¡Maka xmosiaujkaua!

1. ¿Tleka melak tiyolpakij pampa tiiteixpantijkauan Jehová?

¡MELAK tiyolpakij pampa tiiteixpantijkauan Jehová! Ijkuak titenojnotsaj niman titemachtiaj, tikteititiaj ika tejuamej tikteixpantiaj itoka toTajtsin. Melak techyolpaktia tikpaleuiskej manochiua iteixpantijkauj Jehová yakaj akin kineki kipiyas “nemilistli para nochipa” (Hech. 13:48). Tomachiliaj ijkon ken Jesús ijkuak “on Espíritu Santo sanoyej okipakti” pampa inomachtijkauan okijlikej ika melak kuajli okinkakkej kampa otenojnotsatoj (Luc. 10:1, 17, 21).

2. ¿Kenon tikteititiaj ika melak noneki titenojnotsaskej?

² Tejuamej tikitaj ika melak noneki titenojnotsaskej. Apóstol Pablo ijkin okijli Timoteo: “Kuajli xkita ken timouikas niman kuajli xkita on tlen tiktemachtia”. Niman noijki okijli: “Tla ijkin tikchiuas, timomakixtis niman no tikinmakixtis on yejuan mitskakiskej” (1 Tim. 4:16). Yejuin techititia ika ijkuak titenojnotsaj tikinpaleuiyaj oksekimej para noijki mamakisakan. Pampa tikteixpantiaj itoka Jehová, nochipa tiknekij tikchiuaskej tlen kuajli. Nochipa tiknekij ika tlen tikchiuaj makiteititi ika tiktlakaitaj Jehová niman ika titlaneltokaj itech tlen tikteijliaj ijkuak titenojnotsaj (Filip. 1:27). Niman tikteititiaj ika xsan tikauilmatij totekiyo ijkuak kuajli tomachtiaj tlen tikteijliskej ijkuak tontenojnotsaskej niman ijkuak tiktlajtlaniliaj Jehová matechpaleui matitlajtokan imiuan oksekimej.

3. ¿Tlenon uelis panos maski tejuamej tokojtiliaj chikauak titenojnotsaskej? Xkijto tlenon okixnamijkej sekimej tokniuan.

³ Maski tejuamej melak tokojtiliaj chikauak titenojnotsaskej, kemantika sekimej xkinekij kikakiskej tlen tikteijliaj. San matontlanemilikan itech tlen ipan onochiuj tokniuj Georg Lindal, akin iselti otenojnots ne Islandia desde 1929 hasta 1947. Yejua melak miyek amatlajkuiloltin okintemakak, san ika, xakaj onochiuj iteixpantijkauj Jehová. Yejua okijkuilo: “Sekimej kitlauelitaj tlen kijtoua Biblia niman oksekimej xkipatiojkaitaj”. Sakin, ne Islandia oajsikej sekimej misioneros de Galaad, san ika, noijki xakaj onochiuj iteixpantijkauj Jehová. Sakin ika yopanokej 9 xiuitl, sekimej opeuj kitekichiuiliaj Jehová niman onoapolaktijkej.b

4. ¿Kanaj kenon tomachiliaj ijkuak akin tikinnojnotsaj xtechkakisnekij?

⁴ Ijkuak akin tikinnojnotsaj xkinekij techkakiskej, melak toyolajmanaj. Kanaj tomachiliaj ijkon ken apóstol Pablo, akin okijto ika kipiaya “sanoyej ueyi ajmantli” pampa miyekej judíos xokinejkej kineltokaskej ika Jesús yejua Mesías katka (Rom. 9:1-3). Niman, ¿kenon tomachiliaj tla, maski tokojtiliaj kuajli titemachtiskej niman tikchiuaj teoyotl, akin tikmachtiaj xnopatla niman noneki tijkajkauaskej ika tikmachtiaj? Noso ¿kenon tomachiliaj tla xakaj tikpaleuiyaj manoapolakti? ¿Kijtosneki ika xkuajli tikchiujtokej totekiyo niman ika Jehová xtechteochiujtika? Ipan yejuin tlamachtijli, tiknankiliskej yejuin: ¿tlenon kiteititia ika kuajli tikchiujtokej totekiyo? niman ¿tlenon uelis tikchiaskej ijkuak titenojnotsaj?

