“Yonitlaxiko pampa niktlasojtla Jehová”

¿Tleka nejua, akin melak ninokalaktiaya ipan política, oninochiuj iteixpantijkauj Jehová maski gobierno melak kintlauelitaya? Ijkuak ninemiya ne kampa chikauak nitekitiya, ¿kenon onechpaleui Jehová niman tokniuan maninopatla?

Niknekiya niyolseujtos niman manochiua tlen kuajli

Oninen ipan 1930 ne Tabani, se kalpantsin tlen nokaua Moldavia, kampa miyekej xmás kipiyaj tomin. Notajuan chikauak tekitiyaj para kinmakaskej tlen kinpolouaya inkoneuan, akin chikuasemej katkaj. Tejuamej xmás tikpiayaj tomin. Nonan yaya ipan Iglesia ortodoxa rusa niman notaj católico katka. Miyekpa tlajtouayaj itech tlen xkuajli kichiuayaj teopixkej.

Otlan ninomachtia escuela ijkuak nikpiaya 18 xiuitl niman opeuj ninosentlalia ipan se grupo tlen noixmatiya ken Komsomol. Ipan yejuin grupo techmachtiayaj kenon titlapaleuiskej ipan Partido Comunista, niman onechtlalijkej ken secretario. Melak nikuelitaya ompa ninemis pampa techmachtiayaj ika tinochimej tikniujtin, ika xnoneki titechikoitaskej nion tiktechiuiliskej tlen xkuajli. San ika, ijkuak nikitaya kenon oksekimej kichiuayaj tlen xkuajli, melak ninoyolkokouaya.

Pampa niteuan katka itech grupo Komsomol nonekiya nikchiuas ken tlanauatiaya Gobierno de la Unión Soviética.a Yejuamej kintsakuayaj iglesias niman xkinkauiliayaj seki religiones makichiuakan intekiyo. Ipan tokalpan nemiyaj sekimej iteixpantijkauan Jehová. Maski yejuamej xtlakajkayauaj niman xnokalaktiaj ipan tlauejli, xnikuelitaya makijtokan ika san yejuamej kipiyaj tlaneltokijli tlen melauak. San ika, xkeman oniknemili tla se iteixpantijkauj Jehová nechijliskia tlen desde yeuejkaui niknekiya nikmatis.

Notío Dimitri chantiya ipan tokalpan niman yejua iteixpantijkauj Jehová katka. Nikilnamiki ika ipan mayo de 1952, yejua onechtlajtolti: “Guéorgui, ¿tlenon tikchiuas ika monemilis?”. Onikitak ika pampa melak nechtlasojtlaya onechtlajtolti yejon. Tlen onechijli melak onechtlanemililti. Nejua nochipa ninotlajtoltiaya yejuin: “Tla toTajtsin melauak nemi, ¿kuakon tleka titlajyouiyaj?”. Ipan se semana, notío Dimitri onechnankili ika Biblia nochi tlen nejua niknekiya nikmatis. Kemantika tiuejkauiyaj titlajtouayaj itech toTajtsin hasta las 3 ika kualkan.

Kuakon opeuj kuajli ninomachtia Biblia niman onikitak ika toTajtsin yejua nechtlasojtla ken se tajtli (Salmo 27:10). Maski xmiyek nikmatiya itech Biblia, nejua iniktlasojtlaya Jehová niman yejon onechpaleui manikpatla tlen nikchiujtoya. Onijkajkauj Partido Comunista, maski akin ompa tlayekanaya onechijli ika nexchiuiliskia itlaj tlen xkuajli. Niman ipan septiembre de 1952 oninosentemakak itech Jehová niman oninoapolakti. Ijkon onikchiuj maski san yopanoka naui metstli ika opeuj ninomachtia Biblia.

