Telpokamej, ¿tlenon noneki nenkichiuaskej tla yonemoapolaktijkej?

1. ¿Tlenon yokichiujkej miyekej telpokamej?

SEJSE xiuitl miyekej telpokamej niman ichpokamej noapolaktiaj. ¿Tejua noijki yotimoapolakti? Tla kema, kuajli xmatsto ika tokniuan niman Jehová melak yolpakij (Prov. 27:11). San xkonnemili nochi tlen yotikchiuj. Melak otiuejkauj otimomachti Biblia niman yejon omitspaleui xneltoka ika Biblia iTlajtol toTajtsin. Niman noijki aman itikixmati Jehová, akin okichijchiuj Biblia, niman melak tiktlasojtla. Ika yejon, otimosentemakak niman otimoapolakti. ¡Melak kuajli tlen otikchiuj!

2. ¿Tlenon tikitaskej ipan yejuin tlamachtijli?

² Kanaj ijkuak tejua xtimoapolaktiaya, Satanás melak omitstlatlatak. San ika, aman más mitstlatlatas pampa yejua kineki xtlalkaui Jehová niman maka xtlasojtla (Efes. 4:14). Maka xkauili mamitstlani Satanás. San ika ¿tlenon mitspaleuis xmelajkanemi itech Jehová niman xchiua tlen otikijto ijkuak otimosentemakak? Noneki timopatlatias niman más tikchikaujtias motlaneltokil (Heb. 6:1). Niman ipan yejuin tlamachtijli tikitaskej kenon uelis tikchiuas yejuin.

¿KENON UELIS MÁS TIKCHIKAUAS MOTLANELTOK?

3. ¿Tlenon noneki kichiuaskej akin yonoapolaktijkej?

³ Ijkuak yakaj noapolaktia, noneki kichiuas tlen apóstol Pablo okimijli tokniuan akin chantiyaj Éfeso. Yejua okimijli: “Ijkon titoskaltijtiaskej ipan tonemilis” (Efes. 4:13). Kentla kimijliskia “Matikchikaujtiakan totlaneltok”. Pablo okijto ika ijkuak yakaj kichikaua itlaneltok, yeskia ken ijkuak se konetsintli noskaltia. Ijkuak tajtin kipiyaj se inkonetsin, melak yolpakij, san ika, kimatstokej ika inkoneuj xnochipa yes se konetsintli pampa noneki noskaltis (1 Cor. 13:11). Akin tikchiuaj ken Cristo tiyeskiaj ken yejon konetsintli: ijkuak toapolaktiaj noneki toskaltijtiaskej noso tikchikaujtiaskej totlaneltok. Matikitakan tlenon uelis mitspaleuis tla yotimoapolakti.

4. ¿Tlenon mitspaleuis xchikaua motlaneltok, niman tleka? (Filipenses 1:9).

⁴ Más xtlasojtla Jehová. Kuajli nesi ika tejua melak tiktlasojtla Jehová, san ika, uelis más tiktlasojtlas. Sejpatsin apóstol Pablo okitlajtlanili Jehová makinpaleui tokniuan akin chantiyaj Filipos “más ma miyekiya” intlasojtlalis, ika yejon, tikijtouaj ika tejua noijki uelis más tiktlasojtlas Jehová (xpoua Filipenses 1:9). San ika ¿kenon uelis más tiktlasojtlas? Pablo okijto: “[Ika] nemotlamatkilis niman nemokajsikamatilis”. Yejuin kijtosneki ika ijkuak más tikixmatis Jehová, más tiktlasojtlas, más tikuelitas tlen kichiua, nochipa tiknekis tikyolpaktis niman xkeman tiknekis tikyolkokos. Noijki más tiknekis tikmatis tlen kuelita Jehová, niman tla itikmati, timokojtilis tikchiuas tlen yejua kuelita.

5, 6. ¿Kenon uelis más tiktlasojtlaskej Jehová?

