Tikinmakaj tlen kinpoloua tokniuan ijkuak onka guerras

Ipan yejuin itlamiyan tonaltin xtechmojkatlachialtia ika “nisiuj niman uejka [onka] guerras” (Mateo 24:6). Miyekej tokniuan tlajyouiyaj ipampa guerras, san ika nochipa tikinpaleuiyaj ika tlen kinpoloua. Ipan video Grupo akin Tlayekana kijtoua tlen panotika #3 de 2022, onoijto ika ipan Europa del Este, nopaleuijtokej tokniuan akin tlajyouiyaj ipampa guerra tlen panotika ne Ucrania. ¿Kenon kinpaleuiyaj tokniuan akin chantij Ucrania maski onka guerra? ¿Tlenon kinpoloua niman kenon komintitlaniliaj?

¿Tlenon kinpoloua? ¿Kenon komintitlaniliaj?

Ipan 24 de Febrero de 2022, opeuj guerra ne Ucrania niman yejon tonajli, Grupo akin kiyekana Tekitl, okijto ika ueliskia noxelos tomin ijkon kinpaleuiskiaj tokniuan akin ompa chantij. Nimantsin, sucursal tlen onka Ucrania opeuj kikoua tlen noneki niman 27 grupos akin kita ken notepaleuiya okixelojkej tlen onokouj.

Niman tokniuan akin nemij ipan Oficina kampa noyekana nochi isucursales iteixpantijkauan Jehová, nimantsin opeuj kinemiliaj kenon kipaleuiskej sucursal de Ucrania. Grupo akin kiyekana Tekitl niman akin kiyekana tlen Nochijchiua, okijto ika Departamento Mundial de Compras niman tokniuan akin nemij ipan isucursal de Ucrania niman Polonia, san sekan makitakan tlen uelis nochiuas. Mojmostla miyekej tokniuan nosentlaliayaj niman ijkon kitaskej tlen nochiuas, ompa nemiyaj grupo akin kita tlen nokouas, akin Kititlani amatlajkuiloltin, tokniuan de Asuntos Legales itech yejuin sucursales, se tokniuj itech Grupo akin kiyekana Sucursal ipan Ucrania niman sekimej tokniuan itech Departamento Mundial de Compras.

Jay Swinney, akin tlapaleuiya ipan Departamento Mundial de Compras, techijlia: “Kachtopa nonekiya tikmatiskej tlen tokniuan kinpolouaya. Tiknekiyaj tikiminmakaskej tlen yejuamej kixmatiyaj, ken tlakuajli niman tlen ika nochipauaj noso naltiaj. San ika, xsan nonekiya tikmatiskej tlen kinpolouaya, noijki nonekiya tikitaskej kenon ueliskiaj tikominkauiliskiaj niman kenon totlajpiyaskej ipampa guerra”.

Ipan 9 de Marzo de 2022, ikimatstoyaj tlen nonekiya notitlanis. Onoijto ika ipan cajas notlaliskia latas tlen kipiyaj nakatl niman michin, cereales, arroz, yetsintli, xapo niman papel de baño. Onoitak ika yejon despensa kaxiliskia para se tokniuj niman kixikoskia para se metstli, niman yejuin despensa patioj katka kanaj 65 dólares. Pampa miyekej tokniuan kinpolouaya yejuin despensa, Grupo akin kiyekana tekitl okijto ika ueliskia notekitiltiskia miyek tomin para kinpaleuiskej tokniuan. San ika ¿Kenon ueliskiaj tokniuan kominkauiliskiaj niman noijki notlajpiyaskiaj?

Ipan 13 de Marzo, omemej tokniuan akin chantij Polonia okimitkikej yejon despensas desde ipan isucursal Polonia hasta ipan se bodega tlen onka ne Ucrania, nisiuj itech kalpan Leópolis (Lviv). Seki tonaltin achto, tokniuan itech sucursal de Ucrania niman Polonia, okinpaleuijkej kuajli manoyektlalikan niman ijkon kuajli ajsiskiaj. Okiyektlalijkej amamej tlen nonekij niman ijkon kinkauiliskiaj panoskiaj ipan frontera, noijki kuajli okitakej ika incarros manesi ika yejuamej yaskiaj on tlapaleuiskiaj. Niman imiuan oksekimej tokniuan akin chantij Ucrania, okitakej kanon ueliskiaj yaskiaj ijkon más isiujkan ajsiskiaj ipan yejon bodega. Okinkaujkej despensas ipan Leópolis niman san ipan 24 horas okinxelouilijkej tokniuan akin kitaj ken notepaleuiya, yejuin omemej tokniuan kuajli onokuepkej hasta Polonia niman xtlaj okinpanok, nochi yejuin pampa kuajli okitakej tlen kichiuaskej niman pampa Jehová okinpaleui.

