¿Nonekis ninochiuas iteixpantijkauj Jehová tla imiuan ninomachtia Biblia?

Ka, xakaj mitschiualtis ijkon xchiua. Miyekej touan nomachtiaj Biblia niman xnochiuaj iteixpantijkauan Jehová.a Tlamachtijli tlen tiktemakaj mitspaleuis kuajli xkasikamati tlen Biblia temachtia. San ika, tejua tiktlapejpenis tlenon tikchiuas ika nochi tlen tiueltiuj ipan Biblia. Kema, toseselti noneki tiktlapejpeniskej ipan katlejua religión tinemiskej (Josué 24:15).

¿Uelis nijkuis Biblia tlen nejua nikpiya ijkuak nechmachtiskej?

Kema. San ika, tejuamej tikuelitaj tikuiskej Traducción del Nuevo Mundo pampa kipiya tlajtoltin tlen kuajli nasikamatij. Tla tejua tikneki, uelis se timitsmakaskej niman xtlaj tiktlaxtlauas noso tla tikneki noijki uelis tijkuis Biblia tlen tikpiya. Maski san katlejua Biblia tijkuis, ompa uelis tikasikamatis tlenon kineki kichiuas toTajtsin ika tlayekapan niman noijki kenon uelis timakisas.

¿Tleka nenkinmachtiaj oksekimej maski xnochiuaj iteixpantijkauan Jehová?

• Tejuamej ijkon tikchiuaj pampa melak tiktlasojtla Jehová. Yejua kineki ika akin tikchiuaj ken Cristo matikimititikan oksekimej tlen tejuamej yotiuelkej (Mateo 22:37, 38; 28:19, 20, TNM). Melak techyolpaktia titekitiskej iuan toTajtsin, niman yejuin tikchiuaj ijkuak tikinpaleuiyaj oksekimej mauelikan tlen kijtoua Biblia (1 Corintios 3:6-9).

• Noijki ijkon tikchiuaj pampa tikintlasojtlaj oksekimej (Mateo 22:39). Melak tikuelitaj tikimijliskej oksekimej nochi tlen kualtsin yotiuelkej (Hechos 20:35).