Xpaleui akin tikmachtia makitekichiuili Jehová

1, 2. a) ¿Tleka sekimej akin tikinmachtiaj Biblia xnochiuaj iteixpantijkauan Jehová? b) ¿Tlenon tikitaskej ipan yejuin tlamachtijli?

¿ONKATKA itlaj tlen mitsteltiaya maka xmochiua iteixpantijkauj Jehová? Kanaj mitsmojtiaya mamitstlauelitakan akin imiuan titekiti, moamigos noso mochanejkauan. Noso kanaj otiknemili ika xkeman uelis tikchiuas tlen kineki toTajtsin. Kuakon, uelis tikinmajsikamatis akin tikinmachtijtika Biblia niman itlaj kinteltia manochiuakan iteixpantijkauan Jehová.

² Jesús kimatstoya ika yejuin ueliskia kichiuas ika maka matiktekichiuilikan Jehová (Mat. 13:​20-22). Yejua xsan ijkon okinkauj akin nomojtiayaj nochiuaskej inomachtijkauan. Tla tikchiuaj ijkon ken Jesús, uelis tikinpaleuiskej akin tikinmachtiaj 1) makitakan tlenon kintsakuilia makitekichiuilikan Jehová, 2) más makitlasojtlakan Jehová, 3) kachtopa makitekichiuilikan Jehová niman 4) tlenon uelis kichiuaskej ijkuak kintlauelitaskej. ¿Kenijki uelis tikchiuaskej ijkon ken Jesús? Niman, ¿kenijki uelis tiktekitiltiskej libro ¡Nochipa uelis tiyolpakis! para tikpaleuiskej akin tikmachtiaj manochiua iteixpantijkauj Jehová?

XPALEUI AKIN TIKMACHTIA MAKITA TLENON KITSAKUILIA MAKITEKICHIUILI JEHOVÁ

3. ¿Tlenon kiteltiaya Nicodemo manochiua inomachtijkauj Jesús?

³ Judíos melak kitlakaitayaj Nicodemo. Yejua itlaj kiteltiaya manochiua inomachtijkauj Jesús. Ijkuak Jesús ikuikaya chikuasen metstli ika tenojnotstinemiya, Nicodemo yokasikamatka ika Jesús katka Mesías (Juan 3:​1, 2). Maski ijkon, Nicodemo san ichtaka iuan tlajtouaya Jesús pampa kinmakasiya judíos (Juan 7:13; 12:42). Kanaj yejua okonnemili nochi tlen ueliskia kipoloskia tla nochiuaya inomachtijkauj Jesús.a

4. ¿Kenijki Jesús okipaleui Nicodemo makasikamati tlen toTajtsin kinekiya makichiua?

⁴ Nicodemo kuajli kixmatstoya tlanauatijli tlen okimakakej Moisés, san ika, nonekiya yakaj makajsikamachilti tlen kinekiya Jehová makichiua. ¿Kenijki okipaleui Jesús? Yejua okixelo tiempo pampa maski yetlayoua katka kinektoya iuan tlajtos. Noijki okasikamachilti ika tla kinekiya nochiuas inomachtijkauj nonekiya noyolkuepas, noapolaktis niman kiteititis ika tlaneltoka itech iKoneuj toTajtsin (Juan 3:​5, 14-21).

5. ¿Kenijki uelis tikpaleuiskej akin tikmachtiaj makita tlenon kitsakuilia manochiua iteixpantijkauj Jehová?

⁵ Kanaj yakaj akin tikmachtiaj kuajli kixmati Biblia, san ika, sa noneki makipaleuikan makita tlenon kitsakuilia makitekichiuili Jehová. Kanaj melak tekiti noso ichanejkauan xkinekij manochiua iteixpantijkauj Jehová. ¿Kenijki uelis tikchiuaskej ken Jesús? Tla tikxelouaj tiempo para iuan tinemiskej tonomachtijkauj. Uelis tikontaskej ichan noso tikijliskej mauajla tochan, kanaj yejon kipaleuis makinekto techijlis tlen kixnamiktok. Yejon techpaleuis matikpaleuikan makita tlenon noneki kipatlas, niman matikijlikan makichiua pampa kitlasojtla Jehová niman xpampa tejuamej tiknekij matechyolpakti.

