Matitetlasojtlakan ika nochi toyojlo

1. ¿Tlenon okinnauati Jesús inomachtijkauan? (Xkita tlaixkopinajli tlen onka ixpan yejuin revista).

IJKUAK sa achijtsin poliuiya ika mikis Jesús, yejua okinmakak inomachtijkauan se tlanauatijli, okimijli: “Ijkon ken nejua nemechtlajsojtla, nemejuamej no ijki xmotlajsojtlakan inuan oksekimej”. Niman sakin okijto: “Tla nemotlajsojtlaj inuan oksekimej, nochi tlakatl kitas ika nennotemachtijkauan” (Juan 13:34, 35).

2. ¿Tleka melak noneki matitetlasojtlakan?

² Jesús okijto tlenon kinpaleuiskia oksekimej makimatikan akinomej yemelak inomachtijkauan, okijto ika yejuamej notlasojtlaskiaj imiuan oksekimej ijkon ken yejua okintlasojtlak. Ipan kachtopa siglo, inomachtijkauan otetlasojtlakej, niman aman tejuamej noijki noneki titetlasojtlaskej maski ijkuak ouijtika yes.

3. ¿Tlenon tikitaskej ipan yejuin tlamachtijli?

³ Pampa titlajtlakolejkej, kemantika ouijtika tikitaj titetlasojtlaskej ika nochi toyojlo. Maski ijkon, noneki tokojtiliskej tikchiuaskej ken Cristo. Ipan yejuin tlamachtijli, tikitaskej kenon tlasojtlalistli techpaleuiya matiknekikan tinemiskej ika yolseuilistli imiuan tokniuan, maka matikinchikoitakan niman kuajli matikinselikan. Ijkuak tikitstiaskej yejuin tlamachtijli, matotlajtoltikan: “¿Kenon uelis nikchiuas ijkon ken tokniuan akin tetlasojtlaj maski kixnamikij tlen ouijtika?”.

MATIKTEJTEMOKAN YOLSEUILISTLI

4. Ken kijtoua Mateo 5:23, 24, ¿tleka noneki totlapopoluiskej imiuan oksekimej?

⁴ Jesús otechmachti ika melak noneki totlapopoluiskej imiuan oksekimej (xpoua Mateo 5:23, 24). Jesús okijto ika noneki kuajli touikaskej imiuan oksekimej tla tiknekij tikyolpaktiskej toTajtsin. Kema, Jehová yolpaki ijkuak kita ika tokojtiliaj kuajli touikaskej imiuan tokniuan. Tla xtikilkauaj tlen xkuajli texchiuiliaj tokniuan niman tla xtiknekij imiuan toyolseuiskej, yejua xkiselis tlen tikchiuaj ipampa (1 Juan 4:20).

5. ¿Tleka Mark ouijtika okitak noyolseuis iuan se tokniuj?

⁵ Kanaj ouijtika tikitaj toyolseuiskej iuan se tokniuj. ¿Tleka ijkon panoua? Matikitakan tlenon ipan onochiuj tokniuj Mark.b Yejua onoyolkoko pampa se tokniuj melak okitejteneuj ipan tlanechikojli. ¿Tlenon okichiuj Mark? Yejua kijtoua: “Xonikxiko niman iuan oninokualani”. San ika, sakin, Mark onajman ipampa tlen okichiujka niman okiyejyeko noyolseuis iuan tokniuj. San ika, tokniuj xkinekiya kitlapopoluis. Ijkuakon, Mark okinemili: “¿Tleka nejua noneki niktlajtlanilijtos manechtlapopolui tla yejua nion xkineki nechtlapopoluis?”. San ika, se tokniuj tlayekanketl ipan circuito okijli maka manosiaujkaua. ¿Tlenon okichiuj Mark?

6. a) ¿Tlenon okichiuj Mark niman ijkon noyolseuis iuan tokniuj akin iuan onokualanijka? b) ¿Tlenon opanok pampa Mark okichiuj tlen kijtoua Efesios 4:2, 32?

