Tiktekichiuiliaj toTajtsin akin “sanoyej ueyi iteiknelilis”

1. ¿Kanaj akinon tikilnamikij ijkuak titlanemiliaj itech yakaj akin teiknelia?

YAKAJ akin teiknelia tenotski, kineki kinpaleuis oksekimej niman kuelita kitemakas tlen kipiya. Kanaj tikilnamikij on samaritano akin Jesús okiteneuj. Yejuin samaritano melak “okiknelij” se judío akin okiuijuisojkej sekimej tlachtejkej. Pampa melak “okiknelij” okipaleui niman okuikak kampa ueliskia kitlajpiyaskiaj (Luc. 10:29-37). Tlen okichiuj yejuin tlakatl, techititia ika pampa toTajtsin techtlasojtla mojmostla techititia ika techiknelia.

2. ¿Tlenon okseki kichiua akin teiknelia?

² Yakaj akin teiknelia xkitechiuilia tlen xkuajli, maski akin yokichiuj tlen xkuajli kinamiki ijkon makichiuilikan. Jehová kuajli techititia ika techiknelia, pampa se salmista okijto: “Xtechcastigaroua ken kimelaua totlajtlakoluan” (Sal. 103:10). San ika, kemantika Jehová kema noneki kimelajkatlalis yakaj akin yotlajtlako.

3. ¿Tlenon tiknankiliskej ipan yejuin tlamachtijli?

³ Ipan yejuin tlamachtijli, yejuin tlen tiknankiliskej ika Biblia: ¿tleka Jehová teiknelia?, ¿tleka tikijtouaj ika Jehová kiteititia ika teiknelia ijkuak kikixtiaj yakaj itech tlanechikojli? niman ¿kenon uelis titeikneliskej ijkon ken yejua?

¿TLEKA JEHOVÁ TEIKNELIA?

4. ¿Tleka Jehová teiknelia?

⁴ Pampa tetlasojtla. Itechkopa espíritu santo, apóstol Pablo okijto ika toTajtsin kipiya “sanoyej ueyi iteiknelilis”. Nikan, Pablo kiteneujtoya kenon Jehová kimititia tokniuan akin tlapejpeniltin ika kimiknelia pampa, maski tlajtlakolejkej, kinkauilia manemikan ne iluikak (Efes. 2:4-7). San ika, Jehová xsan kimiknelia akin tlapejpeniltin. David okijto ipan se salmo: “ToTEKO kuajli iyojlo iminuan nochimej, niman ika iueyiteiknelilis sanoyej kuajli cuidaroua nochi on tlen okichijchiu” (Sal. 145:9). Pampa Jehová techtlasojtla, nochipa techititia ika techiknelia.

5. ¿Tleka Jesús kuajli kimatstok ika Jehová teiknelia?

⁵ Jesús kuajli kimatstok ika iTaj melak kuelita teiknelis. Ijkuak Jesús xiuajlaya ipan tlaltikpaktli, melak ouejkauj onen iuan iTaj ne iluikak (Prov. 8:30, 31). Miyekpa, okitak kenon iTaj kimikneliaya tlaltikpakchanejkej maski tlajtlakolejkej (Sal. 78:37-42). Ijkuak Jesús otemachti, noijki okiteititi ika teiknelia ijkon ken iTaj.

6. ¿Tlenon okijto Jesús para techititis ika Jehová melak teiknelia?