6. ¿Kenijki uelis tikinpaleuiskej akin tikinmachtiaj makichiuakan tlen ueltiuej? (1 Corintios 16:13).

⁶ Tla tiknekij ika akin tikmachtiaj makichiua tlen ueltiuj ipan Biblia, noneki tikmatstokej ika Jehová kipaleuis makintlakamati itlanauatiluan (xpoua 1 Corintios 16:13). Tejua uelis tikpaleuis akin tikmachtia, tla tikonnemilia kenijki katka akin mitsmachtiaya ipan escuela. Akin mitsmachtiaya xsan mitsijliaya tlen nonekiya tikmatis. Yejua noijki omitspaleui xchiua tlen tiknemiliaya ika xueliskia tikchiuas. Ijkon xchiua ken akin omitsmachti ipan escuela. Maka san xkijli akin tikmachtia tlen Jehová kineki makichiua noijki xkilnamikti ika yejua kipaleuis manopatla. Matikitakan tlenon uelis más tikchiuaskej para tikinpaleuiskej akin tikinmachtiaj.

XPALEUI AKIN TIKMACHTIA MÁS MAKITLASOJTLA JEHOVÁ

7. ¿Kenijki okinpaleui Jesús akin kikakiyaj más makitlasojtlakan Jehová?

⁷ Jesús kimatstoya ika tla inomachtijkauan kitlasojtlaya Jehová, ueliskia kichiuaskej tlen ueltiayaj. Ika yejon, yejua miyekpa itlaj kinteneuiliaya tlen makinpaleui más makitlasojtlakan, iTaj iluikakchane. Sejpa okinteneuili itech se kuajli tajtli akin kinmaka tlen kuajli ikoneuan (Mat. 7:​9-11). Sekimej akin kikaktoyaj kanaj xokipixkej intaj akin makintlasojtla. Kuakon, san xkonnemili kenijki onomachilijkej ijkuak Jesús okimijli kenijki se tajtli akin melak teikneliani oksejpa okiseli ikoneuj akin yonoyolkuepka sakin ika yokichiujka tlen xkuajli. Tlen okimijli okinpaleui makitakan ika Jehová nochimej melak kintlasojtla (Luc. 15:​20-24).

8. ¿Kenijki uelis tikpaleuis akin tikmachtia más makitlasojtla Jehová?

⁸ Tejua noijki uelis tikpaleuis akin tikmachtia más makitlasojtla Jehová, tla tikijlia tlen kualtsin kichiua Jehová. Ijkuak tikmachtis, xkijli ika tlen youel kiteititia ika Jehová melak kitlasojtla. Niman ijkuak nemomachtiskej ken Jehová okitemakak iKonetsin topampa, xkasikamachilti ika Jehová ijkon okichiuj pampa melak kitlasojtla (Rom. 5:8; 1 Juan 4:10). Tla akin tikmachtiaj kasikamati ika Jehová melak kitlasojtla, yejon kipaleuis más makitlasojtla Jehová (Gál. 2:20).

9. ¿Tlenon okipaleui Michael manopatla?

⁹ Matikitakan tlen ipan opanok Michael, akin chanti Indonesia. Ijkuak pitentsin katka opeuj nomachtia Biblia, san ika, xkeman onoapolakti. Ijkuak kipiaya 18 xiuitl, oyaj okse país kampa tekitiya ipan se camión. Sakin, onokuep Indonesia, ononamikti, okipix se ikoneuj niman sakin oksejpa otekitito okse país. Isiuauj niman ikoneuj opeujkej nomachtiaj Biblia niman kichiujtiayaj tlen ueltiayaj. Michael onokuep ichan sakin ika omik inan para ijkon kitlajpiyas itaj. Sakin, yejua opeuj nomachtia Biblia. Niman ijkuak nomachtijtoya tlamachtijli 27 itech libro ¡Nochipa uelis tiyolpakis!, tlen ouel itech “okseki xkasikamati” melak okuelitak. Michael opeuj choka ijkuak okonnemili kenijki Jehová melak okiyolkoko kitas ken okitlajyouiltijkej iKoneuj. Pampa melak okitlasojkamat tlen Jehová okichiuj ipampa okipaleui manopatla niman manoapolakti.

