Akin más kipiyaj tomin kinpaleuiyaj akin xmás kipiyaj

Iteixpantijkauan Jehová tenojnotsaj niman tlapaleuiyaj ipan kanaj 200 países niman territorios. San ika, san ipan 35 países tokniuan uelij kitlaxtlauaj tlen kipopolouaj ika donaciones tlen kitemakaj ipan inpaís. Kuakon, ¿tlenon panoua kampa xmás onka tomintsin?

Grupo akin Tlayekana ipan nochi tlanechikoltin kita tlenon kinpoloua iteixpantijkauan Jehová ipan nochi tlaltikpaktli. Tomintsin tlen nosentlalia melak kuajli notekitiltia. Tla se sucursal más kiselia tomin, kontitlani ipan okseki sucursales kampa kinpoloua. Ijkon nochiua ken nochiuaya ipan kachtopa siglo. Yejuamej okitekitiltijkej tlen nokauaya niman ijkon kinpaleuiskej oksekimej akin xmás kipiayaj tomin (2 Corintios 8:14).

¿Kenon nomachiliaj tokniuan akin kiseliaj tomintsin tlen kintitlaniliaj okseki sucursales? San matitlanemilikan itech yejuin, ne Tanzania, kanaj tlajko akin ompa chantij san nopanoltijtiuij ika 40 pesos ipan se tonajli, kuakon onotekitilti tomin niman ijkon okiyektlalijkej se kajli kampa nosentlalia tlanechikojli Mafinga. Tokniuan itech yejuin tlanechikojli okijtojkej: “Aman ika okiyektlalijkej Kajli kampa Tosentlaliaj, más yotimiyekiyakej. Melak tiktlasojkamachiliaj ikalpan Jehová niman nochimej tokniuan akin kitemakaj intomin. Aman tikpiyaj se kualtsin kajli kampa tikueyichiuaj Jehová”.

Ipampa pandemia COVID-19, sekimej tokniuan akin chantij Sri Lanka xmás kipiyaj tlen kikuaskej, ken tokniuj Imara Fernando iuan itelpokatsin Enosh. San ika, ipampa donaciones tlen okitemakakej okseki países, yejuamej okiselijkej tlen kinpolouaya. Sakin, yejuamej okichijchiujkej se tarjeta niman okijkuilojkej: “Tikintlasojkamachiliaj tokniuan akin otechititijkej ika melak techtlasojtlaj ipan yejuin tonaltin tlen melak ouijtika. Melak tipakij pampa tinemij ipan yejuin familia niman tiktlajtlaniliaj Jehová ok makinpaleuijto tokniuan ipan yejuin sa ika tlami tonaltin”.

Maski san kanon manemikan tokniuan, nochimej kuelitaj kitemakaskej tlen kipiyaj. Enosh, okichijchiuj icajita kampa kontlajkaltiuj itomintsin niman ijkon uelis kinpaleuis familias akin kinpoloua. Guadalupe Álvarez, akin chanti México, noijki melak kuelita kitemakas. Yejua chanti kampa miyekej xmás kipiyaj tomintsin niman xmás xueyi kintlaxtlauiliaj. San ika, yejua kichiua nochi tlen ueli niman ijkon kinpaleuis oksekimej. Guadalupe kijtoua: “Niktlasojkamachilia Jehová pampa melak nechtlasojtla niman nechmaka tlen nechpoloua. Nikmatstika ika tlen niktemaka iuan tlen kitemakaj oksekimej, melak kinpaleuis tokniuan akin kixnamiktokej tlen xkuajli”.

Sucursales melak yolpakij ijkuak kinpaleuiyaj okseki sucursales ika tomintsin. Anthony Carvalho, akin nemi ipan Grupo akin kiyekana Sucursal ipan Brasil, kijtoua: “Miyek xiujtin okseki sucursales otechpaleuijkej ika tomintsin. Pampa otechpaleuijkej, ikalpan Jehová melak youeyiyak. Aman, pampa xok techpoloua tomin, tipakij tikinpaleuiskej oksekimej. Tokniuan kimatstokej ika titenojnotsa ipan nochi tlaltikpaktli niman ika uelis tlapaleuiskej, ken kichiua se kuajli inomachtijkauj Cristo”.

¿Kenon iteixpantijkauan Jehová uelis kinpaleuiskej imikniuan akin kixnamiktokej tlen ouijtika? Tla kontitlani intomintsin ipan obra mundial niman tla xkontitlani ipan sucursales tlen onka ipan okseki países. Uelis kontlajkaliskej itomintsin ipan caja tlen onka ipan tlanechikojli kampa kijtoua “Obra mundial” noso ipan donate.jw.org. Nochi tlen nenkitemakaj melak tepaleuiya.