Jesús kalaki Jerusalén ipan se polokotsin niman miyekej melak kiueyiteneuaj

¿Kiteititiaj teotlajtoltin tlen uajlauej ipan Biblia ika Jesús yejua Mesías?

Tlen Biblia kijtoua

Kema. Ijkuak Jesús ouajlajka ipan tlaltikpaktli onochiujkej nochi teotlajtoltin tlen tlajtouayaj itech Mesías, akin uajlaskia para techmakixtis (Daniel 9:25; 1 Juan 4:14). Niman sakin ika Jesús yomijka, ok ipan onochiujkej seki teotlajtoltin tlen tlajtouayaj itech Mesías (Salmo 110:1; Hechos 2:34-36).

**¿Tlenon kijtosneki Mesías?**

Tlajtojli ika hebreo Maschíaj (Mesías) nima tlajtojli ika griego Kjristós (Cristo) kijtosnekij “Tlapejpenijli”. Kuakon, Jesucristo kijtosneki “Jesús yejua Tlapejpenijli” noso “Jesús yejua Mesías”.

Yeuejkaui, ijkuak yakaj kitlapejpeniayaj para kichiuas se ueyi tekitl kampa nonekiya tlanauatis, kitekiliayaj aceite ipan itsontekon (Levítico 8:12; 1 Samuel 16:13). ToTajtsin okitlapejpeni Jesús ken Mesías, se tekitl tlen melak ueyi kijtosneki (Hechos 2:36, TNM). San ika, ijkuak toTajtsin okitlapejpeni Jesús, xokitekili aceite, yejua okitlapejpeni ika espíritu santo (Mateo 3:16 TNM)

¿Ueliskia miyekej inpan nochiuas teotlajtoltin tlen yonoijtokaj itech Mesías?

Ka. Ijkuak kuajli tomachtiaj teotlajtoltin tlen tlajtouaj itech mesías, kuajli nesi ika san tlajtoua itech se mesías noso Cristo. San ika, Biblia kijtoua: “Uajlaskej on tlakajkayajkej yejuan noteneuaskej Cristos noso tiotlajtojkej. Niman kichiuaskej uejueyi tlamauisoltin niman milagros para tekajkayauaskej, niman tla ueli, hasta on yejuan Dios yokintlapejpenij kinkajkayauaskej. Pero yejuamej xuelis kinkajkayauaskej” (Mateo 24:24).

¿Uelis nemis se Mesías ika tlayekapan?

Ka. Biblia yokijtojka ika Mesías ualeuaskia itech David, akin otekiuajtik ipan Israel (Salmo 89:3, 4) San ika, kampa tlajkuilolnestoyaj akinomej katka ichanejkauan tekiuaj David, opopoliujkej. Noijtoua ika kanaj opopoliujkej ijkuak romanos okinotlatkitijkej Jerusalén ipan xiuitl 70.a Desde ijkuakon, xakaj ueli kijtoua tla yakaj ualeua itech ichanejkauan David, san ika, ijkuak Jesús nemiya ipan tlaltikpaktli ok onkatka kampa tlajkuilolnestoyaj akinomej ualeuayaj itech David. Niman hasta akin kitlauelitayaj Jesús, kimatstoyaj ika Jesús ualeuaya itech David (Mateo 22:41-46).

¿Kech teotlajtoltin noteneuaj ipan Biblia itech Mesías?

Xuelis tikijtoskej kech teotlajtoltin onokej itech Mesías, pampa tlatlamantik ken nopouaj teotlajtoltin itech Mesías. San matikonteneuakan yejuin, Isaías 53:2-7 kinteneua seki teotlajtoltin tlen tlajtouaj itech Mesías, sekimej kijtouaj ika tlen noteneua ipan yejuin texto kijtosneki san se teotlajtojli, san ika, sekimej kijtouaj ika tlen noijtoua ipan yejuin texto kinteneua miyek teotlajtoltin.

