Melak tona ken xkeman panouaya, ¿Tlenon kijtoua Biblia itech yejuin?

Ipan julio de 2022, melak tona katka ken xkeman panouaya:

• Ipan 25 de julio de 2022, ipan noticias CNN onoijto ika 70 kalpamej itech China, oksejpa ikimijlitokej ika manotlajpiyakan pampa melak tona yes.

• Ipan 17 de julio de 2022, periódico The Guardian okijto ika ipan Europa miyekan otlatlak kampa tlakoyoj pampa melak tona katka.

• Ipan domingo 24 de julio de 2022, periódico The New York Times okijto ika ipan yejon tonajli melak tona katka ipan sekimej kalpamej tlen onokej ipan este, sur niman medio oeste itech Estados Unidos.

¿Kijtosneki yejuin ika xok uelis tichantiskej ipan yejuin tlaltikpaktli? ¿Tlenon kijtoua Biblia?

¿Onoijto ipan Biblia ika melak tona yeskia?

Kema. Ipan Biblia yonoijtoka ika ipan yejuin tonaltin miyek tlajtlamach panoskiaj. Jesús okijto ika “miyek tlajtlamach temojtij nesis, niman uejueyi tlamauisoltin” (Lucas 21:11). Miyekej kinemiliaj ika ipampa tlen tikchiuaj melak tona, niman nomojtiaj tla ipampa yejuin, tlaltikpaktli mapopoliui.

¿Xok uelis tichantiskej ipan yejuin tlaltikpaktli?

Kema, pampa toTajtsin okichijchiuj yejuin tlaltikpaktli para nochipa ompa matichantikan (Salmo 115:16; Eclesiastés 1:4). ToTajtsin xkitekauilis ika makixoxotonikan yejuin tlaltikpaktli, pampa yejua kinpopolos “on yejhuan quixoxotoniaj on tlalticpactli” (Apocalipsis 11:18, In Yencuic Iyectlajtoltzin Dios).

Matikitakan ome tlemach tlen toTajtsin yokijto ika nochiuas ipan yejuin tlaltikpaktli:

• “On xalpatlajkan niman on tlaluatsalkan, sanoyej pakanesiskej pampa xochiyouaskej” (Isaías 35:1). ToTajtsin xkitekauilis más makijtlakokan yejuin tlaltikpaktli niman yejua kiyektlalis tlen yokijtlakojkej.

• “Tejua ticuidaroua in tlaltikpaktli; ipan titlakiauitia para ma tlatlaki” (Salmo 65:9). ToTajtsin kichiuas ika yejuin tlaltikpaktli manokuepa se kualtsin xochitlalpan.

Tla tikneki tikmatis itech kenon Biblia yokijtojka ika melak tona yeskia, xkita tlamachtijli “¿Qué dice la Biblia sobre el cambio climático y nuestro futuro?”.

Tla tikneki tikmatis kenon toTajtsin tlayektlalis, xkita tlamachtijli “¿Quién salvará el planeta?”.