Xneltoka ika Jehová yomitstlapojpolui

1, 2. ¿Tlenon kichiua Jehová ijkuak toyolkuepaj, niman kenijki tomachiliaj ijkuak ijkon kichiua? (Noijki xkita tlaixkopinajli).

TEKIUAJ David melak notlajtlakoltiaya ipampa tlen xkuajli yokichiujka (Sal. 40:12; 51:​3, tlajtoltin tlen nesij achto ika peuas). San ika, onoyolkuep niman Jehová okitlapojpolui (2 Sam. 12:13). Ijkuak David okasikamat ika Jehová yokitlapojpoluijka melak oyolpak niman oyolseuj (Sal. 32:1).

² Tejuamej noijki uelis tiyolseuiskej niman tiyolpakiskej tla tikasikamatij ika Jehová techiknelia niman kintlapojpoluiya totlajtlakoluan. Jehová techtlapojpoluiya maski tla tikchiuaj se ueyi tlajtlakojli. San ika, noneki yemelak toyolkuepaskej, tiktlajtlaniliskej matechtlapojpolui, tikimijliskej tlayekankej niman tokojtiliskej xok ijkon tikchiuaskej (Prov. 28:13; Hech. 26:20; 1 Juan 1:9). Techyolseuiya tikmatiskej ika ijkuak Jehová techtlapojpoluiya, xok keman kilnamiki niman yeskia kentla tla xkeman titlajtlakoskiaj (Ezeq. 33:16).

3, 4. ¿Kenijki nomachiliaya Jennifer? ¿Tlenon tikitaskej ipan yejuin tlamachtijli?

³ San ika, kemantika ouijtika tikitaj tikneltokaskej ika Jehová yotechtlapojpolui. Matikitakan tlen ipan onochiuj Jennifer. Ijkuak yejua pitentsin katka, itajuan okimachtijkej itech Jehová, san ika, ijkuak oichpochtiak opeuj kichiua tlen xkuajli niman xtlaj kimijliaya itajuan. San ika, seki xiuitl sakin, onokuep itech Jehová niman onoapolakti. Jennifer kijtoua: “Nejua melak niauilnemiya, nitlauaniya, melak nitlauele katka niman san niknekiya melak nikpiyas tomin. Nikmatstoya ika Biblia kijtoua ika pampa Jesús omik topampa Jehová uelis techtlapojpoluis. San ika, xueliya nikneltokaya tla Jehová yonechtlapojpolui maski yoninoyolkuepka niman yoniktlajtlanilijka manechtlapojpolui”.

⁴ ¿Kemantika xueli tikneltoka ika Jehová yomitstlapojpolui ipampa tlen xkuajli otikchiuj yeuejkaui? Xkilnamiki ika Jehová kineki ika ijkon ken David, kuajli xmatsto ika yejua techiknelia niman techtlapojpoluiya. Ipan yejuin tlamachtijli tikitaskej tleka melak noneki matikneltokakan ika Jehová yotechtlapojpolui niman tlenon techpaleuis ijkon matikchiuakan.

TLEKA MELAK NONEKI MATIKNELTOKAKAN IKA JEHOVÁ YOTECHTLAPOJPOLUI

5. ¿Tlenon kineki Satanás matiknemilikan? Xkijto se neskayotl.

⁵ Tla kuajli tikmatstokej ika Jehová yotechtlapojpolui, xtechkajkayauas Satanás. Matikilnamikikan ika Satanás san tlemach kichiuas niman ijkon matiktlalkauikan Jehová. Satanás kineki matiknemilikan ika yotikchiujkej se ueyi tlajtlakojli niman Jehová xkeman techtlapojpoluis. Matontlanemilikan itech tlakatl akin chantiya Corinto akin okikixtijkej itech tlanechikojli pampa oauilnen (1 Cor. 5:​1, 5, 13). Sakin, yejon tlakatl onoyolkuep. San ika, Satanás kinekiya ika tokniuan maka makitlapojpoluikan niman maka makiselikan ipan tlanechikojli. Tla tokniuan xkitlapojpoluiskiaj, Satanás kichiuaskia ika yejon tlakatl makinemili ika Jehová xkeman uelis kitlapojpoluis. Niman pampa yejon tlakatl melak najmanaskia, hasta xok kitekichiuiliskia Jehová. Aman, Satanás noijki kineki matiknemilikan ika Jehová xkeman uelis techtlapojpoluis niman ijkon matiktlalkauikan. Melak kuajli ika tejuamej tikmatstokej tlenon kikui Satanás para techkajkayauas (2 Cor. 2:​5-11).

