MATINEMIKAN KEN CRISTO
Kuajli xkita tlenon kuelita Jehová
Tla tiknekij tikyolpaktiskej Jehová, noneki tikitaskej ika makuelita tlen tiktlapejpeniskej, maski maka maonia se tlanauatijli tlen matechijli tlenon noneki tikchiuaskej (Pr 27:11). ¿Kenon tikmatiskej tlenon kuelita Jehová?
Mojmostla matomachtikan Biblia. Ijkuak tikamapouaj Biblia, kentla tinemiskiaj iuan Jehová. Ijkuak tikitaj kenon Jehová okipaleui ikalpan niman ijkuak titlanemiliaj itech tlen kuajli okichiujkej niman tlen xkuajli okichiujkej akin noteneuaj ipan Biblia, techpaleuiya pampa tikitaj kenon tlanemilia Jehová. Tla titlanemiliaj itech tlen tomachtiaj, ijkuak nonekis itlaj tiktlapejpeniskej iespíritu santo Jehová techpaleuis matikilnamikikan tlen otiuelkej ipan iTlajtol (Jn 14:26).
Xtejtemo tlen tikneki tikmatis. Achto tiktlapejpenis itlaj, xmotlajtolti: “¿Katlejua tlaxeloltin tlen noteneuaj ipan Biblia uelis nechpaleuiskej manikmati tlenon kinemilia Jehová itech tlen niktlapejpenis?”. Xtlajtlanili Jehová mamitspaleui niman xtekitilti nochi tlen ikalpan Jehová yomitsmakak ika motlajtol niman ijkon uelis tiknextis itlaj ipan Biblia tlen mitspaleuis (Sl 25:4).
XKITAKAN VIDEO NONEKI TOTLALOSKEJ IKA TLAXIKOUILISTLI: KUAJLI MATOTLAKUALTIKAN, SAKIN XNANKILIKAN YEJUIN:
¿Tlenon kixnamiktoya ichpochtli akin onoteneuj ipan video?
¿Kenon uelis mitspaleuis tlen ikalpan Jehová mitsmaka para timomachtis niman ijkon uelis tikxikos tlen tikixnamiki?
¿Kenon uelis techpaleuis tla achto itlaj tiktlapejpeniskej kuajli tomachtiaj niman tiktejtemouaj tlen tiknekij tikmatiskej? (Heb 5:13, 14).