TLAMACHTIJLI 34
Nochipa matiktlakamatikan tlen melauak
“In yejua más nechpaktia ijkuak nikmati ika nokoneuan itech Cristo kitlakamatij on tlen melauak” (3 JUAN 4).
TLAKUIKAJLI 111 Onka tlen ika tipakij
TLEN TIKITASKEJa
1. ¿Kenon techpaleuiya ijkuak tikimijliaj oksekimej kenon otikixmatkej “tlen melauak”?
IJKUAK tikixmatij se tokniuj, kemantika techtlajtoltia: “¿Kenon otikixmat tlen melauak?”. Niman tejuamej ika nochi toyojlo tiknankiliaj. Noijki tikuelitaj tikinkakiskej tokniuan ijkuak techijliaj kenon okixmatkej Jehová niman kenon opeuj kitlasojtlaj. Tejuamej noijki ika nochi toyojlo tikimijliaj tleka tikuelitaj tinemiskej ipan ikalpan Jehová (Rom. 1:11). Ijkuak ijkin tonojnotsaj, techilnamiktia ika melak kualtsin ika tiiteixpantijkauan Jehová. Noijki techilnamiktia ika tiknekij nochipa tinemiskej ipan “tlen melauak”, noso ika tiknekij nochipa tikyolpaktiskej Jehová (3 Juan 4).
2. ¿Tlenon tikitaskej ipan yejuin tlamachtijli?
2 Ipan yejuin tlamachtijli tikitaskej tleka tiktlasojtlaj tlen melauak. Noijki tikitaskej kenon uelis tikteititiskej ika melak tiktlasojkaitaj ika tinemij ipan ikalpan Jehová. Tlen tikitaskej, techpaleuis matiktlasojkamachilikan Jehová pampa otechuajuikak ipan ikalpan (Juan 6:44). Noijki techyolchikauas matikimijlikan oksekimej tlen melauak.
¿TLEKA TIKTLASOJTLAJ “TLEN MELAUAK”?
3. ¿Tleka tiktlasojtlaj tlen melauak?
3 Tejuamej melak tiktlasojtlaj tlen melauak. ¿Tleka? Kachtopa, pampa tiktlasojtlaj Jehová, akin techmachtia tlen melauak. Ipan iTlajtoltsin Biblia tikitaj ika toTajtsin melak kojtik niman ika yejua okichijchiuj iluikak niman tlaltikpaktli. Ompa noijki tiuelij ika Jehová se toTaj akin melak techtlasojtla niman kinektika techpaleuis (1 Ped. 5:7). Ipan Biblia, Jehová techijlia: “[¡Nejua] nitetlasojtla niman niteiknelia! Xnimantsin nikualani. Sanoyej nitetlasojtla, niman nochipa nikchiua on tlen nikijtoua” (Éx. 34:6). Yejua noijki kineki manochiua “nochi on tlen melajki” (Is. 61:8). Jehová noyolkokoua ijkuak kita kenon titlajyouiyaj niman sa kinektika maajsi yejon tonajli ijkuak kipopolos nochi tlen techtlajyouiltia (Jer. 29:11). ¡Tejuamej noijki sa tiknektokej mayejko yejon tonajli! Ika yejon, melak tiktlasojtlaj Jehová.
Tlen melauak yeskia ken... se teposcadena noso ancla
Ijkon ken se teposcadena noso ancla kimelajkapiya se barco, totlamachialis tlen onka ipan Biblia techmelajkapiya niman techyolseuiya ijkuak tikixnamikij tlen ouijtika. Tlen melauak techpaleuiya matiknekikan tikimijliskej oksekimej tlen kualtsin kichiuas toTajtsin ika tlayekapan. (Xkimita párrafos 4-7).
4, 5. ¿Tleka okijto apóstol Pablo ika totlamachialis yeskia kentla se teposcadena noso ancla?
4 Noijki tiktlasojtlaj tlen melauak pampa melak techpaleuiya. San se matikonteneuakan itech kenon melak techpaleuiya. Ipan Biblia kijtoua ika tikpiyaj se tlamachialistli. Apóstol Pablo okijto ika yejuin tlamachialistli melak techpaleuiya, ika yejon, okijkuilo: “On totlamachalis kimelajkapiya toalma ijkon ken on teposcadena kimelajkapiya on barco ijkuak ika yokisalojkej” (Heb. 6:19). Ijkon ken se teposcadena noso ancla kimelajkapiya se barco, totlamachialis tlen onka ipan Biblia techmelajkapiya niman techyolseuiya ijkuak tikixnamikij tlen ouijtika.