Ononek nikteititis ika melak niktlasojtla Jehová

Ijkuakon, akin iteixpantijkauan Jehová katkaj, xkinkauiliayaj makiueyichiuakan toTajtsin ken yejuamej kichiuaj. San ika, pampa niknekiya nikteititis ika niktlasojtla Jehová, onikteijli ika nejua ueliskia nikominmakaskia amatlajkuiloltin tokniuan akin chantij ipan okseki kalpantsitsintin. Yejuin tekitl melak ouijtika katka. Pampa ipan se kalpantsin, tla yakaj xkixmatiyaj, kitlateluiliayaj. Niman tokniuan kinemiliayaj ika nejua san nikatka se policía akin kinekiya kijtlakos tlanechikojli. San ika, sakin okitakej ika yemelak niiteixpantijkauj Jehová. Ome metstli sakin ika oninoapolakti, onechtsajkej pampa nikintemakatinemiya toamatlajkuiloluan.

Ipan se xiuitl, tekiuajkej xonechkauilijkej miyek tlemach manikchiua. Ijkuakon melak miyekpa onechtlajtoltijkej pampa kinekiyaj maniktlalkaui Jehová. San ika, xoniktlalkaui pampa iniktlasojtlaya. Sakin onechuikakej Odesa ne Ucrania, niman okimijlikej notajuan niman nokniuan noijki mauiyan. San ika, yejuamej xiteixpantijkauan Jehová katkaj.

Ijkuak nechyolkuitijtoyaj, okijtokej ika onechkajkayaujkej para manikalaki ipan se secta tlen melak xkuajli, niman policías kinekiyaj ika notajuan makineltokakan ika nejua yonikpolojka notlamachilis. Notajuan melak onomojtijkej, opeuj chokaj niman onechijlikej ika maka sa maniktekichiuili Jehová. San ika, nejua onikijli nonan: “Maka xmajmana. Nejua xonechkajkayaujkej, nejua oniknexti tlen nochipa niktejtemojtinemiya. Niman aman xnijkauas” (Proverbios 23:23). Ok nechpolouaya miyek niuelis itech Biblia, san ika, maski xmás nikixmatiya Jehová nochipa niknekiya itech nimelajkanemis. Chikuasen xiuitl sakin, notajuan opeuj kixmatij Jehová niman sakin noijki okitekichiuilijkej.

Onechtitlankej Kolimá, ne Siberia, kampa kintekitiltiayaj akin kintsakuayaj, niman onechijlikej ika ompa ninemiskia 15 xiujtin. Akin ompa techtlajpiayaj kemantika xtechtlakualtiayaj niman techuijsokiyaj. Ijkuak kemach onajsik, oniknemili ika ompa nimikiskia.

Jehová onechmachti niman onechititi ika nechtlasojtla

Sakin ika onajsik, 34 tokniuan akin ompa tsauktoyaj onechnisiuijkej niman san ichtaka onechtlajtoltijkej: “¿Nemi se Jonadab ipan mogrupo?”. Ijkuakon onikmat ika yejuamej iteixpantijkauan Jehová katkaj. Xakaj más ueliskia kitekitiltiskia yejon tokayotl. Yejuin tokniuan youejkaujkaj ika kitekichiuiliayaj Jehová niman onechpaleuijkej maniktlakamati tlen kijtoua Biblia niman maninopatla. Noijki, onechititijkej manikita tlenon nikchiuas tla itlaj nikixnamiki.

Ompa, nejua nikintekitiltiaya máquinas. Sejpatipan onitekit iuan se tlakatl akin itoka katka Matfei. Yejua noueyimatiya pampa kijtouaya ika yokintsontekontlalijka intokayouan 50 “santos”. Kuakon, onikijto itlaj tlen xkuajli itech yejon akin yejua kintokayotiaya “santos”. Yejua ika, Matfei kinekiya nechuijsokis, san ika, nejua onicholojteuj. Sakin onikitak ika tokniuan opeuj uejuetskaj, niman yejon melak onechkualani. Onikimijli: “¿Tleka nenuetskaj? Nejua san niknekiya nitenojnotsas”. Tokniuan onechilnamiktijkej ika ijkuak titenojnotsaj xnoneki titekualaniskej, yej noneki tikteijliskej tlen kuajli (1 Pedro 3:15). Maski Matfei kitlauelitaya Gobierno, okimojkaitak ika iteixpantijkauan Jehová kuajli tikiminnojnotsayaj tekiuajkej niman akin techtlajpiayaj. Sakin yejua más opeuj kineki kimatis tlenon kijtoua Biblia. Xkeman nikilkauas ijkuak san ichtaka onoapolakti ipan se barril.