⁶ Ijkon ken otikitakej ipan okse tlamachtijli, Jesús otlajto itech se telpochtli akin onoyolkuep para okiteititi ika Jehová kuelita teiknelis. Yejuin telpochtli oyaj “ipan okse país kampa otlan kinajauiltia itomin ikan sen xkuajli nemilistli” (Luc. 15:13). Sakin, onoyolkuep itech nochi tlen xkuajli yokichiujka, onoyolyemanili niman oksejpa onokuep ichan. ¿Kenon okiseli itaj? Jesús okijto: “Ijkuak sanken uejka uajlaya, on itataj okontak niman okiknelij. Kemaj onotlaloj, okinamikito, okinapaloj niman okitenkuaj” noso okipipitso. Yejua xokipijpinaujti, yej okikneli, okitlapopolui niman oksejpa kuajli okiseli ichan. Maski yejuin tekoneuj yokichiujka miyek tlen xkuajli, itaj okitlapopolui pampa yonoyolkuepka. Tajtli akin Jesús okiteneuj kineskayotia Jehová. Ika yejuin tlen okijto, Jesús okiteititi ika iTaj kineki kintlapopoluis akin melauak noyolkuepaj (Luc. 15:17-24).

7. ¿Tlenon kichiua Jehová pampa tlamachilise niman teiknelia?

⁷ Pampa melak tlamachilise. Maski Jehová melak tlamachilise, xkijtosneki tla xtetlasojtla nion xteiknelia. Biblia kijtoua ika “on yejuan kipiyaj itlamatkilis Dios, [...] sanoyej teiknelianij, niman kitechiuiliaj miyek tlajtlamach tlen kuajli” (Sant. 3:17). Ijkon ken se tajtli akin melak tetlasojtla, Jehová kimatstika ika melak kinpaleuis ikoneuan tla kimiknelia (Sal. 103:13; Is. 49:15). Ipampa iteiknelilis, uelis tikpiyaskej se nemilistli tlen xkeman tlamis maski titlajtlakolejkej. Pampa yejua melak tlamachilise, techiknelia nochipa ijkuak kita ika noneki techiknelis. San ika, yejua noijki techmelajkatlalia ijkuak kita ika noneki.

8. ¿Kemantika tlenon noneki nochiuas, niman tleka?

⁸ Matikonnemilikan ika se itekipanojkauj toTajtsin kuajchiujtiuj se ueyi tlajtlakojli maski kimati ika xkuajli. Kuakon, ¿tlenon nonekiskia nochiuas? Itechkopa espíritu santo, apóstol Pablo okijkuilo: “Maka iuan xmonelokan” (1 Cor. 5:11). Akin xnoyolkuepaj kinkixtiaj itech tlanechikojli. ¿Tleka? Pampa ijkon kintlajpiyaj itekipanojkauan Jehová akin itech yolmelajkanemij niman noteititia ika ikalpan chipauak. San ika, sekimej kinemiliaj ika toTajtsin xteiknelia, ika yejon, kikixtiaj itech tlanechikojli akin yotlajtlako. Matikitakan tla yejon melauak.

¿TLEKA JEHOVÁ KITEITITIA IKA TEIKNELIA IJKUAK KIKIXTIAJ YAKAJ ITECH TLANECHIKOJLI?

9, 10. Itech tlen kijtoua Hebreos 12:5, 6, ¿tleka Jehová kiteititia ika teiknelia ijkuak kikixtiaj yakaj itech tlanechikojli? Xteneua itlaj tlen techpaleuiya matikasikamatikan.

⁹ Melak teyolkoko ijkuak ipan tlanechikojli kuajteijliaj ika yakaj akin tiktlasojtlaj “xok iteixpantijkauj Jehová”. Kanaj totlajtoltiaj tla melauak nonekiya makikixtikan. ¿Jehová kiteititia ika teiknelia ijkuak kikixtiaj yakaj itech tlanechikojli? Kema. Tla yakaj noneki makimelajkatlalikan, kititiskej ika kitlasojtlaj niman kikneliaj tla kimelajkatlaliaj (Prov. 13:24). ¿Itlaj ika kipaleuis akin yotlajtlako tla kikixtiaj itech tlanechikojli? Kema. Miyekej akin okichiujkej se ueyi tlajtlakojli sakin okitakej ika, pampa okinkixtijkej itech tlanechikojli, okinpaleui más kuajli matlanemilikan, manopatlakan niman manokuepakan itech Jehová (xpoua Hebreos 12:5, 6).

