Tejua uelis tijkajkauas tlen xkuajli

1. ¿Tlenon tikchiuaya ijkuak xtimomachtiaya Biblia?

¿TLENON tikchiuaya ijkuak xitimomachtiaya Biblia imiuan iteixpantijkauan Jehová? Timiyekej nion xtiknekij tikilnamikiskej. Kanaj titlanemiliayaj niman tikchiuayaj ijkon ken akin xkitekichiuiliaj toTajtsin. Kuakon, tinemiyaj ijkon ken kijtoua Efesios 2:12: “Nennemiyaj ipan in tlaltikpaktli xikan tlamachalistli nion xnenkipiyayaj Dios”. San ika, nochi yejon onopatlak ijkuak opeuj tomachtiaj Biblia.

2. ¿Tlenon otiuel ijkuak tejua opeuj timomachtia Biblia?

² Ijkuak opeuj timomachtia Biblia, otiuel ika nemi se toTajtsin akin melak mitstlasojtla. Otikasikamat ika tla tiknekiya tikyolpaktis Jehová niman tinemis ipan ikalpan, nonekiya tikpatlas tlen tikchiua niman ken titlanemilia. Noijki, nonekiya peuas tikintlakamatis itlanauatiluan toTajtsin (Efes. 5:3-5).

3. a) Ken kijtoua Colosenses 3:9, 10, ¿tlenon kineki Jehová matikchiuakan? b) ¿Tlenon ika techpaleuis yejuin tlamachtijli?

³ Pampa Jehová yejua akin otexchijchiuj niman yejua toTajtsin, kinamiki matechijli tlenon noneki tikchiuaskej. Niman akin kinekij noapolaktiskej kimijlia: “Xok nennemij nion nemouikaj ken achtoj nemouikayaj”b (xpoua Colosenses 3:9, 10). ¿Tiknemilijtika timoapolaktis? Yejuin tlamachtijli mitspaleuis xkasikamati yejuin: ¿tlenon noneki tijkajkauaskej?, ¿tleka noneki tijkajkauaskej? niman ¿kenon uelis ijkon tikchiuaskej? Niman tla yotoapolaktijkej, yejuin tlamachtijli techpaleuis maka oksejpa matikchiuakan tlen yeuejkaui tikchiuayaj.

¿TLENON NONEKI TIJKAJKAUASKEJ?

4. ¿Tlenon kichiua yakaj akin xinopatla?

⁴ Yakaj akin xinopatla, ok nimantsin kualani, san itech tlanemilia, xtlaj kitetlasojkamachilia niman noueyimati. Yejua kanaj hasta kuelita kitas pornografía niman películas kampa nochiua tlen melak xkuajli. Niman maski najmana ijkuak kijtoua noso kichiua itlaj tlen xnoneki, xonka itlaj tlen makiyolmapeua para kinekis kipatlas ken tlanemilia niman tlen kichiua (Gál. 5:19-21; 2 Tim. 3:2-5).

5. ¿Tlenon xueli tikchiuaj pampa titlajtlakolejkej? (Hechos 3:19).

⁵ Pampa titlajtlakolejkej, xueli tikpopolouaj nochi tlen xkuajli tiknemiliaj niman tikileuiyaj. Kemantika uelis tikchiuaskej noso tikijtoskej itlaj tlen xtiknekiyaj (Jer. 17:9; Sant. 3:2). San ika, tla topatlaj, xok tikchiuaskej niman xok toyekanaskej ika tlen kileuiya totlalnakayo (Is. 55:7; xpoua Hechos 3:19).

6. ¿Tleka Jehová techijlia ika noneki tijkajkauaskej tlen xkuajli tiknemiliaj niman costumbres tlen xkuajkualtin?

⁶ Jehová techijlia ika noneki tijkajkauaskej nochi tlen xkuajli tiknemiliaj niman costumbres tlen xkuajkualtin pampa techtlasojtla niman kineki kuajli matinemikan (Is. 48:17, 18). Yejua kuajli kimatstika ika tla tikchiuaj nochi tlen tikileuiyaj, sa no tejuamej toyolkokoskej niman noijki tikinyolkokoskej oksekimej. Yejua xkineki ijkon topan manochiua.

