¿Tlenon techijliaj teotlajtokej itech toTajtsin?
Yeuejkaui, toTajtsin okintekitilti teotlajtokej niman ijkon makijkuilokan tlen yejua kineki techijlis. ¿Techijliaj ipan tlen okijkuilojkej tlenon noneki tikchiuaskej tla tiknekij ika toTajtsin matechteochiua? Kema. Matikitakan tlenon tiuelij itech tlen okijtokej yeyimej teotlajtokej.
TEOTLAJTOKETL ABRAHÁN
ToTajtsin xtechikoita niman kineki nochimej kinteochiuas.
ToTajtsin okijli teotlajtoketl Abrahán: “Motechkopa tejua nikintiochiuas nochi kech familias nemij ipan tlaltikpaktli” (Génesis 12:3).
¿Tlenon techmachtia? ToTajtsin melak techtlasojtla niman kineki nochimej kinteochiuas (tlakamej, siuamej niman kokonej) akin kitlakamatij.
TEOTLAJTOKETL MOISÉS
ToTajtsin techiknelia niman kineki kinteochiuas nochimej akin kinekij kixmatiskej.
ToTajtsin akin nochi ueli kichiua, okimakak Moisés kojtilistli niman ijkon makichiua milagros. Maski ijkon, Moisés okitlajtlanili toTajtsin: “Xnechijli tlinon tikneki ma nikchiua para nikpiyas noyojloj motech niman ijki sanken uelis nikpiyas motlapaleuilis” (Éxodo 33:13). ToTajtsin okuelkak tlen Moisés okitlajtlanili niman okiteochiuj, okimakak tlamachilistli niman okipaleui kuajli makixmati. Tikmatij yejuin pampa Moisés okimat ika akin otexchijchiuj techtlasojtla niman techiknelia (Éxodo 34:6, 7).
¿Tlenon techmachtia? Ika toTajtsin nochimej techteochiuas (tlakamej, siuamej niman kokonej) tla tokojtiliaj kuajli tikixmatiskej. Ipan iTlajtoltsin techijlia kenon noneki tikueyichiuaskej niman noijki techijlia ika melak kineki techteochiuas.
TEOTLAJTOKETL JESÚS
Jesús oteikneli niman otepajti.
ToTajtsin techteochiuas tla tiuelij tlen Jesús okichiuj niman otemachti.
ITlajtol toTajtsin techijlia tlenon okichiuj Jesús niman tlenon otemachti. ToTajtsin okimakak Jesús kojtilistli niman ijkon makichiua milagros. Jesús okinpajti akin xuelij tlachiaj, akin xuelij tlakakij niman akin xuelij nejnemij niman hasta okinyoliti akin yomijkaj. Pampa ijkon okichiuj Jesús, otechititi tlenon kichiuas toTajtsin ika tlayekapan. Yejua techijlia tlenon noneki tikchiuaskej niman ijkon uelis techteochiuas. Yejua okijto: “In nemilistli yejuan para nochipa se kiselia ijkuak mitsixmati tejua yejuan san moselti melauak tiDios, niman nejua niJesuCristo yejuan otinechajtitlan” (Juan 17:3).
Jesús teikneliaya niman yolkuajli katka. Tlakamej niman siuamej okichiujkej tlen Jesús okijto: “Xmokauilikan ma nemechmachti, pampa nejua niyolsejki niman niyolyemanki, niman notech nenkiseliskej neseuilistli” (Mateo 11:29). Jesús kuajli kiminotsaya niman kintlakaitaya siuamej, xijkon ken sekimej tlakamej akin kintlajyouiltiayaj siuamej.
¿Tlenon techmachtia? Jesús melak tetlasojtlayaj niman kuajli otechititi kenon noneki tikimitaskej oksekimej.
JESÚS XTOTAJTSIN
ITlajtol toTajtsin techmachtia ika “san se Dios tikpiyaj”. ToTajtsin okitekitilti Jesús niman ijkon matechijli iTlajtol (1 Corintios 8:6). Jesús okijto ika san toTajtsin ueyixtika niman ika yejua okuajtitlan ipan tlaltikpaktli (Juan 11:41, 42; 14:28).a
a Tla okseki tikneki tikmatis itech Jesucristo, xkimita secciones 8 niman 9 itech amatlajkuilojli La fe verdadera, la puerta a una vida feliz, tlen onka ipan www.jw.org.