Tleka melak tiktlasojkamatij itlapojpoluilis Jehová

1, 2. ¿Tleka tikijtouaj ika kentla tikteuikiliskiaj ken yejon telpochtli akin onoteneuj ipan párrafo 1?

MATONTLANEMILIKAN itech se telpochtli akin itajuan melak tominyejkej, san ika, se tonajli konnotsaj niman kijliaj ika itajuan omikkej. Niman xsan yejon, noijki kijliaj ika itajuan san okinauiltijkej intomin niman aman melak ueyi kiteuikiliaj. Kuakon, yejon telpochtli xtlaj okikauilijteujkej, yej san okixpolojteujkej pampa aman nonekis yejua tlatlaxtlauas. Niman kijliaj ika noneki tlatlaxtlaujtiuetsis, san ika, xkeman uelis tlatlaxtlauas pampa itajuan sajnoye ueyi okinotlaneuijkej.

² Tejuamej kentla noijki melak ueyi tikteuikiliskiaj ken yejon telpochtli. Toachtotajuan, Adán niman Eva, xtlajtlakolejkej katkaj niman nemiyaj ipan se kualtsin xochitlalpan (Gén. 1:27; 2:​7-9). Yejuamej ueliskiaj nochipa nemiskiaj niman melak yolpakiskiaj. San ika, nochi onopatlak pampa otlajtlakojkej. Jehová okinkixti itech jardín de Edén niman sakin omikkej. ¿Tlenon okinkauilijteujkej inkoneuan? Biblia kijtoua: “Ipan in tlaltikpaktli on achtoj tlakatl otlajtlakoj niman ipampa on tlajtlakojli onkaj mikilistli. Yejua ika nochimej mikiskej pampa nochimej tlajtlakouaj” (Rom. 5:12). Adán otechkauilijteuj tlajtlakojli, tlen kichiua matimikikan. Yejuin tlajtlakojli yeskia ken itlaj tlen tikteuikiliaj tlen nion se tlaltikpaktlakatl xuelis kitlaxtlauas (Sal. 49:8).

3. Xkijto tlenon panoua ijkuak titlajtlakouaj.

³ Jesús okijto ika totlajtlakoluan yeskiaj ken itlaj tlen tikteuikiliskiaj (Mat. 18:​32-35). Kuakon, ijkuak titlajtlakouaj, yeskia kentla tla totlaneuiskiaj itech Jehová. Niman tla yejua xitlaj kichiuaskia para kintlapojpoluis totlajtlakoluan, san ueliskia tikintlaxtlauaskej ika tonemilis (Rom. 6:​7, 23).

4. a) ¿Tlenon panoskia tla xakaj techpaleuiskia? (Salmo 49:​7-9). b) ¿Tlenon kijtosneki ipan Biblia tlajtojli tlajtlakojli? (Xkita recuadro “Tlajtlakojli”).

⁴ San toselti xueliskia oksejpa tikpiyaskej nochi tlen Adán niman Eva okipolojkej (xpoua Salmo 49:​7-9). Tla xakaj techpaleuiskia, xkeman ueliskia tikchiaskej nochipa tinemiskej nion tiyoliuiskej. Timikiskiaj niman xok keman tiyoliuiskiaj, ijkon ken inpan panoua yolkamej (Ecl. 3:19; 2 Ped. 2:12).

5. ¿Tlenon okichiuj Jehová para techpaleuis matiktlaxtlauakan tlen tikteuikiliaj? (Xkita tlaixkopinajli ).

⁵ Oksejpa matontlanemilikan itech telpochtli akin otikteneujkej ipan párrafo 1. ¿Kenijki nomachiliskia tla se tlakatl akin melak kipiya tomin kijliskia ika yejua kitlaxtlauas nochi tlen kiteuikilia? Kuajli tikmatstokej ika melak kitlasojkamatiskia niman kinektoskia makipaleuikan. Noijki ijkon, toTaj Jehová, akin melak techtlasojtla, yotechtlayokoli itlaj tlen kitlaxtlaua tlajtlakojli tlen Adán otechpanoltili. Jesús otechijli katlejua on tetlayokolijli, yejua okijto: “Pampa toTajtsin melak okitlasojtlak yejuin mundo, hasta okitemakak isenteKonetsin para ijkon nochimej akin kiteititiskej ika itech tlaneltokaj xpopoliuiskej, yej kipiyaskej nemilistli tlen xkeman tlami” (Juan 3:16). Tlen Jehová otechtlayokoli noijki techpaleuiya kuajli iuan matouikakan.