Seki teotlajtoltin tlen tlajtouayaj itech Mesías tlen onochiujkej ijkuak ouajlajka Jesús

Tlen nochiuaskia	Teotlajtojli	Ken onochiuj
Ualeuaskia itech Abrahán	Génesis 22:17, 18	Mateo 1:1
Ualeuaskia itech Isaac, akin ikoneuj Abrahán	Génesis 17:19	Mateo 1:2
Ualeuaskia itech tribu israelita de Judá	Génesis 49:10	Mateo 1:1, 3
Ualeuaskia itech ichanejkauan David	Isaías 9:7	Mateo 1:1
Uajnemiskia itech se ichpochtli	Isaías 7:14	Mateo 1:18, 22, 23
Tlakatiskia Belén	Miqueas 5:2	Mateo 2:1, 5, 6
Kitokayotiskiaj Emmanuelb	Isaías 7:14	Mateo 1:21-23
Xuajnemiskia ipan se familia akin matominye	Isaías 53:2	Lucas 2:7
Satepan ika tlakatiskia, miyekej kokonej kinmiktiskiaj	Jeremías 31:15	Mateo 2:16-18
Yaskia Egipto	Oseas 11:1	Mateo 2:13-15
Kixmatiskiaj ken Nazarenoc	Isaías 11:1	Mateo 2:23
Se tenojnotsketl kiteijliskia ika yejkoskia	Malaquías 3:1	Mateo 11:7-10
Nochiuaskia Mesías ipan xiuitl 29d	Daniel 9:25, (TNM)	Mateo 3:13-17, (TNM)
ToTajtsin kijtoskia ika yejua ikoneuj	Salmo 2:7	Hechos 13:33, 34
Kitlakaitaskia ikal toTajtsin	Salmo 69:9	Juan 2:13-17
Kiteijliskia kuajli tlajtojli	Isaías 61:1	Lucas 4:16-21
Tlen kiteijliskia Galilea yeskia ken se tlauijli	Isaías 9:1, 2	Mateo 4:13-16
Ijkon ken Moisés, Jesús kinchiuaskia milagros	Deuteronomio 18:15	Hechos 2:22
Ijkon ken Moisés, Jesús tlajtoskia ipampa toTajtsin	Deuteronomio 18:18, 19	Juan 12:49
Okinpajti miyekej kokoxkej	Isaías 53:4	Mateo 8:16, 17
Xkichiuaskia makiueyiteneuakan	Isaías 42:2	Mateo 12:17, 19
Kinmikneliskia akin tlajyouiayaj	Isaías 42:3	Mateo 12:9-20; Marcos 6:34
Otemachti imelajkayo toTajtsin	Isaías 42:1, 4	Mateo 12:17-20
Kuajli tetlakanojnotsaskia	Isaías 9:6, 7	Juan 6:68
Kitemachistiskia itoka Jehová	Salmo 22:22	Juan 17:6
Temachtiskia ika neskayomej	Salmo 78:2	Mateo 13:34, 35
Tlayekanaskia	Daniel 9:25	Mateo 23:10
Miyekej xitech tlaneltokaskiaj	Isaías 53:1	Juan 12:37, 38
Yeskia kentla se tetl tlen miyekej kintlajkaliskia	Isaías 8:14, 15	Mateo 21:42-44
Miyekej xkiseliskiaj	Salmo 118:22, 23	Hechos 4:10, 11
Kitlauelitaskiaj maski xtlaj kitechiuiliskia	Salmo 69:4	Juan 15:24, 25
Kiueyiteneuaskiaj ijkuak kalakiskia Jerusalén ipan se polokotsin	Zacarías 9:9	Mateo 21:4-9
Kiueyiteneuaskiaj kokonej	Salmo 8:2	Mateo 21:15, 16
Uajlaskia itechkopa itoka Jehová	Salmo 118:26	Juan 12:12, 13
Se iamigo kinemakaskia	Salmo 41:9	Juan 13:18
Kinemakaskiaj ika 30 plata tomin	Zacarías 11:12	Mateo 26:14-16
