¿Tleka iteixpantijkauan Jehová xkiluichiuiliaj ijkuak se kaxiltia xiuitl?

Tiiteixpantijkauan Jehová xtikiluichiuiliaj ijkuak se kajxiltia xiuitl pampa kuajli tikmatstokej ika toTajtsin xkineki matikchiuakan. Maski ipan Biblia xtechijlia maka matikchiuakan, kema techpaleuiya matikasikamatikan kenon kita toTajtsin ijkuak se kajxiltia xiuitl. Matikitakan naui tlemach niman tlen kijtoua Biblia itech yejuin.

1. Tikiluichiuas ijkuak tikaxiltis xiuitl ualeua itech tlaneltokijli xmelauak. Se diccionario enciclopédico kijtoua ika yejuin iluitl oualeuj itech tlen noneltoka ika ijkuak se kajxiltia xiuitl, “espíritus xkuakualtin niman tlen xkuajli kojtilistli kiyejyekouaj kixnamikiskej akin noiluichiuilia” niman ika “akin imiuan nouika niman ijkuak kijliaj ika kipiyas suerte yejuin uelis kitlajpiyas” (Funk & Wagnalls Standard Dictionary of Folklore, Mythology, and Legend). Okse amoxtli kijtoua ika yeuejkaui kijkuilouayaj ijkuak se tlakatiya, pampa “kinpaleuiaya niman ijkon kimatiskej inhoróscopo”, tlen nokixtia itech “astrología”. Yejuin amoxtli noijki kijtoua: “Miyekej kineltokaj ika velas tlen kintlaliliaj akin kajxiltiaj xiuitl kipiyaj magia tlen kichiua makiselikan tlen kitlajtlanij” (The Lore of Birthdays).

   San ika, Biblia kijtoua xkuajli tla tikchiua magia, titetlatemouilis, naualyotl noso okseki tlemach ken yejuin (Deuteronomio 18:14; Gálatas 5:​19-​21). Niman yeuejkaui, toTajtsin okitlajtlakolmakak ueyi kalpan Babilonia pampa akin ompa chantiyaj kichiuayaj astrología, tlen ika kitayaj tlen panos ika tlayekapan (Isaías 47:11-​15). Maski tiiteixpantijkauan Jehová xtiktejtemouaj tikmatiskej kanon oualeuj itlaj tlen noiluichiua, xtiknekij tikchiuaskej tlen Biblia kijtoua ika ualeua itech naualyotl.

2. Akin kachtopa opeujkej kichiuaj ken Cristo xokiluichiujkej ijkuak se kajxiltiaya xiuitl. Se enciclopedia kijtoua ika akin kachtopa opeujkej kichiuaj ken Cristo kitayaj “tikiluichiuas ijkuak se kajxiltia xiuitl, maski san katlejua, ualeua itech tlen kineltokaj tlaltikpakchanejkej”, kijtosneki itech tlaneltokijli xmelauak (The World Book Encyclopedia). Biblia kiteititia ika itlatitlankauan Cristo niman oksekimej akin okinmachti ijkuak onen ipan tlaltikpaktli okitlalijkej tlen noneki kitokaskej nochimej akin kichiuaj ken Cristo ​(2 Tesalonicenses 3:6).

3. Tlen okinnauatijkej makipanoltikan inomachtijkauan Cristo xyeskia ijkuak otlakat, kilnamikiskiaj ijkuak omik Jesús. (Lucas 22:17-20, TNM). Yejuin xkipiya ika techmojkatlachialtis, pampa Biblia kijtoua ika “melak kuajli [...] tonajli ijkuak se miki [...] xken ijkuak se tlakati” (Eclesiastés 7:1). Ijkuak sa achijtsin poliuiya ika mikiskia, Jesús yokiteititijka ika kuajli onen ixpan toTajtsin, ika yejon, ijkuak yejua omik melak kuajli katka xken ijkuak otlakat (Hebreos 1:4, TNM).

4. Ipan Biblia xkijtoua ika se akin okitekichiuili toTajtsin onoiluichiuili ijkuak okajxilti xiuitl. Yejuin xsan pampa xonotlali, ipan iTlajtol toTajtsin kema tlajtoua itech omemej akin okajxiltijkej xiuitl niman xkitekichiuiliayaj toTajtsin. Biblia xkuajli tlajtoua itech yejuin ome iluimej ​(Génesis 40:20-​22; Marcos 6:​21-​29).

¿Kinemiliaj inkoneuan iteixpantijkauan Jehová ika kinopolouilijtokej itlaj pampa xkiluichiuaj ijkuak se kaxiltia xiuitl?

Ijkon ken nochimej kuajli tajtin, iteixpantijkauan Jehová kintlasojtlaj inkoneuan. Ika yejon, ipan okseki tonaltin tlemach kintlayokoliaj niman kinchiuiliaj iluitl kampa kuajli noyolpaktiaj. Kiyejyekouaj kichiuaskej ijkon ken toTajtsin, akin kinmaka tlemach tlen kuajli ipan nochi tonaltin akin kitekipanouaj (Mateo 7:​11). Kuakon, inkoneuan iteixpantijkauan Jehová xkimachiliaj tla itlaj kuajli kinopolouilijtokej. Ijkon techasikamachiltia tlen nikan kijtouaj:

• “Melak teyolpakti tikselis se tetlayokolijli ijkuak xtikchias.” (Tammy, 12 xiuitl.)

• “Maski notajuan xtlaj nechtlayokoliaj ijkuak nikajxiltia xiuitl, kema nechtlayokoliaj tlemach okse tonajli. Melak nikuelita manechtlayokolikan tlemach ijkuak xnikchia.” (Gregory, 11 xiuitl.)

• “Konemej san kikuaj pasteles niman nokuikatiaj. Yejon iluimej xnikinnuelita, iluimej tlen tikinchiuaj nochan melak kualtsitsintin.” (Eric, 6 xiuitl.)