¿Kitemakaj diezmo iteixpantijkauan Jehová?

Ka, tiiteixpantijkauan Jehová xtiktemakaj diezmo; totekiyo notlaxtlaua ika tomintsin tlen miyekej kitemakaj ika inyojlo. ¿Tleka iteixpantijkauan Jehová xkitemakaj diezmo? ¿Kanon oualeuj ika notemaka diezmo?

Yeuejkaui, Tlanauatijli tlen okinmakakej israelitas kijtouaya ika makitemakakan diezmo, kijtosneki, majtlaktli itech nochi tlen kinotlaniliayaj, yejuin kinmakayaj teopixkej. Biblia kuajli kijtoua ika akin kichiuaj ken Cristo xkipiya ika kitlakamatiskej yejuin Tlanauatijli. Ika yejon, ipan yejuin tonajli xkipiya ika kitemakaskej diezmo (Hebreos 7:​5, 18; Colosenses 2:​13; Colosenses 2:14, TNM).

Kuakon tiiteixpantijkauan Jehová xtiktemakaj diezmo nion xtexchiualtiaj matiktemakakan itlaj okse, tikchiuaj ijkon ken inomachtijkauan Jesucristo. Yejuamej tlapaleuiayaj ipan tlanechikojli ika yejuin ome tlemach: kitlaliayaj tomin tlen kisa ipan inyojlo, xkitlajtlaniyaj makintlaxtlauilikan ijkuak tenojnotsayaj niman temachtiayaj iTlajtol toTajtsin.

Tikchiuaj ijkon ken okimijlikej inomachtijkauan Cristo, tlen ipan Biblia kijtoua: “Cada se ma kitemaka iofrenda ken kixtia ipan iyojlo. Ma ka kitemakas ikan tlauejli, nion kinemilis san yakaj kichiualtia, pampa Dios kitlajsojtla on yejuan kitemaka iofrenda ikan paktli” (2 Corintios 9:7).