XPALEUI AKIN TIKMACHTIA KACHTOPA MAKITEKICHIUILI JEHOVÁ

10. ¿Kenijki Jesús okinpaleui inomachtijkauan más makitekichiuilikan Jehová? (Lucas 5:​5-11; noijki xkita tlaixkopinajli).

¹⁰ Sekimej inomachtijkauan Jesús yokimatkaj ika yejua katka Mesías, san ika, nonekiya makinpaleuikan makasikamatikan ika melak nonekiya kachtopa matenojnotsakan. Ijkuak Jesús okimijli Pedro niman Andrés iuan mayakan matenojnotsatij, yejuamej ikuikayaj seki tiempo ika yonochiujkaj inomachtijkauan (Mat. 4:​18, 19). Sakin, noijki okimijli Santiago niman Juan, akin michtlamajkej katkaj (Mar. 1:​16-20). Ijkuak Pedro niman Andrés “okikajkej inmatlauj”, yejuamej okitakej kenijki ok uelis kinmakaskiaj inchanejkauan tlen ika nopanoltiskiaj niman ijkon xtlaj kinpoloskia. ¿Tlenon okinpaleui makinekikan kikaujteuaskej tlen kichiuayaj? Lucas okijto ika Jesús okichiuj se milagro tlen okinpaleui makineltokakan ika Jehová nochipa kinmakaskia tlen kipolouaya (xpoua Lucas 5:​5-11).

11. ¿Kenijki uelis tikpaleuis akin tikmachtia machikaui itlaneltok?

¹¹ Kanaj tejuamej xuelis tikinchiuaskej milagros ijkon ken Jesús, san ika, kema uelis tikteijliskej kenijki Jehová yokinpaleui akin kachtopa kichiuaj tlen yejua kineki. Uelis tikijlis akin tikmachtia kenijki otikitak ika Jehová omitspaleui ijkuak otiktlapejpeni tiktekichiuilis niman kenijki yejon más okichikauj motlaneltok. Uelis tikijlis kenijki Jehová omitspaleui ijkuak opeuj tiauj tlanechikoltin noso kenijki omitspaleui ijkuak otikijli akin itech titekiti ika saniman tikisas pampa tias tlanechikojli.

12. a) ¿Kenijki kipaleuis akin tikmachtiaj tla tikinuikaj sekimej tokniuan? b) ¿Xkijto kenijki uelis más tikpaleuis akin tikmachtia kachtopa makitekichiuili Jehová?

¹² Akin tikmachtiaj noijki melak kipaleuis tlen okichijkej sekimej tokniuan niman ijkon kitekichiuiliskej Jehová. Kuakon, ijkuak tontemachtis xkinuika sekimej tokniuan niman xkimijli makijtokan kenijki okixmatkej Jehová niman tlenon okinpaleui kachtopa makitekichiuilikan. Noijki uelis más tikpaleuis akin tikmachtia tla tikxeloua tiempo niman ijkon iuan tikimitas videos tlen nesij itech “Okseki xkasikamati” noso ipan “Okseki xkita” itech libro ¡Nochipa uelis tiyolpakis! Ijkuak nemomachtiskej tlamachtijli 37, xkitakan video Jehová nochipa techmakas tlen techpoloua niman xkijli ika tla kachtopa kitekichiuilia Jehová, yejua nochipa kimakas tlen kipoloua.

XPALEUI AKIN TIKMACHTIA MAKIXIKO IJKUAK KITLAUELTOKASKEJ

13. ¿Tlenon okimijli Jesús inomachtijkauan?

