Tlen notlajtoltiaj akin kitaj revistas

¿Kechmej kualneskayomej uelis tikinpiyaskej tla toTajtsin techmaka iespíritu santo? ¿Kanaj san yejon tlen noteneuaj ipan Gálatas 5:22, 23?

Ipan yejuin tlaxeloltin, noteneuaj chiknaui kualneskayomej. Itech Traducción del Nuevo Mundo, yejuin tlaxelojli kijtoua: “Itlakilyo espíritu santo yejuin: tlasojtlalistli, pakilistli, yolseuilistli, ijyouilistli, iknelilistli, yolkuajlilistli, tlaneltokijli, yolyemanilistli, noteltia iselti”. San ika, espíritu santo xsan yejuin kualneskayomej uelis techpaleuis matikinpiyakan.

Matikitakan tlen apóstol Pablo kachtopa yokijkuilojka: “On yejuan kichiuaj tlen xkuajli keleuiya intlalnakayo [...] auilnemij, kichiuaj tlen xkuajli niman xchipauak. Kinmauistiliaj ídolos, niman kichiuaj nauajlotl. Tlauelnemij, nokuajkualaniaj niman chauatij. San itlaj ikatsin nimantsin kualanij niman kichiuaj itlaj san para yejuamej. Texexelouaj niman ojonkuaj tesentlaliaj. Nexikolejkej, temiktianimej, tlauantinemij, kichiuaj iluitl yejuan tepinajtij, niman kichiuaj okseki tlajtlamach más yejuan sano ijki xkuajli” (Gál. 5:19-21). Kuakon, Pablo ueliskia kiteneuas okseki tlajtlamach tlen kichiuaj akin noyekanaj ika “tlen xkuajli keleuiya intlalnakayo”, pampa ijkon okichiuj ipan Colosenses 3:5. Yejuin techititia ika apóstol Pablo noijki ueliskia kinteneuas okseki kualneskayomej ipan Gálatas 5:22, 23. Ipan yejuin tlaxeloltin, Pablo xokinteneuj nochi kualneskayomej tlen espíritu santo uelis techpaleuis matikinpiyakan.

¿Tleka ijkon tikijtouaj? Matikilnamikikan tlen Pablo okimijkuilouili tokniuan akin chantiyaj Éfeso: “Nochimej yejuan nemij ipan tlauijli kijtouaj tlen melauak, niman kichiuaj tlen kuajli, niman yolmelajkej” (Efes. 5:8, 9). Ken tikitaj, nochimej akin nemij ipan tlauijli “kichiuaj tlen kuajli” noso kipiyaj yolkuajlilistli, yejuin se kualneskayotl tlen kiteititiaj akin toTajtsin kinmaka iespíritu santo. Yejuin kijtosneki ika Pablo ueliskia kijkuilos ipan Gálatas 5:22, 23 ika akin kipiyaj iespíritu santo toTajtsin noijki “kijtouaj tlen melauak” niman “yolmelajkej”.

Pablo noijki okijli Timoteo makinteititi yejuin chikuasen kualneskayomej: yolmelaualistli, yolchipaualistli, tlaneltokalistli, tetlajsojtlalistli, ijyouilistli niman yolyemanilistli (1 Tim. 6:11). Tikitaj ika Pablo okiteneuili Timoteo yeyi kualneskayomej tlen teuan itech itlakilyo espíritu santo: tlaneltokalistli, tetlajsojtlalistli niman yolyemanilistli. San ika, nonekiya espíritu santo makipaleui Timoteo niman ijkon uelis kinpiyas on okseki kualneskayomej tlen Pablo okiteneuili: yolmelaualistli, yolchipaualistli niman ijyouilistli (uelis tikitas Colosenses 3:12; 2 Pedro 1:5-7).

Ika yejon, ueli tikijtouaj ika Gálatas 5:22, 23 xkinteneua nochi kualneskayomej tlen noneki tikinpiyaskej akin tikchiuaj ken Cristo. Espíritu santo uelis techpaleuis matikinpiyakan nochi yejon chiknaui kualneskayomej tlen noteneuaj ipan Gálatas. San ika, onokej okseki kualneskayomej tlen techpaleuiskej machikaui totlaneltokil niman matotlakentikan ika “on yenkuik nemilistli” niman matimelajkanemikan “ken Dios yolmelajki niman yolchipauak” (Efes. 4:24).