¿Tlenon kijtoua Biblia itech yakaj akin kuelita kitemakas tlen kipiya?
Tlen Biblia kijtoua
Biblia techijlia matiktemakakan ika nochi toyojlo tlen tikpiyaj. Ijkuak ijkon tikchiuaj, tikinpaleuiyaj oksekimej, niman yejon kichiua kuajli matomachilikan (Proverbios 11:25; Lucas 6:38). Jesús okijto: “Más paki yejuan kitemaka xken on yejuan kiselia” (Hechos 20:35).
¿Kemanon kuajli itlaj tiktemakas?
Ijkuak ika nochi toyojlo tiktemakaj tlen tikpiyaj, melak kinpaleuiya oksekimej. Biblia kijtoua: “Cada se ma kitemaka iuentomin ken kixtia ipan iyojlo. Maka ma kixtoka tlen kitemaka, nion maka ma nomati san kichiualtiaj ma kitemaka, pampa Dios kitlajsojtla on yejuan kitemaka iuentomin ikan paktli” (2 Corintios 9:7).
ToTajtsin kineki ika akin tiktekichiuiliaj matitepaleuikan ika nochi toyojlo (Santiago 1:27). Tla tikinpaleuiyaj akin xtlaj kinopiliaj, kentla tikpaleuijtoskiaj toTajtsin, niman yejua kita kentla techuikiliskia ipampa tlen tiktemakaj (Proverbios 19:17). Biblia kijtoua ika toTajtsin techteochiuas (Lucas 14:12-14).
¿Kemanon xkuajli yeskia itlaj tiktetlayokoliskej?
Ijkuak san totech titlanemiliaj. Ken...
... ijkuak itlaj tiktetlayokoliaj san para matechtlakaitakan (Mateo 6:2).
... ijkuak itlaj tiktetlayokoliaj, san ika, tiknekij matechkuepilikan (Lucas 14:12-14).
... ijkuak itlaj tiktetlayokoliaj san pampa tiknekij matechmakixti toTajtsin (Salmo 49:6, 7).
Ijkuak tikinpaleuiyaj oksekimej para makichiuakan tlen toTajtsin xkuelita. Xkuajli yeskia tla tikinmakaj tomintsin oksekimej para ika manauiltikan, matlauanikan noso manotlalilikan drogas (1 Corintios 6:9, 10; 2 Corintios 7:1). Noijki xkuajli yeskia tla tikmakaj tomintsin yakaj akin san tlatsiui tekitis (2 Tesalonicenses 3:10).
Ijkuak xok techaxilia para tikinmakaskej tofamilia tlen kinpoloua. Biblia kijtoua ika on akin tlayekana ipan ifamilia noneki kinmakas tlen kinpoloua (1 Timoteo 5:8). Xkuajli yeskia tla yakaj kitemaka tlen kipiya, san ika, ipampa yejon hasta xok kinmaka ifamilia tlen kinpoloua. Noijki, Jesús okijto ika melak xkuajli tlen kichiuayaj sekimej pampa xkinmakayaj tlen kinpolouaya intajuan akin youeuentsintiakaj pampa kijtouayaj: “On tlinon nikpiya yonikmaktilij Dios” (Marcos 7:9-13).