Tekitl tlen kinpaleuiya tokniuan niman tlen xkijtlakoua tlaltikpaktli

Akin tiiteixpantijkauan Jehová tikmatstokej ika toTajtsin xok kikauilis ika tlaltikpakchanejkej más makijtlakokan tlaltikpaktli (Apocalipsis 11:18). Maski ijkon, tejuamej tokojtiliaj tiktlajpiyaskej. Ika yejon, kampa tosentlaliaj tijkuij tlen xkijtlakoua tlaltikpaktli.

Miyekej nokojtiliaj kitekitiltiskej tlen xkijtlakoua tlaltikpaktli. ¿Tejuamej tlenon tiktekitiltijtokej? Niman, ¿kenijki yotepaleui para kuajli manotekitiltikan donaciones?

Kualtsin tlen onochiuj ipan Kajli kampa tikpiyaj Toueyitlanechikol

Ijkuak onochijchiuj salón de asambleas de Matola ne Mozambique, san okitlapachojkej ika láminas niman inajnakastlan tlapojtoya. Ika yejon, ijkuak tokniuan nosentlaliayaj melak tonalmikiyaj. Se tokniuj akin ompa chanti, kijtoua: “Nochipa titonalmiktoyaj. Ijkuak tlamiya programa, nochimej titotlalojteuayaj para titosejseliskej kiyauak”. ¿Tlenon ueliskia tikchiuaskej para tokniuan tlakakiskiaj ika inyojlo?

Onoijto notlalis itlaj tlen xkijtlakoua tlaltikpaktli. Notlaliskiaj ventiladores tlen tekitij ika ajakatl niman itsintlan lámina noijki itlaj notlaliliskia. Material tlen notlaliskia itsintlan lámina tepaleuiskia para maka melak matlatotonia, niman ventiladores tlasejseliskiaj. Yejon ventiladores xkikuij luz pampa tekitij ika ajakatl. Yejuin ventiladores nokouaj ika 50 dólares cada se.a

Yejuin melak yotepaleui ipan salón de Asambleas. Pampa ajakatl kuajli kalaki, xkuechaui niman xpoxkaui kajli. Noijki, tokniuan más kuajli nijyotiaj. Aman, akin yauej ipan asamblea más kuajli tlakaktokej niman ika inyojlo nemij. Tokniuj akin yotikneteneujkaj, kijtoua: “Aman xtikisteuaj ijkuak tlami programa. Timiyekej, ijkuak titlakuaj tokauaj ipan salón niman tonojnotsaj imiuan toamigos. Kualtsin tomachiliaj ipan tosalón pampa tikmachiliaj kentla toseuiskiaj itsintlan se ueyi kojtli kampa kualtsin tlaseuayan”.

Notekitiltia luz tlen xkeman tlami

Yotikintlalijkej paneles solares ipan kaltin tlen tikintekitiltiaj ipan nochi tlaltikpaktli. Yejuin paneles solares kentla láminas tlen ijkuak totoniaj kikuepaj niman kisentlaliaj luz. Kuakon, xmás notekitiltia luz tlen uajleua itech tekojli, petróleo niman gas. Yejuin tlen nochiua xmás kijtlakoua tlaltikpaktli niman noijki xmiyek tomin nopopoloua itech donaciones.

Ipan 2022 onotlalijkej paneles solares ipan isucursal Eslovenia. Kanaj tlajkotipan de luz tlen notekitiltia ipan yejon sucursal nokixtia ipan paneles solares. Niman tla kemantika yejon paneles solares más kisentlaliaj luz, yejon luz uelis kimakaskej pueblo. Yejuin paneles solares onokojkej ika 360,000 dólares. San ika, pampa aman sucursal xmás miyek luz kitlaxtlaua, ipan cuatro años kentla nokuepaskia yejon tomintsin tlen onopopolo.

