¿Tleka kinnojnotsaj tlaltikpakchanejkej akin ikipiyaj intlaneltokil?

Yotikitakej ika tlaltikpakchanejkej akin ikipiyaj intlaneltokil kuelitaj tlajtoskej itech tlemach tlen kijtoua Biblia. Tejuamej tiktlakaitaj tlen tlaltikpakchanejkej kineltokaj, ika yejon, xtikinchiualtiaj makineltokakan tlen tejuamej tikneltokaj.

Ijkuak titlajtouaj itech tlaneltokiltin, tikyejyekouaj tikchiuaskej ijkon ken kijtoua Biblia, tikinnotsaj ika “yolyemanilistli” niman “tetlakaitalistli” (1 Pedro 3:15). Tikmatstokej ika nemiskej akin xkiseliskej tlen tikteijliaj (Mateo 10:14). San ika, tla ximiuan titlajtouaj xtikmatiskej kenon technankiliskej. Noijki tikmatstokej ika innemilis tlaltikpakchanejkej nopatla.

Kemantika, uelis tiknextiskej akin xkinekis techkakis pampa itlaj kichiujtika, san ika, kanaj okse tonajli kinekis touan tlajtos. Noijki, nemij akin kemach okixnamijkej se tlauejli noso itlaj tlen xkuajli, niman kichiua makitejtemokan tlen kijtoua Biblia. Ika yejon, oksejpa tokuepaj inchan niman tikyejyekouaj imiuan titlajtoskej.