Xtlanemilikan itech tlen okichiujkej teotlajtokej: Habacuc
1. ¿Tleka kuajli tikasikamatij teotlajtoketl Habacuc?
1 Ijkuak tikitaj kenon miyekiya tlen xkuajli ipan yejuin tlaltikpaktli, kanaj tomachiliaj ijkon ken Habacuc, akin okitlajtolti Jehová tleka kikauiliaya maonia tlen xkuajli (Hab. 1:3; 2 Tim. 3:1, 13). Tla titlanemiliaj itech tlen otenojnots Habacuc niman itech kenon yejua oyolmelaujkanen, uelis techpaleuis matitlaxikokan niman matikchiatokan tonajli ijkuak teyolkuitis Jehová (2 Ped. 3:7).
2. ¿Kenon uelis tiyolmelaujkanemiskej ken Habacuc?
2 Matiyolmelaujkanemikan. Habacuc xnochipa tlanemilijtoya itech tlen xkuajli ipan nochiujtoya, yejua nochipa tlatlachixtoya niman chikauak okitekichiuili toTajtsin (Hab. 2:1). Jehová okimelajkaijli Habacuc ika iTlajtol nochiuaskia ijkuak ajsiskia tonajli niman ika akin yolmelaujkej nochipa nemiskiaj (Hab. 2:2-4). Ipan sa itlamiyan tonaltin tlen tinentokej, ¿tlenon kijtosneki yejuin tlajtoltin itech akin tikchiuaj ken Cristo? Ika, kuajli tla tiktejtemouaj tikmatiskej kemanon yejkos tonajli ijkuak nochi tlamis, san ika, melak ueyi kijtosneki matikneltokakan ika yemelak yejkos. Totlaneltokil techpaleuis matitlatlachixtokan niman nochipa matitenojnotstokan itech toTajtsin (Heb. 10:38, 39).
3. ¿Tleka noneki matiktekichiuilijtokan Jehová ika yolpakilistli?
3 Tiyolpakij ika tiktekichiuiliaj Jehová. Nesis tla chikauak totlaneltokil ijkuak Gog de Magog kixnamikis ikalpan Jehová (Ezeq. 38:2, 10-12). Nochipa ijkuak onka se guerra, miyekej tlajyouiyaj, maski akin tetlanij. Tlaltikpakchanejkej kipolouaj tlen kipiyaj, xmiyek onka tlakuajli niman kemantika xok noijki chantij. ¿Tlenon tikchiuaskej ijkuak tikixnamikiskej yejuin? Habacuc kimatstoya ika kixnamikiskia tlauejli, san ika, yejua okinemili kitekichiuilis Jehová ika yolpakilistli (Hab. 3:16-19). “Iyolpakilis Jehová” noijki techpaleuis matikinxikokan tlatlatalistin (Neh. 8:10; Heb. 12:2).
4. ¿Tlenon uelis techyolpaktis aman niman ika tlayekapan?
4 Jehová xkikajkauas kinmachtijtias nochimej akin kinmakixtis ipan tonajli ijkuak teyolkuitis (Hab. 2:14). Tlaltikpakchanejkej akin yoliuiskej noijki ueliskej itech Jehová. Matipeuakan ipan yejuin tonajli matiktejtemokan kenon tikteijliskej itech yejua niman tlemach tlen kualtsin yokichijchiuj (Sal. 34:1; 71:17.