⁵ Noijki uelis tiktlasojtlaskej Jehová tla tikixmatij iKoneuj. ¿Tleka? Pampa yejua kichiua ijkon ken iTaj (Heb. 1:3). Niman tla tejua tikinamapoua on naui Evangelios tlen uajlauej ipan Biblia, mitspaleuis kuajli xkixmati Jesús. ¿Tejua mojmostla tikamapoua moBiblia? Tla ka, uelis aman tipeuas. Xkita kenon katka Jesús ijkuak tikamapouas ipan Evangelios tlen okichiuj niman tlen okijto. Yejua nochimej kuajli kinnotsaya, ika yejon, miyekej kinisiuiayaj. Yejua noijki hasta kinnapalouaya kokonej (Mar. 10:13-16). Noijki, inomachtijkauan kuajli nomachiliayaj ijkuak iuan nemiyaj; ika yejon, ueliyaj kijliayaj nochi tlen kimachiliayaj (Mat. 16:22). Jesús ijkon katka pampa okinokixti iTajtsin Jehová. Jehová kinektika matiknotsakan, ika yejon, tikijliaj nochi tlen tikmachiliaj, niman kuajli tikmatstokej ika yejua xtechtejteneuas. Yejua melak techtlasojtla niman kineki techpaleuis (1 Ped. 5:7).

⁶ Jesús melak teikneliaya. Apóstol Mateo otechijli: “Ijkuak Jesús okintak on tojlamej, sanoyej okimiknelij, pampa yejuamej najmanayaj niman xkipiyayaj yolchikaualistli. Yejuamej nemiyaj ken on borreguitos yejuan xkipiyaj intlajpixkau” (Mat. 9:36). Jesús noijki okijto ika iTaj, Jehová, melak teiknelia, yejua okijto: “Xkineki para semej yejuamej in konetsitsimej ma poliuikan” (Mat. 18:14). ¡Melak tiyolpakij pampa Jehová melak techtlasojtla! Kuakon, tla más tikixmatij Jesús, más tiktlasojtlaskej Jehová.

7. ¿Kenon uelis mitspaleuiskej tokniuan akin chikaujtok intlaneltok?

⁷ Tla tejua timouika imiuan tokniuan akin chikaujtok intlaneltok, noijki mitspaleuis más xtlasojtla Jehová niman más xchikaua motlaneltok. Yejuin tokniuan nochipa yolpaktinemij niman ika inyojlo kitekichiuiliaj Jehová, niman xnoyolkuepaj itech tlen yokitlapejpenijkej kichiuaskej. Kuakon, xkintlajtolti tlenon inpan yonochiuj niman tlenon yokinpaleui. Niman ijkuak itlaj tiktlapejpenis, xkimijli mamitspaleuikan. Xkilnamiki ika Biblia kijtoua: “Miyekej kuajkualtin tetlakanonotskej, kimanauiskej on nación” (Prov. 11:14).

8. ¿Tlenon uelis tikchiuas tla tiometlamati itech tlen kijtoua Biblia?

⁸ Tla tiometlamati, xmomachti. Ipan párrafo 2 otikitakej ika Satanás xkineki xchikaua motlaneltok, ika yejon, kineki xometlamati. Yejua kinekiskia maka sa xneltoka tlen kijtoua Biblia. Ajsis tonajli ijkuak sekimej mitsijliskej ika xnemi se toTajtsin akin otexchijchiuj niman ika tejuamej tinemij ipampa evolución. Kanaj tejua xtitlanemiliaya itech yejuin pampa tipitentsin katka, san ika, aman ika yotiueyiyak, kanaj yejon tlen mitsmachtiskej ipan moescuela. Tlen kijtoskej momaestros uelis kichiuas xometlamati niman uelis peuas tiknemilis ika yemelak tlen kijtouaj. San ika, xkilnamiki ika yejuamej kanaj xnomachtiaj itech toTajtsin akin otexchijchiuj. Xkilnamiki tlen kijtoua Proverbios 18:17: “Yejuan achtoj tlajtoua para nomanauis, nesi ken melauak tlen kijtoua. Pero ijkuak yejko on itlauelikniu, yejua kipanextia ika xmelauak tlen okijtoj”. Yejuin texto mitsititia ika xnoneki tikneltokas nochi tlen mitsijliaj ipan escuela. ¿Tlenon uelis tikchiuas? Kuajli xmomachti iTlajtol toTajtsin. Ipan toamatlajkuiloluan xtejtemo kampa tlajtoua itech evolución. Noijki xtlajto imiuan tokniuan akin tlaneltokayaj itech evolución niman xkintlajtolti tlenon okinpaleui makineltokakan ika yemelak nemi toTlachijchiujkauj Jehová.b Tlen mitsijliskej yejuin tokniuan mitspaleuis xneltoka ika yemelak nemi akin otexchijchiuj.