Maski yejuin kuajli okis, tokniuan san okixelojkej kanaj se tonelada, ok kinpolouaya kixeloskej 200 toneladas. ¿Kenon ueliskiaj kitkiskiaj niman kixeloskiaj?

Mokalpan “notemakaskej ika nochi inyojlo”

Pampa okipoujkej ipan jw.org kenon tokniuan kimijtlakojtika yejuin guerra, miyekej kinekiyaj tlapaleuiskej. Akin chantij uejka de Ucrania, okitemakakej indonaciones ipan tlen ika nochiua tekitl ipan nochi tlaltikpaktli, pampa yejuamej kimatstoyaj ika kuajli notekitiltiskiaj yejuin tomin. Niman akin chantij nisiuj, otlapaleuijkej ika intiempo niman ika tlen kipiyaj. Yejuin tlen sekimej okichiujkej.

Ipan Polonia, melak miyekej tokniuan otlapaleuijkej ijkuak okiyektlalijkej despensas niman melak miyekej kokonej okinchijchiujkej seki dibujitos. Tokniuj Bartosz Kościelniak tlapaleuiya ipan grupo akin kita tlen nokouas ipan sucursal tlen onka Polonia, yejua techijlia: “Salmo 110:3 kijtoua ika ikalpan Jehová notemakaskia ‘ika nochi iyojlo’, miyekpa yonikpoujka yejuin texto, san ika aman yonikitak ika tlen ompa kijtoua yemelauak, pampa yonikitak kenon miyekej tokniuan onosentlalijkej niman ika inyojlo kinektoyaj tlapaleuiskej”.

Se tokniuj kipiya se empresa melak ueyi de paquetería, yejua otechtlaneujti icarros niman noijki okitlaxtlauj gasolina tlen notekitiltiskiaj, yejua kijtoua: “Ijkon ueli nikimititia tokniuan niman Jehová ika melak nikintlasojtla, melak niyolpaki pampa onitlapaleui”. Kuakon otechtlayokolijkej ipantsin 7,700 litros de gasolina para onoxelo nochi despensas niman oksekimej tokniuan otlapaleuijkej ika intiempo niman ika inkojtilis pampa okinuikakej carros kanaj 48,000 kilometros.

Pampa tokniuan ika inyojlo otlapaleuijkej, san ipan ome semanas onotitlankej 100 toneladas de despensas ipan Ucrania, tlen kipiayaj tlakuajli, tlen ika nochipauaskiaj noso naltiskiaj niman tlen ika nopajtiskiaj. Niman pampa miyekej tokniuan niman sekimej tlanemakakej otetlayokolijkej miyek tlemach, xmiyek tomin otikpopolojkej ipan yejuin despensas. Hasta aman, iteixpantijkauan Jehová yotiktitlankej 190 toneladas ne Ucrania, ijkon kinpaleuiskej tokniuan. ¿Kenon nomachiliaj tokniuan akin yokiselijkej yejuin?

“Kipiayaj nemotlasojtlalis”

Ijkuak on despensas oajsikej Leópolis, grupos akin kitaj ken notepaleuiya, tlen onokej ipan nochi Ucrania, okinxelouilijkej tokniuan akin más kinpolouaya. Miyekej de yejuin despensas okinxelojkej ipan okse kalpan, kanaj 1,300 kilómetros ika uejka. Maski tokniuan melak onokojtilijkej xnimantsin onoxelojkej nochi despensas.a

Markus Reinhardt, akin tlapaleuiya ipan Grupo akin kiyekana sucursal ipan Ucrania, techijlia: “Ika nochi yejuin, miyekej tokniuan kuajli yokitakej ika Jehová melak kintlasojtla niman ika melak tepaleuiya tla tikchiua tlen ikalpan Jehová techtlajtlanilia achto ika tlaixpoliuis, kentla ijkuak techijlia ika noneki tikejyeuaskej tlakuajli niman atl tlen uelis uejkauis miyek semanas. Se tokniuj tlayekanketl ne ipan Kiev, akin itoka Anton, okitak yejon, niman okijto: ‘Melak tiktlasojkamatij pampa ikalpan Jehová otechyektlali para tikixnamikiskej yejuin. Tejuamej tikpiayaj atl, tlen tikuaskej niman se radio, yejuin otechmakixti’. Melak tipakij pampa tokniuan okichiujkej tlen noneki; yejuin okimakak tiempo sucursal ijkon ueliskia kuajli kitas kenon tepaleuis”.