5 Ijkuak Pablo okijkuilo tlen kijtoua Hebreos 6:19, kiteneujtoya tlamachialistli tlen kiseliskej tokniuan tlapejpeniltin. Yejuamej kichiaj yaskej iluikak. San ika, yejuin tlaxelojli noijki kinpaleuiya nochimej akin kichiaj nemiskej ipan se kualtsin xochitlalpan (Juan 3:16). Melak techyolpaktia ika tinochimej tikpiyaj se kualtsin tlamachialistli.
6, 7. ¿Kenon yokipaleui Yvonne aman ika ikimatstok tlenon panos ika tlayekapan?
6 Matikitakan tlen ipan onochiuj tokniuj Yvonne. Yejua xonoskalti ipan ikalpan Jehová, ika yejon, ijkuak pitentsin katka kimakasiya mikis. Yejua kijtoua: “Nikilnamiki ika sejpatsin onikpouj se libro kampa kijtouaya: ‘Ajsis se tonajli ijkuak xok titlanextiliskej’”. Yejua noijki kijtoua: “Tlen onikpouj xnechkauiliaya manikochi pampa san nontlanemilijtoya itech tlen panoskia ika tlayekapan”. Yvonne notlajtoltiaya: “¿Tleka otinemikoj? ¿Tleka xuejkaujtipan tinemij?”. ¡Yejua xkinekiya mikis!
7 Ijkuak oichpochtiak, okimixmat iteixpantijkauan Jehová. Yejua kijtoua: “Onechmachtijkej ika kema ueliskia nochipa ninemis ipan tlaltikpaktli ipan se kualtsin xochitlalpan”. Aman ika yokixmat tlen melauak melak yokipaleui, pampa kijtoua: “Aman ika noyojlo nikochi niman xok san niknemilijtika tlen panos ika tlayekapan nion xok nikmakasi nimikis”. Yvonne melak kitlasojkamati pampa ouel tlen melauak niman melak kuelita kimijlis oksekimej tlen kualtsin tikseliskej ika tlayekapan (1 Tim. 4:16).
Tlen melauak yeskia ken... se tesoro
Tiktekichiuiliskej Jehová aman niman ijkuak tekiuajtis iTekiuajyo, yeskia kentla tikpiyaskiaj se tesoro tlen melak patioj. Nochi tlen tikchiuaskej xsan nenka yes. (Xkimita párrafos 8-11).
8, 9. a) ¿Tlenon okichiuj yejon tlakatsintli akin Jesús okiteneuj ijkuak okinexti se tesoro? b) ¿Tejua tikpatiojkaita tlen melauak? Xkijto tleka ijkon titlanankilia.
8 ¿Tlenon okseki tlen melauak yotiuelkej ipan Biblia? Tlen kualtsin kichiuas iTekiuajyo toTajtsin. Jesús okijto ika tlen melauak itech iTekiuajyo toTajtsin yeskia kentla se tesoro. Yejua okijto: “Sen tlakatl yejuan kinokauilia [iTekiuajyo] Dios ma kimandaro, nesi ken sen tlakatl yejuan okinextij sen tesoro ipan sen tlajli kampa iyantikatka. Ijkuak okinextij on tesoro, oksejpa ompa okiyan. Niman ikan pakilistli oyaj ichan, niman okinamakato nochi tlen kipiya. Kemaj okou on tlajli kampa okinextij on tesoro” (Mat. 13:44). Yejuin tlakatsintli xkitejtemojtinemiya se tesoro. San ika, ijkuak okinexti, okinemakak nochi tlen kipiaya niman ijkon uelis kikouas tlajli kampa onkatka yejon tesoro. ¿Tleka okinemakak nochi tlen kipiaya? Pampa kimatstoya ika yejon tesoro más patioj katka xijkon ken nochi tlen kipiaya.
9 ¿Tejua tikpatiojkaita tlen melauak? ¡Tikmatstokej ika kema! Maski yejuin tlaltikpaktli miyek tlen techtekiuiltia, xitlaj ueli techyolpaktia ijkon ken techyolpaktia tiktekichiuiliskej Jehová niman ijkon ken techyolpaktia tikmatiskej ika tikpiyaj se tlamachialistli: ika uelis nochipa tinemiskej ipan yejuin tlaltikpaktli kampa tekiuajtitos iTekiuajyo toTajtsin. Tejuamej tijkajkauaj nochi tlen xkuajli pampa tiknekij kuajli touikaskej iuan Jehová. Melak tiktlasojkamatij ika Jehová kinektok iuan matouikakan. Noijki melak techyolpaktia tiktlakamatiskej Jehová pampa yejon tlen yejua kiyolpaktia (Col. 1:10).