6. ¿Tlenon tikitaskej ipan yejuin tlamachtijli, niman tleka?

⁶ ¿Tlenon uelis tikchiuaskej niman ijkon matechpaleui itetlayokolil Jehová tlen kichiua maueli matechtlapojpolui? Tla tiknekij tikmatiskej yejon, matikitakan tlenon kijtosnekij seki tlajtoltin tlen Biblia kinteneua. Melak noneki matitlanemilikan itech yejon tlajtoltin pampa yejon techpaleuis más matiktlasojkamatikan tlen Jehová okichiuj para uelis techtlapojpoluis.

JEHOVÁ KINEKI IUAN MATIYOLSEUJTOKAN

7. a) ¿Tlenon opanok pampa Adán iuan Eva xotetlakamatkej? b) ¿Tlenon noneki matikchiuakan akin tiiuejkakoneuan Adán niman Eva? (Romanos 5:​10, 11).

⁷ Adán niman Eva xok ouel onenkej nochipa, san ika, xsan yejon, noijki xok ouel onouikakej iuan inTaj, Jehová. Ijkuak xetlajtlakouayaj, toTajtsin kimitaya ken ichanejkauan (Luc. 3:38). San ika, ijkuak xokitlakamatkej Jehová, yejua xok okimitak ken ichanejkauan. Yejuin opanok achto kinpiyaskiaj inkoneuan (Gén. 3:​23, 24; 4:1). Yejua ika, akin tiiuejkakoneuan Adán, noneki toyolseuiskej iuan Jehová (xpoua Romanos 5:​10, 11). Kema, noneki oksejpa kuajli iuan touikaskej. Se amatlajkuilojli kijtoua ika ijkuak yejuin tlaxelojli kijtoua ika noneki toyolseuiskej, kitekitiltia se tlajtojli ika griego tlen uelis kijtosnekis “tikchiuas ika se motlauelikniuj manochiua motlasojkaikniuj”. Melak temojkatlachialti ika Jehová yejua akin kachtopa okinek iuan matoyolseuikan. Matikitakan tlenon okichiuj para uelis iuan tiyolseujtoskej.

TLEN JEHOVÁ OKICHIUJ PARA KINTLAPACHOS TLAJTLAKOLTIN

8. ¿Tlenon okitemakak Jehová?

⁸ Jehová itlaj okichiuj niman ijkon uelis iuan touikaskej maski titlajtlakolejkej. Ika hebreo, onka se tlajtojli tlen kijtosneki “tiktlapachos”. Kema, Jehová itlaj okichiuj para “kintlapachos” totlajtlakoluan. Niman ipan Tlajkuiloltin ika Griego kijtoua ika “Dios okitlalij [ . . . ] se uentli” para “kimpopolouilia intlajtlakol on tlakamej” (Rom. 3:25). Yejuin tlen okichiuj Jehová techpaleuiya iuan matiyolseujtokan niman iuan matouikakan.

9. ¿Tlenon okichiuj Jehová para uelis kintlapojpoluis israelitas?

⁹ Ipan itonaluan israelitas, Jehová itlaj okichiuj para uelis kintlapojpoluilis intlajtlakoluan niman ijkon imiuan nouikas. Sejse xiuitl, ipan Tonajli ijkuak Notlapachouayaj Tlajtlakoltin, ueyi teopixki kinuentlaliaya yolkamej para Jehová makintlapojpolui israelitas. San ika, yejon yolkamej tlen kinuentlaliayaj xueliskia kintlapachoskiaj nochi intlajtlakoluan israelitas pampa yolkamej xsan noijki uejueyixtokej ken tlaltikpaktlakamej. Maski ijkon, Jehová kinektoya kintlapojpoluis, san ika, yejuamej nonekiya noyolkuepaskej niman kiuentlaliskej tlen yejua kitlajtlaniya (Heb. 10:​1-4). Yejon uentin tlen notemakayaj ipan Tonajli ijkuak Notlapachouayaj Tlajtlakoltin niman ipan okseki tonaltin, kimilnamiktiaya israelitas ika tlajtlakolejkej katkaj niman ika nonekiya se uentli tlen maueli makinpopolouili intlajtlakoluan para nochipa.