¹⁰ Matikonnemilikan ika se tlajpixketl kita ika se iborreguito kualo. Yejua kuajli kimatstika ika, tla kineki kipajtis yejon borreguito akin kualo, kipiya ika kixelos intech oksekimej borregos. San ika, borregos kuelitaj san sekan nemiskej niman tsajtsij ijkuak kinxelouaj. ¿Kijtosneki ika on tlajpixketl kixeloua iborreguito pampa xkitlasojtla? Ka, xyejon kijtosneki. Yejua kimatstika ika tla xkixeloua on borreguito akin kualo uelis kinkokolismauas oksekimej borregos. Ika yejon, ijkuak kixeloua on borreguito akin kualo, kintlajpiya on oksekimej borregos (uelis tikitas Levítico 13:3, 4).

11. a) ¿Tleka tikijtouaj ika yakaj akin kikixtiaj itech tlanechikojli yeskia ijkon ken se borreguito akin kualo? b) ¿Tlenon ok uelis kichiuaskej akin yokinkixtijkej itech tlanechikojli?

¹¹ Uelis tikijtoskej ika akin kikixtiaj itech tlanechikojli yeskia ijkon ken on borreguito akin kualo, pampa yejua yoijtlakauj itlaneltokil (Sant. 5:14). Ijkon ken yakaj akin kipiya se kokolistli tlen temaua, akin yoijtlakauj itlaneltokil noijki uelis kimijtlakos oksekimej. Ika yejon, akin xnoyolkuepaj noneki kinxeloskej itech tlanechikojli. Yejuin tlen nochiua kiteititia ika Jehová kintlasojtla akin nemij ipan tlanechikojli niman ika kineki kipaleuis manoyolkuepa akin yotlajtlako. Yakaj akin yokikixtijkej itech tlanechikojli ok uelis yas tlanechikoltin, kampa uelis kiselis tlen ika oksejpa kichikauas itlaneltokil. Noijki, uelis kintlajtlanis amatlajkuiloltin tlen ika nomachtis niman uelis kitas JW Broadcasting^®. Niman, ijkuak tlayekankej kitaj ika inopatlatiuj, kemantika uelis kijliskej tlenon más noneki kichiuas para makichikaua itlaneltokil niman ijkon oksejpa uelis yes iteixpantijkauj Jehová.b

12. ¿Tlenon noneki kichiuaskej tlayekankej tla akin yotlajtlako xnoyolkuepa?

¹² Maka matikilkauakan ika san kinkixtiaj itech tlanechikojli akin xnoyolkuepaj. Tlayekankej kuajli kimatstokej ika yejuin itlaj tlen xsan noneki kauilmatiskej. Niman noijki kimatstokej ika Jehová temelajkatlalia san “ken kimelaua” (Jer. 30:11). Kintlasojtlaj imikniuan niman xkinekiskiaj kichiuaskej itlaj tlen kichiuas maka sa manouikakan iuan Jehová. San ika, tlayekankej kemantika noneki kikixtiskej itech tlanechikojli akin yotlajtlako para kiteititiskej ika tetlasojtlaj niman teikneliaj.

13. ¿Tleka okikixtijkej se tokniuj itech tlanechikojli de Corinto?

¹³ Matikitakan tlenon okichiuj apóstol Pablo ipan kachtopa siglo, ijkuak se tlakatl akin kichiujtoya se ueyi tlajtlakojli xkinekiya noyolkuepas. Yejuin tokniuj de Corinto auilnentoya pampa chantiya iuan isiuauj itaj. ¡Melak xkuajli! Youejkauj, Jehová okimijlika israelitas: “Tla sen tlakatl notekas iuan isiuau itataj, tla ijkon, on tlakatl ixkoyejyeua itataj. On tlakatl niman on siuatl, nenkintlajtlakolmakaskej niman nenkinmiktiskej” (Lev. 20:11). Pablo xueliskia kimijlis tokniuan de Corinto makimiktikan yejon tlakatl, san ika, kema okimijli makikixtikan itech tlanechikojli. Tlen xkuajli kichiujtoya yejuin tlakatl, ikijtlakojtoya tlanechikojli. Sekimej hasta kinemiliayaj ika kanaj xse ueyi tlajtlakojli katka tlen kichiujtoya (1 Cor. 5:1, 2, 12, 13).

