Matiktlasojkamatikan iteiknelilis toTajtsin tlen xtechmelaua

1, 2. a) Xkijto se neskayotl tlen okiteneuj Jesús. b) ¿Kenon yejuin neskayotl teititia ijkuak se kuelita kitetlayokolis niman teiknelis?

IPAN se tonajli ika kualkan, se tokaketl ika uvas oyaj okintejtemoto akin itech tekitiskej. Yejua okimijli keski tomin kintlaxtlauilis niman yejuamej okijtokej ika kema. San ika, sakin ononek kintejtemos oksekimej akin itech tekitiskej. Ika yejon oksejpa oyaj niman miyekpa ipan yejon tonajli okintejtemoto. Yejua okimijli kintlaxtlauilis san keski nonekiya. Ijkuak otlan tekitl, okinsentlali nochimej akin itech tekitiyaj niman ijkon okintlaxtlauili. Sekimej yotekitkaj nochi tonajli niman oksekimej san se hora. San ika, san noijki okintlaxtlauili. Ijkuak akin otekitkej nochi tonajli okimatkej yejuin xokuelitakej. Tokaketl okimijli ika yejuamej okijtokej ika kema itech kech kintlaxtlauiliskia. Noijki okimijli yejua kimati tlenon kichiuas ika tomin tlen kipiya. Kuakon okintlajtolti tla yejuamej kinexikolitayaj pampa yejua kuelita kitetlayokolis (Mateo 20:1-15).

² Tlen okijto Jesús techmachtia itlaj tlen ueyi kijtosneki, itech iteiknelilis Jehová (xpoua 2 Corintios 6:1)^[1] (xkita nota kampa ontlami). Sekimej uelis kinemiliskej ika tekitkej akin otekitkej nochi tonajli noneki kinmakaskej okse tomin xijkon ken oksekimej. San ika, yejon tokaketl okimititi iknelilistli akin otekitkej san seki horas. Se ixtlamatki okijto itech tlajtojli “teiknelilistli” tlen notekitiltia ipan Biblia ika uelis kijtosnekis: “Itlaj tlen san techtlayokoliaj niman xtechmelaua tikseliskej, itlaj tlen kimakaj se tlakatl tlen xkinotlanilia niman xkinamiki makiseli”.

SE TETLAYOKOLIJLI TLEN TECHMAKA JEHOVÁ

3, 4. ¿Tleka Jehová yokiteititi iteiknelilis niman kenon yokichiuj?

³ Biblia techijlia ika iteiknelilis toTajtsin se tetlayokolijli (Efesios 3:7, TNM). Pampa xueli tiktlakamatij Jehová itech nochi, xtechmelaua tikseliskej iteiknelilis toTajtsin. Kema, tejuamej techmelaua timikiskej. Tekiuaj Salomón okijto: “Pampa xnemi ipan tlajli se tlakatl akin nochipa makichiua tlen kuajli niman maka matlajtlako” (Eclesiastés 7:20). Sakin, Pablo, itlatitlankauj Cristo, okijto: “Nochimej [...] tlajtlakolejkej niman xkipiaj on yolmelajkanemilistli yejuan Dios okinek ma kipiakan” niman “tlajtlakojli kitemaka tlaxtlauijli ikan mikilistli” (Romanos 3:23; 6:23a).

⁴ Pampa Jehová melak kintlasojtla tlaltikpakchanejkej, yejua okuajtitlan isenteKonetsin mamikiki topampa. Yejon tlen melak ueyi ken toTajtsin okiteititi iteiknelilis (Juan 3:16). Pablo okijto ika Jesús “kipia ueyilistli niman tetlakaitalistli pampa otlajyouij niman omik” ipampa nochi tlakatl ika “iueyi teiknelilis” toTajtsin (Hebreos 2:9). Kuakon uelis tikijtoskej ika “nemilistli [tlen] tikseliaj itechkopa Cristo Jesús toTeko” se tetlayokolijli (Romanos 6:23b).

