MATINEMIKAN KEN CRISTO
Pablo okitlasojkamachili toTajtsin, niman más onoyolchikauj
Ijkuak tlanechikojli ipan Roma okikakej ika Pablo iajsitoya kampa yejuamej nemiyaj, sekimej tokniuan okinamikitoj maski kipiaya kanaj 64 kilómetros ika uejka. ¿Kenon onomachili Pablo ipampa yejuin tlen okichiujkej? “Ijkuak Pablo okintak, okimakak tlaxtlauijli Dios, niman más onoyolchikau” (Hch 28:15). Maski Pablo yejua akin miyekpa kinyolchikauaya tokniuan akin komintlajpalouaya, aman yejua akin nonekiya makiyolchikauakan pampa kuikayaj niman ijkon kontsakuaskej (2Co 13:10).
Aman, tlayekankej ipan circuito kominitaj tlanechikoltin niman ijkon kinyolchikauaskej tokniuan. Ijkon ken nochimej inpan nochiua, kematika yejuin tokniuan siauij, notekipachouaj niman noyolajmanaj. Ijkuak tlayekanketl ipan circuito niman isiuauj mechontlajpaloskej, ¿tlenon uelis tikchiuas niman ijkon imiuan timoyolchikauas? (Ro 1:11, 12).
Xmosentlali kampa nenkisaskej nemontenojnotsaskej. Tlayekanketl ipan circuito melak kuajli nomachilia ijkuak kita ika akin tenojnotsaj nokojtiliaj kisaskej ontenojnotsaskej (1Te 1:2, 3; 2:20). Uelis timochiuas precursor auxiliar ijkuak mechontlajpaloskej. ¿Ueliskia titenojnotsas noso tontemachtis iuan tokniuj tlayekanketl ipan circuito noso iuan isiuauj? Yejuamej kinyolpaktia tenojnotsaskej imiuan nochimej, kema, imiuan akin kemach yopeujkej tenojnotsaj niman akin kintekiyomaka kuajli tenojnotsaskej.
Kuajli xkinseli. ¿Kanaj uelis tikinseuis mochan noso uelis imiuan titlakuas? Tla ijkon tikchiua, tikimititis ika tikintlasojtla. Yejuamej xkichiaj itlaj ueyi xkinmaka (Lu 10:38-42).
Xkinkaki niman xchiua tlen mitsijliskej. Tlayekanketl ipan circuito ika tlasojtlalistli techpaleuiya matikitakan kenon más kuajli tiktekichiuiliskej Jehová. Kemantika yejuamej noneki texchikajkanotsaskej (1Co 5:1-5). Yejuamej melak pakij ijkuak tikinkakij niman tikintlakamatij (Heb 13:17).
Xkintlasojkamachili. Xkijli tokniuj tlayekanketl ipan circuito iuan isiuauj kenon yomitspaleui nochi tlen kichiuaj. Noijki uelis tikimijkuilouilis se amatsintli (Col 3:15).