¿TLENON KITEITITIA IKA KUAJLI TIKCHIUJTOKEJ TOTEKIYO?

5. ¿Tleka tekitl tlen tikchiuaj ipampa Jehová xnochipa kisa ijkon ken tejuamej tiknekij?

⁵ Biblia kijtoua ika akin kichiua tlen toTajtsin kineki “nochi tlen kichiua [...] kuajli kisa” (Sal. 1:3). San ika, yejon xkijtosneki ika nochi tlen tikchiuaj ipampa Jehová nochipa kisas ken tejuamej tiknekij. Ijkon panoua pampa totlajtlakol kichiua matikpiyakan “miyek tlajyouilistli” (Job 14:1). Noijki, pampa akin techtlauelitaj kanaj sakin xok techkauiliskej matitenojnotsakan (1 Cor. 16:9; 1 Tes. 2:18). Kuakon, ¿kenon kita Jehová tla kuajli titenojnotstokej niman titemachtijtokej? Matikimitakan seki textos tlen techpaleuiskej matiknankilikan yejuin.

6. ¿Kenon kita Jehová tla kuajli titenojnotstokej niman titemachtijtokej?

⁶ Jehová kita kenon tokojtiliaj niman titlaxikouaj. Yejua kita ika kuajli tikchiuaj totekiyo ijkuak kuajli titenojnotsaj niman tikchiuaj ika tlasojtlalistli, maski miyekej xkinekij techkakiskej. Pablo okijkuilo: “Dios yolmelajki. Yejua xkelkauas nemotekiu nion on tetlajsojtlalistli yejuan onenkititijkej ijkuak onenkimpaleuijkej on tlaneltokakej, niman hasta aman nenkimpaleuiyaj” (Heb. 6:10). Jehová xkeman kilkaua kenon tokojtiliaj kuajli tikchiuaskej totekiyo niman kenon tikteititiaj ika titetlasojtlaj. Yejua ijkon kichiua maski xakaj tikpaleuiyaj manoapolakti. Kuakon, tlen Pablo okimijli corintios tejuamej noijki techyolseuiya, yejua okimijli: “On tekitl xsanenkaj nenkichiuaskej ijkuak nenkichiuaj san sekan iuan toTEKO” (1 Cor. 15:58). Kuakon, on tekitl tlen tikchiuaj xsan nenka maski xkisa ijkon ken tejuamej tiknekij.

7. ¿Tlenon tiuelij itech apóstol Pablo?

⁷ Apóstol Pablo melak kuajli otenojnots niman miyekan otepaleui manochijchiuakan tlanechikoltin. Maski ijkon, ijkuak sekimej tokniuan akin noueyimatiyaj opeuj kitejteneuaj niman okijtojkej ika xkuajli temachtiaya, yejua xokijto kechmej yokinpaleuijka manoapolaktikan, yej ijkin okinnankili: “Más sanoyej yonitekit” (2 Cor. 11:23). Matikchiuakan ijkon ken Pablo niman matikilnamikikan ika Jehová más kipatiojkaita ken tokojtiliaj niman ken titlaxikouaj.

8. ¿Tlenon noneki tikilnamikiskej itech ken tiktekichiuiliaj Jehová?