6. ¿Tlenon techpaleuis maka melak matotlajtlakoltikan?

⁶ Tla kuajli tikmatstokej ika Jehová yotechtlapojpolui, xok melak titotlajtlakoltiskej. Ijkuak titlajtlakouaj melak xkuajli titomachiliaj, niman kuajli tla ijkon tomachiliaj pampa yejon techpaleuis matopatlakan niman matikchiuakan tlen kuajli (Sal. 51:17; 2 Cor. 7:​10, 11). San ika, tla melak totlajtlakoltiaj maski yotoyolkuepkej, uelis melak titajmanaskej hasta xok tiknekiskej tiktekichiuiliskej Jehová. San ika, tla kuajli tikneltokaj ika Jehová yotechtlapojpolui, xok melak totlajtlakoltiskej niman kuajli tomachiliskej. Niman yejon techpaleuis matiktekichiuilikan Jehová ken yejua kineki: ika totlamachilis chipauak niman ika pakilistli (Col. 1:​10, 11; 2 Tim. 1:3). Aman matikitakan tlenon techpaleuis niman ijkon toyojlo makineltoka ika Jehová yotechtlapojpolui.

¿TLENON MITSPALEUIS XNELTOKA IKA JEHOVÁ YOMITSTLAPOJPOLUI?

7, 8. ¿Kenijki onoteneuj Jehová ipan Éxodo 34:​6, 7, niman kenijki techpaleuiya yejon?

⁷ Xtlanemili itech ken onoteneuj Jehová. Matikitakan tlenon okijli Moisés ipan tepetl Sinaí (xpoua Éxodo 34:​6, 7).a Jehová ueliskia kijlis Moisés miyek tlen kuajli kichiua, san ika, yejua san ijkin okijto: “¡NimoDios yejuan nitetlasojtla niman niteiknelia!”. Kuakon, ¿tiknemilia ika Jehová xkitlapojpoluiskia yakaj akin tlajtlakoua niman noyolkuepa? Tla yejua xtetlapojpoluiskia, kiteititiskia ika xtetlasojtla niman xteiknelia.

⁸ Uelis tikneltokaskej ijkuak Jehová kijtoua ika yejua melak teikneliani pampa yejua nochipa kijtoua tlen melauak (Sal. 31:5). Kuakon, tla xueli tikneltoka ika Jehová yomitstlapojpolui, xnemili yejuin: Tla kuajli tikneltoka ika Jehová teikneliani niman kintlapojpoluiya nochimej akin noyolkuepaj, noijki kuajli xneltoka ika tejua noijki yomitstlapojpolui.

9. ¿Tlenon techmachtia Salmo 32:5 itech ken Jehová tetlapojpoluiya?

⁹ Xtlanemili itech tlen kijtoua Biblia itech ken Jehová techtlapojpoluiya. Matikilnamikikan ijkuak David ijkin okijli Jehová: “Tejua noTEKO, otinechtlapojpoluij” (xpoua Salmo 32:5). Ipan yejuin tlaxeloltin tlajtojli “kintlapojpoluiya”, ika hebreo kijtosneki “kinmajkokui” noso “kimitki”. Kuakon, ijkuak Jehová okitlapojpolui David kentla kajkokuiliskia tlen kimamajtoya niman kitkiskia. Pampa Jehová ijkon okichiuj, David oyolseuj niman oyolpak (Sal. 32:​2-4). Tla yemelak toyolkuepaj, uelis tomachiliskej ijkon ken David, xok noneki melak totlajtlakoltiskej ipampa tlen otikchiujkej pampa Jehová yokimitkik totlajtlakoluan.

10, 11. ¿Tlenon techmachtia Salmo 86:5 itech Jehová?