Ijkuak kemach otajsikej cárcel, nejua niman omemej tokniuan telpokamej otechijlikej matitlakakitij kampa temachtiayaj itech tlenon kichiua política. Ijkuakon, nimantsin otikijtokej ika ka, pampa tiknemiliayaj ika tla ijkon tikchiuayaj xtiktlakamatstoskiaj Jehová (Juan 17:16). Kuakon, otechtsajkej ome semana kampa melak tlayouatok katka. Ijkuak otikiskej, tokniuan otechititijkej ika tla san ompa tontlakakij xkijtosneki tla tokalaktijtokej ipan política. Hasta otechijlikej ika ijkuakon uelis tikteititiskej tlen kuajli tikchiuaj iteixpantijkauan Jehová. Tokniuan kuajli otechnotskej niman otechititijkej kenon kuajli tikasikamatiskej tlen kijtoua Biblia itech tlenon uelis tikchiuaskej niman tlenon ka.

Nochi tlen nechijliayaj tokniuan nechititiaya ika Jehová kinekiya nechpaleuis. Kampa nitsauktoya nemiya se tlakatl akin kinyekanaya akin kitayaj kenon notekitiltiaya tomin. Yejua teopixki katka niman ijkuak nechitayaj, nechijliaya: “¿Kenon tinemi ikoneuj Diablo?”. Se akin ompa tsauktoya onechijli ijkin maniknankili: “¡Kuajli ninemi notaj!”. Pampa onikchiuj tlen onechijli melak onechuijuisojkej. Ijkuak tokniuan okimatkej tlen nopan onochiuj onechpaleuijkej manikasikamati ika xkuajli tlen yonikchiujka (Proverbios 29:11). Sakin onikijli yejon teopixki ika manechtlapopolui.

Ijkuak xinechtsakuayaj, san ichtaka niaya tlanechikoltin ika tlayoua noso ika kualkan. San ika, kampa titsauktoyaj xkanaj ueliskia titiyanaskiaj. Yejua ika, mojmostla toyeualtlaliayaj niman san sekan tikimitayaj seki textos tlen yotikimijkuilojkaj ipan amatsitsintin. Tosentlaliayaj maski ompa nemiyaj akin techtlajpiayaj. Ijkon tikchiuayaj pampa tiknekiyaj tikintsontekontlaliskej miyek textos niman ijkon sakin tikimitaskej. Niman tla yakaj akin techtlajpixtoya yejkoya, nimantsin tikintolouayaj yejon amatsitsintin.

Maski san noselti oninen, Jehová xkeman onechkauj

Ipan xiuitl 1959 onechkixtijkej kampa nitsauktoya niman onechtitlankej Karagandy, ne Kazajistán. Maski ok xnechkauiliayaj manikchiua miyek tlemach, oniktlajtlan 20 tonaltin para uelis ninonamiktis. Oniaj ne Tomsk, tlen nokaua Rusia. Ompa nikixmatiya se kualtsin tokniuj akin yolmelajki niman itoka katka María. Ijkuak onajsik, san onikijli: “María xnikpiya tiempo para tinovios yeskej. ¡Nouan xmonamikti!”. Yejua okijto ika kema niman otonamiktijkej. María kipatiojkaitaya nochi tlen yonikxikojka niman kinekiya nechpaleuis kuajli maniktekichiuili Jehová (Proverbios 19:14).

Ipan yejon xiujtin, xtechkauiliayaj matitenojnotsakan techajchan, yejua ika tokojtiliayaj san kanon titenojnotsaskej. Ijkuak kanaj tiayaj noso tikpiayaj vacaciones, tikimijliayaj oksekimej kenon uelis nochipa tinemiskej ipan yejuin tlaltikpaktli. Noijki tikitayaj kenon uelis más miyekej tikinnojnotsaskej. Tiayaj kampa kinnemakayaj kaltin niman tikyejyekouayaj tiknojnotsaskej itech toTajtsin akin ompa chantiyaj. Yejuin otechpaleui matikinnextikan chikuasen akin kinekiyaj nomachtiskej Biblia niman sakin onochiujkej iteixpantijkauan Jehová.

