¿Melauak nemi Diablo?

Tlen Biblia kijtoua

Kema, Diablo melauak nemi. Yejua katka se ángel, san ika, sakin okixnamik toTajtsin. Biblia kijtoua ika yejua akin “tlamandaroua ipan in tlaltikpaktli” (Juan 14:30; Efesios 6:11, 12). Ipan Biblia noteneuaj seki tokayomej tlen kipanextia kenon yejua, matikitakan seki:

• Satanás, tlen kijtosneki “Teixnamijketl” (Job 1:6).

• Diablo, tlen kijtosneki “Tetlajtolchijchiuilijketl” (Apocalipsis 12:9).

• Kouatl, ipan Biblia noijki nokui para noijtos tekajkayaujketl (2 Corintios 11:3).

• Tetlatlataketl (Mateo 4:3).

• Xkijtoua tlen melauak (Juan 8:44).

Xsan kineskayotia tlen xkuajli

Sekimej kinemiliaj ika Diablo san se ixneskayotl tlen tinochimej tikpiyaj, niman hasta toTajtsin kipiya. Ipan Biblia kijtoua ika toTajtsin otlajtlajto iuan Diablo. San ika, toTajtsin chipauak niman xkipiya tlajtlakojli. Kuakon, ¿kenon ueliskia kipiyas itlaj tlen xkuajli ijtik? (Deuteronomio 32:4; Job 2:1-6). Noijki, ipan Biblia kijtoua ika Satanás okitlatlatak Jesús, akin xtlajtlakole (Mateo 4:8-10; 1 Juan3:5). Kuajli nesi ika Biblia temachtia ika Satanás melauak nemi, niman xsan se ixneskayotl itech tlen xkuajli.

Miyekej kinemiliaj ika Diablo xmelauak nemi. Yejuin xnoneki techmojkatlachialtis pampa ipan Biblia kijtoua ika Satanás san tlemach kichiua niman ijkon techkajkayauas (2 Tesalonicenses 2:9, 10). Satanás melak miyekej yokinneltokilti ika yejua xmelauak nemi (2 Corintios 4:4).

Tlen xmelauak itech Diablo

Tlen xmelauak: Diablo noijki kitokayotiaj Lucifer.

Tlen melauak: Tlajtojli ika hebreo tlen ipan seki Biblias notlajtolkuepa ken “Lucifer” kijtosneki “tlen petlani” (Isaías 14:12). Yejuin tlajtojli uajnestiuj ipan se teotlajtojli. Ika tlen noijtoua ipan yejon teotlajtojli, techasikamachiltia ika ompa tlajtotoya itech tekiuajkej babilonios, akin toTajtsin kinpopoloskia pampa noueyimatiyaj (Isaías 14:4, 13-20). Tlajtojli “tlen petlani” okitekitiltijkej para kinpijpinaujtiskej tekiuajkej Babilonios sakin ika yokinpopolojkaj.

Tlen xmelauak: Diablo kipaleuiya toTajtsin.

Tlen melauak: Diablo xkipaleuiya toTajtsin, yejua kitlauelita. Satanás noijki kintlauelita akin kitekichiuiliaj toTajtsin, ika yejon, kintlaueltoka niman kintlajtolchijchiuilia (1  Pedro 5:8; Apocalipsis 12:10).