10. ¿Tlenon okichiuj Jehová niman ijkon kintlapojpoluis para nochipa tlaltikpaktlakamej?

¹⁰ ¿Tlenon okichiuj Jehová niman ijkon kintlapojpoluis para nochipa tlaltikpaktlakamej? Okichiuj ika isenteKonetsin san sejpa manotemaka “ken uentli para miyekej kinkixtilis intlajtlakoluan” (Heb. 9:28). Jesús okitemakak inemilis ken tlaxtlauijli niman ijkon kinmakixtis miyekej tlaltikpaktlakamej (Mat. 20:28). ¿Niman tlenon kijtosneki tlaxtlauijli?

TLAXTLAUIJLI TLEN ONOTEMAKAK

11. a) ¿Tleka Jehová okinek manotemaka se tlaxtlauijli? b) ¿Kenijki nonekiya yes akin ueliskia tlatlaxtlauas?

¹¹ Biblia kijtoua ika Jehová okinek manotemaka se tlaxtlauijli para uelis techintlapojpoluilis totlajtlakoluan niman para uelis iuan touikaskej. ¿Kech ononek notlaxtlauas niman ijkon tlaltikpaktlakamej oksejpa makipiyakan tlen Adán okipolo? (1 Tim. 2:6). San ueliskia notlaxtlauas ika inemilis se tlakatl akin xtlajtlakole, akin ueliskia nochipa nemis ipan tlaltikpaktli niman akin kinekiskia kitemakas noso kiuentlalis inemilis topampa. Tla nemiskia se tlakatl ken akin yotikonteneujkej, ueliskia kitlaxtlauas ika inemilis nochi tlen Adán okipolo.

12. ¿Tleka ouel otlatlaxtlauj Jesús?

¹² Jesús ouel otlatlaxtlauj pampa 1) xtlajtlakole katka, “nion se tlajtlakojli xokichiu”, 2) ueliskia nochipa nemis ipan tlaltikpaktli niman 3) kinektoya kitemakas inemilis niman mikis topampa (1 Ped. 2:22; Heb. 10:​9, 10). Jesús xtlajtlakole katka ijkon ken Adán xtlajtlakole katka achto tlajtlakoskia (1 Cor. 15:45). Ika imikilis, Jesús otlatlaxtlauj, noso, okitlapacho tlen Adán okichiuj (Rom. 5:19). Ijkon, Jesús onochiuj “san ika nochi Adán”. Xok noneki okse tlaltikpaktlakatl, akin xkipiya tlajtlakojli, mauajla niman makitlaxtlaua tlen Adán okipolo. Jesús omik “san sejpa niman para nochipa” (Heb. 7:27; 10:12).

13. ¿Tlenon yokichiuj Jehová niman ijkon uelis iuan touikaskej?

¹³ ¿Tlenon yokichiuj Jehová niman ijkon uelis iuan touikaskej? Hasta aman yotikitakej ika Jehová itlaj okichiuj para kintlapachos totlajtlakoluan, kijtosneki, para uelis techtlapojpoluis niman para uelis iuan touikaskej. San ika, para ueliskia ijkon panos, nonekiya yakaj tlatlaxtlauas. Jesús yejua otlatlaxtlauj ika iyesyo tlen okitoyauj ijkuak omik topampa (Efes. 1:7; Heb. 9:14). ¿Niman kenijki yokisato nochi yejuin? Matikitakan.

JEHOVÁ TECHMAKIXTIA NIMAN TECHITA KEN TIYOLMELAJKEJ

14. ¿Tlenon tikitaskej aman, niman tleka?

¹⁴ ¿Kenijki techpaleuiya tlen Jehová okichiuj topampa? Tla tiknekij tiknankiliskej yejon, matikitakan ome tlemach tlen techpaleuis matikajsikamatikan kenijki techpaleuiya itlapojpoluilis Jehová.

15, 16. a) ¿Itech tlenon timakisaj pampa onotemakak se tlaxtlauijli? b) ¿Kenijki tomachiliaj pampa uelis techmakixtiskej itech tlajtlakojli niman mikilistli?

¹⁵ Biblia kijtoua ika pampa onotemakak se tlaxtlauijli, ouel otechmakixtijkej. Apóstol Pablo ijkin okijto: “Yejua san topampa onotemakak ipan mikilistli para techmakixtia itech nochi kech tlajtlakojli onkaj, niman para techchipaua kuajli” (Tito 2:14a).

