¿Tlenon uelis tikchiuaskej ijkuak tikitaskej ika nochiua tlen xkuajli?

1, 2. ¿Tlenon kichiuaj miyekej ijkuak kitaj ika oksekimej kinchiuiliaj tlen xkuajli, niman kanaj tlenon uelis totlajtoltiskej?

IPAN yejuin tonaltin miyekej kinchiuiliaj tlen xkuajli. Kintlajyouiltiaj pampa xkipiyaj tomin, pampa oksekan ualeuaj, ipampa ken tlachiaj noso ipampa okseki tlemach. Niman sekimej tekiuajkej niman akin melak kipiyaj tomin san intech tlanemiliaj, niman xkimajmana kijtlakoskej tlaltikpaktli niman kinchiuiliskej tlen xkuajli tlaltikpakchanejkej. Nochi yejuin niman okseki tlen xkuajli nochiua, uelis techtlajyouiltis noso kintlajyouiltis akin tikimixmatij.

² Kema, tinochimej tiknekij tiyolseujtoskej niman matechchiuilikan tlen kuajli. Ika yejon, sekimej melak kualanij ijkuak kitaj ika sekimej kitechiuiliaj tlen xkinamiki. Sekimej tlaltikpakchanejkej kiyejyekouaj yejuamej kiyektlaliskej tlen xkuajli panoua ipan tlaltikpaktli noso ipan inpaís. Ika yejon, ontetsajtsiliaj pampa kinekij kinpatlaskej tekiuajkej niman intlanauatiluan niman kinpaleuiyaj políticos akin kiteijliaj ika kiyektlaliskej tlen xkuajli. San ika, akin tiktekichiuiliaj toTajtsin tikmatstokej ika tejuamej xtiteuamej ipan yejuin tlaltikpaktli niman ika iGobierno toTajtsin kipopolos nochi tlen xkuajli techchiuiliaj (Juan 17:16). Maski ijkon, techyolkokoua niman hasta techkualania ijkuak tikitaj ika kinchiuiliaj tlen xkuajli oksekimej. Kanaj uelis ijkin totlajtoltiskej: “¿Tlenon uelis nikchiuas ijkuak ijkon panos? ¿Tlenon uelis nikchiuas aman?”. Ipan yejuin tlamachtijli tiknankiliskej yejon. San ika, kachtopa matikitakan kenijki nomachiliaj Jehová niman Jesús ijkuak kitaj ika techchiuiliaj tlen xkinamiki.

JEHOVÁ NIMAN JESÚS KITLAUELITAJ IJKUAK NOCHIUA TLEN XKINAMIKI

3. ¿Tleka xtikuelitaj ijkuak techchiuiliaj noso kinchiuiliaj oksekimej tlen xkinamiki? (Isaías 5:7).

³ Jehová “kitlajsojtla on tlen melauak niman melajki” niman Biblia kijtoua ika Jehová otechchijchiuj ken yejua, ika yejon, tejuamej noijki xtikuelitaj matechchiuilikan tlen xkinamiki noso makinchiuilikan oksekimej tlen xkinamiki (Sal. 33:5; Gén. 1:26). Yejua xkeman kichiua tlen xmelajki niman kineki ika oksekimej noijki maka makichiuakan tlen xmelajki (Deut. 32:​3, 4; Miq. 6:8; Zac. 7:9). Matikonteneuakan yejuin, ipan itonaluan teotlajtojketl Isaías, Jehová kikakiya “inchokilis” israelitas akin tlajyouijtoyaj pampa oksekimej israelitas kinchiuiliayaj tlen xkuajli (xpoua Isaías 5:7). Okintlajyouilti akin xkintlakamatiyaj itlanauatiluan niman akin kitechiuiliayaj tlen xkuajli (Is. 5:​5, 13).

4. ¿Tlenon tiuelij itech Jesús ijkuak okipajti tlakatl akin xueliya koliniaya ima? (Noijki xkita tlaixkopinajli).

