman ika nonekiya manopatlakan (Amós 3:7).

Noé katka se itekipanojkauj toTajtsin akin ika yolchikaualistli okimijli tlaltikpakchanejkej akin auilnemiyaj niman akin tlauelejkej katkaj ika iajsitoya tonajli ijkuak apachiuiskia nochi tlaltikpaktli (Gén. 6:9-13, 17). Noijki okimijli tlenon nonekiya kichiuaskej tla kinekiyaj makisaskej. Noé melak kuajli okichiuj itekiyo, hasta okixmatkej ken akin otenojnots itech melajkayotl (2 Ped. 2:5).

Maski Noé chikauak otenojnots, tlaltikpakchanejkej xokineltokakej niman xokitlakamatkej toTajtsin. Ika yejon, omijkej “ijkuak opeu kiaui” (Mat. 24:39; Heb. 11:7). Xueliskiaj kijtoskej ika toTajtsin xitlaj okimijlika.

Noijki, Jehová okimijli tlaltikpakchanejkej tlenon kichiuaskia maski achijtsin poliuiya ika kintlajtlakolmakaskia. Maski ijkon, okinmakak tiempo niman ijkon mauelikan makitlakamatikan. Ijkon okichiuj ijkuak okititlan majtlaktli tlajyouilistin ipan Egipto. Matikitakan tlenon opanok ijkuak toTajtsin okichiuj melak matesiui. Jehová okititlan Moisés niman Aarón niman ijkon makijlitij faraón niman itekipanojkauan tlenon panoskia ipan yejon ika chikome tlajyouilistli. Pampa uajmostla tesiuiskia, ¿kipiayaj tiempo niman ijkon ueliskiaj nomanauiskiaj? Biblia technankilia: “Niman sekimej itlapaleuijkauan on rey okineltokakej niman onomojtijkej ika on tlen toTEKO okijtoj. Yejua ika, yejuamej onotlajsiuitijkej okinkalaktijkej kalijtik nochi iminyolkauan niman iminesclavos. Pero nemiyaj sekimej yejuan xokineltokakej [...] niman xokintsakukej kalijtik iminyolkauan niman iminesclavos” (Éx. 9:18-21). Kuajli tikitaj ika toTajtsin okinmakak miyek tiempo. Niman pampa toTajtsin ijkon okichiuj, akin otetlakamatkej xotlajyouijkej.

ToTajtsin noijki okijli faraón niman itekipanojkauan ika ikuajtitlaniskia ika majtlaktli tlajyouilistli. San ika, yejuamej xotlanemilijkej niman xitlaj okichiujkej (Éx. 4:22, 23). Ika yejon, omijkej inyenkuiyouan. ¡Melak teajman tlen opanok! (Éx. 11:4-10; 12:29). ¿Okipixkej tiempo niman ijkon kichiuaskiaj tlen toTajtsin okimijlika? Kema. ¿Tleka ijkon tikijtouaj? Moisés okimijli israelitas ika toTajtsin ijkon tetlajyouiltiskia niman okimijli kenon makisaskiaj yejuamej niman inchanejkauan (Éx. 12:21-28). ¿Niman kechmej okikakej? Nesi ika omakiskej ipantsin 3 millones, sekimej israelitas katkaj niman noijki “seseknekamej tlakamej yejuan xisraelitas”, seki egipcios noijki omakiskej (Éx. 12:38).

Ken tikitaj, Jehová nochipa okitemakak tiempo niman ijkon tlaltikpakchanejkej mauelikan makitlakamatikan (Deut. 32:4). ¿Tleka ijkon okichiuj? Apóstol Pablo okijto ika Jehová “nion se tlakatl xkineki ma poliui, yej kineki para nochimej ma noyolpatlakan” (2 Ped. 3:9). Kema, toTajtsin najmanaya inpampa tlaltikpakchanejkej. Kinekiya ika manoyolkuepakan niman makichiuakan tlen kimijliaya achto ika tetlajtlakolmakas (Is. 48:17, 18; Rom. 2:4).

MATIJKAKIKAN TLEN TOTAJTSIN TECHIJLIA KICHIUAS

Aman, tlaltikpakchanejkej noijki noneki kikakiskej tlen noteijlitika ipan nochi tlaltikpaktli. Ijkuak Jesús nemiya nikan ipan tlaltikpaktli, okijto ika yejkoskia se ueyi “tlajyouilistli” kampa kinpopoloskiaj akin xkuajkualtin (Mat. 24:21). Jesús okijto nochi tlen inomachtijkauan kitaskiaj ijkuak nonisiuiskia yejon tonajli. Otlajto itech nochi tlen nochiuaskia ipan tlaltikpaktli. Niman nochi yejon itikitstokej (Mat. 24:3-12; Luc. 21:10-13).

Ijkon ken kijtoua yejuin teotlajtojli, Jehová kimijlia tlaltikpakchanejkej ika makitekichiuilikan niman makitlakamatikan. Kineki ika nochimej akin kitlakamatij kuajli manemikan niman kualtsin machantikan ipan se yenkuik tlaltikpaktli (2 Ped. 3:13). Jehová kineki matitlaneltokakan itech tlen yokijto kichiuas, ika yejon, yotechijli tlenon kichiuas iTekiuajyo, niman yejon uelis techmakixtis. Jesús okijto ika notenojnotsaskia “nochiuiyan ipan in tlaltikpaktli para nochimej países ma kixmatikan on tlen melauak” (Mat. 24:14). ToTajtsin yokichiuj ika itekipanojkauan matenojnotsakan kanaj ipan 240 uejueyimej kalpamej. Kineki ika miyekej makimatikan tlenon kichiuas niman mamakisakan itech “ajakakiyaujtli” tlen yejkos ijkuak tetlajtlakolmakas (Sof. 1:14, 15; 2:2, 3).

Kuakon, tikitaj ika xnoneki totlajtoltiskej tla Jehová kinmaka miyek tiempo tlaltikpakchanejkej niman ijkon makikakikan tlen yokijto kichiuas. Yotikitakej ika yejua nochipa ijkon kichiua. Más kuajli tla totlajtoltiaj tla tlaltikpakchanejkej kikakiskej toTajtsin aman ika ok onka tiempo. Tejuamej akin tiitekipanojkauan toTajtsin, matikchiuakan nochi kech tiueliskej niman ijkon miyekej ueliskej makisaskej ijkuak toTajtsin kipopolos tlen xkuajli ipan yejuin tlaltikpaktli.