7. Ken kijtoua Romanos 12:1, 2, ¿tlenon noneki tiktlapejpeniskej?

⁷ Kanaj sekimej tochanejkauan niman toamigos kemantika techpijpinaujtiaj pampa kitaj ika itopatlatokej (1 Ped. 4:3, 4). Kanaj yejuamej techijliaj ika uelis tikchiuaskej san tlen tejuamej tiknekiskej niman ika xakaj noneki techijlis tlenon noneki tikchiuaskej. San ika, akin xkitlakamatij Jehová xmelauak kichiuaj tlen yejuamej kinekij pampa Satanás kinyekantika (xpoua Romanos 12:1, 2). Kuakon, matiktlapejpenikan tla tiknekij matechyekana Satanás noso tla tijkauiliskej Jehová matechpatla para tikchiuaskej tlen kuajli (Is. 64:8).

¿KENON UELIS TIJKAJKAUASKEJ TLEN YEUEJKAUI TIKCHIUAYAJ?

8. ¿Kenon techpaleuiya Jehová para matopatlakan?

⁸ Jehová kimatstok ika xuelis nimantsin topatlaskej niman ika noneki tokojtiliskej para tijkajkauaskej nochi tlen xkuajli tiknemiliaj niman costumbres tlen xkuajkualtin (Sal. 103:13, 14). Jehová kikui Biblia, iespíritu santo niman ikalpan para techpaleuis matopatlakan. Kuajli tikmatstokej ika tejua yotikitak kenon Jehová yomitspaleui. Amantsin tikitaskej tlenon uelis tikchiuas para ok timopatlatias niman uelis timoapolaktis.

9. ¿Kenon uelis mitspaleuis iTlajtol toTajtsin?

⁹ Xtekitilti Biblia niman ijkon tikitas tlenon tikchiujtika. Biblia yeskia kentla se espejo, kuakon uelis mitspaleuis xkita kenon titlanemilia, kenon titlajtoua niman tlenon tikchiua (Sant. 1:22-25). ¿Kenon uelis mitspaleuis akin mitsmachtijtika Biblia niman oksekimej tokniuan akin chikauak kipiyaj intlaneltok? Yejuamej kitekitiltiskej Biblia para mitsijliskej tlenon kuajli tikchiujtika niman tlenon ok mitspoloua tikyektlalis, niman mitsititiskej kanon tiknextis tlen mitspaleuis xkajkaua tlen xkuajli tikchiua. Jehová yejua akin más uelis mitspaleuis, pampa yejua kimatstok tlenon onka ipan moyojlo (Prov. 14:10; 15:11). Ika yejon, nochipa xnotsa Jehová niman mojmostla xpoua iTlajtol.

10. ¿Tlenon mitsmachtia tlen ipan onochiuj Elie?

¹⁰ Kuajli xmatsto ika tlen Jehová technauatia yejon tlen más tepaleui. Nochi tlen Jehová techijlia techpaleuiya. Akin kitlakamatij tlen toTajtsin technauatia más kuajli nomachiliaj niman melak yolpakij (Sal. 19:7-11). San ika, akin kichiuaj tlen kileuiya intlalnakayo melak tlajyouiyaj. Tlen ipan onochiuj se tlakatl akin itoka Elie, techititia tlenon panoua ijkuak xtiktlakamatij tlen toTajtsin technauatia. Maski itajuan kitekichiuiliayaj Jehová, ijkuak yejua onoskalti oyaj imiuan iamigos akin kichiuayaj tlen xkuajli. Opeuj kinkui drogas, opeuj auilnemi niman noijki opeuj tlachteki. Kijtoua ika opeuj más totoka kualani niman hasta opeuj teuisoki. Elie kijtoua: “Nikchiuaya nochi tlen xnonekiya kichiuas yakaj akin kitekichiuilia toTajtsin”. San ika, xkeman okilkauj tlen itajuan okititijkej ijkuak konetl katka. Yejua ika, sakin oksejpa opeuj nomachtia Biblia, onokojtili kikajkauas nochi tlen kichiuaya niman onoapolakti ipan xiuitl 2000. ¿Kenon yokipaleui pampa aman kitlakamati tlen Jehová kijtoua? Elie kijtoua: “Aman ika noyojlo ninemi niman notlamachilis chipauak”.c Tlen ipan onochiuj Elie kuajli techititia ika akin xkitlakamatij tlen Jehová technauatia sa no yejuamej notlajyouiltiaj. San ika, Jehová kinektok kinpaleuis manopatlakan.

11. ¿Tlenon kitlauelita Jehová?