⁶ Mark sa no yejua opeuj noixtlaloua niman okitak ika kemantika xyolyemanki katka niman noueyimatiya. Okasikamat ika nonekiya nopatlas (Col. 3:8, 9, 12). Mark oksejpa okitato tokniuj niman, ika yolyemanilistli okitlajtlanili makitlapopolui. Noijki okijkuilouili seki cartas kampa kijliaya ika kajmanaya tlen okichiujka niman ika kinekiya oksejpa kuajli manouikakan. Noijki hasta okitlayokoli seki tlemach tlen ueliskia kuelitas. Teajman ika tokniuj xokinek kitlapopoluis. Maski ijkon, Mark xkitlauelitaya niman nochipa kitlapopoluiaya, ijkon ken Jesús otechnauati (xpoua Efesios 4:2, 32). Kanaj sekimej xkinekiskej techtlapopoluiskej maski miyekpa tikimijliskej matechtlapopoluikan. San ika, tejuamej kema tikintlapopoluiskej niman tiktlajtlaniliskej Jehová matechpaleui matikyektlalikan yejon tlauejli. Ijkon tikchiuaskej pampa tikintlasojtlaj tokniuan (Mat. 18:21, 22; Gál. 6:9).

7. a) ¿Tlenon otechnauati Jesús matikchiuakan? b) ¿Tlenon ipan onochiuj se tokniuj?

⁷ Jesús otechnauati matikinchiuilikan oksekimej tlen tejuamej tikuelitaskiaj matexchiuilikan. Noijki okijto ika xsan noneki tikintlasojtlaskej akin noijki techtlasojtlaj (Luc. 6:31-33). ¿Tlenon tikchiuaskiaj tla se tokniuj xtechnotsasneki niman nion xkineki techtlajpalos? Melauak ika yejon xmás panoua ipan ikalpan Jehová, san ika, yejon tlen ipan onochiuj se tokniuj siuatl akin itoka Lara. Yejua kijtoua: “Se tokniuj siuatl xkinekiya nechtlajpalos, niman xnikmatiya tleka ijkon kichiuaya. Xika noyojlo niaya tlanechikojli niman ninomojtiaya”. Kachtopa, Lara kinemiliaya: “Xnejua notlajtlakol. Sekimej tokniuan noijki xmás kasikamatij yejon tokniuj”.

8. a) ¿Tlenon okichiuj Lara niman ijkon noyolseuis iuan yejon tokniuj? b) ¿Tlenon tiuelij itech tlen ipan onochiuj tokniuj Lara?

⁸ ¿Tlenon okichiuj Lara niman ijkon noyolseuis iuan yejon tokniuj? Yejua okichiuili teoyotl Jehová niman otlajto iuan tokniuj. Otlajtokej itech tlen panouaya, ononapalojkej niman onotlapopoluijkej. Nesiya ika yonoyektlalijka yejon tlauejli. San ika, Lara kijtoua: “Sakin, tokniuj oksejpa opeuj nexchiuilia ken kachtopa nexchiuiliaya. Melak oninajman”. Lara kinemiliaya ika san ueliskia yolpakis tla tokniuj xok ijkon kichiuiliskia. San ika, sakin, okasikamat ika más kuajli tla kititiaya ika kitlasojtlaya niman tla kitlapopoluiaya ika nochi iyojlo (Efes. 4:32–5:2). Noijki okilnamik ika akin yemelak tetlasojtla ijkon ken kineki Jesús, xkonilnamiktika tlen xkuajli kichiuiliaj, kixikoua nochi tlen xkuajli, kineki ika oksekimej kuajli manemikan, kineltoka tlen kuajli niman kimijyouiya oksekimej (1 Cor. 13:5, 7). Yejon okipaleui Lara oksejpa manemi ika iyojlo. Sakin, tokniuj akin xmás kinekiya kinotsas onopatlak niman opeuj más kuajli kinotsa. Tla tikyejyekouaj kuajli touikaskej imiuan tokniuan niman tla nochipa tikintlasojtlaj, uelis tikmatstoskej ika touan nemis “toDios yejuan kitemaka yolseuilistli niman tetlajsojtlalistli” (2 Cor. 13:11).

MAKA MATITECHIKOITAKAN

9. Ken kijtoua Hechos 10:34, 35, ¿tleka xnoneki titechikoitaskej?

⁹ Jehová xtechikoita (xpoua Hechos 10:34, 35). Ijkuak tejuamej noijki xtitechikoitaj, tikteititiaj ika tiikoneuan Jehová. Niman xsan yejon, ijkon tiktlakamatij tlanauatijli kampa kijtoua matikintlasojtlakan oksekimej ijkon ken tejuamej totlasojtlaj, niman noijki titlapaleuiyaj maonia yolseuilistli ipan ikalpan Jehová (Rom. 12:9, 10; Sant. 2:8, 9).

10, 11. ¿Tlenon okichiuj tokniuj Ruth niman ijkon xtechikoitas?