Kemantika ueliya titenojnotsayaj ijkuak kitlapejpeniayaj akinon tlayekanaskia ipan país. Sejpatipan, sekimej policías ouajlajkej kampa nejua niman oksekimej tokniuan titekitiyaj. Kuakon, imixpan 1,000 akin noijki ompa tekitiyaj otechtlajtoltijkej tleka akin tiiteixpantijkauan Jehová xtokalaktiayaj ipan política. Akin itech titekitiyaj niman oksekimej tocompañeros okimijlikej ika, akin tiiteixpantijkauan Jehová katkaj, melak titekitkej niman xtikauilmatij totekiyo. Yejon otechyolchikauj niman otikimijlikej tlenon tikneltokayaj ika textos tlen yotikintsontekontlalijkaj. Yejon okichiuj ika nauimej akin noijki ompa tlapaleuiayaj makinekikan nomachtiskej Biblia niman, maski xiajsiya se xiuitl ika nomachtijtoyaj, onoapolaktijkej.

Kanaj ipan xiuitl 1970 miyekej akin kipiayaj kuajli inyojlo onochiujkej iteixpantijkauan Jehová ne Kazajistán. Kuakon otikitakej ika iueliskia tikpiyaskej toueyitlanechikol. San ika, ¿kenon tikchiuiliskiaj para maka matechitakan policías? Sekimej tokniuan akin chantiyaj nisiuj se kalpantsin tlen onka Almaty nonamiktiskiaj, kuakon otiknemilijkej ika kuajli yeskia tla tikpanoltiaj toueyitlanechikol ipan yejon iluitl. Oyajkaj ipantsin 300 ipan yejon ueyitlanechikojli tlen onopanolti kampa ononamiktilok. Nosiuatsin niman oksekimej tokniuan siuamej onokojtilijkej kualtsin tlayektlaliskej niman kichijchiuaskej tlakuajli tlen melak uelik, san ika, akin oyajkaj más okuelitakej on tlamachtiltin tlen okinpanoltijkej 12 tokniuan tlakamej. Maski xkeman nikpanoltiaya se tlamachtijli imixpan miyekej, ijkuakon onikchiuj.

Otitlaxikojkej pampa tiktlasojtlaj Jehová

Nosiuatsin María melak tetlasojtlaya, kuelitaya tetlakamatis niman nochipa nokojtiliaya chikauak tenojnotsas. Yejua nochipa oyolmelajkanen itech Jehová, hasta ijkuak omik. Maski yejua chikaujtoya, okajsik se kokolistli tlen itoka osteoporosis. Yejuin okichiuj ika manemi ipan tlapechtli kanaj 16 xiuitl. Nejua niman nochpoch Liudmila melak kuajli otiktlajpixkej, hasta ijkuak omik ipan 2014.

Melak nechyolkokouaya ijkuak nikitaya kenon nosiuatsin María kualouaya. Kemantika hasta nichokaya ijkuak iuan ninemiya. Maski ijkon, san sekan otikpoujkej Biblia niman okseki tlen melak otechyolchikauj. Miyekpa titlajtouayaj itech xochitlalpan. Melak techyolseuiaya niman techpaleuiaya maka matosiaujkauakan ijkuak tikitayaj nochi tlen Jehová yokijto kichiuas ika tlayekapan (Salmo 37:18; 41:3).

Desde ijkuak onikixmat Jehová, yonikitak kenon melak nechtlasojtla niman kenon melak yonechpaleui (Salmo 34:19). Ijkuak onechtsakuatoj ne kampa chikauak titekitiyaj niman ijkuak onikixnamik okseki tlemach tlen ouijtika, onikitak ika Jehová onechpaleui ika iTlajtol. Noijki, onechpaleui maniktlajpiya nosiuatsin María, hasta ijkuak omik. Aman kuajli yonikitak ika yonikxiko nochi tlen yonikixnamik pampa niktlasojtla Jehová.