Iamigos kikauaskiaj	Zacarías 13:7	Mateo 26:31, 56
Xkuajkualtin tlakamej kitlajtolchijchiuiliskiaj	Salmo 35:11	Mateo 26:59-61
Xtlajtoskia imixpan akin kitlajtlakolmakatoyaj	Isaías 53:7	Mateo 27:12-14
Kichijchaskiaj	Isaías 50:6	Mateo 26:67; 27:27, 30
Kikuajuijuitekiskiaj ipan itsontekon	Miqueas 5:1	Marcos 15:19
Kiuijuitekiskiaj	Isaías 50:6	Juan 19:1
Xteixnamikiskia ijkuak kimajmailiskiaj	Isaías 50:6	Juan 18:22, 23
Tekiuajkej kitlajtolchijchiuiliskiaj	Salmo 2:2	Lucas 23:10-12
kimatetsotsonaskiaj, kikxitetsotsonaskiaj niman kajkopiloskiaj ipan se kojtli	Salmo 22:16	Mateo 27:35; Juan 20:25
Notlatlaniskiaj para kitaskej akinon kikuis itlaken	Salmo 22:18	Juan 19:23, 24
Kitaskiaj ken se akin tlajtlakolchiuani	Isaías 53:12	Mateo 27:38
Kiuijuikaltiskiaj, kitlauelitaskiaj	Salmo 22:7, 8	Mateo 27:39-43
Kinektoskia tlajyouis inpampa akin tlajtlakolejkej	Isaías 53:5, 6	1 Pedro 2:23-25
Nesiskia kentla toTajtsin yokitlalkauijka	Salmo 22:1	Marcos 15:34
Konitiskiaj vinagre tlanelojli iuan hiel	Salmo 69:21	Mateo 27:34
Ijkuak imikiskia, melak amikiskia	Salmo 22:15	Juan 19:28, 29
Kijtoskia ika on iespíritu kimaktiliskia toTajtsin	Salmo 31:5	Lucas 23:46
Kitemakaskia inemilis	Isaías 53:12	Marcos 15:37
Techmakixtiskia itech tlajtlakojli	Isaías 53:12	Mateo 20:28
Xkipostekiliskiaj nion se iomiyo	Salmo 34:20	Juan 19:31-33, 36
Kitsopiniskiaj ijtinakastlan	Zacarías 12:10	Juan 19:33-35, 37
Kitokaskiaj ken se akin tominye	Isaías 53:9	Mateo 27:57-60
Yoliuiskia	Salmo 16:10	Hechos 2:29-31
Kitekipatlaskiaj akin kinemakaskia Jesús	Salmo 109:8	Hechos 1:15-20
Notlaliskia iyekmakopa toTajtsin	Salmo 110:1	Hechos 2:34-36

a Cyclopedia de McClintock y Strong kijtoua: “Uelis tikijtoskej ika kampa tlajkuilolnestoyaj tribus niman familias judías opopoliujkej ijkuak onotlatkitijkej Jerusalén”.

b Tokayotl ika hebreo Emmanuel kijtosneki “Dios touan nemi”. Yejuin tokayotl kuajli kineskayotia tlen okichiuj Jesús ken Mesías. Ijkuak ouajlajka ipan tlaltikpaktli, yejua kuajli okiteititi ika toTajtsin nemi imiuan akin kiueyichiuaj (Lucas 2:27-32; 7:12-16).

c Tlajtojli Nazareno kanaj ualeua itech tlajtojli hebrea nétser, tlen kijtosneki “tlaitsmonijli”.

d Tla tikneki tikmatis tleka noijtoua ika Mesías yejkoskia ipan xiuitl 29, xkita nota 2. “¿Kemanon yejkoskia Mesías?”, ipan libro ¡Nochipa uelis tiyolpakis! Tlen okichijchiujkej iteixpantijkauan Jehová. Noijki onka ipan www.jw.org.