Misioneros tenojnotsaj “nochiuiyan ipan in tlaltikpaktli”

Jesús okimijli inomachtijkauan: “Niman noka nentenojnotsaskej [...] nochiuiyan ipan in tlaltikpaktli” (Hechos 1:8). Iteixpantijkauan Jehová nokojtiliaj kichiuaskej yejuin ika nochi inyojlo. Maski ijkon, xuelij titenojnotsaj ipan miyek kalpamej, pampa seki kalpamej melak uejueyimej niman melak miyekej tlaltikpakchanejkej ompa chantij. Noijki ipan seki kalpamej xmiyek nemij iteixpantijkauan Jehová (Mateo 9:37, 38). ¿Tlenon tikchiujtokej ijkon más tikinnojnotsaskej miyekej itech iTlajtol toTajtsin?

Para uelis tikchiuaskej tlen Jesús technauatia, Grupo akin kiyekana Tenojnotsalistli itech Grupo akin Kinyekana iTeixpantijkauan Jehová kintitlani misioneros kampa melak noneki matenojnotsakan. Ipan yejuin tonajli nemij 3,090 misioneros akin tlapaleuijtokej ipan nochi tlaltikpaktli.a Niman miyekej misioneros yoyajkej ipan Tlamachtijli tlen kiseliaj akin Tenojnotsaj itech iTekiuajyo toTajtsin. Yejuin misioneros kinektokej kikauaskej inchan niman onchantiskej okse país. Pampa kuajli yonomachtijkej niman más kimatij uelij más tlapaleuiyaj manotenojnotsa tlen kualtsin techijliaj toTajtsin. Niman tlen kuajli kichiuaj yejuamej yokinpaleui akin kemach peuaj tenojnotsaj.

Ijkuak tikinpaleuiyaj misioneros noijki tikinpaleuiyaj oksekimej

Ipan nochi sucursales, yejon Sección de Ministros en el Campo itech Grupo akin kiyekana itech ken notenojnotsa, tekiti iuan Grupo akin tlayekana ipan se Sucursal, ijkon kinpaleuiskej tokniuan misioneros. Yejuamej kinpaleuiyaj makinextikan kanon chantiskej, ika tlenon nopajtiskej niman kinpaleuiyaj ika achijtsin tomintsin. Ipan xiuitl septiembre de 2019 hasta agosto de 2020, iteixpantijkauan Jehová okipopolojkej kanaj 27 millones de dólares, ijkon kinpaleuiskej misioneros. Ipampa yejuin, tokniuan misioneros uelis más kuajli tenojnotsaj niman kinpaleuiyaj akin nemij ipan intlanechikol.

¿Kenon tlapaleuiyaj misioneros ipan tenojnotsalistli? Frank Madsen, akin tlapaleuiya ipan Grupo akin kiyekana Sucursal ipan Malaui, kijtoua: “Ika tlen uelij kichiuaj niman ika yolchikaualistli, misioneros yokinpaleuijkej tlanechikoltin matenojnotsakan kampa melak ouijtika, yejuamej kalakij ipan kalpamej kampa xnotekauilia makalakikan, niman kampa tlajtouaj okse tlajtojli. Niman pampa kitaj ika misioneros kinekij ueliskej itech tlen yejuamej kichiuaj niman tlajtoskej intlajtol, melak kinpaleuiya oksekimej, noijki kinyolchikauaj telpokamej más matenojnotsakan. Tiktlasojkamachiliaj Jehová ipampa yejuin misioneros”.

Se akin tlapaleuiya ipan Grupo akin tlayekana ipan se Sucursal ipan okse país, kijtoua: “Nesi ipan misioneros ika tiiteixpantikauan Jehová san sekan touikaj maski san kanon tiualeuaj. Hasta akin xnomachtiaj Biblia kitaj ika xtlaj techxeloua. Pampa tlen tiuelij ipan Biblia kichiua kuajli matouikakan niman matotlasojtlakan maski san kanon tiualeuaj”.

¿Kenon kinpaleuiyaj misioneros akin tenojnotsaj ipan intlanechikol? Paulo, akin chanti Timor Oriental, melak kitlasojkamati nochi tlen kichiuaj misioneros akin tlapaleuiyaj ipan itlanechikol. Yejua techijlia: “Tichantij kampa melak tona, niman maski misioneros ualeuaj kampa seua, yejuamej nochipa tenojnotsaj maski melak tona. Yejuamej nochipa nosentlaliaj ipan tlanechikojli tlen kitemakaj achto ika tiaskej tontenojnotsaskej. Kemantika ipan tlajko tonajli ijkuak melak tona, yejuamej ok komintlajpalouaj oksekimej niman ijkuak más teotlak ok tlajtolmoyauaj. Melak miyekej yokinpaleuijkej makixmatikan tlen melauak, nejua noijki yonechpaleuijkej. Misioneros ika miyek pakilistli kitekichiuiliaj Jehová, yejon kichiua ika akin nemij ipan tlanechikojli más makitekichiuilikan Jehová ika nochi inyojlo”.

Ketti, se precursora regular de Malaui, techijlia kenon se tokniuj iuan isiuatsin akin tlapaleuiyaj ken misioneros okipaleuijkej ifamilia: “Ijkuak tokniuan okintitlankej ipan notlanechikol san nejua ninomachtiaya niman nochanejkauan xnomachtiayaj. Tokniuan misioneros melak onechpaleuijkej niman kuajli onouikakej iuan nofamilia. Nokoneuan ouelkej itech yejuamej ika tla tiktekichiuilia Jehová melak tiyolpakis. Ipampa tlen kuajli okichiujkej tokniuan, yeyimej noichpokauan onochiujkej precursoras regulares niman noueuentsin opeuj yauj ipan tlanechikoltin”.

Kuakon, ¿kanon nokixtia tomin tlen ika kinpaleuiyaj misioneros akin tenojnotstinemij? Itech donaciones tlen ika nochiua tekitl ipan nochi tlaltikpaktli. Miyek itech yejuin donaciones nochiuaj ipan donate.jw.org. Tiktlasojkamatij pampa nenkuelitaj nenkitemakaskej nemotomintsin.