Ken otitlapaleuijkej kampa otlaixpoliuj ipan 2023: “Uelij tikitaj kenon melak techtlasojtla Jehová”

Biblia yokijtojka ika ipan itlamiyan tonaltin “uejueyitekiuajkej nouijsokiskej inuan oksekimej uejueyitekiuajkej”, niman ika miyekan panoskia miyek tlen xkuajli (Mateo 24:3, 7). Ipan septiembre de 2022 hasta agosto de 2023, kuajli otikitakej ika yejuin teotlajtoltin onochiujkej. Kanaj ipan 100 kalpamej opanokej guerras niman melak otlaixpoliuj, maski ijkon, iteixpantijkauan Jehová okiteititijkej tetlasojtlalistli ijkon ken toTajtsin kichiua. ¿Kenon okichiujkej?

Ipan septiembre de 2022 hasta agosto de 2023, otlaixpoliuj kanaj ipantsin 200 veces niman yejon melak okimijtlako tokniuan. Ikalpan Jehová okipopolo ipantsin 10 millones de dólaresa tlen kisa itech tomin tlen kitemakaj tokniuan para tlapaleuiskej kampa tlaixpoliui. Niman nikan xtikpouaj tomintsin tlen miyekej tokniuan okipopolojkej niman ijkon ontlapaleuiskej. Matikitakan kenon onotekitilti tomintsin tlen nenkitemakaj para kinpaleuiskej tokniuan akin chantij ipan ome kalpamej kampa otlaixpoliuj.

“Yemelak nemij akin techtlasojtlaj”

Ipan seki kalpantsitsimej itech ueyi kalpan Nigeria, tlaapachiui ijkuak kiyaui. San ika, melak xkuajli ken otlaapachiuj ipan octubre de 2022, yopanoka kanaj 10 xiuitl ika xok keman ijkon panouaya. Atl okinuikak ipantsin 676,000 hectáreas de tlajli kampa tokaj, niman kanaj dos millones de tlaltikpakchanejkej ononek kikauaskej inchan. Nimantsin isucursal Nigeria okintlali Grupos akin tlapaleuiskiaj kampa otlaixpoliuj niman ijkon kinpaleuiskiaj niman kinyolchikauaskiaj tokniuan.

Ken okimijtlako tokniuan

• 7,505 tokniuan ononek kikauaskej inchan.

• 860 kaltin oijtlakaujkej noso oxoxotonkej.

• 90 kaltin kampa tosentlaliaj niman se kajli kampa tikinpanoltiaj uejueyimej tlanechikoltin oapachiujkej.

Ken onotekitilti tomintsin tlen tiktemakaj

Onotekitilti ipantsin 250,000 dólares para tikinpaleuiskej tokniuan. Ipan yejuin onotekitilti:

• Onokouj arroz, yetl niman sopa.

• Onokouj colchones niman pabellones.

• Onoyektlalijkej noso oksejpa onochijchiujkej kaltin tlen oijtlakaujkej.

¿Kenon okitakej tokniuan ika kuajli manotekitilti tomintsin tlen tiktemakaj? Kachtopa kitayaj tla se kajli nonekiya san noyektlalis noso oksejpa yenkuik nochijchiuas. Tla nonekiya oksejpa nochijchiuas, kitayaj kenon ueliskiaj kichijchiuaskej ika materiales tlen ompa notekitiltiaya.

Tokniuan melak kitlasojkamatij pampa okinpaleuijkej. Se tokniuj siuatl kijtoua: “Ijkuak otlaapachiuj xok tikmatiyaj tlenon tikchiuaskej, pampa otikpolojkej tochan niman nochi tlen otiktokakaj. San ika, melak otiyolseujkej ika ipan yejon tonajli tokniuan oyejkokej para techpaleuiskej niman otechuikakej kampa ueliskia tokauaskiaj. Niman noijki kuajli otomachilijkej ijkuak otikselijkej tlakuajli tlen otechuajtitlanili sucursal. Kuajli yotikitakej kenon topan yonochiuj tlen kijtoua Juan 13:34,35. Otikitakej ika yemelak nemij akin techtlasojtlaj. Nejua niman nofamilia ika nochi toyojlo tiknekij timechijliskej yejuin: tlaxtlauikan ika onenuajlakej onentechpaleuikoj”.