¹¹ Xtlauelita tlen Jehová kitlauelita (Sal. 97:10). Biblia kijtoua ika Jehová sajnoye kikualania akin “ikan iminixtololojuan kipanextiaj ika noueyimatij, ikan iminnepil sanoyej tlakajkayauaj, ikan iminmauan kinmiktiaj yakamej maski kuaj[k]ualtin tlakamej”. Noijki kintlauelita “on yejuan tlakajkayauaj niman temiktiaj” (Prov. 6:16, 17; Sal. 5:6). Ika yejon, ijkuak ipan itonaluan Noé miyekej opeuj kichiuaj tlen xkuajli, Jehová okinpopolo (Gén. 6:13). Teotlajtoketl Malaquías okijto ika Jehová noijki kitlauelita ijkuak yakaj akin yononamikti auilnemi san pampa kineki kikauas ixnamik. Akin ijkon kichiuaj xkiyolpaktiaj Jehová niman yejua kinyolkuitis (Mal. 2:13-16; Heb. 13:4).

12. ¿Tlenon kijtosneki tiktlauelitas tlen xkuajli?

¹² Ipan Romanos 12:9, Jehová techijlia: “Xtlauelitakan on tlen xkuajli”. ¿Tlenon kijtosneki tiktlauelitas tlen xkuajli? Kijtosneki ika nion achijtsin xtiknekis tikonitas itlaj noso tiknisiuis. San matikonnemilikan tlenon tikchiuaskiaj tla yakaj techijliskia matijkuakan itlaj tlen yomoloniak. Maski san tikonnemiliaj hasta telmoyauisnekij. Yejon tlen noneki tikmachiliskej ijkuak tiknekiskej tikchiuaskej itlaj tlen Jehová kitlauelita.

13. ¿Tleka noneki kuajli tikitaskej tlen tiknemiliaj?

¹³ Kuajli xkita tlen tiknemilia. Ijkuak itlaj tikchiuaj, kachtopa tiknemiliaj. Yejua ika, Jesús otechijli matotlajpiyakan para maka titlanemiliskej itech itlaj tlen uelis kichiuas matitlajtlakokan (Mat. 5:21, 22, 28, 29). Tla tiknekij tikyolpaktiskej Jehová, xnoneki tiknemiliskej tlen xkuajli.

14. ¿Tlenon kiteititia tlen tikijtouaj, niman tlenon noneki totlajtoltiskej?

¹⁴ Kuajli xkita tlen tikijtoua. Jesús okijto: “Tlen kisa ikamak sen tlakatl ualeua ipan iyojlo” (Mat. 15:18). Yejua ijkon okijto pampa tlen tikijtouaj kiteititia tlen onka ipan toyojlo. Kuakon xmotlajtolti: “¿Nochipa nikijtoua tlen melauak maski kanaj uelis nechijtlakos? Tla yoninonamikti, ¿xok yakaj okse nikitstinemi? ¿Nion achijtsin xnitlajtoua itech auilnemilistli? ¿Xniktlauelnotsa yakaj akin melak yonechkualani?”. San matikonnemilikan yejuin: ¿tlenon tikchiuaj ijkuak yoijtlakauj ikpatl tlen ika sasalijtika se totlaken? Kanaj nimantsin tikpatlaj yejon ikpatl. Noijki ijkon, matikpatlakan tlen xkuajli tikchiuaj, maka matikijtokan tlen xkuajli, maka matitekajkayauakan niman maka matitlajtokan itech auilnemilistli.

15. ¿Tlenon noneki tikchiuaskej tla tiknekij tikyolpaktiskej Jehová?

¹⁵ Xmokojtili timopatlas. Apóstol Pablo okijto itlaj tlen techpaleuiya matikasikamatikan ika melak noneki topatlaskej. Okijto ika ijkon ken Jesús okinokauili makipilokan ipan se kojtli melaktik pampa kinekiya kiyolpaktis Jehová, tejuamej noijki noneki kentla tikpiloskej ipan se kojtli melaktik nochi tlen xkuajli tikchiuaj (Rom. 6:6, TNM). Yejuin kijtosneki ika noneki tijkajkauaskej nochi tlen xkuajli tikchiuayaj niman costumbres tlen Jehová kintlauelita para tikyolpaktiskej. Tla ijkon tikchiuaj, chipaujtos totlamachilis niman nochipa uelis tinemiskej (Juan 17:3; 1 Ped. 3:21, TNM). Matikilnamikikan ika Jehová xkinpatlas itlanauatiluan san para techyolpaktis, tejuamej noneki topatlaskej para tikyolpaktiskej (Is. 1:16-18; 55:9).