⁴ Ijkon ken Jehová, Jesús noijki kitlasojtla melajkayotl niman kitlauelita ijkuak nochiua tlen xkinamiki. Matontlanemilikan itech tlen opanok ijkuak nemiya ipan tlaltikpaktli. Se tonajli okitak se tlakatl akin xueliya koliniaya ima, kuakon yejua melak okikneli niman okipajti. San ika, ijkuak teopixkej okitakej yejon, melak okualankej. Kijtouayaj ika Jesús xkitlakamatstoya tlanauatijli itech sábado, yejuamej xkikneliayaj yejon tlakatsintli. “Jesús melak okualan niman onoyolkoko ijkuak okitak ika akin ompa nemiyaj melak yoltechikajkej” (Mar. 3:​1-6).

5. ¿Tlenon noneki tikilnamikiskej tla melak tikualanij ijkuak tikitaj ika sekimej kinchiuiliaj tlen xkuajli?

⁵ Jehová niman Jesús kualanij ijkuak kitaj ika sekimej kinchiuiliaj tlen xkinamiki, kuakon, xtlaj tlenon tla noijki tikualanij ipampa yejon (Efes. 4:26). San ika, noneki tikilnamikiskej ika maski melak tikualaniskej xkichiuas ika oksekimej maka sa makitechiuilikan tlen xkuajli. Niman matikilnamikikan ika tla melak uejkaujtipan tikualantokej noso xtikteltiaj totlauel uelis melak titajmanaskej niman hasta uelis tikualoskej (Sal. 37:​1, 8; Sant. 1:20). Kuakon, ¿tlenon uelis tikchiuaskej ijkuak techchiuiliskej noso kinchiuiliskej tlen xkuajli oksekimej? Matikitakan tlen okichiuj Jesús.

TLENON OKICHIUJ JESÚS IJKUAK OKITAK IKA SEKIMEJ KINCHIUILIAYAJ TLEN XKINAMIKI

6. ¿Ijkuak Jesús nemiya ipan tlaltikpaktli tlenon xkuajli kinchiuiliayaj tlaltikpakchanejkej? (Noijki xkita tlaixkopinajli).

⁶ Ijkuak Jesús nemiya ipan tlaltikpaktli kitaya kenijki miyekej melak kintlajyouiltiayaj. Yejua kimatstoya ika teopixkej kinchiualtiayaj tlaltikpakchanejkej makichiuakan tlen yejuamej xueliyaj niman maka ika inyojlo manemikan (Mat. 23:​2-4). Noijki kimatstoya ika tekiuajkej romanos melak xkuajli tlen kinchiuiliayaj judíos. Ika yejon, miyekej judíos xok kinekiyaj makinyekana Roma niman sekimej, ken zelotes, hasta kinektoyaj tlauijsokiskej ipampa yejon. Aman tej, Jesús xokinyekan nion xokinpaleui akin ijkon kichiuayaj. Niman ijkuak okimat ika kinekiyaj kitlaliskej ken tekiuaj, yejua ocholo (Juan 6:15).

7, 8. ¿Tleka Jesús xokiyejyeko kipopolos tlen xkuajli nochiua ijkuak ouajlajka? (Juan 18:36).

⁷ Jesús xkeman onokalakti ipan política para kiyektlalis tlen xkuajli panotika ipan tlaltikpaktli. ¿Tleka? Pampa kimatstoya ika nion se tlakatl xuelis nion xkinamiki tlayekanas (Sal. 146:3; Jer. 10:23). Niman yejuamej xueliskej kipopoloskej tlen techtlajyouiltia. Ijkon panoua pampa Satanás yejua akin kiyekana yejuin tlaltikpaktli niman kichiua ika tlaltikpakchanejkej matechtlajyouiltikan ijkon ken yejua techtlajyouiltia (Juan 8:44; Efes. 2:2). Niman noijki, pampa titlajtlakolejkej, maski tiknekiskiaj tiktechiuiliskej tlen kuajli, xtiuelij (Ecl. 7:20).

