Ueyi Tlanechikojli yeyi Tonajli nopanoltia ipan radio niman televisión

Xkeman nopanoltiaya se ueyi tlanechikojli yeyi tonajli ijkon ken onochiuj ipan 2020. Pampa xkeman nochiuaya san se grabación itech programa de toueyitlanechikol ipan nochi tlaltikpaktli niman ika makitlejkoltianij ipan internet. San ika, miyekej tokniuan akin chantij Malaui niman Mozambique ouel okitakej toueyitlanechikol maski xkipiayaj internet ¿Kenon ouel onochiuj yejuin?

Grupo akin kiyekana Tekitl niman akin kiyekana Tlamachtijli itech Grupo akin Tlayekana ipan nochi tlanechikoltin okijtokej ika ueliskia nopanoltiskia toueyitlanechikol yeyi tonajli ipan radio niman televisión ne Malaui niman Mozambique. ¿Tleka ononek ijkon manochiua? Pampa ne Malaui melak patio tikpiyas internet xijkon ken ipan okseki países, ika yejon, san sekimej iteixpantijkauan Jehová akin chantij ipan yejon país uelij kipiyaj internet. William Chumbi akin tlapaleuiya ipan Grupo akin kiyekana Sucursal ipan Malaui, techijlia: “San ipan radio niman televisión tokniuan ueliskiaj kakiskiaj noso kitaskiaj nochi tlamachtiltin itech toueyitlanechikol”. Luka Sibeko, okse akin noijki tlapaleuiya ipan yejon grupo, noijki kijtoua: “Tla xnopanoltiskia yejuin programa ipan radio niman televisión, san sekimej tokniuan akin nikan chantij ueliskiaj kitaskiaj noso kikakiskiaj yejuin toueyitlanechikol”. Ipan Mozambique noijki ijkon panoua, pampa miyekej tokniuan xuelij kikouaj incelular noso intableta, nion xuelij kipiyaj internet.

Kenon ouel onochiuj

Ipampa kokolistli COVID-19, miyekej canales de radio niman televisión, yopeujkaj kitlaliayaj totlanechikoluan tlen tikinpiyaj ipan nochi semanas.a Tokniuan okintlajtlanilijkej más horas yejon canales, ijkon ueliskiaj kipanoltiskiaj toueyitlanechikol yeyi tonajli.

Ne Malaui, tokniuan okixnamijkej itlaj tlen ouijtika, pampa seki canales de radio niman televisión san kinkauiliaj makinpanoltikan seki programas tlen xuejkauij, kanaj san se hora, pampa kinemiliaj ika sekimej xmás kuelitaskej niman ika kipatiliskej. San ika, tokniuan okimijlikej ika tlen tikchiuaj, kinpaleuiya tlaltikpakchanejkej, pampa maski xuelij tikisaj ipampa yejuin kokolistli, tlaltikpakchanejkej uelis kikakiskej tlen kualtsin tlajtojli techijlia Biblia, niman yejuin kinpaleuiya más kuajli manouikakan niman mapakikan iuan inchanejkauan. Ijkuak okikakej yejon, akin kiyekanaj yejon canales okinejkej kinmakaskej tokniuan más horas, ijkon ueliskiaj kipanoltiskiaj toueyitlanechikol yeyi tonajli.

Ipan Malaui, se canal de radio niman se de televisión, okipanoltijkej toueyitlanechikol yeyi tonajli. Yejuin canales ajsij ipan nochi país niman miyekej uelij kitaj noso kikakij. Ipan Mozambique, 85 canales de radio niman se de televisión okipanoltijkej toueyitlanechikol.

Ipan yejon ome países, onopopolo kanaj 28,227b dólares (kanaj 560,000 pesos) ijkon onopanolti toueyitlanechikol yeyi tonajli ipan televisión niman kanaj 20,000 dólares (kanaj 400,000 pesos) ika onopanolti ipan radio. San ika, xsan noijki onotlaxtlauj ika onopanolti yejon ueyi tlanechikojli yeyi tonajli ipan radio, pampa seki canales tlen nisiuj ajsij san okitlaxtlaujkej 15 dólares, niman canales tlen uejka ajsij okitlaxtlaujkej 2,777 dólares.

Tokniuan melak kuajli okitakej kenon kitekitiltiskej yejon donaciones. Matikonteneuakan tlen opanok ne Malaui, tokniuan otlajtokej imiuan akin kiyekanaj yejon canales, ijkon xmiyek kitlaxtlauaskiaj. Niman pampa ijkon okichiujkej, ipan se canal, hasta okintemoltilijkej 30%. Ijkon, xokipopolojkej 1,711 dólares. Sekimej canales ipan Mozambique, xmiyek okintlajtlanilijkej tokniuan, pampa iteixpantijkauan Jehová kuajli kimixmatij, ika xtekajkayauaj niman ika nochipa tlatlaxtlauaj.

Tokniuan kitlasojkamatij

Tokniuan melak kitlasojkamatij pampa ouelkej okitakej niman okikakej toueyitlanechikol. Patrick, se tlayekanketl de Malaui, okijto: “Timechtlasojkamachiliaj nokniuan itech Grupo akin Tlayekana ipan nochi tlanechikoltin, ipampa nochi tlenon yonenkichiujkej topampa ipan yejuin pandemia”. Okse tokniuj akin noijki chanti Malaui, tlen itoka Isaac, okijto: “Xtikinpiyaj okseki aparatos, ika yejon, melak tiktlasojkamatij pampa ouel otikakkej yejuin ueyi tlanechikojli yeyi tonajli ipan radio, melak kualtsin tetlayokolijli tlen ikalpan Jehová otechmakak. Ipampa yejuin, nochi nofamilia melak kuajli okikakej niman okinpaleui yejuin ueyi tlanechikojli. Yejuin kichiua ika kuajli matikmatstokan ika Jehová kitlasojtla ikalpan”.

Se tokniuj akin tenojnotsa ne Mozambique okitak kachtopa ueyi tlanechikojli yeyi tonajli ipan 2020, yejua okijto: “Nikitas toueyitlanechikol ipan televisión, onechtlalnamikti ika Jehová melak kojtik. Yejuin kokolistli xokitelti ika Jehová matechmaka tlen noneki, ijkon matikchikauakan totlaneltokil niman ika san matikitakan tochan toueyitlanechikol. Kuajli onikitak ika akin kitekichiuiliaj Jehová yemelak notlasojtlaj. Niman kuajli nikmatstika ika yejuamej kipiyaj tlen melauak”.

Se tlayekanketl akin itoka Wyson, okijto: “Nikneki niktlasojkamachilis tekitketl yolmelauak, pampa xkeman otechkauj niman nochipa otechtlajpix ipan yejuin pandemia. Xmiyek tikpiyaj niman kampa tichantij melak achijtsin tomin notlani, xijkon ken ipan okseki países. San ika, pampa otikpixkej yejuin toueyitlanechikol ipan radio niman televisión, melak otechpaleui niman melak otechyolpakti”.

Grupo akin kiyekana Tekitl niman akin kiyekana Tlamachtijli, oksejpa okijtojkej ika ueliskia nopanoltiskia toueyitlanechikol yeyi tonajli de 2021, ipan radio niman televisión ipan seki kalpamej. ¿Kenon ouel onotlaxtlauj yejuin? Ipampa donaciones tlen nemejuamej nenkitemakaj ipan Tlen ika nochiua tekitl ipan nochi tlaltikpaktli ijkon ken nonextia ipan donate.jw.org. Tiktlasojkamatij pampa nenkuelitaj nenkitemakaskej nemotomintsin.