5, 6. a) ¿Kenon uelis tonkisaskej tla tokauiliaj matechyekana tlajtlakojli? b) ¿Niman kenon uelis tonkisaskej tla tokauiliaj matechyekana iteiknelilis toTajtsin?

⁵ ¿Tleka tikpiyaj tlajtlakojli niman timikij? Biblia kijtoua “ipampa on tlajtlakojli onkaj mikilistli”. Tinochimej tiualeuaj itech Adán niman ika yejon titlajtlakouaj niman timikij (Romanos 5:12, 14, 17). San ika, tejuamej uelis tiktlapejpeniskej tla tokauiliskej noso ka matechyekana tlajtlakojli. ¿Kenon uelis tikchiuaskej yejon? Ijkuak tikteititiaj totlaneltokil itech tlaxtlauijli tlen okitemakak Cristo, ika topaleuiyaj iteiknelilis Jehová. Biblia kijtoua: “Tikmatij ika tikpiaj sanoyej miyek tlajtlakojli, no ijki tikmatij ika más ueyi iteiknelilis. Yejua ika, ijkon ken on tlajtlakojli okipix poder para otemiktij, iteiknelilis Dios no ijki kipia poder para techmaka on nemilistli yejuan para nochipa. Yejua in nochiua ipampa on yolmelajkalistli yejuan tikselia itechkopa toTeko Jesucristo” (Romanos 5:20, 21).

⁶ Maski tinochimej ok titlajtlakolejkej, xkipiya ika tijkauiliskej matechyekana tlajtlakojli. Ika yejon, ijkuak tikchiuaj itlaj tlen xkuajli, matiktlajtlanilikan Jehová matechtlapopolui. Pablo okijto: “On tlajtlakojli xuelis mechchiualtis nenkichiuaskej on tlen xkuajli, xpampa on tlanauatijli mechyekana, yej mechyekana iteiknelilis Dios” (Romanos 6:14). Kuakon ¿kenon uelis ika topaleuiskej iteiknelilis toTajtsin? Oksejpa Pablo okijto: “Iteiknelilis Dios techmachtia ma tikajkauakan nochi tlen xkuajli niman nochi eleuilistli yejuan onkaj ipan in tlaltikpaktli. Niman no techmachtia ma titonauatikan kuajli, ma tiyolmelajkanemikan niman ma tiyeknemikan ipan in tlaltikpaktli” (Tito 2:11, 12).

MIYEK KEN NOTEITITIA ITEIKNELILIS TOTAJTSIN TLEN XTECHMELAUA

7, 8. ¿Tlenon kijtosneki ika iteiknelilis Jehová noteititia “sesetlamantik”? (Xkita tlaixkopinajli kampa peua tlen tomachtijtokej).

⁷ Pedro, itlatitlankauj Cristo, okijkuilo: “Dios omechmakak nemejuamej on tetlayokoliltin [...]. Niman cada se de nemejuamej omechmakak tetlayokoliltin sesetlamantik” (1 Pedro 4:10). ¿Tlenon kijtosneki ika Jehová kiteititia iteiknelilis “sesetlamantik”? Yejon kijtosneki ika maski tikixnamikiskej tlajyouilistli ipan tonemilis, Jehová techmakas tlen techpoloua niman matikxikokan (1 Pedro 1:6). Yejua nochipa techmakas tlen techpoloua niman ijkon matikxikokan nochi tlen tikixnamikiskej.

⁸ Juan, itlatitlankauj Cristo, okijkuilo: “Tinochimej otikselijkej melak ueyi teiknelilistli itech teiknelilistli” (Juan 1:16, TNM). Pampa Jehová miyek ken techititia iteiknelilis, tikseliaj miyek tlateochiualistin. ¿Katlejua seki yejon tlateochiualistin?

9. ¿Kenon techpaleuiya iteiknelilis Jehová niman kenon uelis tikteititiskej ika tiktlasojkamatij?

