Matomachtikan melak kuajli matitenojnotsakan: xkimititi akin tikinmachtia nochipa manomachtikan iTlajtol toTajtsin
Tleka melak noneki. Tla kineki machikaui itlaneltokil, akin tikmachtia noneki kitemiltis itlamachilis niman iyojlo ika tlamachtiltin itech Biblia tlen ouijtika nasikamati (Heb. 5:12–6:1). San ika, kipiya ika nochikauas niman ijkon nomachtis, pampa yejuin kijtosneki kasikamatis tlen ikimatstika iuan tlen kemach onomachti, niman kitas kenon kichiuas ipan inemilis (Prov. 2:1-6). Tla akin kinmachtiaj itech Biblia kinekij kinextiskej tlanankilistin itech tlen notlajtoltiaj, noneki ueliskej kitejtemoskej san inselti. Pampa nochikauaj ika nochi inyojlo kichiuaskej ipan innemilis tlen nomachtijtokej, kinpaleuis makixikokan tlen ouijtika kixnamikiskej pampa kinekij kichiuaskej ken Cristo (Luc. 6:47, 48).
Ipan yejuin metstli xyejyeko yejuin:
Ijkuak titlamis se subtítulo noso se capítulo, xtlajtlanili akin tikmachtijtika makijto ika achijtsin tlajtoltin itech tlen onemomachtijkej. Tla amantsin xakaj tikmachtijtika, xyejyeko xkijto ika achijtsin tlajtoltin itech tlen otikpouj ipan Biblia noso se párrafo itech Amatl Tekakistilijketl. Yejuin mitspaleuis kuajli xkasikamati tlen tikpoua.