¹³ Jesús miyekpa okimijli inomachtijkauan ika kintlauelitaskiaj niman hasta inchanejkauan ijkon kinchiuiliskiaj (Mat. 5:11; 10:​22, 36). Ijkuak yekimiktiskiaj, Jesús okimijli inomachtijkauan ika yejuamej ueliskiaj kinmiktiskiaj (Mat. 24:9; Juan 15:20; 16:2). Niman okimijli ika ijkuak tenojnotsaskiaj maka yakaj iuan manokualanikan niman manotlajpiyakan itech tlen kijtoskiaj niman kichiuaskiaj akin teixnamikiyaj.

14. ¿Kenijki uelis tikpaleuiskej akin tikmachtiaj ijkuak itlaj kixnamikis? (2 Timoteo 3:12).

¹⁴ Ijkon ken Jesús, tejuamej uelis tikimijliskej akin tikinmachtiaj tlenon ueliskia kimijliskej akin imiuan tekitij, akin imiuan nouikaj noso inchanejkauan pampa nomachtiaj Biblia (xpoua 2 Timoteo 3:12). Kanaj akin imiuan tekitij uelis kiuejuetskiliskej pampa kichiua tlen ueltiuj ipan Biblia. Noso ichanejkauan xmás kuelitaskej pampa nomachtia. Ika yejon, melak kuajli tla iuan titlajtouaj akin tikmachtiaj itech tlen uelis kixnamikis niman ijkon yekimatis tlenon kijtos niman kichiuas.

15. ¿Kenijki uelis tikpaleuiskej akin tikmachtiaj tla ichanejkauan kitlauelitaj?

¹⁵ Tla akin tikmachtia kitlauelitaj ichanejkauan, xkijli ika Jesús noijki ijkon ipan onochiuj, sekimej ichanejkauan kinemiliayaj ika yotlamachilispoliujka (Mar. 3:21; Juan 7:5). Noijki xkijli akin tikmachtia makinemili tla ichanejkauan kualanij pampa kinemiliaj ika kikajkayaujtokej noso kinemiliaj ika iteixpantijkauan Jehová xkuajkualtin. Noijki melak noneki maueli matlamachia niman kualtsin nochimej makiminotsa niman más akin ichanejkauan.

16. ¿Kenijki uelis tikpaleuis akin tikmachtia makiteijli tlen kineltoka?

¹⁶ Tla se ichanejkauj akin tikmachtia kitlajtoltia itech tlen kineltoka, xkijli ika xnoneki nochi kilijtiuetsis itech tlen kineltoka pampa tla ijkon kichiua, uelis sakin xok kinekis kikakis. Xkijli san achijtsin matlajto niman makijto tlen xouijtika. Tla ijkon kichiua, ichanejkauj uelis oksejpa kinekis iuan tlajtos itech Biblia (Col. 4:6). Akin tikmachtia noijki uelis kinnojnotsas ichanejkauan itech jw.org. Ijkon ijkuak kinekiskej yejuamej uelis kitejtemoskej tlen kineki kimatis itech iteixpantijkauan Jehová.

17. ¿Kenijki uelis tikmajmachtis akin tikmachtia para matlanankili ijkuak itlaj kitlajtoltiskej? (Noijki xkita tlaixkopinajli).

¹⁷ Uelis tikintekitiltis tlamachtiltin tlen uajlauej ipan jw.org ipan “Tlen miyekpa notlajtoltilo” para tikpaleuis akin tikmachtia makinankili tla itlaj kitlajtoltiaj ichanejkauan noso akin imiuan tekiti (2 Tim. 2:​24, 25). Itlamiyan se tlamachtijli itech libro ¡Nochipa uelis tiyolpakis! onka se recuadro tlen itoka “Sekimej kijtouaj”. Xyolchikaua monomachtijkauj manomajmachti kenijki ueliskia tlanankilis. Maka xpinaui tikijlis akin tikmachtia manomajmachti kenijki más kuajli tlanankilis. Yejuin kipaleuis akin tikmachtia maka manomojti ijkuak kiteijlis tlen kineltoka.

18. ¿Kemanon uelis peuas tenojnotsas akin tikmachtiaj? (Mateo 10:27).