⁸ Jesús kimatstoya ika san iGobierno toTajtsin ueliskia kipopolos tlen kichiua manochiua tlen xkuajli. Ika yejon, yejua okitekitilti itiempo niman ikojtilis niman ijkon “tenojnotsas niman kiteijlis on kuajli tlajtoltin itech iGobierno toTajtsin” (Luc. 8:1). Okimijli akin kinekij manochiua tlen kuajli, ika nochi tlen xkuajli panotika popoliuis (Mat. 5:6; Luc. 18:​7, 8). San ika, yejuin xuelis kichiuas nion se tekiuaj, san iGobierno toTajtsin tlen xonka ipan yejuin tlaltikpaktli (xpoua Juan 18:36).

XCHIUA KEN JESÚS IJKUAK MITSCHIUILISKEJ TLEN XKUAJLI

9. ¿Tleka kuajli tikmatstika ika san iGobierno toTajtsin uelis kipopolos tlen xkuajli?

⁹ Pampa tinemij ipan sa “itlamiyan tonaltin”, aman más nochiua tlen xkuajli xijkon ken ijkuak Jesús onen ipan tlaltikpaktli. Niman ijkon ken ipan itonaluan Jesús, Satanás niman tlaltikpakchanejkej akin xkuajkualtin, yejuamej akin kichiuaj matitlajyouikan (2 Tim. 3:​1-5, 13; Apoc. 12:12). Ijkon ken Jesús, tejuamej tikmatstokej ika san iGobierno toTajtsin uelis kipopolos tlen kichiua matitlajyouikan. Niman pampa tikmatstokej yejon, tejuamej xtokalaktiaj ipan política niman xtikimixnamikij tekiuajkej. Matikitakan tlen ipan onochiuj se tokniuj akin itoka Stacy.a Ijkuak xenochiuaya iteixpantijkauj Jehová, teuan komontsajtsiliaya tekiuajkej pampa kinekiya manochiua tlen kuajli. San ika, sakin opeuj notlajtoltia tla tepaleuiaya tlen kichiuaya. Yejua kijtoua: “Ijkuak teuan nikomontsajtsiliaya tekiuajkej, ninotlajtoltiaya tla yemelak tepaleuis. Aman ika nikpaleuiya iGobierno toTajtsin kuajli nikmatstika ika yejon kema tepaleuis xijkon ken tlen nejua nikchiuaya. Kuajli nikmatstika ika Jehová uelis kinpaleuis nochimej akin tlajyouijtokej” (Sal. 72:​1, 4).

10. Ken kijtoua Mateo 5:​43-48, ¿tleka tejuamej xtokalaktiaj ipan grupos akin kinekij kinpatlaskej tekiuajkej? (Noijki xkita tlaixkopinajli).

¹⁰ Miyekej tlaltikpakchanejkej akin nokalaktiaj ipan grupos pampa kinekij kinpatlaskej tekiuajkej kualanij niman teixnamikij, san ika, Jesús xyejon tlen otemachti nion xyejon tlen okichiuj (Efes. 4:31). Se tokniuj akin itoka Jeffrey kijtoua: “Nikmatstika ika ijkuak tlaltikpakchanejkej komontsajtsiliaj tekiuajkej, maski kuajli peuaj, xkuajli ken ontlamij, pampa sakin melak kualanij, tlaxoxotoniaj niman tlachtekij”. San ika, Jesús otemachti ika noneki nochimej tikintlasojtlaskej, hasta akin xtlanemiliaj ken tejuamej noso techtlaueltokaj (xpoua Mateo 5:​43-48). Niman akin tiiteixpantijkauan Jehová, melak tokojtiliaj tikchiuaskej tlen Jesús otemachti niman okiteititi.

11. ¿Tleka kemantika ouijtika tikitaj tikchiuaskej ken Jesús?

