Otikchiujkej ika kampa tosentlaliaj machipaujto niman maonia tlen ika totlajpiyaskej itech COVID-19

Ipeujyan marzo de 2022, okitlalijkej ipan jw.org yejuin: “Tiyolpakij timechijliskej ika Grupo akin Tlayekana yokijto ika tla tekiuajkej techkauiliaj nochi tlanechikoltin uelis peuaskej nosentlaliskej ipan 1 de abril”. Tinochimej akin tiiteixpantijkauan Jehová melak otechyolpakti tikmatiskej yejuin. San ika, ok onkatka kokolistli.a Niman para tikintlajpiyaskej akin yaskej totlanechikoluan ononek seki nopatlas niman tijkouaskej seki tlemach tlen ompa notekitiltiskia. San ika ¿kenon uelis oksejpa kuajli noyektlaliskia kampa tosentlaliaj tla yopanoka ome xiuitl ika xok ompa titosentlaliayaj?

Pampa tokniuan kuikaya seki metstin uajnoyektlalijtiayaj ika oksejpa san sekan tosentlaliskej kampa tikueyichiua Jehová.

Otikitakej tlen kinpolouaya tokniuan

Ijkuak yopanoka san se metstli ika yokijtokaj ika xok titosentlaliskiaj ipan Kajli kampa Tosentlaliaj ipan 2020, Grupo akin kiyekana Diseño niman Construcción ipan nochi tlaltikpaktli de Warwick, opeuj kita kenon  COVID-19 ueliskia kimijtlakoskia Kaltin kampa Tosentlaliaj. Ika yejon, okitakej tlenon nonekiya kichiuaskiaj niman ijkon oksejpa ompa tosentlaliskej.

Nochiuiyan xsan noijki tlen nonekiya nochiuas. Tokniuj Matthew De Sanctis, akin tekiti ipan Grupo akin kiyekana Diseño niman Construcción ipan nochi tlaltikpaktli kijtoua: “Miyekan, xonka kampa uelis timomapajpakas. Tla kampa tosentlaliaj xonka atl, noneki nokouas noso konkuiskej ipan atentli noso ipan pozo. Miyekan, tekiuajkej okijtokej kenon nonekiya nokuiskej aire acondicionado niman tlen letreros notlaliskej para notlajpiyaskej”.

¿Tlenon okichiujkej tokniuan? Tokniuj Matthew techijlia tlenon okichiujkej sekimej tokniuan ipan Kaltin kampa Tosentlaliaj. Yejua kijtoua ika okitekitiltijkej itlaj tlen xmelak patioj niman melak okinpaleui. Tokniuan akin chantij Papua Nueva Guinea, okinextijkej kenon xouijtika nomapajpakaskiaj. Yejuamej okitekitiltijkej botellas de 20 litros tlen kipiayaj se llave. Yejuin tlen okichiujkej tokniuan melak okinpaleui para maka miyek tomin makipopolokan, san 40 dólares. Noijki tokniuan okikoujkej ipantsin 6,000 tlen ika timomapajpakas niman uelis tikitkitinemis. Yejuin okikuikej ipan nochi tlanechikoltin tlen onka África.

Ipan okseki tlanechikoltin okitlalijkej noso okipatlakej ventiladores para ijkon manotlalo ajakatl. Noijki yejuamej okitakej kenon tokniuan xkimajsiskiaj micrófonos, yej san se. Niman noijki miyekpa kichipauayaj kampa tokniuan kikitskiayaj, ken puertas niman kampa nomapajpakayaj. Ipan seki tlanechikoltin okitlalijkej ika kampa nomapajpakayaj maka makikitskikan ijkuak kitlaposkej, san makinisiuikan inma niman ijkon tlikuiya. Ne ipan kalpan Chile, okipopolojkej 1,400 dólares para kitlaliskej nochi yejuin ipan Kaltin kampa Tosentlaliaj.

Maski tokniuan kinekiyaj kintlajpiyaskej akin nosentlaliaj ipan totlanechikoluan, noijki okitakej kenon kuajli kitekitiltiskiaj donaciones. Noijki ipan sekimej kalpamej, gobiernos okitemakakej tomintsin niman tokniuan okikuikej yejuin para kikouaskej nochi tlen notekitiltiskia ipan Kajli kampa Tosentlaliaj niman seki sucursales onopaleuijkej para okikoujkej miyek niman ijkon achijtsin tomin kipopoloskej. Sucursales niman Departamento Mundial de Compras tlajtouayaj imiuan akin kichijchiuayaj yejuin tlemach niman ijkon xpatioj kisaskia niman totoka komintitlaniliskiaj.

“Nikitas tlen okichiujkej tokniuan onechyolseui”

Tlen tokniuan yokichiujkej para techtlajpiyaskej ipan Kajli kampa Tosentlaliaj kichiua ika akin ompa yauej kuajli manomachilikan. Se tokniuj akin chanti Perú, tlen itoka Dulcine okijto ika ijkuak yejua okimat ika oksejpa tosentlaliskiaj melak onomojti. Yejua kijtoua: “Ijkuak opeuj pandemia onechajsik COVID-19. Ika yejon, melak nechmojtiaya ijkuak niknemiliaya ika oksejpa tosentlaliskiaj. San ika, ijkuak onikalak kampa tosentlaliaj onikitak kenon tlayekankej melak miyek tlemach okichiujka para techtlajpiyaskej. Onkatkaj desinfectante, niman ijkuak titlanankiliayaj san se tokniuj kikitskiaya micrófono. Noijki kuajli tlachipauayaj ijkuak tikalakiyaj niman ijkuak tikisayaj. Nochi yejon nechyolseuiaya”.b

San ika, tlen okixnamik tokniuj Sara akin ualeua Zambia melak tlamantik. Yejua kijtoua: “Noueuentsin omik ipampa COVID-19. Ninajmanaya niknemilis ika oksejpa tosentlaliskiaj niman yejua xok ompa nemiskia”. ¿Kenon nomachilia aman ika oksejpa yopeuj nosentlalia? Yejua kijtoua: “Pampa oksejpa tosentlaliaj nechititia ika Jehová touan nemi ipan yejuin san itlamiyan tonajli. Aman noijki kuajli nikita kenon tokniuan niman tlayekankej yonechititijkej ika nechyolchikauaj, nechtlasojtlaj, niman nechpaleuiyaj”.

Ipan nochi tlaltikpaktli nochimej tokniuan melak yolpakij ika oksejpa iueli tosentlaliaj. Timechtlasokamachiliaj ipampa nenmodonaciones, tlen miyekej kitemaka ipan donate jw.org. Ipampa yejuin tlen niktemaka kichiua ika tokniuan kuajli manomachilikan kampa tosentlaliaj.