2023: Matikilnamiktokan tlen tikchiaj ika tlayekapan | ¿Tlenon kijtoua Biblia?

Aman ika yotikalakkej 2023, tinochimej tiknekiskiaj ika tejuamej niman tochanejkauan más kuajli matinemikan. ¿Tlenon uelis techpaleuis más kuajli matinemikan?

Biblia techijlia tlenon panos ika tlayekapan

Biblia techijlia tlen kualtsin panos ika tlayekapan. Kijtoua ika nochi tlen aman techtlajyouiltia popoliuis. Noijki kijtoua ika nochi tlen onka ipan Biblia “onijkuiloj para techmachtia. Onijkuiloj para on [...] teyoltlalilistli ma techmaka tlamachalistli itechkopa on Yektlajkuilojli” (Romanos 15:4).

• Tla tikneki okseki tikmatis itech tlen Biblia kijtoua panos ika tlayekapan, xkita tlamachtijli “La esperanza real de un mañana mejor”.

Tlamachialistli tlen techmaka Biblia melak techpaleuiya

Tlen Biblia kijtoua panos ika tlayekapan “kimelajkapiya toalma ijkon ken on teposcadena kimelajkapiya on barco ijkuak ika yokisalojkej” (Hebreos 6:19). Tlamachialistli tlen techmaka Biblia melak techpaleuiya. Techpaleuiya matitlaxikokan ijkuak itlaj tikixnamikij, techpaleuiya maka sajnoye matajmanakan niman techpaleuiya matiyolpakikan. Xkita ken Biblia tepaleuiya:

• Tlen kijtoua Biblia okipaleui se tlakatl makikajkaua ika tlauani. Xkita video “Llegué a odiar la vida que llevaba”.

• Tlen kijtoua Biblia techyolseuiya ijkuak tomijkatiaj. Xkita video Tlen mitsyolseuis ijkuak miki se akin tiktlasojtla.

Tikmatstokej ika tlen kijtoua Biblia yemelak panos

Miyekej kinekiskiaj más kuajli matinemikan, san ika, xkimatij tla uelis ijkon nochiuas. Aman tej, ¿tleka tikmatstokej ika tlen kijtoua Biblia yemelak panos? Pampa tlen noijtoua ipan Biblia okijto Jehová,a toTajtsin akin “xueli tekajkayaua” (Tito 1:2). “Nochi on tlen toTEKO kineki, kichiua” pampa san yejua kipiya kojtilistli para uelis kichiuas (Salmo 135:5, 6).

Tejua uelis tikneltokas tlen kijtoua Biblia. Uelis más kuajli timomachtis iTlajtol toTajtsin niman ijkon más tikneltokas tlen ompa kijtoua (Hechos 17:11). ¿Tikuelitaskia yakaj mamitsmachti Biblia? ¡Ipan yejuin 2023 xtlanemili itech tlamachialistli tlen techmaka Biblia!