FPG/The Image Bank via Getty Images
¡NOCHIPA XKITSTO!
Políticos kiteneuaj Armagedón | ¿Tlenon kijtoua Biblia?
Ipan sábado, sekimej tlakamej okintoponijkej bombas ipan se puente tlen kinsentlalia Crimea niman Rusia, ipampa yejon, ipan lunes 10 de octubre de 2022 ika kualkan, rusos okomintlajkalkej bombas ipan seki kalpamej de Ucrania. Nochi yejuin onochiuj sakin ika políticos okiteijlikej ika iyejkotika Armagedón.
Ipan 6 de octubre de 2022, presidente itech Estados Unidos, Joe Biden, okijto: “Ijkuak tlayekanaya presidente Kennedy, otikpixkej miyek tlaueltin iuan Cuba, desde ijkuakon xkeman tikixnamikiyaj itlaj ijkon. Niknemilia ika tla se peua kitekitiltia bombas, nimantsin peuas Armagedón”.
Ipan 8 de octubre de 2022, ipan noticias BBC, onoijto tlen otenankili presidente itech Ucrania, Volodymyr Zelensky, ijkuak okitlajtoltijkej itech tlenon kinemilia ijkuak yakaj kitekitiltia bombas, yejua okijto: “Noijki niknemilia ika yejuin Armagedón niman uelis kijtlakos nochi tlaltikpaktli”.
¿Nimantsin peuas Armagedón tla kintekitiltiaj bombas? ¿Tlenon kijtoua Biblia?
Tla notekitiltiaj bombas, ¿kichiuaskej mapeua Armagedón?
Ka. Tlajtojli Armagedón, san sejpa noteneua ipan Biblia, ipan Apocalipsis 16:16. San ika, yejuin xkijtosneki ika nouisokiskej miyekej kalpamej, yej kijtosneki ijkuak toTajtsin nouisokis imiuan “nochimej on reyes ipan on tlaltikpaktli” (Apocalipsis 16:14). ToTajtsin kitekitiltis yejuin guerra, Armagedón, para kinpopolos nochimej yejon tekiuajkej akin nemij ipan yejuin tlaltikpaktli (Daniel 2:44).
Tla tikneki tikmatis tlenon ipan nochiuas tlaltikpaktli ipan Armagedón, xpoua tlamachtijli ¿Qué es el Armagedón?
¿Popoliuis tlaltikpaktli niman tlaltikpakchanejkej ipampa bombas?
Ka. Tekiuajkej uelis kintekitiltiskej bombas ika tlayekapan, san ika, toTajtsin xkitekauilis makipopolokan yejuin tlaltikpaktli. Biblia kijtoua:
In tlaltikpaktli xkaman nopatla” (Eclesiastés 1:4).
“On yolmelajkej tlakamej kinmakaskej on kuajli tlajli, para ipan chantiskej nochipa” (Salmo 37:29).
San ika, teotlajtoltin tlen uajlauej ipan Biblia niman tlen panotika aman, kuajli techititia ika panos tlen melak temojkatlachialti (Mateo 24:3-7; 2 Timoteo 3:1-5). Tla tikneki tikmatis tlenon panos ika tlayekapan, touan xmomachti Biblia, xtlaj tiktlaxtlauas.