9. ¿Tlenon mitsmachtia tlen ipan onochiuj Melissa?

⁹ Tokniuj Melissa melak okipaleui ijkuak opeuj nomachtia itech tlen toTajtsin okichijchiuj.c Yejua kijtoua: “Ipan escuela mitstlaneltokiltiskej itech evolución. Niman nejua xniknekiya más ninomachtis itech evolución pampa niknemiliaya ika tla más ninomachtiaya, xok nitlaneltokaskia itech Jehová. San ika, onikilnamik ika Jehová kineki matiktekichiuilikan pampa tikmatstokej ika yemelak nemi. Ika yejon, opeuj ninomachtia niman onikamapouj libro ¿Existe un Creador que se interese por nosotros? niman folletos ¿Es la vida obra de un Creador? niman El origen de la vida. Cinco cuestiones dignas de análisis. Yejuin amatlajkuiloltin melak onechpaleuijkej. ¡Tleka xnimantsin onikinpouj!”.

10, 11. ¿Tlenon mitspaleuis tla xtikneki tikchiuas tlen tikileuiya? (1 Tesalonicenses 4:3, 4).

¹⁰ Maka xchiua tlen tikileuiya. Tla tejua titelpochtli noso tiichpochtli, kanaj kemantika tiknekis timotekas iuan yakaj niman kanaj sekimej uelis mitschiualtiskej xauilnemi. Niman Satanás kineki xchiua tlen tikileuiya. ¿Tlenon mitspaleuis tla xtikneki tikchiuas tlen Satanás kineki? (xpoua 1 Tesalonicenses 4:3, 4). Xnotsa Jehová, xkijli kenon timomachilia niman xtlajtlanili mamitspaleui (Mat. 6:13). Xkilnamiki ika Jehová kinektika mitspaleuis niman ika xkeman mitstejteneuas (Sal. 103:13, 14). Biblia noijki uelis mitspaleuis. Melissa, akin kemach otikteneujkej, kijtoua ika yejua kinemiliaya tlen tsokuiltik. Yejua kijtoua: “Melak onechpaleui ika mojmostla nikpouaya noBiblia pampa nechilnamiktiaya ika nejua yoninosentemakak itech Jehová niman ika niknekiya nochipa niktekichiuilis” (Sal. 119:9).

¹¹ Xkilnamiki ika xsan moselti tinemi, motaj noso monan uelis mitspaleuiskej. Ika yejon, maski kemantika tepinajti noso ouijtika tlen tikmachilia, noneki tikimijlis. Melissa kijtoua: “Oniktlajtlanili Jehová manechyolchikaua para uelis nikijlis notaj tlen nikmachiliaya. Niman ijkuak nochi onikijli notaj, oniuajyolseuj. Niman nikmatstoya ika Jehová okuelitak tlen onikchiuj”.

12. ¿Tlenon mitspaleuis xtlapejpeni tlen kuajli?