⁸ Jehová kiyolpaktia ken tiktekichiuiliaj. Sejpatipan, Jesús okomintitlan 70 inomachtijkauan matenojnotsatij itech iTekiuajyo toTajtsin. Ijkuak otlankej, Biblia kijtoua ika inomachtijkauan “onokuepkej ikan paktli”. ¿Tleka melak oyolpakej? Yejuamej okijtokej: “¡Hasta on xkuajkualtin espíritus otechtlakamatkej ijkuak otikinmajuakej ikan motokatsin!”. San ika, Jesús okimijli: “Maka xpakikan pampa tla on xkuajkualtin espíritus mechtlakamatij, yej xpakikan pampa nemotoka ye tlajkuilolnestikaj ne iluikak” (Luc. 10:17-20). Jesús kimatstoya ika, ijkuak yejuamej tenojnotsaskiaj, xnochipa onkisaskia ijkon ken yejuamej kinekiyaj. Tejuamej xtikmatij kechmej akin okinnojnotskej onochiujkej inomachtijkauan Cristo. San ika, Jesús okimijli inomachtijkauan ika xnonekiya yolpakiskiaj san pampa kuajli kinkakiyaj, yej nonekiya yolpakiskej pampa kimatstoyaj ika intekiyo kiyolpaktiaya Jehová.

9. Itech tlen kijtoua Gálatas 6:7-9, ¿tlenon tikseliskej tla xtijkajkauaj ika titenojnotsaj?

⁹ Tla xtijkajkauaj ika titenojnotsaj, tikpiyaskej nemilistli tlen xkeman tlamis. Ijkuak tokojtiliaj kuajli titenojnotsaskej niman kuajli titemachtiskej, tikteititiaj ika techyekana iespíritu santo toTajtsin. Tla xtosiaujkauaj, Jehová kijtoua ika techmakas nemilistli tlen xkeman tlamis maski tla xouel yakaj otikpaleuijkej manoapolakti (xpoua Gálatas 6:7-9).

¿TLENON UELIS TIKCHIASKEJ IJKUAK TITENOJNOTSAJ?

10. ¿Tleka ijkuak titenojnotsaj sekimej techkakij niman sekimej ka?

¹⁰ Xnochimej akin tikinnojnotsaj kuajli techkakiskej. Ijkuak Jesús otlajto itech se tokaketl, otechasikamachilti ika xnochimej akin tikinnojnotsaj san noijki kipiyaj inyojlo. Yejua okijto ika se tlakatl okitokak xinachtli ipan tlatlamantikej tlaltin, san ika, san otlatlakiltijkej on xinachtin tlen ouetskej ipan kuajli tlajli (Luc. 8:5-8). Jesús okijto ika on tlaltin “kijtosneki inyojlo on tlakamej yejuan kakij itlajtol Dios” (Luc. 8:11-15). Ijkon ken on tlakatl akin otokak, tejuamej noijki xuelis tikinchiualtiskej akin tikinnojnotsaj makineltokakan iTlajtol toTajtsin, pampa xtikmatij tlenon kipiyaj ipan inyojlo. Tejuamej san noneki tokojtiliskej nochipa titenojnotsaskej itech iTekiuajyo toTajtsin. Ijkon ken apóstol Pablo okijto: “Dios kitlaxtlauilis cada se ken kitocaroua ipampa itekiu”, xokijto tla ipampa ken onkisa itekiyo (1 Cor. 3:8).

11. ¿Tleka tikijtouaj ika Noé kuajli okichiuj itekiyo? (Xkita tlaixkopinajli tlen onka ixpan yejuin revista).

¹¹ Sekimej itekipanojkauan toTajtsin akin youejkauj onenkej noijki xokinkakisnejkej akin okinnojnotskej. San matontlanemilikan itech Noé. Yejua melak onokojtili kuajli tenojnotsas ipan miyek xiujtin (2 Ped. 2:5). Maski kichiaya kuajli makikakikan, Jehová xokijli tla ijkon panoskia. Ijkon tikijtouaj pampa ijkuak okijli kenon kichijchiuas akajli, okinauati: “Tejua tikalakis ijtik on akajli niman kalakiskej mouan mosiuau, motelpochuan niman mosiuamouan” (Gén. 6:18). Niman, ijkuak Noé okitak kech ueyi katka on akajli tlen Jehová okijli makichijchiua kanaj ouel okitak ika xmiyekej kikakiskiaj (Gén. 6:15). Niman ijkon onochiuj, xakaj okikak tlen okiteijli (Gén. 7:7). ¿Jehová okinemili ika Noé xkuajli okichiuj itekiyo? Ka, xijkon okinemili. Yejua okitak ika Noé kuajli okichiuj itekiyo pampa onokojtili kichiuas nochi tlen okinauati (Gén. 6:22).