¹⁶ Pampa onotemakak se tlaxtlauijli, uelis timakisaskej itech tlajtlakojli niman mikilistli tlen melak techtlajyouiltia (Rom. 5:21). Melak tiktlasojkamachiliaj Jehová pampa otechmakixti. Noijki melak tiktlasojkamachiliaj Jesús pampa okinek kitemakas iyesyo noso inemilis topampa (1 Cor. 15:22).

17, 18. a) ¿Tlenon kijtosneki ika Jehová techita ken tiyolmelajkej? b) ¿Kenijki techpaleuiya pampa Jehová techita ken tiyolmelajkej?

¹⁷ Biblia kijtoua ika Jehová techita ken tiyolmelajkej. Yejuin kijtosneki ika Jehová xtechtlajtlanilia matitlatlaxtlauakan ijkuak titlajtlakouaj. Maski ijkon, xkijtosneki tla Jehová kinektok matitlajtlakokan noso ika xkinchiua tlanauatiltin tlen yejua yokintlali. Yejua xtechita ken tiyolmelajkej tla pampa tokojtiliaj tiktekichiuiliskej, yejua ijkon techita pampa tikteititiaj ika tikneltokaj nochi tlen yejua niman Jesús okichiujkej para manotemaka se tlaxtlauijli ipampa totlajtlakoluan (Rom. 3:24; Gál. 2:16).

¹⁸ ¿Kenijki techpaleuiya pampa Jehová techita ken tiyolmelajkej? Sekimej itekipanojkauan toTajtsin yokintlapejpenijkej para matekiuajtikan iuan Jesús ne iluikak niman yonochiujkej ikoneuan toTajtsin (Tito 3:7; 1 Juan 3:1). Yejuamej yokintlapojpoluijkej, ika yejon, kentla tla xkeman tlajtlakoskiaj. Yejua ika, teuamej itech Tekiuajyotl (Rom. 8:​1, 2, 30). Oksekimej itekipanojkauan toTajtsin kichiaj nochipa nemiskej ipan tlaltikpaktli. Jehová yokintlapojpolui niman ueli imiuan nouika (Sant. 2:​21-23). Miyekej tlaltikpaktlakamej akin makisaskej ipan Armagedón kichiaj xok keman mikiskej (Juan 11:26). “Nochimej yejuan yolmelajkej niman on yejuan xyolmelajkej” yoliuiskej (Hech. 24:15; Juan 5:​28, 29). Sakin, nochimej itekipanojkauan Jehová akin melajkanemij niman chantiskej ipan tlaltikpaktli “kipiyaskej kualtsin makixtilistli ken ikoneuan toTajtsin” (Rom. 8:​21, TNM). Ken tikitaj, nochi tlen okichiuj Jehová para kintlapachos totlajtlakoluan melak techpaleuis pampa uelis oksejpa tiikoneuan yeskej ijkuak xok tikpiyaskej tlajtlakojli. ¡Sa tikchiatokej mayejko yejon tonajli!

19. ¿Kenijki techpaleuiya tlen Jehová niman Jesús okichiujkej topampa? (Noijki xkita recuadro “Itlapojpoluilis Jehová”).

¹⁹ Ijkon ken telpochtli akin melak ueyi kiteuikiliaya niman xkeman ueliskia tlatlaxtlauas, tejuamej noijki melak ueyi tikteuikiliayaj. San ika, Jehová otechpaleui, yejua okitak tlenon uelis kichiuas para kintlapachos totlajtlakoluan niman okitemakak se tlaxtlauijli. Totlaneltok itech Jesucristo kichiua matimakisakan itech tlajtlakojli niman mikilistli. Noijki, totlajtlakoluan uelis kinpopoloskej niman yeskia kentla tla xkeman titlajtlakoskiaj. Niman noijki ueli kuajli touikaj iuan toTajtsin Jehová, niman yejon tlen más kualtsin.

20. ¿Tlenon tikitaskej ipan okse tlamachtijli?

²⁰ Melak tiktlasojkamatij ijkuak titlanemiliaj itech nochi tlen Jehová niman Jesús yokichiujkej topampa (2 Cor. 5:15). Tla yejuamej xtechpaleuiskiaj, xtikpiyaskiaj nion se tlamachialistli. Ipan okse tlamachtijli, tikimitaskej seki neskayomej tlen techpaleuiskej más kuajli matikajsikamatikan kenijki techtlapojpoluiya Jehová.