10, 11. ¿Tlenon okipaleui Michael manopatla?
10 Miyekej tokniuan okikajkaujkej tlen kuelitayaj kichiuaskej pampa kinekiyaj más kiyolpaktiskej Jehová. Sekimej okikajkaujkej ika nomachtiaj ipan escuela. Oksekimej xokinejkej más notomintiskej. Oksekimej, ijkuak okixmatkej Jehová, okikajkaujkej tlen xkuajli kichiuayaj. Matikitakan tlenon ipan onochiuj Michael akin okixmat Jehová ijkuak iueyi katka. Ijkuak telpochtli katka, yejua onomajmachti karate. Yejua kijtoua: “Nejua sajnoye niyolpakiya pampa melak niueliya nitlauijsokiya. […] Niknemiliaya ika xakaj ueliskia nechtlanis”. Sakin, Michael opeuj nomachtia Biblia niman okasikamat ika Jehová xkuelita matitlauijsokikan (Sal. 11:5). Yejua kijtoua: “Tokniuj iuan isiuauj akin onechmachtijkej xkeman onechijlikej manikajkaua karate, yejuamej san onechmachtijkej tlen melauak”.
11 Ijkuak Michael opeuj más kixmati Jehová, opeuj más kitlasojtla. Michael oyolkaxan ijkuak okimat ika Jehová kimiknelia itekipanojkauan. Yejua okasikamat ika nonekiya nopatlas. Yejua kijtoua: “Nikmatstoya ika ouijtika yeskia nikajkauas karate, san ika, nikmatstoya ika tla nikajkauaya, melak nikyolpaktiskia Jehová. Niman noijki nikmatstoya ika más nechyolpaktiskia niktekichiuilis”. Michael okitlasojkaitak tlen melauak, ika yejon, onopatlak (Sant. 1:25).
Tlen melauak yeskia ken... se tlauijli
Se tlauijli techpaleuiya maka matipoliuikan ika tlayoua. Noijki ijkon, iTlajtol toTajtsin yeskia ken se tlauijli tlen techtlauiluiya ipan yejuin xkuajli tlaltikpaktli kampa tlayekantok Satanás. (Xkimita párrafos 12 niman 13).
12, 13. ¿Kenon Biblia okipaleui Mayli?
12 Biblia kijtoua ika tlen melauak noijki yeskia ken se tlauijli tlen melak kualtsin tlauiloua ika tlayoua (Sal. 119:105; Efes. 5:8). Mayli, akin chanti Azerbaiyán, melak kitlasojkamati pampa okimat tlen temachtia Biblia. Yejua kijtoua ika Biblia kentla okitlauilui iojui. Itaj Mayli musulmán katka, niman inan judía katka. Yejua kijtoua: “Nejua kema nikneltokaya ika nemiya se toTajtsin, san ika, xnikasikamatiya seki tlemach. Ninotlajtoltiaya: ‘¿Tleka otexchijchiuj toTajtsin? ¿Tleka titlajyouiyaj, niman tleka ijkuak timikij oksejpa titlajyouiyaj ipan infierno?’. Miyekej kijtouaj ika toTajtsin kuelita ijkin matinemikan. Ika yejon, ninotlajtoltiaya: ‘¿San tiajauiluan toTajtsin? ¿Yejua kichiua topan mapano tlen xkuajli pampa kuelita kitas kenon titlajyouiyaj?’”.
13 Mayli kinekiya kimatis nochi tlen notlajtoltiaya. Sakin, opeuj nomachtia Biblia niman onochiuj iteixpantijkauj Jehová. Yejua kijtoua: “Ijkuak onikitak ika Biblia nochi melak kuajli techijlia, onechpaleui más maniyolpaki”. Ijkon ken Mayli, timiyekej tikueyiteneuaj Jehová pampa otechkixti “ipan on tlayauajlotl” niman otechuajuikak “kampa sanoyej kua[l]tsin tlauilpan” (1 Ped. 2:9).
14. ¿Tlenon uelis tikchiuaskej niman ijkon más tiktlasojtlaskej tlen melauak? (Xkita recuadro “Okseki tlen techititia ika Biblia melak tepaleui”).
