Kuajli matiktekitiltikan tiempo ipan totlanojnotsalis
Iteixpantijkauan Jehová otitenojnotskej 1,945,487,604 horas itech septiembre xiuitl 2013 hasta agosto xiuitl 2014. ¡Kuajli nesi ika melak tiknekij tikchiujtoskej itekiyo Jehová! (Sal. 110:3; 1 Cor. 15:58.) Pampa “xok tikpiyaj miyek tonaltin”, ¿uelis tiktekitiltiskej totiempo tikinnojnotsaskej tlaltikpakchanejkej kech tiueliskej? (1 Cor. 7:29.)
Kuajli tiktekitiltiskej tiempo ijkuak titenojnotsaj kemantika nonekis tikpatlaskej ken yotiknemilijkej tikchiuaskej. Xnemili, tla miyekpa tipanouaj kanaj se hora ipan se tekitl itech tlanojnotsalistli xakaj iuan titlajtoua, ¿uelis tikpatlas itlaj niman ijkon tikitas kenon tikinnextis tlaltikpakchanejkej akin tikinnojnotsas? Kampa titenojnotsa xsan noijki ken kampa oksekimej tenojnotsaj. San ika, tikchiuas tlen nikan uajnestiuj mitspaleuis kuajli xtekitilti motiempo niman ijkon xsanenka tikchiuas (1 Cor. 9:26).
Titenojnotsas techajchan. Ipan miyek xiuitl, akin tenojnotsaj yonomatkej ika kualkan tenojnotsaj techajchan. San ika, pampa miyekej tekitij ika tonajli, ¿tleka xtikyejyekoua tontenojnotsas ika teotlak noso tla yotlayouatik? Ijkuakon tlaltikpakchanejkej sa noseuijtokej. Tla ika tonajli titenojnotsa ipan ojtli niman kampa tlanemakalo, uelis melak kuajli tonkisas.
Titenojnotsas kampa tojlan nojuitilo. Mesas noso carritos uelis notlaliskej kampa melak tojlan panolo, kampa yokimakakej tlanechikojli matenojnotsa (xkita ToTekiyo itech Tekiuajyotl, julio 2013, página 5 [xonka ika náhuatl de guerrero]). Tla xok tojlan nojuitilo kampa yonotlali yejuin, tlayekankej itech tlanechikojli kijtoskej kanon kipatlaskej kampa kema tojlan nojuitilo.
Timokuepas tontetlajpalos niman titemachtis. ¿Uelis tiknemilis oksejpa tontetlajpalos noso tontemachtis ijkuak xakaj mitsnankilia ijkuak titenojnotsa? Se neskayotl, tla ipan sábados iuan domingos ika kualkan kuajli techkakij ijkuak tontenojnotsaj techajchan, ¿uelis tontemachtis ika teotlak noso tla itlayouatitika? Ijkuak oksejpa tikontlajpaloskej se akin otiknojnotskej, ¿uelis tiachijtsitsintin tiaskej ipan se carro niman ijkon kuajli manochiua yejuin tekitl?
Nochi tiempo ijkuak titenojnotsaj uelis tikpouaskej, san ika, melak techyolpaktis tla nesi ika kuajli tekitl tlen tikchiuaj. Tla tikitaj ika ken titenojnotsaj xakaj tiknextiaj ipan yejon hora, matikpatlakan ika okse. Xchiuili teoyotl Jehová, “iTeko on tlakilyotl”, mamitspaleui kuajli tiktekitiltis tiempo ipan tlanojnotsalistli (Mat. 9:38).