¿Tikilnamiki?

¿Kuajli yotikinpouj revistas tlen san kemach yokiskej itech Amatl Tekakistilijketl? Xkita tla uelis tikinnankilis yejuin tlajtoltilistin:

¿Kenon noneki tikimitaskej akin tlapejpeniltin?

Tikintlakaitaj yejuin tokniuan pampa chikauak kipiyaj intlaneltokil, san ika, xtikinueyikaitaj (Jud. 16). Xtikintlajtoltiaj kenon okimatkej ika toTajtsin okintlapejpeni noso itlaj okse tlen xtechnamiki tikmatiskej (w20.01, página 29).

¿Tleka kuajli tikmatstokej ika Jehová techixmatstika toseselti?

Biblia techititia ika Jehová techixmatstoya achto tiuajtlakatiskiaj niman ika kinkaki nochi toteoyouan. Yejua kimatstika tlenon onka ipan toyojlo niman kimatstok tlenon tiknemilijtokej. Noijki, tlen tikchiuaj uelis kiyolpaktis noso kiyolkokos (1 Crón. 28:9; Prov. 27:11). Niman Jehová yokichiuj matiknisiuikan (w20.02, página 12).

¿Kemanon noneki titlajtoskej niman kemanon xnoneki?

Tejuamej melak tiyolpakij tikinnojnotsaskej oksekimej itech Jehová. Noneki titlajtoskej imiuan akin tikitaj ika kinekij kichiuaskej tlen xkuajli. Tlayekankej yejuamej akin melak nokojtiliaj kinpaleuiskej yejuin tokniuan. Xtitetlajtoltiaj nion xtikteijliaj kenon tokniuan kiueyichiuaj Jehová kampa tekiuajkej xkitekauiliaj. Xtikteijliaj tlen tikmatstokej itech tlanechikojli tlen oksekimej xnoneki kimatiskej (w20.03, páginas 20, 21).

¿Tlenon kijtosnekij on ome teotlajtoltin tlen tlajtouaj intech chapolimej tlen uajnestiuej ipan Joel 2 niman Apocalipsis 9?

Joel 2:20-29 kijtoua ika toTajtsin uejka kinuika chapolimej niman ika tekuepilis nochi tlen chapolimej okitlamijkej. Sakin, yejua kitoyaua iespíritu. Yejuin teotlajtojli onochiuj ijkuak soldados babilonios okixnamijkej Israel, niman seki tlemach sakin nochiua. Apocalipsis 9:1-11 tlajtoua intech tlapejpeniltin akin kiteijliaj ika yolchikaualistli tlen toTajtsin yokijto kichiuas ika tlayekapan. Akin kichiuaj tlen xkuajli xkuelkakij tlen kiteijliaj yejuin tokniuan (w20.04, páginas 3-6).

¿Akinon “rey del norte” ipan yejuin tonaltin?

Rusia niman akin kipaleuiyaj. Yejuamej xkikauiliaj ikalpan toTajtsin matenojnotsa pampa kitlauelitaj. “Rey del norte” yokixnamik “rey del sur” (w20.05, página 13).

¿Kechmej kualneskayomej uelis tikinpiyaskej tla toTajtsin techmaka iespíritu santo? ¿Kanaj san yejon tlen noteneuaj ipan Gálatas 5:22, 23?

Ka. Akin kipiyaj espíritu santo noijki “yolmelajkej” niman kipiyaj okseki kualneskayomej (Efes. 5:8, 9) (w20.06, página 17).

¿Tlenon ueliskia panos tla xkuajli tiknemiliaj tlenon tikijkuiloskej ipan redes sociales niman tlen tlaixkopinaltin niman videos tikintlejkoltiskej?

Tlen tiktlaliaj ipan redes sociales uelis kichiuas ika oksekimej makinemilikan ika toueyimatij niman ika xtiyolyemankej (w20.07, páginas 6, 7).

¿Tlenon tiuelij intech akin kuajli michajsij?

Akin kuajli michajsij komintejtemouaj michimej ijkuak kimatstokej ika uelis kinnextiskej niman yauej kampa kimatstokej ika nemij, kuajli kitekitiltiaj tlen ika michajsij niman tekitij ika yolchikaualistli maski kixnamikij tlen ouijtika. Tejuamej, akin titenojnotsaj, noijki uelis tikchiuaskej ken yejuamej (w20.09, página 5).

¿Kenon uelis tikpaleuiskej tonomachtijkauj más makitlasojtla Jehová?

Uelis tikyolchikauaskej mojmostla makiamapoua Biblia niman itech matlanemili. Noijki uelis tikititiskej kenon kinotsas Jehová (w20.11, página 4).

¿Akinomej kinteneujtoya Pablo ijkuak okijto ika “nochimej yejuan tekoneuan itech Cristo oksejpa yoliskej”? (1 Cor. 15:22).

Apóstol Pablo xkijtotoya tla nochimej tlaltikpakchanejkej yoliuiskej. Ijkuak okijto “nochimej”, kinteneujtoya tlapejpeniltin akin yokinyolchipaujkej (1 Cor. 1:2; 15:18) (w20.12, páginas 5, 6).

¿Tlenon kichiuaskej on tlapejpeniltin akin nimantsin yoliuij “ken ijkuak se iijkopi” ipan yejon tiempo ijkuak kipitsaskej “on sa ika nochi trompeta”? (1 Cor. 15:51-53).

Yejuamej kipaleuiskej Jesús niman ijkon kinyekanaskej nochi kalpamej ika “chikauak tekiuajyotl” (Apoc. 2:26, 27) (w20.12, páginas 12, 13).