MATINEMIKAN KEN CRISTO
Matomachtikan melak kuajli matitenojnotsakan: Xkinpaleui akin tikinmachtia makiyektlalikan ken nomachtiaj
TLEKA MELAK NONEKI. Tla akin kiselia tlamachtijli itech Biblia kuajli kiyektlalia tlen nomachtia, nimantsin kasikamatis niman kilnamikis tlen yokimachtijkej. Yejuin kipaleuis machikaui itlaneltokil. Sakin, ijkuak yonoapolakti nonekis nomachtis tlen noitas ipan tlanechikoltin niman ken tenojnotsas. San ijkon uelis tlatlachixtos (Mt 25:13, TNM). Kuakon, tla nomati kuajli nomachtia niman xkikajkaua melak kipaleuis ipan inemilis. Ijkuak peua kiselia tlamachtijli, noneki nimantsin matikpaleuikan akin tikmachtiaj manomati nochipa makiyektlali tlamachtijli tlen iuan tikitaskej.
KENON TIKCHIUASKEJ:
Xtemaka se kuajli neskayotl (Ro 2:21). Xtlanemili kenon tikpaleuis akin tikmachtia ijkuak tikyektlalis tlamachtijli tlen iuan tikitas (km 11/15 pág. 3). Xkititi moamox tlen yotiktlapalyoti.
Xyolchikaua makiyektlali tlen nomachtis. Ijkuak xok nenkikajkauaj ika nemomachtiaj, xkijli ika noyektlalis noijki ompa kalaki itech tlen nomachtia niman xtomili kenon melak kipaleuis. Xkijli kenon uelis kixelos tiempo niman ijkon uelis nomachtis. Sekimej tokniuan kintlaneujtiaj akin kinmachtiaj inamoxuan ijkuak nomachtijtokej niman ijkon akin nomachtiaj kitaj kenon melak tepaleui ijkuak tiktlapalyotis. Ijkuak kiyektlalis tlamachtijli tlen nenkitaskej, xkijli ika melak kuajli ken kichiua.
Xkititi ken kiyektlalis tlen nomachtis. Sekimej tokniuan ipan kachtopa tlamachtijli kimititiaj akin kinmachtiaj kenon iselti kiyektlaliskej tlamachtijli tlen sakin kitaskej.