¿Kenon onomachilijkej tokniuan pampa okinpaleuijkej? Míkola niman Zinaida, akin chantij Járkov, techijliaj: “Tokniuan najmana topampa, yejon melak techyolpaktia. Tiktlasojkamatij ipampa tlakuajli niman pajtli tlen otechmakakej. Kuajli nesi ika nochi yejuin Jehová kichiua”. Valentina, akin noijki ompa chanti kijtoua: “Ijkuak opeuj yejuin guerra, melak ouijtika otikitakej tijkouaskej tlakuajli. Xnochipa tiknextiayaj tlen techpolouaya, san ika, Jehová kimatstoya niman kitaya tlen topan nochiujtoya. Niman yejua okichiuj ika tokniuan matechmakakan tlen más techpolouaya. Ijkuak tikixnamiki itlaj tlen ouijtika niman xtikmati tlen tikchiuas, ijkuakon tikitas kenon Jehová niman ikalpan melak kuajli mitstlajpiyas. Tipakis niman mitsyolseuis tla mitspaleuiyaj ijkuak noneki”.

Evguen niman Irina ononek choloskej de Mariúpol, yejuamej techijliaj: “Melak tiktlasojkamatij pampa nentechtlajpixkej niman pampa nentechititijkej ika melak nentechtlasojtlaj, yejuin melak otechpaleui. Ijkuak otikimitakej yejon despensas otiknemilijkej ika san kipiayaj tlakuajli, san ika noijki otikitakej ika kipiayaj nemotlasojtlalis”.

Kuajli tikitaj ika Jehová okiyekan ikalpan ika iespíritu santo, pampa tokniuan okixelojkej yejon despensas maski onka guerra. Noijki yejon donaciones tlen nenkitemakaj melak tepaleuiyaj, miyekej onenkichiujkej ijkon ken nonextia ipan donate.jw.org, melak tiktlasojkamatij pampa nenkuelitaj nenkitemakaskej.

Totlajpiyaj ijkuak tikinpaleuiyaj tokniuan

1. 

   24 de febrero de 2022: Grupo akin kiyekana Tekitl okijto ika ueliskia notekitiltiskia tomintsin, ijkon isucursal de Ucrania kinpaleuiskia tokniuan.

2. 

   24 de febrero hasta 8 de marzo de 2022: Tokniuan itech sucursal tlen onka Ucrania kikouaj despensas niman kixelouaj itechkopa grupos akin kitaj ken notepaleuiya. Noijki noyektlaliaj para kiseliskej niman kixeloskej tlen kuajtitlanij de Polonia.

3. 

   9 de marzo de 2022: Grupo akin kiyekana Tekitl okijto ika ueliskia notitlanis despensas ne Ucrania.

4. 

   10 hasta 12 de marzo de 2022: Noita kenon notitlanis kachtopa despensas desde Polonia hasta Leópolis (Ucrania).

5. 

   13 de marzo de 2022: Konkauaj kachtopa despensas desde Polonia hasta Leópolis.

6. 

   14 hasta 16 de marzo de 2022: Ne Polonia, sekimej tokniuan akin tekitij ipan Departamento local de diseño niman construcción, san sekan otekitkej ipan se ueyi kajli kampa tosentlaliaj, tlen onka nisiuj Poznán para kiyektlaliskej cajas ika despensas.

7. 

   17 de marzo de 2022: Naui tonajli sakin ika onotitlankej yejon kachtopa despensas, peua notitlanij 13 toneladas de despensas ipan frontera de Ucrania.

8. 

   21 hasta 27 de marzo de 2022: Noyektlaliaj más despensas ipan Polonia niman notitlanij Ucrania, san ipan 24 horas noxelouaj kampa más noneki.

9. 

   28 de marzo de 2022: Desde ijkuak onoijto ika ueliskia notitlanis despensas ipan Ucrania, yonotitlan 100 toneladas de despensas tlen kipiyaj tlakuajli, tlen ika nochipauaskej noso naltiskej niman tlen ika nopajtiskej.

Hasta aman, ken tiiteixpantijkauan Jehová yotiktitlankej Ucrania ipantsin 190 toneladas de despensas.