Matomachtikan melak kuajli matitenojnotsakan: xkinpaleui akin tikinmachtia manosentemakakan niman manoapolaktikan

TLEKA MELAK NONEKI. Tla akin tikinmachtijtok kinekij makinpaleui Jehová, noneki nosentemakaskej niman noapolaktiskej (1Pe 3:21, TNM). Akin nemij ken okijtokej ijkuak onosentemakakej kintlajpiya itech intlaneltok (Sl 91:1, 2). Akin tikchiuaj ken Cristo tosentemakaj itech Jehová, xitech se tlakatl noso tekitl. Ika yejon, akin kinmachtijtokej kipiya ika kitlasojtlaskej niman kitlakaitaskej Jehová (Ro 14:7, 8).

KENON TIKCHIUASKEJ:

• Ijkuak nimomachtijtoskej, xkitakan tlenon mechmachtia itech toTajtsin yejon tlamachtijli. Xkijli ika melak noneki mojmostla makipoua Biblia niman “nochipa” makichiua teoyotl (1Te 5:17; Snt 4:8).

• Xyoleua akin tikmachtijtika manochikaua ika manosentemaka niman manoapolakti. Noijki xpaleui matlanankili ipan tlanechikojli, makinnojnotsa akin nisiuj chantij niman akin inuan tekiti niman xpaleui makichiua okseki tlemach. Xkilnamiki ika Jehová xakaj kichiualtia makitekichiuili niman se kitlapejpenis tla nosentemakas (Dt 30:19, 20).

• Xyolchikaua akin tikmachtijtika makipatla inemilis niman ijkon kiyolpaktis Jehová niman uelis noapolaktis (Pr 27:11). Pampa tikchiuaj ken youejkauj otechiskaltijkej, akin tikmachtijtika Biblia kanaj nonekis ok tikpaleuijtias niman ijkon makikajkaua tlen kachtopa kichiuaya ipan inemilis (Ef 4:22-24, TNM). Xkititi seki tlamachtiltin tlen uajlauj ipan “La Biblia les cambió la vida” itech revista Amatl Tekakistilijketl.

• Xkijli akin tikmachtijtika kenon melak yomitspakti tiktekichiuilis Jehová (Isa 48:17, 18).