¹⁰ Kanaj sekimej ouijtika kitaj xtechikoitaskej. Matiknemilikan tlenon ipan onochiuj tokniuj Ruth. Ijkuak ichpokakonetl katka, se siuatl akin ualeuaya okse país okinchiuili ichanejkauan tlen xkuajli. Yejon okichiuj makintlauelita akin ualeuaj ipan yejon país. Yejua kijtoua: “Xitlaj niknekiya nikmatis itech yejon país. Niknemiliaya ika nochimej akin ompa chanejkej ijkon katkaj, hasta tokniuan”. ¿Tlenon okipaleui maka sa ijkon matlanemili?

¹¹ Ruth okasikamat ika nonekiya kipatlas ken tlanemiliaya. Okiamapouj tlen yonoijkuilo ipan Anuario kampa tlajtoua itech yejon país. Tokniuj kijtoua: “Oninokojtili nikitas tlen kuajli intech akin ualeuayaj ipan yejon país. Opeuj nikita ika tokniuan akin ompa chantij kitekichiuiliaj Jehová ika nochi inyojlo. Kuajli onikasikamat ika yejuamej noijki nokniuan”. Ika yolik, yejuin tokniuj okitak ika nonekiya kichiuas itlaj okse. Kijtoua: “Ijkuak nikimixmatiya oksekimej tokniuan akin ualeuayaj ipan yejon país, melak ninokojtiliaya kuajli nikinnotsas. Yejon onechpaleui más kuajli manikimixmati”. ¿Tlenon opanok sakin? Ruth kijtoua ika oajsik tonajli ijkuak xok kintlauelitaya akin ompa ualeuaj.

12. ¿Tlenon kichiuaya tokniuj Sarah?

¹² Sekimej kanaj xkimatij ika techikoitaj. Se tokniuj akin itoka Sarah kinemiliaya ika xtechikoitaya pampa xkinemiliaya tlen xkuajli intech oksekimej maski oksekan ualeuaj, maski tla kipiyaj noso xkipiyaj tomin, noso maski tla kipiyaj se tekitl ipan ikalpan Jehová noso ka. San ika, yejua kijtoua: “Onikitak ika kema nitechikoitaya”. ¿Tleka ijkon okijto? Nochimej ichanejkauan onomachtijkej universidad, kuakon, más kinekiya nosentlalis imiuan akin noijki onomachtijkaj universidad. Sejpa katka, hasta okijli se iamigo: “San ninosentlalia imiuan tokniuan akin onomachtijkej universidad, niman akin ka, ximiuan ninosentlalia”. Kuajli nesiya ika Sarah nonekiya kipatlas ken tlanemiliaya. ¿Tlenon okipaleui?

13. ¿Tlenon tiuelij itech tlen okichiuj Sarah niman ijkon xok techikoitas?

¹³ Se tlayekanketl ipan circuito okipaleui Sarah makita kanon nonekiya noyektlalis. Sarah kijtoua: “Tokniuj onechijli ika kuajli ken niktekichiuiliaya Jehová, ken nitlanankiliaya ipan tlanechikoltin niman kuajli nikasikamatiya Biblia. San ika, noijki onechijli ika nochimej akin más kasikamatstiuej Biblia, noijki noneki nokojtiliskej más yolyemankej yeskej, más teikneliskej niman kasikamatiskej ika xnochi uelij kichiuaj”. Sarah okichiuj tlen okijli tokniuj tlayekanketl ipan circuito niman okijto: “Onikitak ika melak ueyi kijtosneki ijkuak yakaj kuajli tenotsa niman tetlasojtla”. Sarah opeuj nopatla niman xok okinchikoitak tokniuan. Opeuj kita tlen kuajli kichiuayaj niman okasikamat tleka Jehová kintlasojtlaya. Xkeman tiknekij toueyimatiskej maski tla melak otomachtijkej. Tla tikintlasojtlaj tokniuan ika nochi toyojlo, xkeman tikinchikoitaskej (1 Ped. 2:17).

KUAJLI MATITESELIKAN

14. Itech tlen kijtoua Hebreos 13:16, ¿kenon nomachilia Jehová ijkuak kuajli titeseliaj?

¹⁴ Jehová melak paki ijkuak kuajli titeseliaj (xpoua Hebreos 13:16). Ijkuak ijkon tikchiuaj, Jehová kita ika yejua tikueyichiujtokej, niman más ijkon kita ijkuak tikinpaleuiyaj akin noneki yakaj makinpaleui (Sant. 1:27; 2:14-17). Yejua ika, Biblia techijlia kuajli matiteselikan (Rom. 12:13). Tla kuajli tikinseliaj oksekimej, tikimititiskej ika tikintlasojtlaj ika nochi toyojlo niman ika imiuan touikaj. Jehová yolpaki ijkuak tikintlayokoliaj oksekimej itlaj tlen uelis kikuaskej noso koniskej, ijkuak imiuan tinemij niman ijkuak tikinpaleuiyaj (1 Ped. 4:8-10). San ika, kanaj onias itlaj tlen techteltisnekis maka matitepaleuikan noso kuajli matiteselikan.