¹¹ Maski tikmatstokej ika iGobierno toTajtsin kipopolos nochi tlen techtlajyouiltia, kanaj ouijtika tikitaskej tikchiuaskej ken Jesús ijkuak techchiuiliaj tlen xkinamiki. Matikitakan tlenon ipan onochiuj Janiya, akin okichikoitakej ipampa ken nesiya. Yejua kijtoua: “Melak oninajman, melak nikualantoya niman niknekiya noijki makinchiuilikan tlen xkuajli akin ijkon onechchiuilijkej. Kuakon, onikalak ipan se grupo kampa kinpaleuiayaj akin kinchikoitayaj. Oniknemili ika yejon kichiuaskia kuajli maninomachili”. San ika, sakin okitak ika nonekiya kipatlas ken tlanemiliaya. Yejua kijtoua: “Onikitak ika xok nitlaneltokaya itech Jehová niman yopeujka más nitlaneltokaya itech tlen kijtouayaj tlaltikpakchanejkej, ika yejon, onikintlalkaui”. Ijkuak techchiuiliaj tlen xkuajli noso ijkuak kinchiuiliaj tlen xkuajli oksekimej kanaj melak tikualanij, san ika, maka matijkauilikan ika yejon makichiua matokalaktikan ipan política (Juan 15:19).

12. ¿Tleka melak noneki kuajli matiktlapejpenikan tlen tikitaj, tlen tikpouaj noso tlen tijkakij?

¹² ¿Tlenon uelis techpaleuis maka sajnoye matikualanikan ijkuak techchiuiliskej noso tikitaskej ika oksekimej kinchiuiliaj tlen xkuajli? Uelis tikchiuaskej yejuin: kuajli tiktlapejpeniskej tlen tikitaj, tlen tikpouaj niman tlen tijkakij. Seki tlen noijtoua ipan internet xmelauak, pampa san kinekij kinmojtiskej tlaltikpakchanejkej niman kijtoskej tlen xkuelitaj itech tekiuajkej. Niman miyekpa akin kipanoltiaj noticias, san kijtouaj tlen yejuamej kinemiliaj niman xkijtouaj tlen yemelak opanok. Niman maski tla tlen kijtouaj yemelak opanok, xtlaj ika techpaleuis tla melak itech titlanemiliaj. Tla san nochipa tikitstokej, tikamapoujtokej, noso tikaktokej noticias, kichiuas maka ika toyojlo matinemikan, matajmanakan niman matikualanikan (Prov. 24:10). Niman hasta uelis tikilkauaskej ika san iGobierno toTajtsin uelis kipopolos nochi tlen xkuajli panotika aman.

13. ¿Kenijki techpaleuis tla mojmostla tikamapouaj toBiblia?

¹³ Noijki uelis tikchiuaskej yejuin: mojmostla tikamapouaskej Biblia niman itech titlanemiliskej. Se tokniuj akin itoka Alia melak okualan ijkuak okitak ika sekimej akin chantiyaj kampa yejua chantiya kinchiuiliayaj tlen xkuajli niman ika xtlaj kinchiuiliayaj akin tetlajyouiltiayaj. Yejua kijtoua: “Ononek nikilnamikis ika san Jehová uelis kiyektlalis nochi tlen xkuajli panotika aman. Kuakon, onikamapouj tlen kijtoua Job 34:​22-29, kampa kuajli techijlia ika xakaj uelis niyanas itech Jehová. San yejua uelis kuajli kiyektlalis nochi tlen xkuajli panoua”. Kuakon, ¿onka itlaj tlen uelis tikchiuaskej aman ika iGobierno toTajtsin xekipopoloua nochi tlen xkuajli nochiua?

¿TLENON UELIS TIKCHIUASKEJ AMAN?

14. ¿Tlenon uelis tikchiuaskej aman? (Colosenses 3:​10, 11).

¹⁴ Xuelis tikchiuaskej ika sekimej makinchiuilikan tlen kuajli oksekimej, san ika, tejuamej kema uelis tiktechiuiliskej tlen kuajli. Ijkon ken yotikitakej, tikchiuaj ken Jesús ijkuak tikteititiaj ika titetlasojtlaj. Niman yejon tlasojtlalistli kichiuas matikinchiuilikan tlen kuajli oksekimej, hasta akin techchiuiliaj tlen xkuajli (Mat. 7:12; Rom. 12:17). Jehová yolpaki ijkuak kita ika kuajli titenotsaj niman titechiuiliaj tlen kuajli (xpoua Colosenses 3:​10, 11).