12. ¿Tlenon okipaleui Jeremías matenojnotsa ika iyojlo maski xkikakisnekiyaj niman kitlaueltokayaj?

¹² Teotlajtoketl Jeremías noijki ouejkauj chikauak tenojnotsa maski miyekej xkikakisnekiyaj niman kitlauelitayaj. Pampa melak kiuijuikaltiayaj niman kipijpinaujtiayaj, onoyolkoko niman hasta xok kinekiya tenojnotsas (Jer. 20:8, 9). San ika, xonosiaujkauj. ¿Tlenon okipaleui kuajli matlanemili niman ika iyojlo matenojnotsa? Yejua okichiuj yejuin ome tlemach. Kachtopa: yejua kuajli kimatstoya ika tlen kiteijliaya ueliskia kinpaleuis akin kinnojnotsaya makipiyakan “on sanoyej kuajli tlamachalistli” (Jer. 29:11). Ika ome: yejua kuajli kimatstoya ika Jehová yokitlapejpenijka para makiteijli itlajtoltsin (Jer. 15:16). Tejuamej, noijki tikimijliaj tlaltikpakchanejkej itlaj tlen uelis kinmakas se tlamachialistli, noijki, tikteixpantiaj itoka Jehová. Ijkuak tejuamej titlanemiliaj itech yejuin ome tlemach, techpaleuiya matiyolpakikan ijkuak titenojnotsaj maski xtechkakisnekij.

13. ¿Tlenon techmachtia tlen Jesús okijto ipan Marcos 4:26-29?

¹³ Akin tikinnojnotsaj ika yolik noskaltijtiuj intlaneltokil. Jesús ijkon okiteititi ijkuak okiteneuj tlen kijtoua Marcos 4:26-29 (xpoua). Ompa, okijto kenon se tokaketl okitak kenon ika yolik onoskaltijtia ixinach niman ika xitlaj ouel okichiuj niman ijkon más totoka manoskalti. Noijki ijkon, tejuamej kanaj xnimantsin uelis tikitaskej kenon akin tikmachtiaj nopatlatiuj, pampa ika yolik noskaltijtiuj itlaneltokil. Ijkon ken se tokaketl xuelis kichiuas ika on xinachtli más totoka manoskalti, tejuamej noijki xuelis tikchiualtiskej akin tikmachtiaj más totoka makiskalti itlaneltokil, ijkon ken tejuamej tiknekiskiaj. Ika yejon, maka matoyolkokokan nion matosiaujkauakan tla tikitaj ika akin tikmachtiaj xnimantsin nopatla ijkon ken tejuamej tiknekiskiaj. Ijkon ken akin toka noneki tlamachias, tejuamej noijki noneki titlamachiaskej ijkuak titemachtiaj (Sant. 5:7, 8).