15, 16. a) ¿Tleka sekimej xmás kinekij teseliskej? b) ¿Tlenon okipaleui Edit kuajli mateseli?

¹⁵ Miyekej xmás kinekij teseliskej pampa kinemiliaj ika yejuamej xkinnamiki kichiuaskej yejon. Yejon tlen kinemiliaya se tokniuj siuakauajli akin itoka Edit. Ijkuak xinochiuaya iteixpantijkauj Jehová, yejua xmás tenotski katka. Ika yejon, kinemiliaya ika oksekimej kema kinnamikiya makinselikan tokniuan.

¹⁶ Ijkuak Edit onochiuj iteixpantijkauj Jehová, xok ijkon otlanemili niman onokojtili kuajli kinselis tokniuan. Yejua kijtoua: “Ijkuak onochijchiuj Kajli kampa tosentlaliaj, se tlayekanketl onechtlajtolti tla ueliskiaj nokauaskej nochan se tokniuj iuan isiuatsin akin uajtlapaleuiskiaj. Kuakon onitlanemili itech on siuakauajli akin chantiya Sarepta niman itech kenon Jehová okiteochiuj” (1 Rey. 17:12-16). Edit okinek kinseuis tokniuan. ¿Tlenon opanok pampa ijkon okichiuj? Yejua kijtoua: “Melak oniyolpak, xsan onokaujkej nochan ome semanas, onokaujkej ome metstli. Melak kuajli imiuan oninouikak”. Edit noijki melak kuajli imiuan nouika tokniuan akin nemij ipan itlanechikol. Aman precursora niman kuelita kinnotsas tokniuan akin imiuan tenojnotsa mauiyan ichan niman ijkon itlaj makonitij noso itlaj makikuatij. Kijtoua: “Nechyolpaktia niktemakas tlen nikpiya. Niman manimechonijli: nikinselia melak miyek tlateochiualistin” (Heb. 13:1, 2).

17. ¿Tlenon okasikamatkej tokniuj Luke niman isiuatsin?

¹⁷ Kanaj tikitaj ika tejuamej kuajli titeseliaj niman titepaleuiyaj, san ika ¿uelis tokojtiliskej más kuajli titeseliskej? Matikitakan tlenon okasikamatkej tokniuj Luke niman isiuatsin. Yejuamej miyekpa kinnotsayaj intajuan, inchanejkauan, iminamigos niman tlayekanketl ipan circuito iuan isiuatsin matlakuatij inchan. San ika, Luke kijtoua: “Otikasikamatkej ika nochipa san tikinnotsayaj akin más kuajli tikimixmatiyaj”. ¿Tlenon okichiujkej niman ijkon más kuajli kinseliskej tokniuan?

18. ¿Tlenon okichiujkej Luke niman isiuatsin niman ijkon más kuajli teseliskej?

¹⁸ Luke niman isiuatsin okasikamatkej tlenon kijtosneki kuajli titeselis ijkuak otlanemilijkej itech tlen okijto Jesús: “Tla nemejuamej nenkintlajsojtlaj san on yejuan mechtlajsojtlaj, ¿tlen tetlayokolijli nenkiseliskej itech Dios yejua ika on?” (Mat. 5:45-47). Kuajli okitakej ika nonekiya kichiuaskej ken Jehová, yejua nochimej kinmaka tlen kipiya. Kuakon, okijtokej kinnotsaskej tokniuan akin xkeman kinnotsayaj mauiyan inchan. Luke kijtoua: “Tinochimej techyolpaktia ijkuak tosentlaliaj imiuan oksekimej, más kuajli imiuan touikaj niman más chikaui totlaneltokil”.

19. ¿Kenon tikteititiaj ika tiinomachtijkauan Jesús, niman tlenon yotikijtokej tikchiuaskej?

¹⁹ Ipan yejuin tlamachtijli, yotikitakej ika tla titetlasojtlaj ika nochi toyojlo, tiknekiskej toyolseuiskej imiuan tokniuan, xtitechikoitaskej niman kuajli titeseliskej. Matikintlasojtlakan tokniuan ika nochi toyojlo niman maka matiknemilikan tlen xkuajli intech. Tla ijkon tikchiuaj, tiyolpakiskej niman tikteititiskej ika yemelak tiinomachtijkauan Jesús (Juan 13:17, 35).