Yejkos tonajli ijkuak xok noixnamikilos ipan guerras

TOTAJTSIN KINPOPOLOS GOBIERNOS AKIN AMAN TLAYEKANAJ

Nochi gobiernos akin aman tlayekanaj, toTajtsin kinpopolos ipan se guerra tlen Biblia kitokayotia Armagedón (Apocalipsis 16:16).a Ijkuak nochiuas yejon guerra, kinsentlaliskej “nochimej on reyes [noso gobiernos] ipan on tlaltikpaktli” para “nouijsokiskej iuan Dios yejuan nochi ueli kichiua” (Apocalipsis 16:14). Tla yopanok Armagedón, xok keman nochiuaskej guerras.

ToTajtsin kintekipatlas gobiernos akin aman tlayekanaj niman kichiuas ika san maonia iGobierno. Yejon Gobierno uajtlayekantos desde cielo niman xkeman kitekipatlaskej (Daniel 2:44). ToueyiTajtsin yokitlapejpeni Jesús, akin ikoneuj, para yejua matlayekana ken Rey (Isaías 9:​6, 7; Mateo 28:18). Jesús okiteneuj yejuin Gobiernob ijkuak otemachti kenon nochiuas oración (Mateo 6:​9, 10). Niman ijkuak peuas tlayekanas yejuin Gobierno, san Jesús tlanauatis ipan nochi tlaltikpaktli.

Jesús xkichiuas ijkon ken kichiuaj gobiernos akin aman tlayekanaj. Ijkuak yejua tlayekanas nochimej kinpaleuis niman xkinchikoitas akin oksekan ualeuaj (Isaías 11:​3, 4). Ijkuakon xok yakaj nonekis tlaixnamikis, pampa Jesús kitas ika nochimej makipiyakan tlen kinpoloua. Biblia kijtoua itech Jesús: “Yejua kimanauis on mayanki yejuan kitlajtlanilis ma kipaleui, niman kimanauis on yejuan tlajyouiya, yejuan xkipiya akinon kipaleuis [ . . . ]. Yejua kinmanauis on yejuan kintlajyouiltiaj” (Salmo 72:​12-14).

Ijkuak tlayekanas iGobierno toTajtsin xok oniaskej armas (Miqueas 4:3). Noijki, xok nemiskej akin kuelitaj tlaixnamikiskej niman akin tetlajyouiltiaj (Salmo 37:​9, 10). Nochimej, tlakamej, siuamej niman kokonej xok nomojtiskej maski san kanon kistinemiskej (Ezequiel 34:28).

Ipan iGobierno toTajtsin tinochimej ika toyojlo tinemiskej. Aman melak noixnamikilo pampa miyekej xkipiyaj tlenon kikuaskej, kanon chantiskej noso xkipiyaj tomintsin. Pero ijkuak Jesús tlayekanas, tinochimej tikpiyaskej tlenon tijkuaskej niman tinochimej tikpiyaskej kampa tichantiskej (Salmo 72:16; Isaías 65:​21-23).

Ijkuak tlayekanas iGobierno toTajtsin, xok yakaj kikokoskej, xok yakaj najmanas niman xok yakaj ajmankamikis ipampa nochi tlen xkuajli nochiua ipan guerra. Niman akin yomikkej oksejpa yoliuiskej ipan yejuin tlaltikpaktli (Isaías 25:8; 26:19; 35:​5, 6). Noijki, familias oksejpa san sekan nemiskej niman xok yakaj kilnamikis ken okitlajyouilti guerra (Apocalipsis 21:4).

TOTAJTSIN KIPOPOLOS TLAJTLAKOJLI

Ipan iGobierno toTajtsin tinochimej san Jehovác tikueyichiuaskej, “toTajtsin akin melak techtlasojtla niman kichiua matiyolsejtokan” (2 Corintios 13:11). Gente kinmajmachtiskej kenon kuajli nouikaskej imiuan oksekimej (Isaías 2:​3, 4; 11:9). Niman akin kitlakamatiskej toTajtsin kinkixtiliskej tlajtlakojli (Romanos 8:​20, 21).

TOTAJTSIN KINPOPOLOS SATANÁS NIMAN IDEMONIOS

Ijkuak tlayekantos iGobierno toTajtsin, Satanás niman idemonios xok nemiskej. Kuakon, xok kichiuaskej ika gente makipeualtikan guerra (Apocalipsis 20:​1-3, 10). Pampa yejuamej xok nemiskej, onias “yolseuilistli” (Salmo 72:7).

Uelis tikneltokaskej ika toTajtsin melauak kichiuas ika maka maoniakan guerras niman manoixnamikilo, pampa yejua kipiya kojtilistli para kichiuas niman kinektok kichiuas.

• ToTajtsin kipiya poder para kichiuas maka manotlauelitalo niman manoixnamikilo ipan guerra, niman kimatstok kenon kichiuas (Job 9:4). Yejua nochi ueli kichiua (Job 42:2).

• ToTajtsin melak kajmana ijkuak kita ika titlajyouiyaj (Isaías 63:9). Niman kintlauelita akin “kichiuaj on tlen xkuajli” (Salmo 11:5).

• ToTajtsin nochipa kichiua tlen kijtoua pampa “xueli tekajkayaua” (Isaías 55:​10, 11; Tito 1:2).