14. ¿Kenon Pablo okiteititi ika okikneli se tlakatl akin yokikixtijkaj itech tlanechikojli, niman tleka? (2 Corintios 2:5-8, 11).

¹⁴ Sakin, Pablo okimat ika yejuin tlakatl yonopatlaka. Niman ika melauak yonoyolkuepka. Maski yejuin tlakatl yokichiujka maka kuajli matlajtokan itech tlanechikojli, Pablo okimijli tlayekankej ika xkinekiya kichiuas ika on tlakatl más manoyolkoko. Pablo okimijli: “Noneki nenkitlapojpoluiskej niman nenkiyoltlaliskej para maka yej san ipampa on iajmanalis xok kinekis kitokas Cristo”. Apóstol Pablo okikneli yejuin tlakatl akin yonoyolkuepka niman xkinekiya ika sajnoye manajmana nion makinemili ika toTajtsin xok keman kitlapopoluiskia (xpoua 2 Corintios 2:5-8, 11).

15. ¿Kenon kiteititiaj tlayekankej ika temelajkatlaliaj niman teikneliaj san ken kinamiki?

¹⁵ Ijkon ken Jehová, tlayekankej noijki kuelitaj kiteititiskej ika teikneliaj. Temelajkatlaliaj ijkuak noneki, san ika, noijki kiteititiaj ika teikneliaj ijkuak kitaj ika akin yotlajtlako yemelak yonoyolkuep. Tla tlayekankej xkimelajkatlaliskiaj akin kichiua se tlajtlakojli, xkiteititijtoskiaj ika teikneliaj, yej kikaujtoskiaj manochiua tlen xkuajli ipan tlanechikojli. ¿Kijtosneki ika san tlayekankej noneki kiteititiskej ika teikneliaj?

¿TLENON TECHPALEUIS MATITEIKNELIKAN?

16. Itech tlen kijtoua Proverbios 21:13, ¿tlenon kinchiuilia Jehová akin xteikneliaj?

¹⁶ Tinochimej akin tiktekichiuiliaj Jehová, tiknekij titeikneliskej ijkon ken yejua. ¿Tleka? Pampa Jehová xkinkaki akin xkimikneliaj oksekimej (xpoua Proverbios 21:13). Pampa tiknekij ika Jehová nochipa makinkaki toteoyouan, tokojtiliaj titeikneliskej. Tejuamej nochipa tokojtiliaj tijkakiskej akin tlajyouijtika. Noijki, xsan tikauilmatij tlen Biblia techijlia ipan Santiago 2:13, kampa kijtoua: “On yejuan xteiknelia, Dios no xkiknelis. Pero on yejuan teiknelis nomanauis ijkuak Dios teyolkuitis”. Tla tiyolyemankej niman tikasikamatij ika tejuamej noijki noneki matechiknelikan, más tiknektoskej tikteititiskej ika titeikneliaj. Niman más tiknekij tikikneliskej akin uajnokuepa itech tlanechikojli.

17. ¿Kenon okiteititi tekiuaj David ika teikneliaya?

¹⁷ Biblia kinteneua sekimej itekipanojkauan toTajtsin akin techititiaj kenon titeikneliskej. Matontlanemilikan itech tekiuaj David, akin miyekpa okiteititi ika teikneliaya. Maski tekiuaj Saúl kinekiya kimiktis, David okikneli yejuin tekiuaj pampa kimatiya ika Jehová akin yokitekitlalijka. Niman xokiyejyeko notlakuepiltis noso kichiuilis itlaj tlen xkuajli (1 Sam. 24:9-12, 18, 19).

18, 19. Xteneua kemanon David xoteikneli.

