¿Kuajli titemachtiaj itech Biblia?
1. ¿Tlenon noneki tikchiuaskej tinochimej akin titemachtiaj itech Biblia?
1 “Tla xkinotsa” Jehová xakaj uelis kitekichiuilis (Juan 6:44). Maski ijkon, noneki matikinpaleuikan tlaltikpakchanejkej manonisiuikan itech toTajtsin iluikakchane (Sant. 4:8). Ika yejon noneki kuajli matoyektlalikan. Tikinpaleuis makasikamatikan tlen nomachtiaj niman manoskalti intlaneltokil, xsan noneki matikimijlikan makipouakan párrafos niman makinankilikan tlajtoltilistin.
2. ¿Kenon kuajli titemachtiskej?
2 Tla kineki kuajli temachtis, akin tenojnotsa noneki kipaleuis akin kinmachtia itech yejuin: 1) makasikamati tlen Biblia temachtia 2) makineltoka niman 3) makichiua tlen Biblia temachtia (Juan 3:16; 17:3; Sant. 2:26). Tikpaleuis yakaj makichiua yejuin uelis uejkauis. San ika, tlen ika yolik kichiujtias kijtosnekis ika ipeujtika nouika iuan Jehová niman nosentemakas itech.
3. ¿Tlenon noneki tiktlajtoltiskej akin tikmachtiaj niman tleka?
3 ¿Tlenon kinemilia akin tikmachtia? Tla tiknekij tikmatiskej ika akin tikmachtiaj kineltoka tlen nomachtijtok niman kasikamati, matikyolchikauakan matlajto maka san tejuamej melak matitlajtokan (Sant. 1:19). ¿Kasikamati tlen Biblia kijtoua itech tlen nomachtijtok? ¿Ueli ika itlajtoluan kijtoua tlen kasikamati? ¿Tlenon kimachilia itech tlen nomachtijtok? ¿Kinemilia ika kuajli tlen temachtia Biblia? (1 Tes. 2:13.) ¿Kasikamati ika tlen nomachtijtok kipiya ika kichiuas manopatla ken nemi? (Col. 3:10.) Tla tiknekij kuajli tikmatiskej tlenon kinemilia nomachtijketl, noneki tiktlajtoltiskej niman sakin kuajli tijkakiskej (Mat. 16:13-16).
4. ¿Tlenon tikchiuaskej tla akin tikmachtiaj xkasikamati tlen Biblia temachtia noso ouijtika kita kitlakamatis?
4 Tlen se kichiua niman kinemilia melak saliujtika ipan itlanemilil niman uejkauis kipatlas (2 Cor. 10:5). ¿Tlenon tikchiuaskej tla akin tikmachtijtokej xnimantsin kichiua tlen nomachtijtok noso xkiselia? Noneki maka matosiaujkauakan, matijkauilikan ika iTlajtol toTajtsin niman iespíritu matekiti ipan iyojlo akin tikmachtiaj (1 Cor. 3:6, 7; Heb. 4:12). Tla ouijtika kasikamati niman kichiuas tlen nomachtijtok, xpano ipan okse tlamachtijli. Ika tlayekapan, tla kita ika xtosiaujkauaj niman tiktlasojtlaj, yejon kichiuas makipatla tlen noneki.