Tlemach tlen tiktekitiltiaj ika titemachtiaj
1. ¿Kenon akin kichiua ken Cristo ijkon ken se akin kinchijchiua kaltin?
1 Se akin kinchijchiua kaltin kipiya miyek tlemach tlen ika tekiti. Seki san kintekitiltia ijkuak kichiua se ueyi tekitl, niman seki mojmostla kintekitiltia. Akin youelkej melak kuajli kinchijchiuaj kaltin yokitakej katlejua mojmostla kitekitiltiaj niman nochipa kitkitinemij pampa melak kuajli yokixmatkej kenon kitekitiltiaj. ToTajtsin iTlajtol techyolchikaua kuajli matitenojnotsakan, niman ijkon se iteixpantijkauj Jehová manochiua “tekitki, yejuan xitlaj ika pinaua” (2 Tim. 2:15). ¿Katlejua nochipa melak tiktekitiltiaj ijkuak titenojnotsaj? ToTajtsin iTlajtol, yejuin ika tikinmachtiaj oksekimej manochiuakan inomachtijkauan Jesús (Mat. 28:19, 20). Ika yejon, noneki melak tokojtiliskej tiktekitiltiskej yejuin “kuajli [...] tlajtojli tlen melauak”. San ika, nochimej akin tikchiuaj ken Cristo noneki kuajli tiktekitiltiskej okseki tlemach tlen techpaleuiya matikinmachtikan tlen melauak oksekimej (Prov. 22:29).
2. ¿Tlenon tiktekitiltiaj mojmostla ijkuak titemachtiaj Biblia?
2 Tlen tiktekitiltiaj mojmostla ika titemachtiaj. Maski Biblia tlen melak tiktekitiltiaj, ¿katlejua okseki tiktekitiltiaj ijkuak titemachtiaj? Amoxtli ¿Tlenon melauak temachtia Biblia?, yejuin tiktekitiltiaj ijkuak titemachtiaj itech Biblia. Ijkuak titlamij yejuin amoxtli iuan akin tomachtiaj, tiktekitiltiaj amoxtli Nochipa xnemikan itech itlasojtlalis toTajtsin tlen kipaleuiya makichiua ipan inemilis tlen kijtouaj tlajtolyekanalistin tlen uajlauej ipan Biblia. Ika yejon, noneki tikixmatiskej niman tikmatiskej kenon kuajli tikintekitiltiskej yejuin ome amoxtin. Itech tlen tiktekitiltiaj noijki noneki tiktlaliskej seki amatlajkuiloltin ken ¡ToTajtsin techijlia tlen kualtsin! tlen techpaleuiya matikpeualtikan se tlamachtijli itech Biblia. Tla kampa titenojnotsaj nemij tlaltikpakchanejkej akin san achijtsin ueli amapouaj noso xonka amatlajkuiloltin ika intlajtol noso xmiyek tikpiyaj, uelis tikintekitiltiskej amatlajkuiloltin Xkaki toTajtsin noso Xkaki toTajtsin niman tinemis nochipa. Okse tlen techpaleuis tikititiskej akin tikmachtiaj makimati itech kenon noyekana ikalpan toTajtsin, amatlajkuilojli ¿Akinomej kichiuaj tlen kineki Jehová ipan yejuin tonajli? Noijki uelis tikintekitiltiskej videos ¿Tleka noneki timomachtis Biblia?, ¿Tlenon nochiua kampa tosentlaliaj? niman ¿Kenon nochiua se tlamachtijli itech Biblia? ijkuak tikinmachtiskej oksekimej niman ijkon manochiuakan inomachtijkauan Jesús.
3. ¿Tlenon tomachtiskej itech okseki tlen kisas ipan ToTekiyo itech Tekiuajyotl?
3 Okseki tlen kisas ipan ToTekiyo itech Tekiuajyotl tomachtiskej kenon kuajli tikintekitiltiskej amatlajkuiloltin tlen ika titemachtiaj. Tla tochikauaj kuajli tikintekitiltiaj, tikchiujtoskej tlen kijtoua Biblia: “Kuajli xmixtlalo niman kuajli xkita on tlen tiktemachtia. Tejua noijki kuajli ipan xmouika. Tla ijkin tikchiuas, timomakixtis niman no tikinmakixtis on yejuan mitskakiskej” (1 Tim. 4:16).