⁹ Jehová techtlapopoluilia totlajtlakoluan. Ipampa iteiknelilis tlen xtechmelaua, Jehová techtlapopoluilia totlajtlakoluan. San ika, yejua techtlapopoluiya san tla toyolkuepaj niman tochikauaj xtikchiuaj tlen xkuajli (xpoua 1 Juan 1:8, 9). Pablo okimijli tlapejpeniltin ipan kachtopa siglo kenon Jehová kintlapopoluiya totlajtlakoluan, Yejua okijto ika toTajtsin yokinmakixtijka itech tlayoualyotl niman aman nemiskiaj ipan tekiuajyotl. Noijki okijto ika “yejua okitlaxtlau para nochi [in]tlajtlakol, niman o[kin]tlapojpoluij” (Colosenses 1:13, 14). Melak tiktlasojkamatij iteiknelilis toTajtsin niman tiknekij tikueyichiuaskej. Niman pampa Jehová techtlapopoluilia totlajtlakoluan, uelis tikseliskej miyek okseki tlateochiualistin.

10. ¿Tleka techyolpaktia iteiknelilis toTajtsin?

¹⁰ Tejuamej uelis tinemiskej ika yolseuilistli niman kuajli iuan touikaskej toTajtsin. Tinochimej tiitlauelikniuan toTajtsin pampa tinochimej tiuajnemij ika tlajtlakojli. San ika, Pablo okijto: “Ijkuak tiitlauelikniuan katkaj Dios, yejua otechmakak yolseuilistli itechkopa imikilis iKonetsin” (Romanos 5:10). Ipampa tlaxtlauijli tejuamej uelis toyolseuiskej iuan toTajtsin. Aman uelis kuajli touikaskej ika yolseuilistli. Pablo okijto kenon nochiuas yejuin ijkuak otlajto itech iteiknelilis Jehová iuan ikniuan tlapejpeniltin: “Aman, tej, ipampa totlaneltok Dios techmaka cuenta ika totlajtlakoluan yokintlaxtlau. Yejua ika iuan yejua tikpiaj yolseuilistli itechkopa toTeko Jesucristo. Ipampa totlaneltok Jesucristo yotechmakak iteiknelilis Dios niman aman timelajkanemij ipan iteiknelilis” (Romanos 5:1, 2). ¡Melak tiktlasojkamatij ika aman kuajli touikaj iuan Jehová ika yolseuilistli!

11. ¿Kenon tlapejpeniltin kinuajuikaj miyekej akin nemiskej ipan tlaltikpaktli itech melajkayotl?

¹¹ ToTajtsin uelis techitas timelajkej ixpan. Teotlajtoketl Daniel okijkuilo ika ipan sa itlamiyan tonaltin, “akin kipiyaj asikamatilistli” noso tlapejpeniltin “kinuajuikas[kiaj] miyekej itech melajkayotl” (xpoua Daniel 12:3).a ¿Kenon tlapejpeniltin kichiuaj yejon? Yejuamej kiteijliaj kuajli tlajtoltin niman kinmachtiaj melak miyekej itlanauatiluan toTajtsin akin nemiskej ipan tlaltikpaktli (Juan 10:16). Tlapejpeniltin kinpaleuiyaj yejuamej manochiuakan melajkej ixpan toTajtsin. Yejuin ueli nochiua ijkon san ipampa iteiknelilis Jehová. Pablo okijto: “Itechkopa iteiknelilis yejuan okintlayokolij, kijtoua ika intlajtlakoluan yokintlaxtlau. Yejua in kichiua itechkopa Jesucristo yejuan okitlaxtlau para totlajtlakol” (Romanos 3:23, 24).

12. ¿Kenon iteiknelilis toTajtsin techpaleuiya matiuelikan tikchiuaskej teoyotl?