¹⁸ San ika, David xnochipa oteikneli. San matikilnamikikan kenon David melak okualan niman okijto ika kimiktiskia Nabal niman nochimej tlakamej akin iuan chantiyaj san pampa okiuijuikalti niman xokinek kinmakas tlen kikuaskej. San ika, pampa Abigaíl, isiuauj Nabal, nimantsin okichiuj tlen nonekiya, David xotemikti (1 Sam. 25:9-22, 32-35).

¹⁹ Sejpatipan, teotlajtoketl Natán okitlajtlatouili tekiuaj David kenon se tlakatl akin kipiaya miyek tomin okichtekili iborreguita se tlakatl akin xkipiaya tomin. David melak okualan niman okijto: “¡Ninotlajtolmaka ika itokatsin Dios, ika on tlakatl yejuan ijkon okichiu, kitocaroua mikis!” (2 Sam. 12:1-6). Yejua kuajli kimatstoya ika itlanauatil Moisés kijtouaya ika, tla yakaj kiteichtekiliaya se borrego, nonekiya kintekuepilis naui borregos (Éx. 22:1). San ika, ijkuak David okijto ika yejon tlakatl nonekiya mikis okiteititi ika xteikneliaya. Natán okitlajtlatouili David itech yejon tlakatl pampa kinekiya kipaleuis makasikamati ika yejua más miyek tlajtlakojli yokichiujka. San ika, Jehová okikneli David, maski David xokikneli on tlakatl akin Natán okiteneuili (2 Sam. 12:7-13).

20. ¿Tlenon techmachtia tlen okichiuj David?

²⁰ Pampa David melak kualantoya, okijto ika Nabal niman nochimej itlakeualuan nonekiya mikiskej. Sakin, okijto ika on tlakatl akin Natán okiteneuj noijki nonekiya mikis. Kanaj totlajtoltiaj, ¿tleka se tlakatl akin melak kuajli iyojlo katka aman xoteikneli? Tikasikamatiskej tla tikitaj tlenon ipan nochiujtoya David. Ijkuakon, xkuajli nomachiliaya pampa melak yotlajtlakojka. Kuakon, tla yakaj xteiknelia kijtosneki ika xok kuajli onka itlaneltokil. Jesús okimelajkaijto: “Maka kaman xkintlajtlakolmakakan oksekimej, para Dios no xmechtlajtlakolmakas, pampa tla nemejuamej nentetlajtlakolmakaskej, Dios no mechtlajtlakolmakas” (Mat. 7:1, 2). Ika yejon, maka matitetlajtlakolmakakan, yej matokojtilikan tikimikneliskej oksekimej, ijkon ken toTajtsin kichiua.

21, 22. ¿Kenon uelis tikteititiskej ika titeikneliaj?

²¹ Yakaj akin teiknelia xsan kijtoua, yej noijki tepaleuiya. Ika yejon, tinochimej uelis tiknemiliskej kenon uelis tikinpaleuiskej tochanejkauan, tokniuan akin nemij ipan tlanechikojli noso akin tikinnojnotsaj. Tikitaskej ika onka miyek ken uelis tikteititiskej ika titeikneliaj. ¿Otikilnamijkej yakaj akin kineki makiyolseuikan? ¿Uelis yakaj tikitkiliskej tlen kikuas noso itlaj tlen kipoloua? ¿Nemi se tokniuj akin kemach youajnokuep itech tlanechikojli niman kineki makiyolchikauakan? ¿Uelis más titenojnotsaskej? Tla tikinpaleuiyaj, tikteititijtoskej ika titeikneliaj (Job 29:12, 13; Rom. 10:14, 15; Sant. 1:27).

²² Tla titlanemiliaj intech oksekimej, tikitaskej ika onka miyek ken uelis tikteititiskej ika titeikneliaj. Tla titeikneliaj, tikyolpaktiskej toTajtsin Jehová akin “sanoyej ueyi iteiknelilis”.