¹² Xchiua tlen Biblia kijtoua. Ijkuak más tiueyixtias, sa no tejua tiktlapejpenis tlen tikchiuas. San ika, xkilnamiki ika ok tikonetl niman ika uelis miyekpa timopopolos. San ika ¿tlenon uelis tikchiuas tla xtikneki tikyolkokos Jehová niman tla tikneki nochipa iuan timouikas? (Prov. 22:3). Tokniuj Kari kijtoua tlenon okichiuj ijkuak ononek itlaj kitlapejpenis. Yejua okitak ika akin chikaujtok intlaneltok xsan noyekanaj ika tlanauatiltin, yejuamej noijki kitaj kenon tlanemilia Jehová. Kari kijtoua: “Xsan noneki nikimixmatstos nochi tlanauatiltin tlen uajlauej ipan Biblia, yej noneki nikmatstos tlenon kinemilia Jehová itech tlen nikneki nikchiuas”. Ijkuak tikamapouas moBiblia, xmotlajtolti: “¿Tlenon nechmachtia yejuin itech ken Jehová tlanemilia? ¿Yejuin tlaxelojli uelis nechpaleuis manikchiua tlen kuajli? ¿Kenon nechpaleuis tla nikchiua tlen kijtoua yejuin tlaxelojli?” (Sal. 19:7; Is. 48:17, 18). Tla tikamapoua moBiblia niman itech titlanemilia, tiktlapejpenis tlen kuajli niman melak tikyolpaktis Jehová. Tla tikasikamati kenon tlanemilia Jehová, xok san timoyekanas ika tlanauatiltin. Tla ijkon titlanemilia, kijtosneki ika ichikaujtok motlaneltokil.

13. ¿Kenon uelis mitspaleuiskej moamigos akin chikaujtok intlaneltok? (Proverbios 13:20).

¹³ Xkintejtemo moamigos akin kitlasojtlaj Jehová. Ken otikitakej ipan párrafo 7, moamigos uelis mitspaleuiskej más machikaui motlaneltok (xpoua Proverbios 13:20). Tokniuj Sara xok más yolpakiya ijkuak kitekichiuiliaya Jehová. ¿Tlenon okipaleui? Yejua kijtoua: “Onikinnexti sekimej noamigos akin onechpaleuijkej ijkuak melak niknekiya manechpaleuikan. Nochi semanas ninosentlaliaya iuan se noamiga niman san sekan tomachtiayaj Amatl Tekakistilijketl, niman okse noamiga onechpaleui manitlanankili ipan tlanechikoltin. Noamigos onechpaleuijkej más maninomachti niman manikchiua teoyotl. Sakin, opeuj más kuajli ninouika iuan Jehová niman opeuj más niyolpaki”.

14. ¿Kenon Julien okinnexti iamigos akin melak okipaleuijkej?

¹⁴ ¿Tlenon uelis tikchiuas tla tikneki tikinpiyas moamigos akin uelis mitspaleuiskej? Se tokniuj tlayekanketl akin itoka Julien kijtoua: “Ijkuak nitelpochkonetl katka opeuj kuajli ninouika imiuan akin nitenojnotsaya. Onikitak ika noamigos melak yolpakiyaj ijkuak tenojnotsayaj niman nejua noijki niknekiya ijkon niyolpakis, ika yejon, opeuj nikita kenon uelis más niktekichiuilis Jehová. Noijki onikitak ika san ninouikaya imiuan notelpochikniuan, ika yejon, opeuj nikintejtemoua noamigos akin más iuejueyimej katkaj pampa yejuamej noijki ueliskiaj nechpaleuiskej. Niman ijkuak onitlapaleuito Betel noijki onikinnexti noamigos akin melak onechpaleuijkej. Yejuamej onechpaleuijkej kuajli maniktlapejpeni tlen ika ninoyolpaktis, niman yejon okichiuj más kuajli maninouika iuan Jehová”.

15. ¿Tlenon okijlikej Timoteo? (2 Timoteo 2:20-22).

¹⁵ ¿Niman tla tikita ika ipan motlanechikol nemi yakaj akin uelis mitsijtlakos? Ipan kachtopa siglo, apóstol Pablo kimatstoya ika ipan tlanechikojli nemiyaj sekimej akin xchikaujtoya intlaneltokil. Ika yejon, okijli Timoteo maka melak imiuan manosentlali (xpoua 2 Timoteo 2:20-22). Melak tiktlasojkamatij pampa ueli touikaj iuan Jehová. Kuakon, matokojtilikan kuajli touikaskej iuan Jehová niman maka matikchiuakan itlaj tlen kichiuas maka sa iuan matouikakan (Sal. 26:4).