¹² Uelis tonisiuiskej itech toTajtsin ika teoyotl. Ipampa iteiknelilis toTajtsin, uelis tiknisiuiskej ika teoyotl. Pablo kitokayotia kampa tlanauatia Jehová ken “kampa tlanauatia toTajtsin itech iteiknelilis” niman yejua technotsa “ika maka matomojtikan titlajtoskej [iuan]” (Hebreos 4:16a, TNM). Tejuamej uelis tikchiuiliskej teoyotl Jehová ipampa Jesús. ¡Yejuin se ueyi tlateochiualistli! Pablo okijto: “Xtitomojtiaj para tiknisiuiyaj Dios ikan nochi toyojlo, pampa tikneltokaj Cristo” (Efesios 3:12).

13. ¿Kenon uelis iteiknelilis toTajtsin techpaleuis “ijkuak itlaj techpolos”?

¹³ Uelis tiknextiskej tlapaleuilistli ijkuak noneki. Pablo otechyolchikauj matikchiuilikan Jehová teoyotl san kemanon ijkuak nonekis niman ijkon “ma tikselikan iteiknelilis niman iueyi tetlajsojtlalis yejuan techpaleuis ijkuak itlaj techpolos” (Hebreos 4:16b). Nochipa ijkuak tikixnamikiskej tlajyouilistli ipan tonemilis, uelis tiktlajtlaniliskej ika nochi toyojlo matechpaleui. Niman yejua kinnankilis toteoyouan maski xnoneki makichiua. Miyekpa yejua techpaleuiya ika tokniuan. Jehová kinnankilia toteoyouan niman ika yejon ika nochi toyojlo uelis tikijtoskej: “[Jehová] nechpaleuijtikaj. Yejua ika xnikmakajsis on tlen uelis nechchiuilis yakaj tlakatl” (Hebreos 13:6).

14. ¿Kenon iteiknelilis Jehová techyolseuiya?

¹⁴ Uelis tikseliskej yolseuilistli. Yejuin se ueyi tlateochiualistli tlen ika Jehová techyolseuiya nochipa ijkuak melak tajmanaj (Salmo 51:17). Ijkuak tlaneltokakej itech Cristo ipan Tesalónica tlajyouiayaj pampa kintlaueltokayaj, Pablo okimijkuilouili yejuin tlajtoltin: “Ma sa no toTeko Jesucristo, niman Dios toTajtsin, yejuan techtlajsojtla niman ikan iteiknelilis otechmakak yoleualistli para nochipa niman se kuajli tlamachalistli, ma mechyoleua niman ma mechmelajkatlali” (2 Tesalonicenses 2:16, 17). ¡Melak techyolchikaua tikmatiskej ika ipampa iteiknelilis Jehová yejua techtlasojtla niman najmana topampa!

15. ¿Tlenon uelis tikchiaskej ipampa iteiknelilis toTajtsin?

¹⁵ Tikchiaj tinemiskej nochipa. Pampa titlajtlakolejkej, xuelis tikpiyaskiaj tlamachialistli tla Jehová xtechpaleuiskia (xpoua Salmo 49:7, 8).b San ika, Jehová yotechmakak se kualtsin tlamachialistli. ¿Katlejua yejon tlamachialistli? Jesús okijto: “Yejua kineki para nochimej on yejuan kimatij akinon nejua yejuan niiKoneu Dios niman nechneltokaj, ma kipiakan nemilistli para nochipa” (Juan 6:40). Kuakon aman tikchiaj tinemiskej nochipa ipampa iteiknelilis Jehová. Pablo noijki okijto: “Iteiknelilis [toTajtsin] yejuan nochi tlakatl kuajkuilia temakixtilistli” (Tito 2:11).

ITEIKNELILIS TOTAJTSIN TLEN XTECHMELAUA MAKA MATIJKUIKAN IKA TITLAJTLAKOSKEJ

16. ¿Kenon yeuejkaui akin kichiuayaj ken Cristo xkuajli ken kikuiyaj iteiknelilis toTajtsin?