¹⁸ Jesús okimijli inomachtijkauan nochimej makinnojnotsakan (xpoua Mateo 10:27). Tla niman peua tenojnotsa akin tikmachtiaj, uelis nimantsin peuas tlaneltokas itech Jehová pampa kitas kenijki kipaleuiya. Xkijli akin tikmachtia imiuan matenojnotsa tokniuan ipan tlanechikojli, uelis peuas ijkuak chikauak notenojnotsa pampa ijkuakon xmás kitekiyomakas peuas tlajtos imiuan oksekimej. San xkijli tlenon noneki kichiuas para nochiuas tenojnotsketl. Noijki uelis tikijlis makiteijli ika kineki kipanoltis se tlamachtijli ipan tlanechikojli tlen tikpiyaj itlajkotian semana. Yejon kipaleuis makiteijli tlen kineltoka.

XKITITI AKIN TIKMACHTIA IKA ITECH TITLANELTOKA

19. ¿Kenijki okiteititi Jesús ika tlaneltokaya itech inomachtijkauan, niman kenijki uelis tikchiuaskej ken yejua?

¹⁹ Achto ika Jesús yas iluikak, okimijli inomachtijkauan ika oksejpa imiuan nemiskia. Yejuamej xokajsikamatkej ika kimijlijtoya ika imiuan nemiskia ne iluikak. Maski ijkon, Jesús san okitak ken melajkanemiyaj niman xokitak kenijki ometlamatiyaj (Juan 14:​1-5, 8). Jesús kimatstoya ika nonekiya tiempo para ijkon kuajli itlaj kajsikamatiskej, ken yaskej iluikak (Juan 16:12). Tejuamej noijki uelis tikimititiskej akin tikinmachtiaj ika intech titlaneltokaj niman ika kinekij kitekichiuiliskej Jehová.

20. ¿Kenijki okiteititi tokniuj Chifundo ika tlaneltokaya itech akin kimachtiaya?

²⁰ Melak noneki matikneltokakan ika akin tikmachtiaj kinektok nopatlas. Se tokniuj akin itoka Chifundo niman chanti Malaui opeuj kimachtia se ichpochtli akin católica katka niman itoka Alinafe. Ijkuak nomachtijtoyaj tlamachtijli 14 itech libro ¡Nochipa uelis tiyolpakis!, Chifundo okitlajtolti tlenon kinemiliaya itech ijkuak yakaj kintekitiltia imágenes niman ijkon kiueyichiuas toTajtsin. Alinafe melak okualan niman okijli ika yejon noneki toselti tiktlapejpeniskej. Kuakon, Chifundo okinemili ika xok nomachtiskia. San ika, yejua xonosiaujkauj niman ok iuan onomachti Alinafe pampa kineltokaya ika yejua ueliskia kasikamatis ika xnoneki tikintekitiltiskej imágenes. Seki metstin sakin, Chifundo okitlajtolti tlajtoltilistli tlen nesi ipan tlamachtijli 34: “¿Kenijki yomitspaleui pampa timomachtia Biblia niman yotikixmat Jehová?”. Chifundo kijtoua ika Alinafe okijto miyek tlen kualtsin niman se ika iteixpantijkauan Jehová xkichiuaj itlaj tlen Biblia kitlauelita. Sakin Alinafe xok okintekitilti imágenes niman onoapolakti.

21. ¿Kenijki uelis tikpaleuiskej akin tikmachtiaj makitekichiuili Jehová?

²¹ Maski “san toTajtsin, akin kichiua manoskalti”, tejuamej noijki uelis tikpaleuiskej akin tikmachtiaj makitekichiuili Jehová (1 Cor. 3:7). Tejuamej xsan tikijliaj ika noneki kitlakamatis Jehová, noijki tikpaleuiyaj más makitlasojtla. Noijki, tikyolchikauaj manopatla niman tikijliaj matlaneltoka itech Jehová ijkuak itlaj kixnamikis. Ijkuak tikititiaj akin tikmachtiaj ika itech titlaneltokaj, tikpaleuiyaj makineltoka ika yejua noijki uelis kitekichiuilis Jehová.