¹⁰ (Xpoua Salmo 86:5). David okijto ika Jehová kinektok techtlapojpoluis. Yejuin kijtosneki ika Jehová xnimantsin kualani ijkuak topopolouaj, niman nochipa kinektok kintlapojpoluis akin noyolkuepaj. David noijki okijto tleka Jehová nochipa kinektok tetlapojpoluis, yejua okijto: “Sanoyej tikintlajsojtla ikan motetlajsojtlalis on yejuan xkaman tlamis on yejuan motech noueyikatsajtsiliaj”. Ipan okse tlamachtijli otiuelkej ika Jehová nochipa kimititis itlasojtlalis tlen xtekaua akin kitlasojtlaj. Yejon tlasojtlalistli kichiua ika Jehová nochipa makinekto kintlapojpoluis akin noyolkuepaj (Is. 55:7). Tla xueli tikneltoka ika Jehová yomitstlapojpolui, xtlanemili itech yejuin: “Tla kuajli tikmatstika ika Jehová kinektok kintlapojpoluis nochimej akin noyolkuepaj niman kitlajtlaniliaj makintlapojpolui, kuajli xmatsto ika tejua noijki yomitstlapojpolui”.

¹¹ Biblia noijki kijtoua ika Jehová kimatstika kenijki titlachijchiujtin niman ika titlajtlakolejkej, yejon melak techyolseuiya (Sal. 139:​1, 2). Matikitakan tlen okijto David ipan okse salmo, tlen techpaleuis más matikneltokakan ika Jehová kineki techtlapojpoluis.

TLEN JEHOVÁ KILNAMIKI

12, 13. Ken nesi ipan Salmo 103:​14, ¿tlenon kilnamiki Jehová niman tlenon kineki kichiuas?

¹² (Xpoua Salmo 103:​14, TNM).b David okijto tleka Jehová kinektika kintlapojpoluis akin noyolkuepaj. Yejua kijtoua ika Jehová “kilnamiki ika titlachijchiujtin ika tlalpoktli”. Yejuin techajsikamachiltia ika Jehová kimatstika ika topopolouaj pampa titlajtlakolejkej. Más matikitakan tlen kijtoua yejuin tlaxelojli.

¹³ David okijkuilo ika Jehová “kuajli kimatstika kenon titlachijchiujtin”. Jehová okichijchiuj Adán ika tlalpoktli, kuakon, kimatstika kenijki titlachijchiujtin niman tlenon techpoloua. Yejua kimatstika ika noneki titlakuaskej, tikochiskej niman titijyotiskej. Hasta maski tla xtitlajtlakolejkej yeskiaj nonekiskia tikchiuaskej yejuin (Gén. 2:7). San ika, pampa Adán niman Eva otlajtlakojkej, tlajtojli “titlalpoktin” noijki uelis kijtosnekis ika ijkuak tiuajtlakatij yetitlajtlakolejkej niman noneki tokojtiliskej xtikchiuaskej tlen xkuajli. David xsan okijto ika Jehová kimatstika ika titlajtlakolejkej, yejua noijki okijto ika Jehová “kilnamiki”. Tlajtojli ika hebreo tlen ipan Salmo 103:14 notlajtolkuepa “kilnamiki” xsan kijtosneki ika Jehová kilnamiktika, noijki kijtosneki ika Jehová itlaj kichiua. Kuakon, yejuin tlaxelojli techajsikamachiltia ika Jehová kasikamati tleka kemantika topopolouaj, san ika, yejua techiknelia niman techtlapojpoluiya tla toyolkuepaj (Sal. 78:​38, 39).

14. a) ¿Tlenon techmachtia Salmo 103:12 itech kenijki tetlapojpoluiya Jehová? b) ¿Tlenon tiuelij itech ken Jehová okitlapojpolui David? (Xkita recuardro “Jehová tetlapojpoluiya niman kilkaua”).

¹⁴ ¿Tlenon más techmachtia Salmo 103 itech kenijki tetlapojpoluiya Jehová? (Xpoua Salmo 103:12). David okijto ika ijkuak Jehová techtlapojpoluiya melak uejka kominkaua totlajtlakoluan “ijkon ken uejka ikisayan tonaltsintli hasta kampa ikalakiyan” tonaltsintli. ¿Tlenon techmachtia? Se ixtlamatkej okijkuilo: “Tla totlajtlakoluan melak uejka kominkauaj, kuakon kuajli matikmatstokan ika xtlaj nokaua, kuajli popoliuij” (El tesoro de David, de Charles Spurgeon, volumen 2, traducción de Samuel Vila). Ken tikitaj, ijkuak Jehová techtlapojpoluiya kuajli kilkaua totlajtlakol niman xok itlaj kilnamiki nion xok techixkoijlia (Ezeq. 18:​21, 22; Hech. 3:19).