Miyekej kitaj kenon titlapaleuiyaj kampa tlaixpoliui. Ne Sabagreia (estado de Bayelsa), se comisario okijto: “Onka miyek religiones ipan nochi tlaltikpaktli, san ika, nion se xtlapaleuiyaj ken iteixpantijkauan Jehová”.

“Uelij tikitaj kenon melak techtlasojtla Jehová”

Ipan febrero de 2023, otlachinauj kanaj ipantsin 400 lugares ne Chile niman yejon melak otlaijtlako. Otlatlakej ipantsin 430,000 hectáreas niman noijki yejon okichiuj mapopoliui miyek tlen melak nokuiya ipan yejon país. Kanaj 8,000 akin ompa chantiyaj ononek kikauaskej inchan. Ijkuak opanok yejuin, sucursal opeuj kintlalia grupos akin tlapaleuiskiaj.

Ken okimijtlako tokniuan

• 222 tokniuan ononek kikauaskej inchan.

• 20 kaltin otlatlakej.

Ken onotekitilti tomintsin tlen tiktemakaj

Onotekitilti ipantsin 200,000 dólares para tikinpaleuiskej tokniuan. Ipan yejuin onotekitilti:

• Onokouj tlakuajli niman atl.

• Onokouj tlen nonekiya para tlachipauaskiaj, seki pajtli niman okseki tlen nonekiya.

• Onochijchiujkej kaltin.

Se familia melak onoyolkokojkej ijkuak okimatkej ika okipolojkej inkal niman kampa tekitiyaj. Ipampa yejon aman xok kipiayaj tlen ika nopanoltiskiaj nion kampa chantiskiaj. Ijkuak san kemach opanokaj yejon, melak najmanayaj ijkuak kitayaj tlajli kampa onkatka inchan. San ika, ijkuak okitakej ika tokniuan oksejpa kichijchiujtoyaj inkal, opeuj kuajli nomachiliaj. Ken okintlasojtlakej niman okinpaleuijkej tokniuan akin ompa oyajkej, melak okinyolchikauj makixikokan tlen inpan yonochiujka. Ipampa yejon, yejuin familia okipaleuijkej yejuin grupo ijkuak opeuj kichijchiuaj ikal okse tokniuj.

Miyekej tokniuan noijki melak okinmojkatlachialti kenon yejuin tokniuan okinpaleuijkej. Se tokniuj tlakatl okijto: “Grupos akin tlapaleuiyaj kampa tlaixpoliui, se kualtsin tetlayokolijli tlen Jehová techmaka. Uajmostla ijkuak otlaixpoliuj, tokniuan inikan nemiyaj niman otechuajkuilijkej tlakuajli niman atl. Yemelak mitsyolchikauas ijkuak tikamapouas kenon yejuin tokniuan tlapaleuiyaj kampa tlaixpoliui. San ika, ijkuak tejua mitspaleuiyaj, más mitsyolchikaua niman tikpatiojkaita nochi tlen ikalpan Jehová kichiua. Noijki melak tiktlasojkamatij ika tokniuan kiteititiaj ika kichiuaj ken Jehová niman kinekij mitspaleuiskej kuajli xmomachili, mitsmakaskej tlen mitspoloua niman mitsyolchikauaskej. Uelij tikitaj kenon melak techtlasojtla Jehová”.

Pampa más nisiuj ionka ijkuak Jehová tlapopolos, más nochiuas tlen xkuajli (Lucas 21:10, 11). San ika, toUeyi Tekiuaj, Jesucristo akin melak techtlasojtla, mojmostla touan nemis “hasta ijkuak sa achijtsin poliuis ijkuak tlamis tlajtlamach ken nochiua ipan tlaltikpaktli” (Mateo 28:20, TNM). Ijkuak tejua tiktemaka motomintsin ipan cajita noso itech donate.jw.org niman titlapaleuiya ika motiempo niman mochikaualis, tikteititia ika tikpaleuijtika Jesús ken Tekiuaj niman iTekiuajyo. ¡Melak timechtlasojkamachiliaj nokniuan, pampa nochipa nenkuelitaj nentlapaleuiskej ika tlen nenkipiyaj!