15. ¿Kenijki titlapaleuiayaj ijkuak titenojnotsaj?

¹⁵ Tla tiknekij titlapaleuiskej para maka sa manochiua tlen xkuajli, noneki tikteijliskej tlen kijtoua Biblia. ¿Tleka ijkon tikijtouaj? Pampa ijkuak tlaltikpakchanejkej kixmatij Jehová niman kinekij kiyolpaktiskej, nopatlaj, peuaj kuajli kinnotsaj oksekimej niman kiteititiaj ika tetlasojtlaj (Is. 11:​6, 7, 9). Ijkuak xenomachtiaya Biblia, se tlakatl akin itoka Jemal, onokalakti ipan se grupo tlen kixnamikiya tekiuaj. Ijkon kichiuaya pampa kijtouaya ika tekiuaj kitechiuiliaya tlen xkuajli. Yejua kijtoua: “Xuelis tikinpatlas tlaltikpakchanejkej, san ika, Biblia kema uelis kinpatlas. Nejua yejon onechpatlak”. Tlen ouel ipan Biblia okichiuj maka sa mateixnamiki, ika yejon, ijkuak titemachtiaj itech iTlajtol toTajtsin, tikinpaleuiyaj tlaltikpakchanejkej maka sa makitekichiuilikan tlen xkuajli.

16. ¿Tleka tikneki titenojnotsas itech iGobierno toTajtsin?

¹⁶ Ijkon ken Jesús, tejuamej noijki sa tiknektokej tikimijliskej tlaltikpakchanejkej ika san iGobierno toTajtsin kiyektlalis tlen xkuajli nochiua aman. Ijkon, uelis kipiyaskej se tlamachialistli akin yokinchiuilijkej tlen xkuajli ipan yejuin tlaltikpaktli (Jer. 29:11). Stacy, akin otiktenejkej ipan párrafo 9, kijtoua: “Nikixmatis tlen melauak, yonechpaleui manikxiko ijkuak nechchiuiliaj tlen xkuajli noso ijkuak nikita ika oksekimej ijkon kinchiuiliaj. Jehová techyolseuiya ika Biblia”. Tla tiknekij tikinyolseuiskej tlaltikpakchanejkej ika tlen kijtoua Biblia, noneki kuajli toyektlaliskej. Tla kuajli tikneltokaj ika iGobierno toTajtsin uelis kiyektlalis nochi tlen xkuajli, xouijtika titlajtoskej itech, ijkuak tinemiskej kampa tomachtiaj noso kampa titekitij.b

17. ¿Kenijki techpaleuiya Jehová matitlaxikokan ijkuak nochiua tlen xkuajli ipan yejuin tlaltikpaktli?

¹⁷ Tikmatstokej ika pampa Satanás ok tlayekantika ipan yejuin tlaltikpaktli, nochiujtos tlen xkuajli. San ika, Jehová yotechijli ika techpaleuis niman noijki ika kipopoloskej Satanás (Juan 12:31). Noijki, Biblia techijlia tleka titlajyouiyaj niman kenijki Jehová melak kiyolkokoua ijkuak kita ika titlajyouiyaj (Sal. 34:​17-19). Itechkopa iKoneuj, techmachtia tlenon uelis tikchiuaskej ijkuak tikitaskej ika panoua tlen xkuajli niman kenijki iGobierno kipopolos nochi tlen xkuajli (2 Ped. 3:13). Ika yejon, ika toyojlo matikteijlikan on kuajli tlajtoltin itech iGobierno toTajtsin chika tikchiaj mayejko yejon tonajli ijkuak ipan yejuin tlaltikpaktli onias “yolmelajkilistli” (Is. 9:7).