15. ¿Tlenon uelis tikchiuaskej tla ok totlajtlakoltiaj?

¹⁵ Tla ok timotlajtlakoltia, tlen kijtoua Salmo 103 mitspaleuis xneltoka ika toTajtsin yemelak yomitstlapojpolui. Xkilnamiki: “Jehová kilnamiki ika titlajtlakole niman kinektika mitstlapojpoluis tla yemelak yotimoyolkuep. Kuakon, tla Jehová yomitstlapojpolui niman yokilkauj motlajtlakol, ¿xnoneki noijki tikilkauas motlajtlakol?”. Jehová xok keman kimilnamiki totlajtlakoluan tlen yokintlapojpolui, kuakon, tejuamej noijki maka matikimilnamiktokan (Sal. 130:3). Tla kuajli yotikasikamat ika Jehová yomitstlapojpolui, xok keman timotlajtlakoltis.

16. ¿Tleka melak xkuajli tla nochipa tikimilnamiktokej totlajtlakoluan? (Noijki xkita tlaixkopinajli).

¹⁶ Xkilnamiki ika tla san nochipa tikimilnamiktok motlajtlakoluan tiyeskia ken yakaj akin kuika icarro niman se sejpa ontlachia tlakuitlapan ipan espejo. Akin kuika icarro kipaleuis tla kemantika ontlachia ika tlakuitlapan para ijkon kitas akinon uajlauj ikuitlapan para maka itlaj ipan panos. San ika, kuajli kimatstika ika tla xkineki itlaj ipan manochiua, noneki nochipa tlachixtias ika tlayekapan. Noijki ijkon, tla kemantika tikimilnamiki motlajtlakoluan, mitspaleuis maka oksejpa ijkon tikchiuas. San ika, tla tejua san nochipa tikimilnamiktok, melak timotlajtlakoltis niman xok ika moyojlo tiktekichiuilis Jehová. Kuakon, ijkon ken akin tlanejnemiltia, nochipa xtlachixtiuj ika tlayekapan. Nochipa xtlanemili itech xochitlalpan kampa xok tikilnamikiskej on tlen xkuajli otikchiujkej (Is. 65:17; Prov. 4:25).

XNELTOKA IKA JEHOVÁ YOMITSTLAPOJPOLUI

17. ¿Tleka noneki tikneltokaskej ika Jehová techtlasojtla niman kinektok techtlapojpoluis?

¹⁷ Tinochimej noneki kuajli tikneltokaskej ika Jehová techtlasojtla niman nochipa kinektok techtlapojpoluis (1 Juan 3:19). Ijkon noneki tikchiuaskej pampa Satanás ok kiyejyekojtos techneltokiltis ika Jehová xtechtlasojtla niman ika xkeman techtlapojpoluis. Yejua kineki matiktlalkauikan Jehová, niman pampa kimatstika ika yekipopoloskej, más kiyejyekos techkajkayauas (Apoc. 12:12). ¡Maka matijkauilikan matechkajkayaua!

18. ¿Tlenon uelis tikchiuas niman ijkon más tikneltokas ika Jehová mitstlasojtla niman mitstlapojpoluiya?

¹⁸ Amanchikueyi otikitakej tlenon mitspaleuis xneltoka ika Jehová mitstlasojtla. Niman ipan yejuin tlamachtijli otikitakej tlenon uelis tikchiuas para kuajli tikmatstos ika Jehová yomitstlapojpolui. Xxelo tiempo niman ijkon xkita ipan Biblia kenijki tetlapojpoluiya Jehová. Xkilnamiki ika yejua kimatstika ika titlajtlakole niman ika mitsiknelia niman mitstlapojpoluiya. Tla tikchiua nochi yejuin, uelis tiktlasojkamachilis Jehová niman tikijtos ken David: “Tejua noTEKO, otinechtlapojpoluij” (Sal. 32:5).