¹⁶ Tikseliaj miyek tlateochiualistin ipampa iteiknelilis Jehová. San ika, noneki kuajli matijkuikan, kijtosneki maka matijkuikan ika tikchiuaskej tlajtlakojli. Ipan kachtopa siglo itech akin kichiuayaj ken Cristo, sekimej okinejkej kichiuaskej tlen xkuajli “pampa Dios ikan itetlajsojtlalis [noso iteiknelilis] [kin]tlapojpoluilia” (Judas 4). Yejon tlaneltokakej nesi ika kinemiliayaj ika uelis tlajtlakoskiaj niman ika Jehová nochipa kintlapopoluiskia. Yejuamej okichiujkej ika oksekimej noijki makichiuakan tlajtlakojli. Ipan yejuin tonajli, akin kichiuaj ijkon xkitlakaitaj “iEspiritu Dios yejuan yokinmakak on iueyi teiknelilis” (Hebreos 10:29).

17. ¿Tlenon okimelajkaijto Pedro?

¹⁷ Ipan yejuin tonajli, Satanás yokinkajkayauj sekimej akin kichiuaj ken Cristo ika makinemilikan ika uelis kichiuaskej tlajtlakojli niman Jehová nimantsin kintlapopoluis. Jehová kema tiknektika tetlapopoluis, san ika, kintlapopoluiya akin yemelak noyolkuepaj. Yejua kichia matochikauakan xtikchiuaskej tlajtlakojli. Ika yejon, Jehová ika iespíritu santo okichiuj Pedro makijkuilo: “Notlajsojkaikniuan, xmotlapialikan [...] ma ka mechajkajkayauaskej  ika on xmelauak kuajli temachtijli on yejuan kitemachtiaj on tlakamej yejuan xkitlakamatij itlanauatil Dios, niman ijkon xnenkipoloskej ika kuajli iuan nemouika Cristo. Pero xkixmatstiakan más kuajli toTeko on toTemakixtijkau Jesucristo, niman xmoskaltikan más ikan itetlajsojtlalis [noso iteiknelilis]” (2 Pedro 3:17, 18).

MATIJKUIKAN ITEIKNELILIS TOTAJTSIN KEN NONEKI

18. ¿Tlenon noneki tikchiuaskej pampa yotikselijkej iteiknelilis Jehová?

¹⁸ Melak tiktlasojkamatij iteiknelilis Jehová. Ika yejon, noneki matiktekitiltikan tetlayokoliltin tlen ika matikueyichiuakan Jehová niman ika matikinpaleuikan oksekimej. ¿Kenon uelis tikchiuaskej? Pablo kijtoua: “Tisesentemej otikselijkej itech Dios sesetlamantik tetlayokoliltin yejuan [...] otechinmakak ikan iteiknelilis [...]. Tla Dios otechmakak on tetlayokolijli yejuan techueliltia para tikimpaleuiskej oksekimej, noneki, tej, ma titepaleuikan. [...] Para titemachtiskej, no noneki para ma titemachtikan. [...] Tla totetlayokolil techueliltia titeyoleuaj, noneki yejua tikchiuaskej. [...] Para itlaj tiktetlayokoliaj, noneki tikchiuaskej hasta kampa tiueliskej. [...] Tla yej techueliltia tikimpaleuiyaj on yejuan itlaj kimpolojtikaj, tla ijkon noneki tikchiuaskej ikan paktli” (Romanos 12:6-8). Kuakon, ipampa iteiknelilis Jehová, noneki chikauak titekitiskej ipan itekiyo toTajtsin, tikinmachtiskej itech Biblia oksekimej, tikinyolchikauaskej tokniuan niman tikintlapopoluiskej akin tlajtlakoskej totechkopa.

19. ¿Itech tlenon titlajtoskej ipan okse tlamachtijli?

¹⁹ Akin yotikselijkej tlateochiualistli ika iteiknelilis Jehová, noneki ika toyojlo tikchiuaskej nochi tlen tiuelij titenojnotsaskej “kuajli tlajtojli [itech] iueyiteiknelilis Dios” (Hechos 20:24). Ipan okse tlamachtijli titlajtoskej itech yejuin tekitl.