16. ¿Tleka noneki timokojtilis para maka oksejpa tikchiuas tlen xkuajli?

¹⁶ Xmokojtili para maka oksejpa tikchiuas tlen xkuajli. Sakin ika yotimoapolakti ok nonekis timokojtilis para xtikchiuas tlen xkuajli. San xontlanemili itech tlen ipan onochiuj tokniuj Maurício, yejua desde ijkuak telpochtli katka opeuj kinuelita tlakamej. Sakin okimixmat iteixpantijkauan Jehová, opeuj nomachtia Biblia, onopatlak niman ipan 2002 onoapolakti. Maski youejkauj ika kitekichiuilijtika Jehová, yejua kijtoua: “Kemantika ok nikileuiya tlen yeuejkaui nikchiuaya, san ika, ninokojtilia xok ijkon nitlanemilis”. Yejua xsan ijkon ouajnokauj, pampa kijtoua: “Nechyolpaktia nikmatis ika tla xnikchiua tlen noyojlo kineki, nikyolpaktis Jehová”.d

17. ¿Kenon mitsyolchikaua tlen ipan onochiuj Nabiha?

¹⁷ Xtlajtlanili Jehová mamitspaleui niman mamitsmaka iespíritu santo (Gál. 5:22; Filip. 4:6). Noneki melak timokojtilis tla tikneki tijkajkauas tlen yeuejkaui tikchiuaya. Xkita tlen ipan onochiuj se siuatl akin itoka Nabiha. Ijkuak yejua kipiaya chikuasen xiuitl, itaj okinkaujteuj. Yejua kijtoua: “Tlen okichiuj notaj melak onechyolkoko”. Ijkuak onoskalti, opeuj san nochi kikualania niman melak tetlaueltik katka. Pampa opeuj kinemaka drogas, okajsikej niman okitsajkej. Sekimej iteixpantijkauan Jehová akin ontenojnotsayaj ipan cárcel opeujkej kimachtiaj Biblia. Niman sakin yejua opeuj nopatla. Nabiha kijtoua: “Seki tlen nikchiuaya ouel nimantsin onijkajkauj, san ika, ouijtika onikitak nikajkauas tabaco”. Maski ouejkauj ipantsin se xiuitl, ouel okikajkauj tabaco. ¿Tlenon okipaleui? Yejua kijtoua: “Ouel onijkajkauj pampa nochipa niktlajtlaniliaya Jehová manechpaleui. Kuajli nikmatstika ika tla nejua ouel oninopatlak para nikyolpaktis Jehová, nochimej uelis kichiuaskej”.e

TEJUA UELIS TIMOAPOLAKTIS

18. Ken kijtoua 1 Corintios 6:9-11, ¿tlenon ouel okichiujkej miyekej itekipanojkauan toTajtsin?

¹⁸ Ipan kachtopa siglo, Jehová okintlapejpeni sekimej tlakamej niman siuamej para tekiuajtiskej iuan Cristo. Sekimej yokichiujkaj tlen melak xkuajli, yoauilnenkaj, yotlachtejkaj, sekimej tlakamej kinuelitayaj tlakamej niman sekimej siuamej kinuelitayaj siuamej. San ika, ouel onopatlakej pampa okinpaleui iespíritu santo toTajtsin (xpoua 1 Corintios 6:9-11). Ipan yejuin tonaltin, melak miyekej yokinpaleui Biblia para makikajkauakan nochi tlen xkuajli niman costumbres tlen toTajtsin xkinuelita.f Tlen yejuamej okichiujkej mitsititia ika tejua noijki uelis timopatlas niman tijkajkauas tlen toTajtsin kitlauelita niman ijkon timoapolaktis.

19. ¿Tlenon tikitaskej ipan okse tlamachtijli?

¹⁹ Akin kinekij noapolaktiskej xsan noneki kikajkauaskej nochi tlen xkuajli kichiuayaj, noijki noneki peuaskej kichiuaskej tlen toTajtsin kitlajtlani. Ipan okse tlamachtijli tikitaskej kenon uelis ijkon tikchiuaskej niman kenon oksekimej uelis techpaleuiskej.