14. Xkijto itlaj tlen makiteititi ika kemantika uejkaui para matechkakikan akin tikinnojnotsaj.

¹⁴ Ipan seki kalpamej uejkaui melak miyek xiujtin ika titenojnotsaj niman xakaj nochiua iteixpantijkauj Jehová. Matikitakan tlenon ipan onochiuj Gladys niman Ruby Allen, omemej ikniujtin akin ualeuaj Canadá. Ipan 1959 okintitlankej ken precursoras regulares ipan se kalpantsin tlen onka Quebec.c Pampa católicos akin ompa chantiyaj kinmakasiyaj teopixkej niman xkinekiyaj makintejteneuakan, xkinkakiyaj tokniuan. Gladys kijtoua: “Ipan ome xiuitl, mojmostla titenojnotsayaj chikueyi horas maski xakaj techkakiya. Ijkuak akin ompa chantiyaj kitayaj ika tejuamej akin ompa yotajsikaj, xtechtlatlapouiliayaj niman oksejpa yayaj. Maski ijkon xotosiaujkaujkej”. Ika yolik, akin ompa chantij okimixmatstiajkej tokniuan niman opeuj kinkakij. Aman, ipan yejuin kalpan onkatij yeyi tlanechikoltin (Is. 60:22).

15. ¿Tlenon techmachtia tlen kijtoua 1 Corintios 3:6, 7?

¹⁵ Noneki miyekej matlapaleuikan para yakaj manochiua inomachtijkauj Cristo. Tinochimej uelis tikpaleuiskej yakaj akin kimachtijtokej Biblia manoapolakti (xpoua 1 Corintios 3:6, 7). Matikonnemilikan ika se tokniuj okimakak se tratado noso se revista yakaj akin kuajli okikak, san ika, yejuin tokniuj sakin kita ika xok uelis oksejpa kontlajpalos, kuakon, kijlia okse tokniuj yejua makitlajpaloti. Yejuin tokniuj peua kimachtia niman, ijkuak ontemachtia, kinuika tlatlamantikej tokniuan tlakamej niman siuamej akin melak kiyolchikauaj akin kimachtijtokej. Nochimej tokniuan akin teuan ontemachtiaj kipaleuiyaj akin kimachtiaj más machikaui itlaneltokil. Ijkon, nochiua tlen Jesús okijto ika “on yejuan tlatoka niman on yejuan pixka” san sekan yolpakij (Juan 4:35-38).

16. ¿Uelis tiyolpakis maski xok ueli titenojnotsa niman titemachtia ijkon ken yeuejkaui pampa xok tikojtik noso tikualo?

¹⁶ ¿Uelis tiyolpakis maski xok ueli titenojnotsa niman titemachtia ijkon ken yeuejkaui pampa xok tikojtik noso tikualo? Kema. Tejua noijki uelis tikpaleuis yakaj akin kimachtijtokej itech Biblia. Matikitakan tlenon opanok ijkuak tekiuaj David niman isoldados okintlankej amalequitas, akin yokintlachtekilijkaj niman yokinuikakaj inchanejkauan. Doscientos isoldados melak siaujtoyaj niman xueliskiaj ontlaixnamikiskej, yejua ika, onokaujkej para kitlajpiyaskej tlen kipiayaj. Sakin ika youajnokuepkej, tekiuaj David okijto ika nochi tlen okitekuilijkaj nochimej kinxelouiliskiaj (1 Sam. 30:21-25). Yejuin tlen ipan onochiuj tekiuaj David techititia ika noijki ijkon panoua ijkuak tikinpaleuiyaj oksekimej manochiuakan inomachtijkauan Cristo. Tinochimej akin tokojtiliaj kuajli tiktekichiuiliskej Jehová, ijkon ken tejua, uelis tiyolpakiskej ijkuak yakaj peua kixmati Jehová niman noapolaktia.

17. ¿Tleka noneki tiktlasojkamachiliskej Jehová?

¹⁷ Melak tiktlasojkamachiliaj Jehová pampa kipatiojkaita tlen tikchiuaj ipampa. Kimatstika ika xuelis tikinchiualtiskej oksekimej matechkakikan niman makitekichiuilikan. San ika, kema kita kenon tokojtiliaj niman ika nochi toyojlo tiktekichiuiliaj, niman techteochiua ipampa yejon. Noijki, techmachtia kenon uelis tiyolpakiskej san ika tlen ueli tikchiuaj ijkuak titenojnotsaj niman titemachtiaj (Juan 14:12). Maka matikilkauakan: tla xtosiaujkauaj, Jehová techteochiuas.