Matikinkuikan videos niman ijkon tikinmachtiskej tonomachtijkauan

Ijkuak yakaj kititiaj itlaj ijkuak kimachtijtokej, melak kuajli kasikamati niman xkilkaua tlen kimachtiaj. Jehová, akin toUeyi Tlamachtijkauj, noijki techititia miyek tlemach niman ijkon techmachtia (Gé 15:5; Jer 18:1-6). Jesús, akin Ueyi Tlamachtijketl, noijki ijkon otemachti (Mt 18:2-6; 22:19-21). Ipan yejuin tonaltin melak tepaleui ijkuak se kinteititia videos. ¿Tikintekitiltiaj videos ijkuak titemachtiaj itech Biblia?

Onokej majtlaktli videos tlen techpaleuiyaj matikintetomilikan tlamachtiltin tlen kinpiya amatlajkuilojli ¡ToTajtsin techijlia tlen kualtsin! Miyekpa, ken itoka video noijki ijkon itoka se tlajtoltilistli tlen kipiya amatlajkuilojli. Tla tiktejtemouaj yejuin amatlajkuilojli ipan jw.org, tikitaskej ika ompa uajnesi katlejua videos uelis tikinteititiskej ipan tlamachtiltin. Niman noijki onokej okseki videos tlen uelis tikintekitiltiskej ijkuak titemachtiskej ika okseki toamatlajkuiloluan.

¿Tikita ika akin tikmachtia kitekiyomaka kasikamatis se tlamachtijli itech Biblia? ¿Kixnamiktika itlaj tlen ouijtika? Xtejtemo se video tlen uelis kipaleuis ipan jw.org® noso ipan JW Broadcasting®. Kanaj uelis san sekan nenkitaskej niman nentlajtoskej itech.

Nochi metstin kisaj yenkuikej videos. Ijkuak tikimitas, xnemili kenon uelis tikintekitiltis niman ijkon ika titemachtis.