14 Ipan yejuin párrafos yotikitakej ika tlen melauak yeskia ken se teposcadena noso ancla, se tesoro niman se tlauijli. Niman kanaj tejua noijki tikimilnamiki okseki tlen mitsititia ika tlen melauak melak tepaleui. Ijkuak san moselti timomachtis, xtejtemo tlen mitspaleuis más xtlasojtla tlen melauak. Ijkuak más tiktlasojtlatiuej tlen melauak, más tikteititiaj ika tiktlasojkaitaj ika tinemij ipan ikalpan Jehová.
¿KENON TIKTEITITIAJ IKA TIKTLASOJTLAJ TLEN MELAUAK?
15. ¿Kenon tikteititiaj ika tiktlasojtlaj tlen melauak?
15 Tla mojmostla tomachtiaj Biblia niman toamatlajkuiloluan, tikteititiskej ika melak tiktlasojtlaj tlen melauak. Maski tla yotiuejkaujkej noso xtiuejkauij ipan ikalpan Jehová, nochipa onka tlen uelis tomachtiskej. Kachtopa revista La Atalaya tlen okis ika inglés okijto: “Tlen melauak yeskia kentla se xochitsintli tlen xiujyopachiujtika ika tlen xkuajli. Para tiknextiskej, noneki kuajli tiktejtemoskej; [...] niman tla yotiknextijkej niman tiknekij tikpiyaskej yejon xochitsintli, noneki tiktekiskej. Maka san se xochitsintli xpixto. [...] Tejua más xkintejtemo niman más xkinmiyekili moxochiuan”. Noneki tokojtiliskej para tomachtiskej, niman ijkuak ijkon tikchiuaj, melak tiyolpakij.
16. ¿Tejua tlenon tikchiua ijkuak timomachtia Biblia? (Proverbios 2:4-6).
16 Xtinochimej tikuelitaj titlaamapouaskej niman tomachtiskej, san ika, Jehová techijlia matomachtikan pampa kineki más matikasikamatikan tlen melauak (xpoua Proverbios 2:4-6). Tla tejuamej tokojtiliaj tomachtiskej, melak miyek tlen tiueliskej. Tokniuj Corey kijtoua ika ijkuak kiamapoua iBiblia, noteltia ipan se tlaxelojli niman itech tlanemilia. Yejua kijtoua: “Nikinamapoua notas, nikintejtemoua amatlajkuiloltin tlen ompa noteneuaj niman más ninomachtia yejon tlaxelojli. […] Yonikitak ika ijkuak ijkon nikchiua, nechpaleuiya más maniueli”. Tla tejuamej tokojtiliaj tikxeloskej tiempo niman kuajli tomachtiskej Biblia, tikteititiskej ika tikpatiojkaitaj tlen melauak (Sal. 1:1-3).
17. ¿Tlenon okse noneki tikchiuaskej? (Santiago 1:25).
17 Yotikitakej ika melak noneki matomachtikan tlen melauak. San ika, onka itlaj tlen noijki noneki tikchiuaskej. ¿Tlenon? Noneki tikchiuaskej tlen melauak techmachtia Biblia. Tla ijkon tikchiuaj, melak tiyolpakiskej (xpoua Santiago 1:25). ¿Niman kenon uelis tikmatiskej tla tikchiujtiuej tlen tomachtijtiuej ipan Biblia? Se tokniuj kijtoua ika noneki toixtlaloskej niman ijkon tikitaskej tla tikchiujtokej tlen kuajli niman tla noneki toyektlaliskej. Niman apóstol Pablo okijto: “Ma tikejeuakan nochi on tlen kuajli ye tikpiyaj” (Filip. 3:16). Yejuin noneki tikchiuaskej maski tla yotiuejkaujkej noso xitiuejkauij ipan ikalpan Jehová.
18. ¿Tleka tokojtiliaj tinemiskej ipan “tlen melauak”?
18 San matikonnemilikan kenon melak techpaleuiya pampa tinemij ipan “tlen melauak”. Xsan tejuamej tiyolpakij, noijki tikyolpaktiaj Jehová niman tokniuan (Prov. 27:11; 3 Juan 4). Kuakon, nochipa matiktlasojtlakan tlen melauak niman matikchiuakan tlen melauak techmachtia Biblia.
TLAKUIKAJLI 144 Maka xkixtenkaua tlaxtlauijli
a Miyekpa, ijkuak tikimijliaj oksekimej tlen tikneltokaj, tiktekitiltiaj tlajtojli “tlen melauak”. Maski tla kemach noso youejkauj ika tinemij ipan tlen melauak, melak techpaleuis tla tikilnamikij tleka tiktlasojtlaj tlen melauak. Tlen aman tikitaskej techpaleuis más matikyolpaktikan Jehová.