XKITA KENON UELIS MÁS TIKUEYICHIUAS JEHOVÁ

16. ¿Tlenon uelis tikchiuas tla tikneki más machikaui motlaneltok?

¹⁶ Xchiua tlen más kichikauas motlaneltok (Efes. 3:16). ¿Tlenon uelis tikchiuas? Kanaj uelis san moselti timomachtis nochi semanas niman mojmostla tikamapouas moBiblia (Sal. 1:2, 3). Noso kanaj uelis más miyekpa tikchiuas teoyotl niman tikijlis Jehová nochi tlen tikmachilia. Noso kanaj uelis más kuajli tiktekitiltis motiempo niman más kuajli tiktlapejpenis tlen ika timoyolpaktis (Efes. 5:15, 16). Jehová melak yolpaki ijkuak kita kenon timokojtilia más tikchikauas motlaneltok.

17. ¿Kenon mitspaleuis tla tikinpaleuiya oksekimej?

¹⁷ Ijkuak tikinpaleuiya oksekimej, más chikaui motlaneltok. Jesús okijto: “Más paki yejuan kitemaka xken on yejuan kiselia” (Hech. 20:35). Melak mitspaleuis tla tiktekitiltia motiempo niman mokojtilis para tikinpaleuis oksekimej. ¿Kenon uelis titepaleuis? Tla ipan motlanechikol nemij tokniuan akin iueuentsitsintin noso akin kualoj, uelis tikomintlakouilis noso tikinpaleuis mauelikan makintekitiltikan inteléfonos noso intabletas. Tla titlakatl niman yotimoapolakti, xmokojtili para uelis titlapaleuijketl yes ipan motlanechikol, ijkon más tikinpaleuis tokniuan (Filip. 2:4). Noijki uelis tikimititis oksekimej ika tikintlasojtla tla tikimijlia tlen kualtsin kichiuas toTajtsin (Mat. 9:36, 37). Noijki xkita tla uelis más chikauak tiktekichiuilis Jehová ipan ikalpan.

18. ¿Kenon mitspaleuis tla más tiktekichiuilia Jehová?

¹⁸ Tla timokojtilia más tiktekichiuilis Jehová, más chikauis motlaneltokil. Tla timochiua precursor, uelis tias ipan Tlamachtijli tlen kiseliaj Akin Tenojnotsaj itech iTekiuajyo toTajtsin, uelis tias Betel noso uelis tontlapaleuis kampa kinchijchiuaj kaltin kampa tikueyichiuaj Jehová. Xkita tlen kijtoua se precursora akin itoka Kaitlyn: “Pampa nitenojnotsaya imiuan tokniuan akin youejkaujkej ipan ikalpan toTajtsin, onechpaleui más manikchikaua notlaneltok ijkuak oninoapolakti. Tlen kichiuayaj, onechpaleui más kuajli maninomachti noBiblia niman más kuajli manitemachti”.

19. ¿Kenon mitsteochiuas Jehová tla timokojtilia tikchikauas motlaneltok?

¹⁹ Tla más tikchikaua motlaneltok, Jehová melak mitsteochiuas. Tiktekitiltis mokojtilis kampa melak tepaleuis (1 Juan 2:17). Xtikchiuas tlen uelis mitsyolkokos. Melak tiyolpakis niman kuajli onkisas tlen tikchiuas (Prov. 16:3). Tlen tikchiuas kinyolchikauas telpokamej, ichpokamej niman tokniuan akin iuejueyimej (1 Tim. 4:12). Noijki, tiyolseujtos niman melak tiyolpakis pampa tikmatstos ika Jehová kuelita tlen tikchiua niman ika kuajli iuan timouika (Prov. 23:15, 16).