Ipan 2024 otikintlalijkej paneles solares niman se ueyi batería ipan isucursal Sri Lanka. Nochi tlen onotlali onotlaxtlauj ika 3 millones de dólares, niman más de tlajkotipan de luz tlen kitekitiltia sucursal nokixtia itech paneles solares. Nochi tlen xnotlaxtlauas de luz ipan yeyi año, kentla kikuepaskia tomin tlen onopopolo. Noijki ipan 2024 onotlalijkej paneles solares ipan isucursal Países Bajos, yejuin onotlaxtlauj ika 1.1 millones de dólares niman luz tlen ompa nokixtia notekitiltia ipan kanaj tlajkotipan de sucursal. Yejuin paneles solares kentla notlaxtlauaskej ipan nueve años.

Noijki yotikintlalijkej paneles solares ipan miyek kaltin kampa tlajtolkuepaj tokniuan de México, ken kampa tlajtolkuepaj ika tarahumara central ne Chihuahua. Ijkuak seua melak tlaseseya niman ajsi hasta menos cero grados, niman ijkuak tona ajsi hasta más de 40 grados. Niman pampa melak patioj notlaxtlaua luz, tokniuan xkitekitiltiayaj tlen ika noseselia niman tlen ika nototonia kajli. Tokniuj Jonatán akin chanti ipan yejuin kajli kampa tlajtolkuepaj, kijtoua: “Ijkuak seua katka, más titotlapachouayaj niman ijkuak tona katka, tikintlapouayaj nochi ventanas”.

Ipan 2024 onotlalijkej paneles solares ipan yejuin kajli kampa tlajtolkuepaj tokniuaj, niman ika nochi onotlaxtlauj 21,480 dólares, pero ipan 5 años kentla notlaxtlauaskia nochi tlen onopopolo. Aman tokniuan ueli kitekitiltiaj tlen ika kitotoniaj niman kiseseliaj kajli. Jonatán kijtoua: “Aman más ika toyojlo tikchiuaj totekiyo niman más totoka titekitij. Noijki kuajli tomachiliaj pampa tikmatij ika ikalpan Jehová kuajli kitekitiltia donaciones niman ipan tlen xkijtlakoua tlaltikpaktli”.

Nosentlalia kiaujatl

Ne África ipan seki kaltin kampa tosentlaliaj, tokniuan xkipiyaj atl tlen chipauak, kuakon noneki melak uejka kitkiskej para kipiyaskej atl. Niman ipan okseki kaltin kampa tosentlaliaj, tokniuan kikouaj atl tlen kimitkiliaj ipan uejueyi carros, san ika, melak patioj kisa niman tlaijtlakoua.

Para tokniuan uelis kipiyaskej atl, yotiktlalijkej tlen ika uelis kitsakuiliskej niman tanques kampa kisentlaliskej atl. Ipan miyek kaltin kampa tosentlaliaj de África, ijkuak tokniuan xetlayektlaliaj, kachtopa kitaj tla melak tona noso xmás tona kampa onka kajli kampa tosentlaliaj niman ijkon kitlaliskej tlen más tepaleuis. Notlalis yejuin ipan se salón kisa kanaj 600 noso hasta 3 mil dólares. Pero yejuin kichiua maka melak manopopolo tomintsin ipan se salón pampa aman tokniuan xok noneki kitlaxtlajtoskej atl.

Yejuin tlen yonochiuj para nosentlalis atl melak yokinpaleui tokniuan. Noemia, se tokniuj de Mozambique, kijtoua: “Ijkuak xenochiuaya yejuin, melak uejka tikonkuiyaj atl. Melak yotisiaujkaj ijkuak tajsiyaj ipan tosalón. Niman pampa xmás onkatka atl, xmás ueliya tomachipauayaj. Pero aman, nochimej uelis nomapajpakaskej. Niman ijkuak tiauej ipan tosalón, xok tisiaujtokej niman más ika toyojlo titlakaktokej. ¡Tlaxtlauikan!”.

¿Kanon nokixtia tomintsin tlen ika notlaxtlaua tekitl tlen nochiujtika? Nokixtia ipan donaciones tlen notemakaj para obra mundial. Miyekej kitemakaj yejuin tomintsin ipan donate.jw.org. ¡Tlaxtlaui ipampa nochi tlen nenkitemakaj!